„Den regtfardikiwan sa brenki leki a son”
„Den regtfardikiwan sa brenki leki a son”
„Na a ten dati den regtfardikiwan sa brenki leki a son na ini a kownukondre fu den Tata.”—MAT. 13:43.
1. Sortu agersitori Yesus gebroiki fu tyari difrenti sani di abi fu du nanga a Kownukondre, kon na krin?
YESUS KRESTES ben gebroiki furu agersitori fu fruklari difrenti sani di abi fu du nanga a Kownukondre. A „gebroiki agersitori fu fruteri den sma ala den sani disi. Iya, a no ben taki nanga den sondro fu gi wan agersitori” (Mat. 13:34). Na ini den agersitori di abi fu du nanga a sai di sma e sai siri fu den tru tori fu a Kownukondre, Yesus sori krin taki wan sma musu abi wan bun ati fu man teki a Kownukondre boskopu. A ben sori krin tu taki na Yehovah e meki a siri gro (Mark. 4:3-9, 26-29). Yesus ben gi wan agersitori tu fu sori taki moro nanga moro sma e gi yesi na a Kownukondre boskopu, aladi a no ala ten dati de fu si wantewante (Mat. 13:31-33). Boiti dati, a sori tu taki a no ala sma di arki a Kownukondre boskopu na trutru borgu fu a Kownukondre dati.—Mat. 13:47-50. *
2. San a bun siri e prenki na ini na agersitori di Yesus ben fruteri fu na aleisi nanga a takru wiwiri?
2 Ma wan fu den agersitori fu Yesus e poti prakseri na den sma di Gado e tyari kon na wán fu tiri makandra nanga Yesus na ini a Kownukondre fu en. Wi sabi na agersitori disi leki a wan fu na aleisi nanga a takru wiwiri, èn a skrifi na Mateyus kapitel 13. A tru taki Yesus ben taigi wi na ini wan tra agersitori, taki a siri di sai na „a wortu fu a kownukondre”. Ma na ini na agersitori disi, a e fruteri wi taki a bun siri di sai, e prenki wan tra sani, namku „den manpikin fu a kownukondre” (Mat. 13:19, 38). Den sma disi a no borgu fu a Kownukondre, ma den na „manpikin” fu a Kownukondre, noso sma di e kisi a Kownukondre leki gudu.—Rom. 8:14-17; leisi Galasiasma 4:6, 7.
Na agersitori fu na aleisi nanga a takru wiwiri
3. Fruklari sortu problema e miti a man na ini na agersitori, èn sori fa a e bosroiti fu lusu a problema.
3 Disi na a agersitori: „A kownukondre fu hemel de leki wan man di ben sai bun siri na ini a gron fu en. Di sma ben e sribi, dan a feanti fu en kon èn a sai takru wiwiri na mindri na aleisi, baka dati a gowe. Di na aleisi bigin gro èn a gi nyanyan, dan a takru wiwiri ben kon de fu si tu. Dati meki den srafu fu a masra fu na oso kon taigi en: ’Masra, a no bun siri yu ben sai na ini a gron fu yu? Dan fa a du kon taki takru wiwiri e gro na ini a gron?’ A masra taigi den: ’Wan feanti, wan man, du disi.’ Den taigi a masra: ’Yu wani taki wi go hari a takru wiwiri puru?’ A taki: ’Nôno, bika te unu e hari a takru wiwiri puru, dan unu ben sa kan hari na aleisi puru tu. Meki den ala tu gro makandra teleki a ten doro fu koti nyanyan; dan te a kotiten doro, mi sa taigi den sma di musu koti a nyanyan: Un musu hari a takru wiwiri puru fosi, dan un musu tai den na ini bondru fu bron den; baka dati un musu tyari na aleisi kon na wan fu poti en na ini mi maksin.’”—Mat. 13:24-30.
4. (a) Suma na a man na ini na agersitori? (b) O ten Yesus bigin sai a siri disi, èn fa a du dati?
