Hori wan Krin Konsensi

PRAKSERI taki yu ben o sidon na ini wan opolani di e frei. Ma a computer di musu sori a piloot pe a musu frei, no e sori en a yoisti pasi. Yu ben sa frede srefisrefi, a no so? Prakseri now taki wan sma di no abi a reti fu du dati, kenki wan tu sani na a sistema di e sori a piloot pe a musu frei. Noso prakseri taki a meki a computer sori fowtu sani fu espresi! We, na wan agersi fasi wan sma e pruberi fu du a srefi sani nanga a konsensi fu yu. A abi a fasti bosroiti fu pori a denki fu yu di musu yepi yu fu kon sabi san bun èn san ogri. A wani taki a denki fu yu musu tuka nanga a denki fu Gado!—Yob 2:2-5; Yohanes 8:44.

Suma na a ogri-ati sma disi di e pruberi fu pori a denki fu yu? Bijbel e kari en „a fosi sneki, a wan di den e kari Didibri nanga Satan, di e kori ala sma na heri grontapu” (Openbaring 12:9). A ben bigin nanga disi na ini a dyari fu Eden, di a ben taki na wan bedrigi fasi nanga Efa. Ala di Efa ben sabi san bun, toku Satan kori en fu no broko en ede nanga dati èn fu opo ensrefi teige Gado (Genesis 3:1-6, 16-19). Sensi a ten dati, Satan meki bigi organisâsi opo kon di e bedrigi sma, bika a wani taki ala sma musu tron feanti fu Gado. A moro bigiwan fu den organisâsi disi di e du na ogri-ati sani dati, na falsi bribi.—2 Korentesma 11:14, 15.

Falsi Bribi E Pori a Konsensi

A Bijbel buku Openbaring e prenki falsi bribi leki wan huru di nen Babilon a Bigiwan. Den sani di a e leri, meki taki furu sma no sabi moro fa fu tyari densrefi na wan bun fasi. Wan tra bakapisi de taki sma kisi bita-ati gi trawan di abi wan tra bribi èn a meki den handri na wan ogri-ati fasi nanga den sma dati srefi. Fu taki en leti, akruderi a buku Openbaring, Gado e sori taki den falsi kerki abi brudu-paiman „fu ala den wan di den kiri na grontapu”, èn den kiri srefi den anbegiman fu Gado.—Openbaring 17:1-6; 18:3, 24.

Yesus ben warskow den disipel fu en taki falsi bribi ben o bruya wan tu sma srefisrefi ini a fasi fa den e denki fu bun gwenti nanga gronprakseri. A ben taki: „A yuru e doro te ibri sma di kiri unu sa denki taki a du wan santa diniwroko gi Gado.” Den ogri-ati sma disi no man si a difrenti kwetikweti na mindri wan bun sani nanga wan ogri sani! Yesus ben taki: „Den no kon sabi a Tata èn den no kon sabi mi tu (Yohanes 16:2, 3). No langa baka di Yesus taki den wortu dati, wan tu kerki fesiman ben gi sma a komando fu kiri en. Den kerki fesiman disi ben suku nomonomo fu meki na ogri fu den gersi wan bun sani (Yohanes 11:47-50). Kontrari fu dati, Yesus taki dati sma kan si suma na den tru bakaman fu en, fu di den abi lobi gi makandra. Ma a lobi fu den bakaman moro bigi srefi, bika den no e sori a lobi gi makandra wawan, ma srefi gi den feanti fu den.—Mateus 5:44-48; Yohanes 13:35.

Wan tra fasi fa falsi bribi pori a konsensi fu furu sma na taki a e agri nanga ala sortu fasi fu libi di pôpi, efu sma wani hori densrefi na bun gwenti nanga gronprakseri noso efu den no wani du dati. Na apostel Paulus ben taki na fesi taki disi ben o pasa.  A ben taki: „Wan pisi ten sa kon pe den no sa frudrage a gosontu leri, ma akruderi den eigi lostu, den sa tyari bun furu leriman kon makandra fu switi den yesi fu den.”—2 Timoteus 4:3.

