Ondrofenitori

Wi teki wan fasti bosroiti fu saka wisrefi ondro a tirimakti fu Gado

SOLEKI FA MICHAL ŽOBRÁK FRUTERI

Baka di den ben sroto mi wán mun langa, mi wawan, dan den tyari mi go na wan man di ben poti wan lo aksi gi mi. A no teki langa di en fesi ben kon redi, èn nanga bigi atibron a bari: „Un spion! Amerkan spion!” San ben meki a atibron so? A ben aksi mi sortu bribi mi abi, èn mi ben piki en: „Mi na wan Kotoigi fu Yehovah.”

A DE feifitenti yari kaba di a sani disi pasa. Na a ten dati, a kondre pe mi ben e libi, ben de na ini anu fu den Komunist. Ma langa ten na fesi, a Kresten leriwroko di wi ben du ben e kisi hebi gens kaba.

Wi e ondrofeni den takru bakapisi fu orloku

Di a Fosi Grontapufeti bigin na ini 1914, mi ben abi aiti yari. Na a ten dati, a dorpu fu mi, Zálužice, ben de wan pisi fu a Gran Kownukondre Oostenrijk-Hongaria. A feti ben meki heri grontapu kon bruya, èn wantronso mi ben abi fu teki bigisma frantwortu na mi tapu, aladi mi ben de wan pikin ete. Mi papa, di ben de wan srudati, dede na ini a fosi yari fu a feti. Disi ben meki taki mi, mi mama, nanga mi tu pikin sisa ben abi fu libi wan pôtisma-libi. Heri esi, mi leki a moro owru mansma na ini na oso, ben kon kisi furu frantwortu, èn mi ben e wroko a gron pe wi ben e prani sani èn den meti di wi ben e kweki. Mi ben kisi furu frantwortu na ini oso tu. Sensi mi pikin-nengreten, mi ben lobi kerkitori kaba. A fesiman fu a Hervormde (Calvijn) Kerki ben aksi mi srefi fu teki presi gi en èn fu gi leri na den skoromati fu mi te a no ben de.

Na ini 1918 a Fosi Grontapufeti kon na wan kaba, èn wi ben breiti srefisrefi fu dati. A Gran Kownukondre Oostenrijk-Hongaria ben lasi a feti, èn wi ben tron borgu fu a Republiek Tyeko-Slowâkia. A no langa baka dati, furu sma fu a kontren fu wi di ben go libi na Amerkankondre, ben drai kon baka. Wan fu den sma disi ben de  Michal Petrík di ben kon na wi dorpu na ini 1922. Di a ben go fisiti wan osofamiri na ini a birti fu wi, dan mi nanga mi mama ben kisi wan kari fu go tu.

A Tirimakti fu Gado e tron wan trutru sani gi wi

Michal ben de wan Bijbel Ondrosukuman, soleki fa den ben e kari Yehovah Kotoigi na a ten dati. A ben taki fu prenspari sani fu Bijbel di ben hari mi prakseri srefisrefi. A sani di ben hari mi moro furu ben de a Kownukondre fu Yehovah di ben o kon (Danièl 2:44). Di a taki dati a sonde di ben o kon, wan Kresten konmakandra ben o hori na ini a dorpu Záhor, dan mi bosroiti fu go nomonomo. Mi wiki 4 yuru mamanten èn mi waka sowan aiti kilometer go na a oso fu mi neef fu leni a baisigri fu en. Baka di mi ben meki a banti di ben plata, dan mi rei 24 kilometer go na Záhor. Fu di mi no ben sabi pe a konmakandra ben o hori, meki mi bigin rei safrisafri na ini wan fu den strati. Dan mi yere sma e singi wan Kownukondre singi na ini wan fu den oso. Mi ben prisiri srefisrefi. Mi go na a oso èn mi fruteri den sma fu san ede mi kon drape. Na osofamiri kari mi fu kon nyan nanga den, dan den tyari mi go na a konmakandra. Aladi mi ben abi fu rei èn waka sowan 32 kilometer go na oso baka, toku mi no ben firi weri srefisrefi.—Yesaya 40:31.

