Den sani di Yehovah meki, moi srefisrefi

„Den furu gudu di de na ini se”

TE SON e dongo, dan a winti e wai safri tapu a se, èn den skwala e naki safri na sekanti. A switi fu yere fa den skwala e naki na syoro. A sani disi e meki taki furu sma e go na sekanti fu rostu. *

Den langa pisi syoro disi de fu feni na heri grontapu èn den de dusundusun kilometer langa. A presi te pe a watra man doro na syoro e kenki ala ten baka, ma toku a watra fu a se no man go moro fara leki a syoro. Na so a Mekiman seti en. Gado e taki fu ensrefi taki a „poti a santi leki wan skotu gi a se”. A e taki moro fara: „Aladi den skwala e naki kon, toku den no man wini; èn aladi den krasi, toku den no man pasa en.”—Yeremia 5:22; Yob 38:8; Psalm 33:7.

Grontapu na trutru a wan-enkri planeiti di abi so furu watra. Moro leki 70 procent fu grontapu lai nanga watra. Di Yehovah ben sreka grontapu so taki libisma kan libi na tapu, a ben gi a komando disi: „Meki den watra na ondro hemel kon makandra na wán presi èn meki a drei gron kon de fu si.” Èn „na so a kon de”. A tori e taki moro fara: „Gado bigin kari a drei gron Grontapu, ma den watra di kon na wán, a kari Se. Ne Gado si taki a ben bun” (Genesis 1:9, 10). Sortu sani e pasa nanga yepi fu den se?

A watra fu den se ben meki fu hori sani na libi, èn dati de fu si na wan tu moi fasi. Fu eksempre, watra man hori waran. Sobun, a se de leki wan bigi baki nanga waran watra di e broko a hebi kowru fu winterten.

Watra e hori sani na libi na wan tra fasi tu. Watra na wan fu den moro bun sani di kan moksi makriki nanga tra sani. Den libisani man tan na libi fu di den difrenti stof na ini den, e moksi nanga makandra. Watra de tumusi prenspari fu meki den pikinpikin pisi fu den difrenti stof disi moksi kon na wán. Furu fu den difrenti stof di moksi kon na wán, abi watra na ini densrefi. A buku The Sea (A Se) e taki: „Ala libisani abi watra fanowdu, èn a watra dati sa musu komoto fu den se te fu kaba, iya srefi gi den sani di e gro na tapu a doti èn sosrefi gi den meti di e waka na tapu gron.”

Den se fu grontapu de tumusi prenspari sosrefi fu meki a loktu na grontapu kon krin. Pikinpikin sortu prani di de na ini se e teki kooldioxide noso a loktu di wi e blo puru, èn den e meki zuurstof, a loktu di wi e hari. Soleki fa wan sabiman e taki, dan „ibri yari 70 procent fu a zuurstof di e kon na ini a loktu e komoto fu den pikinpikin sortu prani na ini a se”.

Den se e meki sani sosrefi di sma kan gebroiki fu dresi siki. Hondrohondro yari kaba, sma meki dresi fu sani di den teki puru fu fisi. Fu wan langa pisi ten kaba sma e gebroiki levertraan (wan sortu geri oli di teki puru fu a lefre fu fisi). No so langa pasa, sma gebroiki sani di de fu feni na ini fisi nanga tra sani di e libi na ini se, fu meki dresi gi sma di abi astma, virus noso kanker.

Sma pruberi fu luku omeni wini a se e gi den na ekonomia sei. Aladi ondrosukuman no man taki soifri omeni wini a e gi sma, toku den  e denki taki te yu ben o prati ala den wini fu a heri naturu na ini dri pisi, dan tu fu den dri pisi disi abi fu du nanga sani di komoto na ini a se. A sani disi e sori krin taki den se no meki fu soso, ma den meki fu gi den libisani san den abi fanowdu èn fu hori den na libi. Fu tru, a fiti te Bijbel e taki fu „den furu gudu di de na ini se”!—Deuteronomium 33:19.

Yehovah e kisi grani leki a Bigi Mekiman fu den gudu disi. Na den sani dati meki Nehemia prèise Yehovah nanga den wortu disi: „Yu wawan na Yehovah; yu srefi meki hemel, . . . den se nanga ala sani di de na den ini; èn ala den sani disi yu e hori na libi.”—Nehemia 9:6.

[Futuwortu]

[Faki/​Prenki na tapu bladzijde 9]

Watra, winti, nanga skwala

Watra nanga winti e meki taki bun bigi skwala e naki na den stonbergi nanga bigi babari, soleki den wan disi na ini Kalifornia, na Amerkankondre. Ala ten den skwala e sori na wan tumusi moi fasi o furu krakti a se abi. Den e memre wi sosrefi na a kefalek bigi makti fu a Mekiman. Yehovah na a sma di „e waka tapu den hei skwala fu se”. „Nanga en krakti a meki a se kon krasi, èn nanga yepi fu en frustan a naki a se bubu na pisipisi” (Yob 9:8; 26:12). Iya, „Yehovah di de na hemel, de hei èn tranga moro a babari fu den bigi watra èn den makti skwala fu a se”.—Psalm 93:4.

Aparti bergi fu santi

Ten na ten, a sekanti furu nanga aparti sortu bergi fu santi, leki den wan di de fu si dyaso na a syoro fu Namibia, na zuidsei fu Afrika. A winti na wan fu den moro prenspari sani di e meki a santi wai kon tron den aparti sortu bergi disi. Sonwan fu den bergi disi di meki fu santi, na pikin bergi. Ma trawan baka kan hei sowan 400 meter. Den bigi ipi santi e meki wi frustan a pisi na ini Bijbel di e taki fu „den ai-santi di de na sekanti”. Bijbel e gebroiki den wortu disi te a e taki fu wan nomru di bigi tumusi fu teri (Genesis 22:17). Wi e lespeki a Mekiman trutru fu a tumusi koni fasi fa a meki so wan kefalek tranga fortresi fu santi teige a krasi se.

[Prenki na tapu bladzijde 9]

Son e dongo na syoro, na a Bocht van Bonny, na ini Kamerun