Tan meki muiti fu sori moro lobi gi yu Kresten brada nanga sisa

„Tan lobi makandra neleki fa Krestes ben lobi unu tu.”​—EF. 5:2.

1. Soleki fa Yesus sori, dan san ben o de wan prenspari fasi fu den bakaman fu en?

SMA sabi Yehovah Kotoigi leki sma di e preiki a bun nyunsu fu Gado Kownukondre oso fu oso. Toku Krestes Yesus ben taki dati wan tra sani ben o de di ben o sori suma na den trutru disipel fu en. A ben taki: „Mi e gi unu wan nyun komando, taki un musu lobi makandra; neleki fa mi lobi unu, na so un musu lobi makandra tu. Na a fasi disi ala sma o sabi taki unu na mi disipel, te unu lobi makandra.”​—Yoh. 13:34, 35.

2, 3. Sortu krakti a lobi fu wi abi tapu den wan di e kon na den Kresten konmakandra fu wi?

² Nowan tra sma na grontapu abi a lobi di tru Kresten abi gi makandra. Neleki fa wan magneiti e hari isri, na so lobi e hari den futuboi fu Yehovah kon na wán. Dati meki den de na ini wánfasi. Boiti dati, a lobi disi e hari reti-ati sma kon na a tru anbegi. Luku na eksempre fu Marcelino, di e libi na ini Kamerun. A man disi ben kisi wan mankeri na wroko di meki taki a kon breni. Baka di a kisi a mankeri, furu sma ben panya a tori taki a ben kon breni fu di a ben de wan bonuman. Na presi taki a domri fu en èn den memre fu a kerki trowstu en, den puru en na ini a gemeente. Di wan Yehovah Kotoigi ben gi Marcelino wan kari fu go na wan konmakandra fu den, dan a no ben wani go. A ben frede taki sma ben o spotu en baka.

³ Di Marcelino go na a Kownukondre zaal, dan a ben fruwondru fu a fasi fa den ben handri nanga en. Den ben gi en wan switikon, èn den Bijbel leri di a ben e yere drape, ben gi en trowstu. A bigin go na ala den gemeente konmakandra, èn a bigin studeri Bijbel. Marcelino go na fesi, èn na ini 2006 a teki dopu. Now a e fruteri den famiriman nanga den birtisma fu en den tru tori fu Bijbel, èn a bigin studeri Bijbel nanga wan tu sma. Marcelino wani sori a srefi lobi gi den Bijbelstudenti fu en, neleki fa a pipel fu Gado sori lobi gi en.

4. Fu san ede wi musu teki a rai di Paulus gi wi fu „tan lobi makandra”?

⁴ A lobi di wi leki bakaman fu Yesus abi gi makandra, moi srefisrefi. Ma wi alamala musu tan meki muiti fu sori a lobi disi. Fu eksempre, kon meki wi taki dati wan tu sma di de na busi, e sidon lontu wan faya fu hori densrefi waran. Efu den sma disi no e tan poti udu gi a faya, dan te fu kaba a faya o kiri. Na so a de tu nanga a lobi di wi e sori na ini a gemeente. Ibri Kresten musu du muiti fu meki a lobi disi kon moro tranga. Fa wi kan du dati? Na apostel Paulus e piki: „Tan lobi makandra neleki fa Krestes ben lobi unu tu èn neleki fa a ben gi ensrefi gi unu leki wan ofrandi èn leki wan srakti-ofrandi gi Gado, fu de leki wan switismeri” (Ef. 5:2). Na sortu fasi wi kan tan lobi makandra? Meki wi go luku fa wi kan du dati.

„Unsrefi musu opo un ati tu”

5, 6. Fu san ede Paulus ben gi den Kresten na ini Korente a rai fu ’opo den ati’?

