Bijbelstudie—A De wan Bun Sani Gi Yu?

„YU NO mag leisi en efu wan priester no de.” A warskow disi de fu feni na a bigin fu son Bijbel di Lomsusma abi. Kay Murdy fu a Bijbel Instituut fu Lomsusma na ini Los Angeles e taki: „Leki Lomsusma, wi no ben abi Bijbel ala ten, ma a situwâsi disi e kenki.” Ma di Lomsusma kon sabi fa den Santa Buku fu Bijbel kan abi krakti tapu a libi fu den, dan soleki fa Kay Murdy e taki, „safrisafri densrefi ben wani sabi nomonomo san skrifi na ini Bijbel”.

A tijdschrift di nen U.S. Catholic e taki fu a kenki disi dati wan sma di e orga sani fu gi kerki leri ben taki dati Lomsusma di ben kisi Bijbel les, ben firi taki „sma ben hori den Lomsusma, na ini don, èn taki kefalek bun furu warti sani skrifi na ini Bijbel. Lomsusma wani fu kisi wan tu fu den warti sani disi di den firi taki den lasi.”

Ma awinsi fa no fa, sortu „warti sani” wan studenti kan kon feni na ini Bijbel? Prakseri den sani disi: Yu wani sabi fa fu kakafutu gi den aladei problema? Fa yu kan sorgu taki sani e tan waka bun na ini na osofamiri? Fu san ede sma grofu so, èn fu san ede den no e prakseri trawan? Fu san ede meki den yonguwan fu a ten disi e du someni ogri-ati sani? Na ini Gado Wortu, Bijbel, yu kan feni bun piki tapu den aksi disi èn tapu tra aksi di e dangra sma. Den piki disi na trutru „warti sani”, no gi Lomsusma noso Protestantsma wawan, ma so srefi gi Budasma, Hindusma, Moslimsma, Syintosma, èn srefi gi atheïst (sma di no e bribi taki wan Gado de) nanga agnosticus (sma di e taki dati wi no man sabi efu Gado de). Neleki fa a psalm skrifiman taki en, dan ’Gado wortu na wan lampu gi en futu, èn wan leti na tapu en pasi’. Gado Wortu kan de dati gi yu tu.—Ps 119:105.