Kownukondre preikiman e fruteri

’Abra kon èn yepi wi’

NA INI yuli 2000, Kotoigi di e taki Doisritongo èn di e libi na ini Oostenrijk, Doisrikondre, nanga Switserland, ben kisi a kari fu froisi go na Bolifia. Fu san ede? Fu di na sowan 300 kilometer moro fara fu Santa Cruz na ini Bolifia, yu abi grupu fu sma di e taki Doisritongo èn di e sori taki den lobi Bijbel trutru. Den e kari den sma disi Mennosma fu di den de fu wan sortu Protestant bribi; den e libi na farawe presi pe den e wroko gron makandra.

Sowan 140 Kotoigi ben teki a kari dati. Sonwan fu den ben go yepi fu wan tu wiki nomo, trawan ben go yepi wan heri yari, noso moro langa srefi. Di den e du dati, dan den sori taki den ben abi a srefi denki leki den zendeling fu a fosi yarihondro di ben teki a kari: „Abra kon na Masedonia èn yepi wi.”—Tori fu den Apostel 16:9, 10.

Fa a de fu wroko na ini den kontren dati? Wan owruman fu a gemeente di de drape, e taki: „Nanga wan bun wagi a kan teki moro leki aiti yuru fu rei pasa na tapu den santi pasi fu doro te na wan fu den 43 kontren pe den sma fu den Protestant grupu disi, e libi. Efu wi wani go na den farawe presi, dan furu tron wi musu teki waka sowan fo dei, èn son neti wi abi fu sribi na ini tenti. Ma fu taki en leti a muiti dati no de fu soso, fu di furu fu den sma disi no yere a bun nyunsu noiti ete.”

Na a bigin, furu fu den Mennosma no ben wani taki den Kotoigi ben e kon na den. Ma baka di den Kotoigi du muiti ibritron baka fu yepi den, dan den kon frustan a boskopu pikinso. Leki eksempre, wán gronman ben taki dati a ben e leisi na Ontwaakt! wán yari langa kaba. Dan a taki: „Mi sabi taki furu sma di de dyaso no e agri nanga san unu e taki, ma mi e bribi taki disi na a waarheid.” Na ini wan tra kontren wan man ben taki: „Sonwan fu den birtisma fu mi e taki dati unu na falsi profeiti, trawan e taki dati unu abi a waarheid. Ma now mi wani ondrosuku a tori gi misrefi.”

Now yu abi wan Doisritongo gemeente fu 35 preikiman na ini Bolifia. Na ini a grupu dati yu abi 14 furuten preikiman. Te kon miti now, dan 14 sma di ben de na ini a Protestant bribi disi, kon tron Kownukondre preikiman, èn 9 trawan e go na den konmakandra doronomo. Wán owru man di teki dopu no so langa pasa, ben taki: „Wi e si krin fa Yehovah e tiri wi. A seni Doisri brada nanga sisa di abi ondrofeni fu kon yepi wi. Wi e warderi dati trutru.” A man disi abi wan umapikin fu 17 yari. Na umapikin disi di dopu kaba e taki moro fara: „Fosi yu denki yu e kon abi a srefi faya leki den yongu brada nanga sisa di kon dyaso. Furu fu den na pionier di e gebroiki a ten nanga a moni fu den, fu yepi trawan. A e meki taki mi wani du a srefi sani tu.”

Fu tru, den wan di du muiti fu ’abra go’ yepi drape, e kisi bigi prisiri nanga furu koloku.