⁵ Luku san na apostel Paulus ben skrifi den Kresten na ini Korente fu owruten: „Un Korentesma, wi opo wi mofo fu taki nanga unu èn wi opo wi ati gi unu. Wi ati no tapu gi unu, ma unu no e opo un ati nofo fu sori dipi firi fu lobi gi wi. Fu dati ede, mi e taki nanga unu leki nanga  pikin-nengre, iya, unsrefi musu opo un ati tu” (2 Kor. 6:11-13). Fu san ede Paulus ben gi den Korentesma a rai fu opo den ati fu sori lobi gi makandra?

⁶ Luku fa a gemeente fu owruten Korente ben seti. Paulus ben go na ini Korente na a kabapisi fu a yari 50. Aladi son sma ben e gens a preikiwroko fu en, toku na apostel tan preiki drape. Na ini wan syatu pisi ten, furu sma na ini a foto gi yesi na a bun nyunsu. „Wán yari nanga siksi mun” langa, Paulus ben e meki tranga muiti fu gi a nyun gemeente leri, èn fu gi den brada nanga sisa drape deki-ati. A de krin taki a ben abi furu lobi gi den Kresten na ini Korente (Tori. 18:5, 6, 9-11). Den ben abi nofo reide fu lobi en tu, èn fu sori lespeki gi en. Ma son sma na ini a gemeente no ben sori lobi gi en. Kande wan tu fu den no ben lobi a krin rai di a ben gi den (1 Kor. 5:1-5; 6:1-10). A kan taki trawan ben e arki den ogri-ati lei fu den „kefalek bun apostel” (2 Kor. 11:5, 6). Paulus ben wani taki ala den brada nanga sisa fu en ben musu lobi en trutru. Dati meki a gi den a deki-ati fu ’opo den ati’. A ben wani taki den ben musu kon moro bun nanga en, èn nanga tra bribiman.

7. Fa wi kan ’opo wi ati’ fu sori lobi gi wi brada nanga sisa?

⁷ Ma fa a de nanga wi? Fa wi kan ’opo wi ati’ fu sori lobi gi wi brada nanga sisa? Kande a moro makriki fu sori lobi gi sma di owru leki wi, èn gi sma di de fu a srefi ras leki wi. Èn nofo tron, sma di lobi den srefi sortu prisiriten, lobi fu moksi nanga makandra. Ma efu wi e moksi soso nanga sma di lobi den srefi sani di wi lobi, dan wi sa abi fu ’opo wi ati’. A ben o bun fu aksi wisrefi: ’A de so taki te mi de na ini a preikiwroko, noso te mi e du tra sani, dan mi e du den sani disi soso nanga sma di mi sabi bun? A de so taki, te mi de na a Kownukondre zaal, dan mi no e moksi furu nanga nyunwan fu di mi feni taki den musu meki muiti fu tron mi mati? Te mi de na den konmakandra, dan mi e gi owruwan nanga yonguwan odi?’

8, 9. Fa a rai di Paulus gi na Romesma 15:7 kan yepi wi fu gi makandra odi na so wan fasi, taki a lobi di wi abi gi makandra e kon moro tranga?

⁸ Te a abi fu du nanga a gi di wi e gi trawan odi, dan den sani di Paulus ben taigi den Romesma kan yepi wi fu kon abi wan yoisti denki fu wi brada nanga sisa. (Leisi Romesma 15:7.) A Griki wortu di vertaal nanga „teki makandra nanga prisiri”, wani taki „gi makandra wan switikon, abi demakandra nanga trawan, èn teki trawan leki mati”. Te sma ben e gi trawan wan switikon na ini Bijbel ten, dan den ben e meki den sma sabi taki den breiti fu si den. Na wan agersi fasi, Krestes gi wi wan switikon na ini a gemeente. Èn wi e kisi a deki-ati fu gi wi brada nanga sisa wan switikon tu.

