Wan skoro di e tyari wini kon gi sma na heri grontapu

NA INI moro leki 200 kondre, gudusma, pôtisma, nanga sma di kweki na difrenti fasi, e kisi leri fu Gado na ini moro leki 98.000 gemeente fu Yehovah Kotoigi. A moro prenspari leribuku fu den na Bijbel, èn a leri disi na fu yepi sma fu kon sabi san na a wani fu Gado, èn fa den musu libi akruderi a wani fu en, so taki den kan go na fesi na yeye fasi. Den sma di e teki a leri disi e kisi furu wini. Den e meki trawan kon sabi san den e leri, èn na so fasi den e gi yesi na a komando di Yesus Krestes ben gi fu meki disipel.—Mateyus 28:19, 20.

Boiti a leriprograma disi di e hori doronomo na ini den gemeente, Yehovah Kotoigi seti wan tu tra skoro pe sma e kisi spesrutu leri. Wán fu den skoro disi na a Dinariskoro. A skoro disi seti na ini oktober 1987 na ini a foto Pittsburgh, na ini Pennsylvania, na Amerkankondre. Na ini a fosi klas yu ben abi 24 studenti di ben e taki Ingrisitongo. Sensi a ten dati a skoro hori na ini 21 tongo èn na ini 43 kondre. Te nanga now, owruman nanga dinari ini a diniwroko fu moro leki 90 kondre go na a skoro. Den brada di e go na a skoro disi, na sma di no trow. Baka te a skoro disi hori aiti wiki langa, dan den studenti e go dini na presi pe yepi de fanowdu, èn dati kan de na ini den eigi kondre, noso na tra kondre. Na a kaba fu a yari 2005, moro leki 22.000 Kresten brada klari a skoro nanga bun bakapisi.  A sakafasi di den sori èn a tranga muiti di den du fu meki Kownukondre afersi go na fesi, tyari furu wini gi trawan.—Odo 10:22; 1 Petrus 5:5.

Den e seti sani fu go na a skoro

Fu man go na a Dinariskoro, dan furu fu den studenti ben musu aksi fri fu a grontapuwroko fu den. Son leisi a sani disi na wan problema. Na ini Hawai, tu Kresten di e wroko leki skoromeester ben kisi kari fu go na a Dinariskoro, èn den ben musu aksi fri fu a wroko fu den. Fu di den ben abi a frutrow taki Yehovah ben o yepi den, meki den skrifi brifi fu aksi fri, èn na ini a brifi den fruteri fu san ede den ben wani go na a skoro, èn fa den ben o kisi wini. Den tu brada disi kisi fri fu a wroko fu den.

Wan tu Kotoigi di ben aksi fu kisi fri fu a wroko fu den, kisi fu yere dati den no ben o abi a wroko moro te den ben drai kon baka. Den Kotoigi disi bosroiti fu teki a leri fu Yehovah en organisâsi, aladi dati ben o meki den lasi a wroko fu den. Bakaten, sonwan fu den kotoigi disi kisi kari fu a basi fu den fu kon baka na wroko te a skoro ben kaba. Disi na san wi kan taki fu a fasti bosroiti di den kotoigi ben abi fu go na a skoro: Aksi fu kisi fri fu yu wroko, begi Yehovah fu yepi yu, èn baka dati, libi ala sani gi Yehovah.—Psalm 37:5.

Den na „sma di Yehovah gi leri”

Na ini den aiti wiki di a skoro e hori, den studenti e studeri Bijbel finifini. Den e leri fa a pipel fu Yehovah orga fu du a wani fu En, èn fa den kan gebroiki Bijbel moro bun na ini a preikiwroko, na den gemeente konmakandra, èn na den bigi konmakandra.

Wan studenti di ben abi warderi gi a leri fu a skoro, ben skrifi wan tra studenti di ben musu go ete na a skoro: „Mi e taigi yu, yu o kisi a moro bun leri di yu kisi oiti. Yu o frustan a bijbeltekst moro bun di e taki dati ’Yehovah e gi sma leri’. Na ondrofeni disi e meki taki yu e kon tron wan nyun sma di e tyari ensrefi moro soifri akruderi na eksempre fu Krestes Yesus. Te yu go na a skoro, dan yu sa ondrofeni a moro moi sani di yu ondrofeni oiti na ini yu libi.”—Yesaya 54:13.

Preikiman, skapuman, nanga leriman

Nownowde den studenti fu a Dinariskoro e dini na ini 117 kondre. Dati na èilanti na ini na Atlantisch Se, a Karibis Se, a Stille Oceaan, èn sosrefi na moro furu fu den kondre pe bijkantoro fu Yehovah Kotoigi de. Den bijkantoro e skrifi taki a wroko di den studenti e du leki preikiman, skapuman, nanga leriman, e sori taki den kisi bun leri. Fu di den kisi a leri disi, meki den man gebroiki Bijbel moro bun na ini a preikiwroko (2 Timoteyus 2:15). Te den e gi den ososma piki tapu den aksi fu den, dan nofo tron den e gebroiki a buku Redeneren aan de hand van de Schrift, * èn den e leri tra Kownukondre preikiman fu du a srefi. A faya di den studenti disi abi e meki taki trawan wani de leki den, èn den sani di den e du e tranga den gemeente.