4 Suma na a man di e sai a bun siri na ini en gron? Yesus e piki na aksi dati bakaten, te a e fruteri den disipel fu en a sani disi: „A man di ben sai a bun siri na a Manpikin fu libisma” (Mat. 13:37). Na ini den dri nanga afu yari di Yesus, a „Manpikin fu libisma”, ben e du a diniwroko fu en na grontapu, dan a sreka a gron fu prani sani na ini (Mat. 8:20; 25:31; 26:64). Èn sensi a Pinksterfesa fu a yari 33, Yesus bigin sai a bun siri, noso „den manpikin fu a kownukondre” èn a e du dati teleki now. Soleki fa a sori, dan a wroko disi pasa di Yesus, leki a sma di e teki presi gi Yehovah, bigin salfu den disipel fu en nanga santa yeye, so taki den tron manpikin fu Gado * (Tori. 2:33). A bun siri gro kon tron lepi aleisi. Sobun, Yesus sai a bun siri fu tyari ala den sma kon na wán te fu kaba di ben o tiri makandra nanga en na ini a Kownukondre fu en.
5. Suma na a feanti na ini na agersitori, èn suma a takru wiwiri e prenki?
5 Suma na a feanti, èn suma na a takru wiwiri? Yesus ben taigi wi taki a feanti „na Didibri”. Bijbel e taki dati a takru wiwiri na „den manpikin fu na ogriwan” (Mat. 13:25, 38, 39). A kan taki Yesus ben e taki fu wan takru wiwiri di gersi na aleisi pransun te a yongu ete. Disi na wan moi fasi fu agersi den falsi Kresten di e du neleki den na manpikin fu a Kownukondre, aladi den no e du a wani fu Gado! Den Kresten disi di abi hoigrifasi, e taki dati den na bakaman fu Krestes, ma fu taki en leti, den na „pikin” fu Satan Didibri.—Gen. 3:15.
6. O ten a takru wiwiri bigin opo kon, èn na sortu fasi sma ben „e sribi” na a ten dati?
6 O ten den Kresten di e prenki a takru wiwiri opo kon? Yesus e taki: „Di sma ben e sribi” (Mat. 13:25). O ten dati ben de? Wi e kisi piki tapu na aksi dati te wi e luku san na apostel Paulus ben taigi den owruman na ini Efeise: „Mi sabi taki te mi gowe, dan ogri busidagu sa kon na un mindri èn den no sa handri na wan switi fasi nanga den skapu; sma sa opo na un mindri, èn den sa taki kruktu sani fu hari den disipel kon na den baka” (Tori. 20:29, 30). Baka dati, Paulus gi den owruman dati a rai fu tan na ai. Baka di den apostel di ben e „gens” falsi leri, bigin dede, dan furu Kresten fadon na sribi na wan agersi fasi. (Leisi 2 Tesalonikasma 2:3, 6-8.) Na a ten dati bun furu Kresten bigin fadon komoto na bribi.
7. A de so taki sonwan fu den aleisi pransun tron takru wiwiri? Fruklari dati.
7 Yesus no ben taki dati na aleisi ben o tron takru wiwiri, ma a ben taki dati a takru wiwiri ben sai na mindri den aleisi pransun. Sobun, na agersitori disi no abi fu du nanga trutru Kresten di e fadon komoto fu a tru bribi. Na presi fu dati, na agersitori e poti prakseri na a muiti di Satan e du fu pori a Kresten gemeente, fu di a e meki ogri sma kon na ini. Na a ten di a lasti apostel Yohanes kon owru, dan a ben de krin fu si kaba taki sma ben e drai baka gi a bribi.—2 Petr. 2:1-3; 1 Yoh. 2:18.
„Meki den ala tu gro makandra teleki a ten doro fu koti nyanyan”
8, 9. (a) Fu san ede den sma di ben arki Yesus ben o frustan a komando di a Masra fu na oso ben gi den srafu fu en? (b) Fa na aleisi nanga a takru wiwiri gro makandra na ini den hondrohondro yari di pasa?