⁹ Boiti taki wi e gi wi brada nanga sisa odi na a Kownukondre zaal èn na tra presi, wi kan poti prakseri tu na den wan di wi no miti langa, noso den wan di wi no taki nanga den wan langa pisi ten. Kande wi kan teki wan tu miniti fu taki nanga den. Na a tra konmakandra, wi kan taki nanga trawan. Fosi wi denki, wi taki switi nanga pikinmoro ala brada nanga sisa na ini a gemeente. Wi no abi fu broko wi ede efu wi no man taki nanga ala sma tapu wán dei. Nowan  sma musu fruwakti taki wi sa man gi den odi na ibri konmakandra.

10. Sortu tumusi moi okasi wi alamala abi na ini a gemeente, èn fa wi kan kisi wini fu dati?

¹⁰ Te wi e gi trawan odi, dan dati na a fosi sani di wi e du fu gi den wan switikon. A kan meki taki wi e taki switi nanga makandra, èn a kan meki taki wi e tron bun mati fu makandra. Fu eksempre, te den wan di e go na den kongres nanga den tra bigi konmakandra e leri sabi makandra, èn te den e bigin taki nanga makandra, dan den o angri fu si makandra baka. Nofo tron, den wan di e yepi bow Kownukondre zaal, èn den brada nanga sisa di e yepi trawan di kisi fu du nanga wan rampu, e tron bun mati fu makandra. Disi e kon fu di den e kon sabi den moi fasi fu makandra, èn fu di den de na ini a srefi situwâsi. Na ini na organisâsi fu Yehovah, furu okasi de fu meki bun mati. Efu wi e ’opo wi ati’, dan wi sa kon abi moro mati, èn disi sa meki taki a lobi di wi leki tru anbegiman abi gi makandra, e kon moro tranga.

Meki ten gi trawan

11. Soleki fa Markus 10:13-16 e sori, dan sortu eksempre Yesus gi wi?

¹¹ Ala Kresten kan pruberi fu sori switifasi gi trawan, neleki fa Yesus ben e du dati. Luku san Yesus taki di den disipel fu en ben e tapu papa nanga mama fu tyari den pikin fu den kon na en. Yesus taki: „Meki den pikin-nengre kon na mi; no pruberi fu tapu den fu kon na mi, bika den sma di de leki den pikin disi sa kisi a kownukondre fu Gado.” Baka dati, „a brasa den pikin-nengre hori, a blesi den, èn a poti en anu na den tapu” (Mark. 10:13-16). Prakseri fa den yonguwan dati ben breiti di a Bigi Leriman poti prakseri na den na wan lobi-ati fasi!

12. San kan meki taki trawan no e kon taki nanga wi?

¹² Ibri Kresten musu aksi ensrefi a sani disi: ’Mi e meki ten gi trawan? Noso mi feni taki mi abi furu tra sani fu du?’ Son gwenti no fowtu, ma son leisi den gwenti dati kan meki en muilek gi trawan fu taki nanga wi. Fu eksempre, efu wi abi a gwenti fu prei nanga wi cellulair telefon pe trawan de, noso efu wi e arki poku nanga wan headphone, dan wi kan gi sma a firi taki wi no wani moksi nanga den. Efu ibri leisi trawan e si fa wi e luku na tapu a pikin computer na ini wi anu, dan den kan denki taki wi no wani taki nanga den. A no de fu taki, dati „wan ten de fu tan tiri”. Ma te wi de nanga tra sma, dan nofo tron dati na wan ’ten fu taki’ (Preik. 3:7). Kande son sma e taki: ’Mi lobi de mi wawan’, noso ’Mi no lobi taki furu te mamanten’. Ma toku, te wi e taki nanga trawan awinsi wi no firi fu du dati, dan wi e sori taki wi abi lobi, èn taki wi ’no e suku wi eigi bun’.​—1 Kor. 13:5.

13. Fa Timoteyus ben musu si en Kresten brada nanga sisa, soleki fa Paulus ben gi en deki-ati?

¹³ Paulus ben gi a yonkuman Timoteyus a deki-ati fu sori lespeki gi ala sma na ini a gemeente. (Leisi 1 Timoteyus 5:1, 2.) Na so a musu de tu, taki wi musu si Kresten di owru moro wi, leki wi mama èn leki wi papa. Den yonguwan wi musu si leki wi eigi brada nanga sisa, dati wani taki, leki pikin fu wi eigi papa nanga mama. Te wi abi a denki disi, dan wi Kresten brada nanga sisa no o kisi a firi taki wi no wani abi demakandra nanga den.