Gemeente owruman abi a grani fu „luku den skapu”, fu di den e yepi fu sorgu gi den sani di trawan abi fanowdu na yeye fasi (1 Petrus 5:2, 3). Wan owruman ben taki fu a seti disi: „Wi de nanga tangi taki a bijkantoro e seni brada di kisi bun leri, fu kon yepi wi fu tyari a frantwortu di wi abi fu luku den skapu fu Gado.” Wan bijkantoro na ini a birti fu Owstu Asia ben skrifi: „Den studenti abi switifasi trutru. Den e wroko tranga, èn a gemeente e kon kisi dipi lespeki gi den. Sma e lespeki den brada disi di den sabi leki sma di abi sakafasi, switifasi, èn sosrefi leki sma di de fayafaya. Den de klariklari fu gi densrefi èn fu froisi go na gemeente pe skapuman de fanowdu” (Filipisma 2:4). Den man disi e tranga den brada nanga sisa, èn fu dati ede wi musu prèise den.—1 Korentesma 16:18.

Boiti dati, den leriman fu a Dinariskoro e yepi den studenti fu tron moro bun takiman.  Fu di den studenti e fiti den rai di den e kisi, meki a no e teki langa fosi den kan hori lezing na kring konmakandra èn na den kongres programa. Wan kring-opziener ben kon si taki den studenti e „hori heri moi lezing èn den e tyari den bodoi kon na krin na wan koni fasi”.—1 Timoteyus 4:13.

Baka di a Dinariskoro ben hori na ini wan Afrikan kondre, dan den studenti go na ini a preikiwroko, èn a sani disi meki taki den sma na ini den gemeente e kisi leri na wan moro bun fasi. Den owruman di kisi leri na a skoro e dini leki preikiman, skapuman, nanga leriman, èn na so fasi den e tranga den gemeente na yeye fasi.—Efeisesma 4:8, 11, 12.

Den gemeente e kisi moro bun tiri

Na furu presi, moro owruman nanga dinari ini a diniwroko de fanowdu. Efu wan studenti fu a Dinariskoro no ben seni go na son gemeente, dan den gemeente dati no ben o abi nowan owruman. Fu dati ede, furu fu den studenti dati musu go dini na presi pe dati de fanowdu.

Wan tu bijkantoro e skrifi taki den brada disi „sabi den seti fu na organisâsi bun”, „den e si a frantwortu fu den leki wan seryusu sani”, „den e yepi trawan fu abi warderi nanga lespeki gi Yehovah en organisâsi”, èn „den e yepi brada nanga sisa na ini den gemeente fu kisi switifasi èn fu gro na yeye fasi”. Disi e pasa fu di den studenti fu a skoro e fiti den sani di skrifi na ini Gado Wortu, den no e frutrow tapu den eigi frustan, èn den no e denki taki den koni (Odo 3:5-7). Den man disi de wan blesi na ini den gemeente pe den e go dini.

Den e dini na farawe kontren

Son studenti di e dini leki spesrutu pionier e yepi grupu na farawe presi, so taki den grupu disi kan tron gemeente. Wan owruman na wan farawe presi na ini Gwatemala, e taki fa a e warderi a yepi fu den studenti disi: „Tutenti yari langa mi ben e broko mi ede fa wi ben o wroko a bun bigi kontren disi, èn mi begi furu leisi fu a sani disi. Den brada fu a Dinariskoro kisi leri fa fu tron bun takiman èn fa fu seti sani na ini a gemeente, èn fu dati ede mi breiti fu si a lobi-ati fasi fa den studenti e poti prakseri na den sma na ini a kontren disi.”

Den studenti leri fa den musu wroko na ini kontren pe den musu teki langa waka abra bergi, fu man doro den pikinpikin dorpu di de na ala sei. Te den doro drape, dan den no e draidrai fu seti èn fu orga den grupu na den farawe presi, srefi efu tra preikiman no ben man du dati. Fu eksempre, wan owruman na ini Niger ben aksi taki wan tu studenti kon yepi en, fu di a ben feni taki den ben o man du bun wroko na ini a kontren pe a ben libi. Spesrutu na ini den farawe kontren, brada di no trow kan dini moro makriki leki spesrutu pionier noso kring-opziener. Neleki na apostel Paulus, di ben de ’na ini kefar na liba, fufuruman ben e suku fu du en ogri, èn a ben de na ini kefar na ini a sabana’, na so den studenti e kisi fu du nanga den sani disi tu. Boiti dati, den e kisi fu du nanga tra fruferi sani, èn den e broko den ede nanga den gemeente pe den e dini.—2 Korentesma 11:26-28.