8 Den srafu fu a Masra e fruteri en san na a problema, èn den e aksi en: „Yu wani taki wi go hari a takru wiwiri puru?” (Mat. 13:27, 28) Kande a sa fruwondru yu san a Masra e piki den srafu. A e taigi den fu meki na aleisi nanga a takru wiwiri gro makandra teleki a kotiten doro. Den disipel fu Yesus ben o frustan a komando dati. Den ben sabi taki a no ben o makriki fu si san ben de aleisi èn san ben de takru wiwiri. Den sma di ben abi ondrofeni leki gronman, ben o si tu taki den rutu fu a takru wiwiri ben frekti densrefi nanga den di fu den aleisi pransun. * Dati meki wi kan frustan fu san ede a Masra e taigi den fu wakti!
9 Na so a de tu taki na ini den hondrohondro yari di pasa, den difrenti kerki fu Krestenhèit kon abi bun furu memre. Na agersi fasi, den memre disi na takru wiwiri. Fosi, den memre disi ben de fu feni na ini den Lomsu Kerki èn na ini den Orthodox Kerki, èn bakaten den ben de fu feni tu na ini den someni Protestant grupu di opo kon. Na a srefi ten, wan tu siri fu a bun aleisi sai na heri grontapu. Soleki fa na agersitori e sori, dan a masra fu na oso wakti nanga pasensi, teleki a kotiten ben doro. A kotiten disi no ben o teki langa.
A kotiten di sma ben e wakti langa ten kaba
10, 11. (a) O ten a kotiwroko e bigin? (b) Fa na agersi aleisi e tyari kon na wán na ini Yehovah en maksin?
10 Yesus e taki: „A kotiwroko na a kaba fu wan grontapu sistema, èn den sma di e koti a nyanyan na den engel” (Mat. 13:39). Na ini den lasti dei fu na ogri sistema disi, wan pratiwroko e pasa. Gado e tyari den manpikin fu a Kownukondre kon na wán, èn a e prati den fu den wan di de leki takru wiwiri. Disi na san na apostel Petrus e taigi wi fu a tori dati: „A reti ten doro fu a krutu bigin na a oso fu Gado. We, efu a e bigin na wi fosi, dan san sa de a kaba fu den wan di no e gi yesi na a bun nyunsu fu Gado?”—1 Petr. 4:17.
11 Syatu baka di den lasti dei, noso „a kaba fu a sistema disi” bigin, Gado bigin krutu den wan di ben e taki dati den na trutru Kresten. Na so a ben o kon na krin efu trutru den ben de „manpikin fu a kownukondre”, noso „manpikin fu na ogriwan”. A „fosi” sani di pasa, na taki Babilon a Bigiwan fadon, èn „baka dati” den manpikin fu a Kownukondre tyari kon na wán na a bigin fu a kotiten (Mat. 13:30). Ma fa den engel e tyari na agersi aleisi kon na wán now na ini a maksin fu Yehovah? Den manpikin fu a Kownukondre di dede kaba, kisi libi na hemel, èn den wan di de na libi ete tron memre fu a Kresten gemeente di de na heri grontapu. Na ini a gemeente disi, den e anbegi Gado na a yoisti fasi èn den e kisi blesi nanga kibri fu Gado.
12. O langa a kotiwroko o teki?
12 O langa a krutu disi o teki? Yesus ben taki dati wan „kotiwroko” ben o pasa, èn nofo tron dati na wan spesrutu pisi ten (Openb. 14:15, 16). Na ini a ten fu a kaba, Gado o krutu ibriwan fu den salfuwan. Te a kaba krutu ibriwan fu den, dan den sa kisi wan marki fu a lasti leisi.—Openb. 7:1-4.