14. Fa wi e kisi wini te trawan e taki nanga wi fu sani di e gi wi deki-ati?

¹⁴ Te wi e taki nanga trawan fu sani di e gi den deki-ati, dan wi kan yepi den fu go na fesi na ini a tru anbegi, èn wi kan meki den firi koloku. Wan brada di e wroko na a bijkantoro, e memre fa a ben de di a no ben de so langa ete na Bethel. Den tra moro owru brada nanga sisa na Bethel ben e taki furu nanga en. A deki-ati di den gi en, ben gi en a firi taki a Bethelfamiri lobi en. Now a e teki na eksempre fu den brada nanga sisa dati, èn a e taki tu nanga trawan na Bethel.

Sakafasi e yepi wi fu meki vrede

15. San e sori taki son leisi wi kan kisi trobi nanga trawan?

¹⁵ Eodia nanga Sentike ben de tu Kresten sisa fu a gemeente na ini Filipi fu owruten. Soleki fa a sori, dan den tu sisa disi ben kon abi wan pikin trobi, èn den no ben man lusu a trobi disi (Fil. 4:2, 3). Paulus nanga Barnabas ben kon abi  wan bun bigi trobi, èn tra sma ben kon sabi a tori. A trobi disi meki taki den tu man disi no ben wroko makandra fu wan pisi ten (Tori. 15:37-39). Den tori disi e sori taki son leisi tru anbegiman kan kisi trobi nanga makandra. Yehovah e gi wi rai di kan yepi wi fu lusu den sortu problema dati, èn fu de mati baka fu makandra. Ma Yehovah wani taki wi du wan sani.

16, 17. (a) Fu san ede a prenspari fu sori sakafasi te wi wani lusu wan trobi? (b) Fa a tori fu Yakob nanga Esau e sori o prenspari a de fu abi sakafasi?

¹⁶ Kon meki wi taki dati yu nanga wan mati e go koiri nanga wagi. Fosi yu man rèi a wagi, dan yu musu gebroiki a sroto fu start a wagi. Na wan agersi fasi, wi abi wan sroto fanowdu tu fu lusu wan trobi. A sroto dati na sakafasi. (Leisi Yakobus 4:10.) Sakafasi e yepi den wan di abi trobi nanga makandra fu fiti Bijbel gronprakseri. Wan eksempre na ini Bijbel, e sori taki disi tru.

¹⁷ Esau ben kon atibron srefisrefi tapu en twelengi brada Yakob. Tutenti yari na fesi, Yakob ben kisi a reti di Esau ben abi leki a fosi pikin. Fu dati ede Esau ben wani kiri en brada. Baka wan pisi ten, den tu brada disi ben o miti makandra, èn „a sani disi frede Yakob srefisrefi èn a bigin bruya”. Yakob ben frede taki Esau ben o du ogri nanga en. Ma di den tu brada miti, Yakob du wan sani di Esau no ben fruwakti. „Di a ben e waka go miti en brada, a boigi” gi en. San pasa baka dati? „Esau lon go miti Yakob. A brasa en, a bosi en, dan den ala tu bigin krei.” Esau no feti moro nanga en brada. Aladi Esau ben abi bita-ati gi en brada, toku en ati kon kowru fu di Yakob sori sakafasi.​—Gen. 27:41; 32:3-8; 33:3, 4.

18, 19. (a) Te wi abi wan pikin trobi nanga wan tra sma, dan fu san ede a prenspari taki wi srefi e meki muiti fu fiti Bijbel rai? (b) Fu san ede wi no musu lasi-ati te a tra sma no wani meki en bun a fosi leisi te wi e taki nanga en?