Na ini a ten disi, kerki fesiman e switi den yesi fu sma fu di den e taki dati na abi di sma abi seks sondro taki den trow nanga makandra, kan de wan sani di Gado e feni bun. Trawan no e feni taki homo-sekslibi na wan fowtu sani. Fu taki en leti, son kerki tiriman srefi abi wan homo-sekslibi. Wan artikel na ini The Times, wan koranti na ini Ingrisikondre, ben taki dati „tinadri kerki tiriman” kisi a frantwortu fu de na ini a General Synod of the Church of England (a tiri skin fu a Kerki fu Ingrisikondre), „ala di trawan sabi taki den sma disi abi wan homo-sekslibi”. Na sortu markitiki den kerkiman musu hori densrefi efu den kerki fesiman srefi no e hori Bijbel gronprakseri di abi fu du nanga a fasi fa den musu tyari densrefi? Fa den sma musu sabi den gronprakseri disi efu den kerki fu den no e du muiti fu leri den dati? A no de fu fruwondru taki milyunmilyun sma e bruya srefisrefi.

Fu tru, a moro bun te wi e meki den waarheid na ini Bijbel tiri wi! Den waarheid dati de neleki lampu, fu di den e yepi wi fu tyari wisrefi na a yoisti fasi èn den e yepi wi so srefi na yeye fasi (Psalm 43:3; Yohanes 17:17). Fu eksempre, Bijbel e leri taki no wan huruman noso sutaman „no sa kisi a kownukondre fu Gado” (1 Korentesma 6:9, 10). Bijbel e fruteri wi taki mansma nanga umasma di e kenki „a naturu gebroiki fu densrefi go ini wan di de kontrari a naturu” na sma di e du sani san Gado e si leki „syenwroko” (Romesma 1:26, 27, 32). Den waarheid disi di e sori wi fa fu tyari wisrefi, no komoto na onvolmaakti libisma. Na Gado gi libisma den markitiki disi nanga yepi fu en santa yeye, èn a no kenki den noiti (Galasiasma 1:8; 2 Timoteus 3:16). Ma Satan e gebroiki tra fasi fu pori a konsensi fu sma.

Luku Bun San Yu E Du na ini Yu Prisiriten

A de wan takru sani fu dwengi wan sma fu du ogri. Ma a de wan moro takru sani fu meki a sma kisi a lostu fu du ogri. A marki fu Satan, „a tiriman fu grontapu”, na fu meki sma kisi a lostu fu du ogri. Satan wani taki sma musu kon denki na a srefi lagi fasi leki fa ensrefi e denki. A wani doro a frustan nanga na ati fu don sma, noso sma di no e fruwakti taki a kan du den ogri. A e poti ai spesrutu tapu den moro swaki sma, namku den yongusma di e brokokindi moro esi gi sani di no bun. Fu dati ede Satan e gebroiki sani soleki buku, felem, poku, computer prei, èn so srefi seks prenki tapu Internet.—Yohanes 14:30; Efeisesma 2:2.

„Ibri yari, den yongu sma [na ini Amerkankondre] e si so wan 10.000 sani tapu telefisi di abi fu du nanga ogri di sma e du nanga tranga”, na so a raportu fu a tijdschrift Pediatrics ben taki, „èn den programa di den meki spesrutu gi pikin-nengre abi moro furu ogridu na ini.” A raportu tyari kon na krin tu taki „ibri yari, tini e si so wan 15.000 sani di abi fu du nanga seks tori, soleki prenki nanga lafutori”. Srefi na ini a pisi ten fu a dei te moro furu sma e luku telefisi (7 yuru te go miti 11 yuru na neti), na so a raportu ben skrifi, „den programa e sori moro leki 8 sani na ini wán yuru di abi fu du nanga seks tori èn dati de moro leki fo leisi moro furu leki san den ben sori na ini 1976”. A no de fu fruwondru taki a raportu ben sori tu taki „moro nanga moro sma e gebroiki dotitaki”. Ma toku, Bijbel  nanga furu buku di e taki fu ondrosuku di sabidensiman du, e warskow sma taki te den abi a gwenti fu luku noso leisi den sani disi doronomo, dan dati trutru sa kenki a libi fu den, ma na wan fowtu fasi. So bun, efu yu wani plisi Gado trutru èn efu yu wani kisi wini gi yusrefi, dan yu musu du san Odo 4:23 e taki: „Kibri yu ati, . . . bika na drape den rutu fu a libi de.”—Yesaya 48:17.