13. Fa den sma di de leki takru wiwiri e meki trawan du sondu, èn fa den e du kruktudu?
13 Suma den engel o puru komoto fu a Kownukondre? Fa den sma disi e meki trawan du sondu, èn fa den e du kruktudu? (Mat. 13:41) Den kerki fesiman fu Krestenhèit di de leki takru wiwiri, kori milyunmilyun sma na ini den hondrohondro yari di pasa. Den du dati nanga yepi fu leri di e pori a nen fu Gado. Den leri „e meki trawan du sondu”. Wan fu den leri dati e taki dati libisma sa kisi strafu fu têgo na ini hel. Wan tra leri na a dangra leri di e taki dati Gado na dri gado na ini wán. Furu kerki fesiman no de wan bun eksempre gi den skapu fu den. Den fesiman disi e du sutadu fu di den na mati fu a grontapu disi. Sonwan fu den e tyari densrefi na wan fasi di no fiti kwetikweti, èn den e du dati sondro fu syen (Yak. 4:4). Boiti dati, Krestenhèit moro nanga moro e tapu ai gi den takru sani di den memre fu den e du. (Leisi Yudas 4.) Aladi den sma disi e tyari densrefi na a fasi dati, toku den e tan du neleki den na sma di abi den fasi fu Gado èn di e dini En nanga den heri ati. Dati meki den manpikin fu a Kownukondre breiti srefisrefi taki den poti aparti fu den sma dati di de leki takru wiwiri. Den breiti tu taki den falsi leri di e meki sma du sondu, no abi krakti na den tapu!
14. Fa den wan di de leki takru wiwiri e krei èn e kaw tifi?
14 Fa den wan di de leki takru wiwiri e krei èn e kaw tifi? (Mat. 13:42) „Den manpikin fu na ogriwan” e nyan pina fu di „den manpikin fu a kownukondre” tyari kon na krin taki den na a takru wiwiri di e panya falsi leri. A e hati den manpikin fu na ogriwan tu taki a yepi di den e kisi fu den memre fu den kerki fu den, e kon moro mendri dei fu dei. Wan tra sani di e hati den, na taki den no abi krakti moro tapu den memre fu den kerki fu den.—Leisi Yesaya 65:13, 14.
15. Fa den engel o bron den Kresten di de leki takru wiwiri?
15 Fa den engel hari den wan puru di de leki takru wiwiri, èn fa den bron den nanga faya? (Mat. 13:40) A sani disi e sori san o pasa te fu kaba nanga a takru wiwiri. Te Bijbel e taki dati den engel sa bron den nanga faya, dan dati wani taki dati den o kisi têgo pori (Openb. 20:14; 21:8). Den Kresten di de leki takru wiwiri, noso den bedrigiman, sa kon na wan kaba na a ten fu a „bigi banawtu”.—Mat. 24:21.
Den „sa brenki leki a son”
16, 17. San Maleaki ben taki fu a tempel fu Gado, èn fa a profeititori dati bigin kisi wan kontru?
16 O ten den wan di de leki bun aleisi „sa brenki leki a son”? (Mat. 13:43) Luku san Maleaki ben taki fu a krin di Gado ben o krin a tempel: „’Wantronso a tru Masra di unu e suku, sa kon na en tempel, makandra nanga a boskopuman fu a frubontu èn di unu lobi. Luku! A sa kon seiker’, Yehovah fu den legre taki. ’Ma suma sa frudrage a dei te a o kon, èn suma sa man tan tanapu te a sori ensrefi? Bika a sa de leki a faya fu wan sma di e soifri sani èn leki a sopo fu den wasiman. Èn a musu sidon leki wan sma di e soifri èn e krin solfru èn a musu krin den manpikin fu Leifi; èn a musu meki den kon soifri leki gowtu èn leki solfru, èn seiker den sa tron gi Yehovah sma di e pristeri wan presenti ofrandi ini regtfardikifasi.’”—Mal. 3:1-3.
17 Na ini a ten disi, a profeititori disi bigin kisi en kontru na ini 1918 di Yehovah, makandra nanga Yesus Krestes, „a boskopuman fu a frubontu” kon luku na agersi tempel. Maleaki e taigi wi san e pasa te Yehovah kaba krin a tempel. A e taki: „Dan unu o man si krin baka suma na wan reti-ati sma èn suma na wan ogri-ati sma, suma e dini Gado èn suma no e dini en” (Mal. 3:18). A de krin fu si taki a kotiten bigin, fu di den tru Kresten di kisi deki-ati baka, e du a wroko fu den nanga moro faya now.