¹⁸ Bijbel e gi wi heri bun rai di kan yepi wi fu lusu trobi (Mat. 5:23, 24; 18:15-17; Ef. 4:26, 27). * Ma efu wi no abi a sakafasi fu fiti den rai dati, dan a o muilek gi wi fu meki vrede nanga trawan. Wi no musu wakti teleki trawan sori sakafasi. Ma wi fu wi sei musu meki muiti tu fu sori sakafasi.

¹⁹ Efu wi e suku fu meki vrede èn wi no abi bun bakapisi a fosi leisi, dan wi no musu lasi-ati. Kande a tra sma abi pikinso ten fanowdu fu kisi ensrefi. Den brada fu Yosef no ben handri bun nanga en. Baka wan langa pisi ten den miti Yosef baka, èn na a ten dati a ben abi wan hei posisi na ini Egepte. Ma te fu kaba, den brada fu Yosef ben kenki, èn den begi en fu gi den pardon. Yosef gi den pardon, èn den manpikin fu Yakob ben kon tron wan pipel di kisi a grani fu tyari a  nen fu Yehovah (Gen. 50:15-21). Te wi e tan libi na ini vrede nanga wi Kresten brada nanga sisa, dan wi e meki taki wánfasi nanga prisiri de na ini a gemeente.​—Leisi Kolosesma 3:12-14.

Meki wi lobi makandra „nanga san wi e du èn nanga waarheid”

20, 21. San wi kan leri fu a wasi di Yesus wasi den futu fu den apostel fu en?

²⁰ Syatu bifo Yesus dede, a ben taigi den apostel fu en: „Mi gi unu na eksempre, so taki unu kan du tu san mi du gi unu” (Yoh. 13:15). Bifo Yesus ben taigi den a sani disi, a ben wasi den futu fu den 12 apostel fu en. Yesus no ben du a sani dati soso fu di a ben de wan gwenti di sma ben abi na a ten dati, èn a no ben du dati soso fu di a ben wani sori switifasi. Fosi Yohanes e fruteri fa Yesus wasi den futu fu den apostel, a ben skrifi: „[Yesus] ben lobi den sma fu en di ben de na grontapu, iya, a ben lobi den te na a kaba” (Yoh. 13:1). Na fu di Yesus ben lobi den disipel fu en, meki a du wan wroko di wan srafu ben musu du. Now, den ben musu sori sakafasi, èn den ben musu du sani gi makandra na wan lobi-ati fasi. Iya, te wi abi trutru lobi gi wi Kresten brada nanga sisa, dan wi sa sori taki wi e broko wi ede nanga den.

²¹ Na apostel Petrus ben frustan san Yesus, a Manpikin fu Gado, ben wani leri en di a wasi den futu fu en. A ben skrifi: „Now di unu krin un libi fu di unu gi yesi na a waarheid, so taki unu kon lobi un brada sondro fu hoigri, dan un musu lobi makandra komoto fu a dipi fu un ati” (1 Petr. 1:22). Masra ben wasi den futu tu fu na apostel Yohanes. Na apostel dati ben skrifi: „Un pikin, no meki wi lobi makandra nanga wortu nomo noso nanga san wi e taki, ma sosrefi nanga san wi e du èn nanga waarheid” (1 Yoh. 3:18). Meki a de so taki wi e du sani di e sori taki wi lobi wi Kresten brada nanga sisa.

[Futuwortu]

Yu e memre disi ete?

• Na sortu fasi wi kan ’opo wi ati’ fu sori lobi gi trawan?

• San o yepi wi fu meki ten gi trawan?

• Fu san ede a prenspari fu sori sakafasi te wi wani meki vrede nanga trawan?

• San musu meki taki wi e broko wi ede nanga wi Kresten brada nanga sisa?

[Aksi fu a tori disi]

[Prenki na tapu bladzijde 21]

Gi yu Kresten brada nanga sisa wan switikon

[Prenki na tapu bladzijde 23]

Teki ibri okasi fu abi demakandra nanga trawan