Furu pôpi poku e pori a konsensi tu. Wan tu singi de di kon pôpi srefisrefi na ini furu Westsei kondre. Wan raportu na ini The Sunday Mail, wan koranti na ini Australia, e warskow taki a singiman fu den singi disi e du „spesrutu muiti fu skreki sma srefisrefi”. Na artikel e taki dati „den singi fu en wani meki sma bribi taki a de wan bun sani fu gebroiki drugs, fu abi seks nanga famiri èn fu dwengi sma fu abi seks”. Na artikel e sori tu taki „a e singi fu a kiri di a kiri en wefi, trowe en skin go na ini wan bigi pisi watra”. Den tra wortu di a raportu e taki fu den, doti tumusi fu wi kari den na ini na artikel disi. Ma toku den poku fu en meki a kisi wan bigi prijs. Den prakseri di kari didyonsro na sani di trutru abi wan ogri krakti tapu a frustan fu sma èn tapu a fasi fa den e tyari densrefi. Yu wani meki den prakseri disi doro yu frustan nanga yu ati, srefi efu den gebroiki poku fu singi fu den sani disi leki bun sani? Wi e howpu taki yu no wani du dati, bika den wan di e handri na so wan fasi e doti a konsensi fu den, èn te fu kaba den e kweki „wan godelowsu ati” di e meki den tron feanti fu Gado.—Hebrewsma 3:12; Mateus 12:33-35.

So bun, handri nanga koni te yu e luku sortu sani yu wani du na ini yu prisiriten. Bijbel e gi wi deki-ati: „Ala sani san tru, ala sani san de wan seryusu afersi, ala sani san regtfardiki, ala sani san krin, ala sani san de fu lobi, ala sani san sma e taki bun fu en, sortu bunfasi de tu èn sortu sani san musu kisi prèise, tan prakseri den sani disi.”—Filipisma 4:8.

Mati Abi Krakti Tapu a Konsensi fu Yu

Di Neil nanga Franz ben yongu ete, dan den ben abi bun demakandra nanga opregti Kresten. * Ma baka wan pisi ten, na so Neil taki, „mi bigin waka nanga mati di no ben tyari densrefi na wan bun fasi”. A bakapisi fu dati de taki a du ogri, so taki a ben musu go na strafu-oso èn dati e sari en trutru. Franz ondrofeni a srefi sani. „Mi denki taki mi ben man abi demakandra nanga den yongu sma fu grontapu, sondro taki den abi krakti na mi tapu”, na so a kragi. „Ma soleki fa Galasiasma 6:7 e taki, dan ’Gado no e meki sma spotu nanga en. Bika san wan sma e sai, na dati a sa koti tu’. Mi kon leri nanga tranga taki mi ben fowtu èn taki Yehovah ben abi leti. Mi sa abi fu koti strafu mi heri libi langa fu na ogri di mi du.”

Sma leki Neil nanga Franz no e bosroiti wantronso fu du ogri. Na ini a bigin den no ben sa prakseri srefi fu bigin du ogri. A drifi di sma e bigin drifi gowe e pasa safrisafri. Moro furu den e bigin fu abi takru mati (1 Korentesma 15:33). A kan de so taki den e bigin gebroiki drugs noso sopi baka dati. Fu taki en leti, a fiti te sma e taki dati ’o moro wi e gebroiki sopi, o moro a konsensi fu wi e kon swaki’. Te fu kaba, so wan sma e drifi gowe moro makriki fu du ogridu noso hurudu.