Mi ben lobi a fasi fa Yehovah Kotoigi e fruklari sani krinkrin nanga yepi fu Bijbel. A howpu fu libi wan bun libi sondro broko-ede ondro a tiri fu Gado, ben naki mi ati trutru (Psalm 104:28). Mi nanga mi mama bosroiti fu seni wan brifi go na a kerki pe wi ben de, fu taigi den taki wi no de fu a kerki dati moro. Disi ben tyari furu dyugudyugu na ini a dorpu fu wi. Aladi wan pisi ten langa son sma no ben wani taki nanga wi, toku wi ben abi bun demakandra nanga den furu Kotoigi di ben e libi na ini a kontren fu wi (Mateyus 5:11, 12). A no ben teki langa fosi mi teki dopu na ini na Uh-liba.

A diniwroko e tron wi libi

Wi ben gebroiki ibri okasi fu preiki fu Yehovah Kownukondre (Mateyus 24:14). Wi ben poti spesrutu prakseri na den preikiwaka tapu sonde, di ben orga heri bun. Sma fu a ten dati ben gwenti fu wiki frukufruku, sobun wi ben man bigin preiki fruku mamanten kaba. Moro lati na a dei, wan publiki konmakandra ben e hori. Nofo tron den Bijbel leriman no ben e hori lezing sondro fu luku na tapu wan papira. Den ben e luku omeni sma ben wani sabi moro, èn sortu bribi den sma disi ben abi, dan den ben e taki fu sani di ben abi fu du nanga den sma disi.

Den tru tori fu Bijbel di wi ben e preiki gi sma, opo den ai fu someni opregti sma. Syatu baka di mi teki dopu, mi go preiki na ini a dorpu Trhovište. Na wan fu den oso, mi ben taki nanga Misi Zuzana Moskal, wan uma di ben abi switifasi trutru. En nanga en osofamiri ben de fu a Kerki fu Calvijn, neleki fa mi ben de dati fosi. Aladi a ben sabi furu fu Bijbel, toku a ben abi furu Bijbel aksi di a no ben man feni piki na tapu. Wan yuru langa wi ben taki nanga makandra, èn mi ben libi a buku De Harp Gods (A Harpu fu Gado) gi en. *

Wantewante a famiri Moskal bigin leisi a buku disi, makandra nanga a Bijbel di den ben gwenti fu leisi kaba. Moro osofamiri na ini a dorpu dati ben wani sabi moro èn den bigin kon na den konmakandra. A fesiman fu a Kerki fu Calvijn drape ben gi wan seryusu warskow taki sma no musu arki wi èn den no musu teki den buku fu wi. Ne son sma di ben wani sabi moro, aksi a fesiman fu kon na a konmakandra fu wi, fu buweisi na publiki taki na leitori wi ben e leri sma.

A fesiman ben kon, ma a no ben man feni nowan sani na ini Bijbel fu sori taki den leri fu en na tru tori. Fu di a no ben wani taki dati a fowtu, meki a taki: „Wi no kan bribi ala san skrifi na ini Bijbel. Na libisma ben skrifi en, èn difrenti fasi de fu piki aksi di abi fu du nanga Gado.” Disi ben kenki a denki fu someni sma. Sonwan fu den taigi a fesiman taki efu a no ben e bribi na ini Bijbel, dan den no ben o kon arki den takimakandra fu en moro. Sobun, den gowe libi a Kerki fu Calvijn, èn sowan 30 sma fu a dorpu dati teki a fasti bosroiti fu hori densrefi na a waarheid fu Bijbel.

Fu di a heri libi fu wi ben abi fu du nanga a preikiwroko fu a bun nyunsu fu a Kownukondre, meki yu kan frustan taki mi ben e suku wan  trowpatna fu wan osofamiri di ben tranga na yeye fasi. Wan fu den sma di ben wroko makandra nanga mi na ini a diniwroko ben de Ján Petruška, di ben leri a waarheid na ini Amerkankondre. Mi ben lobi a fasi fa en umapikin Mária, ben gebroiki ibri okasi fu gi kotoigi na sma, neleki fa en papa ben du dati. Wi trow na ini 1936, èn Mária ben o de mi getrow trowpatna 50 yari langa, teleki a dede na ini 1986. Na ini 1938, Eduard, a wan-enkri manpikin fu wi, gebore. Ma na a ten dati, wan tra feti ben de fu kon na ini Europa. Sortu krakti dati ben o abi tapu a preikiwroko fu wi?