Den e yepi yonguwan

Bijbel e gi yonguwan a rai fu memre a Mekiman fu den (Preikiman 12:1). Fayafaya studenti fu a Dinariskoro na moi eksempre gi den Kresten yonguwan. Baka di tu studenti kon na ini wan gemeente na ini Amerkankondre, dan den preikiman fu a gemeente ben e wroko tu tron so furu yuru na ini a preikiwroko. Boiti dati, a nomru fu gewoon pionier, noso furuten Kownukondre preikiman, kren fu 2 go miti 11. Nofo tron na disi e pasa te den studenti e go dini na ini den gemeente.

Den studenti e gi yongu brada a deki-ati fu go na a Dinariskoro. A sani disi gi son yongu brada di no ben de dinari ini a diniwroko ete, a deki-ati fu meki muiti fu kisi a grani dati. A bijkantoro fu Bakrakondre e taki dati studenti  fu a Dinariskoro na „trutru bun eksempre gi yongu brada di no sabi ete san fu du nanga den libi”.

Den e dini na ini gemeente di e taki wan tra tongo

Na ini furu kondre, moro nanga moro preikiman e meki muiti fu fruteri sma a bun nyunsu na ini a mamatongo fu den. Nofo tron den studenti fu a Dinariskoro e leri wan tra tongo èn den e dini na ini kontren pe furu sma di gowe libi a mamakondre fu den, e tan. Na ini Belgia fu eksempre, moro Kownukondre preikiman de fanowdu fu preiki gi sma di e taki Albaniatongo, Persiatongo, nanga Rosiatongo.

Gemeente nanga grupu di e taki wan tra tongo èn di na ini Amerkankondre, Doisrikondre, Ingrisikondre, Italiakondre, Meksikow, nanga tra kondre, e kisi furu wini kaba fu den kring-opziener, den owruman, nanga den dinari ini a diniwroko di teki leri na a Dinariskoro. A bijkantoro fu Korea e skrifi taki „moro leki 200 studenti de wan bigi yepi na ini den gemeente nanga grupu di e taki wan tra tongo”.

Den e tyari tra frantwortu nanga sakafasi

Boiti taki den studenti fu a Dinariskoro e dini na ini gemeente nanga grupu di e taki wan tra tongo, den e dini tu leki owruman, dinari ini a diniwroko, nanga kring-opziener. Sonwan fu den e go dini na tra kondre, èn kande den e dini na wan bijkantoro pe sma de tranga fanowdu na a Dienst Afdeling. Den studenti di sabi du bow-wroko kan go yepi bow Kownukondre zaal.

Fu di moro nanga moro gemeente nanga kring e kon de na heri grontapu, meki moro kring-opziener de fanowdu doronomo. Fu man yepi nanga a wroko dati, son studenti fu a Dinariskoro e kisi leri tin wiki langa fa fu du a kringwroko, èn baka dati den e yepi den kring-opziener nanga a wroko fu den. Nownowde sowan 1300 studenti e dini leki kring-opziener na ini 97 kondre. Na ini wan Afrikan kondre, 55 procent fu den kring-opziener kisi leri na a Dinariskoro. Na ini wan tra Afrikan kondre dati na 70 procent.

Na ini Amerkankondre, Australia, Kanada, nanga den kondre na ini a birti fu Owstu Asia, hondrohondro studenti fu a skoro ben musu go du spesrutu wroko na ini tra kondre. Na so fasi sma na heri grontapu e kisi wini fu a skoro disi.

Yehovah gebroiki en Manpikin, Yesus Krestes, fu sorgu taki preikiman, skapuman, leriman, nanga tra sma de di e meki Kownukondre afersi go na fesi na ini den lasti dei disi. Wi kan fruwakti taki a pipel fu Gado sa kon moro bigi? Iya, seiker! Fu dati ede, moro leki oiti bifo a de fanowdu trutru taki brada e meki muiti fu kisi moro frantwortu na ini a gemeente (Yesaya 60:22; 1 Timoteyus 3:1, 13). A Dinariskoro e gi owruman nanga dinari ini a diniwroko na okasi fu go na fesi, so taki den kan du moro na ini a diniwroko fu den. A sani disi sa tyari bigi wini gi den, èn gi trawan na heri grontapu.

[Futuwortu]

[Prenki na tapu bladzijde 10]

A Dinariskoro e meki Kownukondre afersi go na fesi na heri grontapu

[Prenki na tapu bladzijde 13]

Yu abi a winsi fu go na a Dinariskoro, so taki yu kan tyari wini gi trawan?