 So bun, fu san ede wi sa bigin srefi fu teki takru mati? Na presi fu dati, abi demakandra nanga koni sma di lobi Gado trutru. Den sa yepi yu meki a konsensi fu yu kon tranga, so taki a sa man yepi yu fu si krin san bun èn san ogri. Na so wan fasi yu no sa abi fu tyari sari nanga pen kon na yu tapu (Odo 13:20). Neil nanga Franz de na strafu ete, ma den kon si now taki a konsensi na wan presenti fu Gado di den musu gi bun leri. Iya, den e frustan taki den musu si a konsensi fu den leki wan tumusi warti sani. Boiti dati, den e du furu muiti fu kisi wan bun matifasi nanga a Gado fu den, Yehovah. Handri nanga koni, èn leri wan sani fu den fowtu di den meki.—Odo 22:3.

Du Muiti fu Hori wan Krin Konsensi

Wi e sori taki wi wani hori wan krin konsensi te wi e leri fu lobi Gado, e poti bribi na ini en, èn te wi frede fu du wan sani di a no feni bun (Odo 8:13; 1 Yohanes 5:3). Bijbel e sori taki wan konsensi di no leri fu du den sani disi, nofotron no sa man yepi wi fu si krin san bun èn san ogri. Fu eksempre, Psalm 14:1 e taki fu den sma di e taki na ini den ati: „No wan Yehovah no de.” Nanga den wortu disi den e sori taki den no abi bribi. Sortu krakti disi abi tapu a fasi fa den e tyari densrefi? A vers e taki moro fara: „Den handri na wan pori fasi, den handri na wan tegu fasi na ini a fasi fa den e tyari densrefi.”

Sma di no e bribi trutru na ini Gado, no abi wan fasti howpu so srefi gi wan betre tamara. Fu dati ede den e libi sondro fu prakseri a dei fu tamara, ala di den e satisferi den lostu fu den na skin sei. A fasi fa den e denki na: „Meki wi nyan èn dringi, bika tamara wi o dede” (1 Korentesma 15:32). Na a tra sei, den sma di e poti prakseri na a presenti fu têgo libi, no e lasi pasi, bika den no e tan luku den prisiri fu grontapu di e pasa gowe esi-esi. Soleki fa wan computer e sori wan piloot krinkrin pe a musu frei, na so a konsensi fu den di kisi leri e sori den krinkrin tu fa den musu tan loyaal na Gado.—Filipisma 3:8.

Efu yu wani taki a konsensi fu yu musu tan wroko bun èn taki a musu tan sori yu a yoisti pasi, dan yu musu meki a kisi leri fu Gado Wortu doronomo. Bijbel e fruteri wi taki a leri dati de fu feni. Nanga moi wortu a e taki: „Un eigi yesi sa yere wan wortu na un baka di e taki: ’Disi na a pasi. Waka na tapu’, efu unu musu go na un reti-anusei noso efu unu musu go na un kruktu-anusei” (Yesaya 30:21). So bun, poti ten na wan sei fu leisi Bijbel ibri dei. Disi sa gi yu krakti nanga deki-ati te yu e meki muiti fu du san bun, noso te yu lasi-ati noso brokosaka dorodoro. Efu yu e poti ala yu frutrow tapu Yehovah, dan yu kan de seiker taki a sa gi yu rai fa fu tyari yusrefi na wan bun fasi èn a sa yepi yu na yeye fasi. Iya, du a srefi leki san a psalm skrifiman ben du, di ben skrifi: „Mi poti Yehovah na mi fesi doronomo. Fu di a de na mi reti-anu, den no sa meki mi degedege.”—Psalm 16:8; 55:22.

[Futuwortu]

[Prenki na tapu bladzijde 5]

Falsi bribi, di Bijbel e kari „Babilon a Bigiwan”, meki taki a konsensi fu furu sma kon swaki

[Sma di abi a reti fu a prenki]

Wan priester e blesi a legre: U.S. Army photo

[Prenki na tapu bladzijde 6]

Te yu e luku sani di abi fu du nanga ogri di sma e du nanga tranga èn hurudu, dan dati sa pori a konsensi fu yu

[Prenki na tapu bladzijde 7]

Te yu e suku rai na Gado Wortu doronomo, dan dati sa yepi yu fu hori wan krin konsensi