Wi e kisi tesi fu di wi leki Kresten no e teki sei

Di a di fu Tu Grontapufeti bigin, dan Slowâkia, di ben kon de wan aparti kondre, ben de na ini a makti fu den Nazi. Ma lanti no ben du nowan sani teige Yehovah Kotoigi leki organisâsi. A no de fu taki dati wi ben abi fu wroko kibrikibri, èn wi no ben mag prati son buku fu wi. Ma toku, wi tan du wi wroko nanga koni.—Mateyus 10:16.

Di a feti kon moro ogri, den seni kari mi fu go wroko leki srudati, aladi mi ben pasa 35 yari kaba. Mi ben weigri fu go wroko leki srudati, fu di mi leki Kresten no e teki sei na ini feti (Yesaya 2:2-4). Koloku, fosi den ben denki san fu du nanga mi, lanti bosroiti taki mi nanga ala den speri fu mi no ben abi fu du srudatiwroko.

Wi ben kon frustan taki a ben moro muilek gi den brada nanga sisa fu wi na ini den foto fu feni den deibrede, leki gi wi di ben e libi na boitipresi. Den sani di wi ben abi, wi ben wani prati nanga den (2 Korentesma 8:14). Sobun, wi ben e teki someni nyanyan leki wi man, fu tyari en go na Bratislava di ben de 500 kilometer na a tra sei fu a kondre. A matifasi di wi ben kisi nanga tra Kresten brada nanga sisa èn a lobi di wi ben sori makandra na ini den yari di a feti ben de, ben gi wi krakti fu pasa den muilek yari di ben o kon bakaten.

Wi e kisi deki-ati di wi abi fanowdu trutru

Baka a di fu Tu Grontapufeti, Slowâkia ben tron wan pisi fu Tyeko-Slowâkia baka. Fu 1946 te go miti 1948, Yehovah Kotoigi ben e hori kongres na ini Brno, noso na ini Praag, èn sma fu a heri kondre ben e kon na den kongres dati. Wi, di ben e tan na owstusei fu Slowâkia, ben e go nanga loko di ben seti spesrutu fu tyari sma go na den kongres. Yu kan taki dati den loko disi ben de loko di e singi, fu di wi ben e singi a heri pasi go na a kongres.—Tori fu den Apostel 16:25.

Mi e memre spesrutu a kongres fu 1947 na ini Brno, pe dri Kresten opziener fu na edekantoro ben de, èn wan fu den ben de Brada Nathan H. Knorr. Fu meki bekènti taki wan publikitaki ben o hori, dan furu fu wi ben anga wan karton na wi borsu èn na wi baka pe wi ben skrifi a nen  fu a lezing na tapu. Eduard, a manpikin fu wi di ben abi neigi yari na a ten dati, no ben lobi en srefisrefi taki a no ben kisi so wan karton. Sobun den brada meki moro pikin karton gi en èn gi furu tra pikin. Den yongu pikin disi ben du wan heri bun wroko fu meki a publikitaki disi bekènti!

Na ini februari 1948, den Komunist teki a kondre abra. Wi ben sabi taki a no ben o teki langa fosi lanti ben o du sani fu tapu a wroko fu wi. Wi ben prisiri fu go na wan kongres di ben hori na ini september 1948 na ini Praag, ma baka den dri yari di wi ben de fri fu hori publiki konmakandra, wi ben de nanga a fasti bosroiti fu tan getrow efu lanti ben o meki bekènti taki wi no mag hori publiki konmakandra moro. Fosi a kongres ben kon na wan kaba, wi alamala teki wan prenspari bosroiti, èn wan pisi fu a bosroiti dati taki so: „Wi, Yehovah Kotoigi, di kon makandra dyaso . . . , e teki a fasti bosroiti fu du a prisiri diniwroko disi moro nanga moro, èn nanga yepi fu a bun-ati fu Masra di wi no frudini, wi sa tan du disi na ini bun ten èn na ini muilek ten, èn wi sa tan preiki na evangelie fu Gado kownukondre nanga moro faya.”