18. San ben o pasa na ini a ten fu wi, soleki fa Danièl ben taki?
18 A profeiti Danièl ben taki disi fu a ten fu wi: „Den wan di man si a dipi fu wan tori, o skèin leki a krin leti na loktu. Boiti dati, den wan di e yepi furu sma fu kon de reti-ati sma, o kon de leki a leti fu stari di e skèin fu ala ten, iya, fu têgo” (Dan. 12:3). Suma na den wan disi di e skèin so krin? We, dati na den salfu Kresten, noso a bun aleisi di Yesus ben taki fu en na ini na agersitori fu na aleisi nanga a takru wiwiri! A bigi ipi fu sma di de leki skapu èn di e kon bigi moro nanga moro, e si krin taki Yesus ’hari’ den Kresten di de leki takru wiwiri, ’puru’ na mindri den wan di de leki aleisi. Fu di den e horibaka gi den salfuwan di de na grontapu ete leki memre fu na Israel fu Gado, meki den wan disi di o tron borgu fu a Kownukondre e meki a leti fu den skèin tu na ini a dungru grontapu disi.—Sak. 8:23; Mat. 5:14-16; Fil. 2:15.
19, 20. San „den manpikin fu a kownukondre” e wakti fayafaya? Na san wi o poti prakseri na ini a tra artikel?
19 Na ini a ten disi, „den manpikin fu a kownukondre” e wakti fayafaya fu kisi a tumusi moi grani fu libi na hemel (Rom. 8:18, 19; 1 Kor. 15:53; Fil. 1:21-24). Ma teleki a ten dati, den musu tan gi yesi na Gado, den musu tan skèin a leti fu den, èn a musu de krin fu si taki den de tra fasi leki „den manpikin fu na ogriwan” (Mat. 13:38; Openb. 2:10). A no de fu taki dati wi alamala musu de nanga tangi taki wi kisi a grani fu si san na a bakapisi fu a ’hari di den engel hari’ a takru wiwiri puru na ini a ten fu wi!
20 Ma fa den manpikin fu a Kownukondre e wroko makandra nanga a bigi ipi di abi a howpu fu libi fu têgo na grontapu leki borgu fu a Kownukondre? Na ini a tra artikel wi sa kisi piki tapu na aksi disi.
[Futuwortu]
^ paragraaf 1 Efu yu wani sabi moro fu den agersitori disi, dan luku A Waktitoren fu 15 yuli 2008, bladzijde 12-21.
^ paragraaf 4 Na ini na agersitori disi, a sai di a man e sai a siri no e prenki a preikiwroko di wi e du fu meki disipel, èn di ben o tyari nyun sma kon na wán fu tron salfu Kresten. Luku san Yesus ben taki fu a bun siri di sai na ini den gron: „Dati na den manpikin fu a kownukondre.” Yesus no ben taki dati den „o tron” den manpikin fu a kownukondre. A sai di a man e sai a siri, abi fu du nanga den manpikin fu a Kownukondre di e tron salfuwan. Den manpikin disi de na heri grontapu.
^ paragraaf 8 Den rutu fu a takru wiwiri e frekti densrefi so te nanga den di fu den aleisi pransun, taki te yu ben o rutu den puru fosi na aleisi ben lepi, dan den aleisi pransun ben o dede. —Luku Inzicht in de Schrift, Deel 1, bladzijde 1132.
Yu e memre disi ete?
Te wi e luku na agersitori di Yesus fruteri fu na aleisi nanga a takru wiwiri, dan san den sani disi wani taki?
• A bun siri
• A man di sai a siri
• A sai di a siri e sai
• A feanti
• A takru wiwiri
• A kotiten
• A maksin
• A krei di sma e krei, èn a kaw di sma e kaw tifi
• A faya onfu
[Aksi fu a tori disi]
[Prenki na tapu bladzijde 20]
Na a Pinksterfesa fu a yari 33, Yesus bigin sai a bun siri
[Prenki na tapu bladzijde 23]
Na ini a ten disi, na agersi aleisi e tyari kon na wán na ini a maksin fu Yehovah
[Sma di abi a reti fu a prenki]
Pictorial Archive (Near Eastern History) Est.