„Feanti fu Lanti”

Soso tu mun baka a kongres na ini Praag, den skowtu di e wroko kibrikibri, kon wantronso na a Bethel-oso, di ben de krosibei fu Praag. Den teki ala sani fu a Bethel-oso, sosrefi ala buku di den ben man feni, èn den grabu ala den sma di ben e wroko na Bethel nanga wan tu tra brada di ben de drape. Ma moro ben de fu kon ete.

Na ini a neti fu 3 go miti 4 februari 1952, skowtu waka na a heri kondre èn den grabu moro leki 100 Kotoigi. Mi ben de wan fu den. A ben de sowan dri yuru mamanten di skowtu wiki mi heri osofamiri. Den aksi mi fu go nanga den, ma den no taigi mi fu san ede. Den tai mi anu èn den tapu mi ai nanga wan krosi, èn makandra nanga wan tu trawan den trowe mi na bakasei fu wan truck. Bakaten den sroto mi wawan na ini wan strafu-oso kamra.

Wan heri mun pasa sondro taki wan sma taki nanga mi. A wan-enkri sma di mi ben si, ben de a waktiman di ben pusu wan pikinso nyanyan nomo gi mi na ini wan olo di ben de na ini a doro. Ne, wan dei den seni mi go na a man fu suma mi ben fruteri na a bigin, di ben poti wan lo aksi gi mi. Baka di a kari mi wan spion, dan a taki: „Kerki na wan don sani. Nowan Gado no de! Wi no kan gi yu pasi fu kori den wrokoman na ini a kondre disi, taki wan Gado de. Efu a no anga wi o anga yu, dan yu o tan na strafu-oso teleki yu dede. Èn efu a Gado fu yu ben o kon dyaso, dan wi e kiri en tu!”

Den lantiman ben sabi taki nowan spesrutu wet ben de di e taki dati wi no mag du wi Kresten diniwroko. Dati meki den ben wani taki sani di ben o sori taki wi ben e du wan heri tra sortu wroko leki san ben skrifi na ini lantibuku, so taki den ben kan feni wan wet di ben o sori taki wi na „feanti fu Lanti” èn spion fu wan tra kondre. Ma fu man du disi, den ben musu kisi wi so fara taki wi no ben o tan getrow moro èn taki wi ben o „taki” dati den falsi sani di den taki fu wi, de so trutru. Baka di den pruberi fu dwengi mi fu du san den wani, dan den no ben wani meki mi sribi. Baka wan tu yuru, den ben poti wan lo aksi gi mi baka. Disi leisi, a man di ben poti aksi gi mi, ben wani mi fu skrifi mi nen na tapu wan papira pe skrifi: „Mi, leki wan feanti fu a Demokrâsia fu a Pipel fu Tyeko-Slowakia, no teki a sei fu a grupu sma di e wroko na den gron fu lanti, bika mi ben e wakti den Amerkan fu kon.” Di mi weigri fu skrifi mi nen na ondro a  leitori disi, dan den seni mi go na wan strafu-oso kamra, pe den ben o strafu mi.

Den no ben gi mi pasi fu sribi, fu didon, noso fu sidon srefi. Mi ben kan tanapu èn waka lontu nomo. Di mi no ben man moro, mi go didon na tapu a gron di ben meki fu ston. Ne den waktiman tyari mi go baka na a man di ben poti aksi gi mi. „Yu o skrifi yu nen na tapu a papira now?”, a aksi mi. Di mi weigri ete wan tron fu du dati, dan a naki mi na ini mi fesi. Mi fesi bigin brudu. Dan a bari gi den waktiman: „A wani kiri ensrefi. Un luku fu a no kiri ensrefi!” Den sroto mi wawan baka. Siksi mun langa den ben du sani nanga mi furu tron fu dwengi mi fu du san den wani. Den ben pruberi na ala sortu fasi fu dwengi mi fu taki dati mi na wan feanti fu Lanti, ma noti meki mi lasi mi getrow fasi na Yehovah.

Mi ben de na ini wan grupu fu 12 brada, èn wan mun fosi mi ben o go na fesi krutu, wan afkati komoto fu Praag fu taki nanga ibriwan fu wi fu meki wi du san den wani. Na afkati aksi mi: „San yu o du efu den kondre fu Westsei kon feti nanga wi kondre?” „Mi ben o du a srefi sani di mi ben du di a kondre disi makandra nanga Hitler ben go feti nanga USSR (Rosiakondre). Mi no ben feti na a ten dati, èn mi no o feti now tu, bika mi na wan Kresten èn mi no e teki sei na ini feti.” Dan a taigi mi: „Wi no kan gi Yehovah Kotoigi pasi fu du a wroko fu den. Wi abi srudati fanowdu efu den kondre fu Westsei o kon feti nanga wi, èn wi abi srudati fanowdu fu fri den wrokoman fu wi di de na den Westsei kondre.”

Tapu 24 yuli 1953, den tyari wi go na krutu-oso. Wan fru wan den kari ala den 12 fu wi na fesi wan grupu fu krutuman. Wi gebroiki na okasi disi fu gi kotoigi fu a bribi fu wi. Baka di wan afkati taki fu den falsi sani di sma ben taki fu wi, dan a opo èn taki: „Mi kon na ini a krutu-oso disi furu tron. Nofo tron mi si taki te fu kaba den sma e agri taki den ben du wan ogri, den e aksi pardon, èn son tron den e krei srefi. Ma te den man disi o gowe fu dyaso, dan den o abi moro krakti leki san den ben abi di den kon dyaso.” Baka dati, den krutu ala den 12 fu wi, taki wi span anu makandra teige Lanti. Den gi mi wan strafu fu dri yari èn Lanti ben teki ala san mi ben abi.

Mi e tan go doro, awinsi mi kon owru

Baka di mi drai kon na oso baka, dan den skowtu di ben e wroko kibrikibri, ben e luku mi ete. Toku mi bigin du mi theokrasia wroko baka èn mi ben kisi a wroko leki opziener na ini a gemeente pe mi ben de. Aladi lanti ben teki na oso fu wi, toku wi ben mag libi na ini ete, èn soso 40 yari baka dati, di a Komunist tirimakti fadon, wi ben kisi na oso baka.

Mi no ben de a wan-enkri sma na ini mi osofamiri di ben go na strafu-oso. Soso dri yari baka di mi ben drai kon na oso baka, den seni kari Eduard fu go du srudatiwroko. Fu di en konsensi ben e piki en taki dati no ben e kruderi nanga Bijbel gronprakseri, meki a weigri fu du dati èn den poti en na strafu-oso. Furu yari baka dati srefi mi granpikin Peter ben ondrofeni a srefi sani, aladi a ben e sikisiki.

A Komunist tirimakti na ini Tyeko-Slowâkia fadon na ini 1989. Mi ben breiti srefisrefi taki baka di lanti tapu a wroko fu wi 40 yari langa, mi ben de fri fu preiki oso fu oso! (Tori fu den Apostel 20:20) Solanga a gosontu fu mi ben gi mi pasi, mi ben lobi fu du a preikiwroko na a fasi disi. Now di mi abi 98 yari, a gosontu fu mi no de leki fosi, ma toku mi breiti taki mi kan gi sma kotoigi ete fu den tumusi moi pramisi di Yehovah gi wi fu a ten di e kon.

Na ini ala den yari di pasa, mi kan teri 12 tiriman fu feifi difrenti kondre di ben tiri a foto pe mi ben e libi. Yu ben abi ogri-ati tiriman, presidenti, nanga wan kownu. Nowan fu den ben man sorgu taki den problema di ben moro a pipel di den ben e tiri, ben o lusu fu ala ten (Psalm 146:3, 4). Mi e taki Yehovah tangi taki a gi mi na okasi fu kon leri sabi en frukufruku na ini mi libi kaba. Fu dati ede, mi kon frustan taki a o tyari wan lusu kon nanga yepi fu en Mesias Kownukondre, èn mi ben man sorgu taki mi no libi wan libi sondro Gado, bika dati na wan soso sani. Moro leki 75 yari mi preiki fayafaya san na a moro bun nyunsu di de, èn disi ben meki mi abi wan marki na ini a libi, mi de koloku, èn mi abi wan tumusi moi howpu fu libi fu têgo na grontapu. San moro mi kan aksi ete? *

[Futuwortu]

[Prenki na tapu bladzijde 26]

Syatu baka a trowdei fu wi

[Prenki na tapu bladzijde 26]

Nanga Eduard, syatu baka 1940

[Prenki na tapu bladzijde 27]

Wi e meki a kongres bekènti na ini Brno, na ini 1947