Mi breiti taki mi dini Yehovah, srefi di mi kisi tesi

Soleki fa Maatje de Jonge-van den Heuvel fruteri

MI ABI 98 yari. Mi ben abi a grani fu dini Yehovah 70 yari kaba, ma mi kisi tesi tu. Na a pisi ten fu a di fu Tu Grontapufeti, den poti mi na ini wan strafuman kampu pe mi ben e firi brokosaka srefisrefi wan pisi ten. A sani dati meki taki mi teki wan bosroiti, èn bakaten mi ben e sari taki mi teki a bosroiti dati. Wan tu yari baka dati, mi kisi wan tra hebi tesi. Aladi dati ben de so, toku mi e taki Yehovah tangi taki mi ben abi a grani fu dini en, srefi di mi ben e kisi tesi.

Na ini oktober 1940 mi libi kenki. Mi ben e libi na ini Hilversum, wan foto di de sowan 24 kilometer na a zuid-owstusei fu Amsterdam, na ini Bakrakondre. Na a pisi ten dati, a Nazi tirimakti ben e tiri a kondre. Mi ben trow feifi yari kaba nanga Jaap de Jonge, mi lobi masra. Wi ben abi wan umapikin di wi ben lobi srefisrefi. A ben nen Willy, èn a ben abi dri yari. Wi ben e libi na sei wan osofamiri di ben pôti, èn a no ben makriki gi a papa nanga mama fu sorgu gi den aiti pikin fu den. Toku den ben meki wan yonguman tan nanga den fu wan pisi ten, èn a ben e nyan na den tu. Mi ben aksi misrefi fu san ede den ben teki a hebi dati na den tapu tu. Di mi ben tyari pikinso nyanyan gi den, dan mi kon sabi taki a yonguman ben de wan pionier. A yonguman disi fruteri mi fu a Kownukondre fu Gado èn fu den blesi di a Kownukondre dati sa tyari kon. Den sani di mi leri naki mi ati trutru, èn heri esi mi teki a tru bribi. A srefi yari dati, mi gi misrefi abra na Yehovah èn mi teki dopu. Wan yari baka di mi teki dopu, mi masra teki a tru anbegi tu.

Aladi mi no ben sabi furu fu Bijbel, toku mi ben e frustan krin taki fu di mi tron wan Kotoigi, meki mi tron wan memre fu wan organisâsi di lanti tapu a wroko fu den. Mi ben sabi tu taki den ben poti furu Kotoigi na ini strafu-oso fu di den ben e preiki a Kownukondre boskopu. Toku, mi bigin preiki oso fu oso wantewante. Boiti dati, mi nanga mi masra ben e meki pionier nanga kring-opziener tan na wi oso. Wi ben e kibri Bijbel publikâsi tu na ini wi oso. Brada nanga sisa fu Amsterdam ben e tyari den publikâsi dati kon poti na wi. Den ben abi spesrutu baisigri fu tyari hebi lai. Den ben e tyari bun furu buku tapu den baisigri dati, èn den ben e tapu den buku nanga tapu-oli. Den brada nanga sisa dati ben abi furu lobi nanga deki-ati! Den dini den brada nanga sisa fu den aladi den ben kan lasi den libi.​—1 Yoh. 3:16.

„Yu no o tan langa tòk mama?”

Sowan siksi mun baka di mi teki dopu, dri skowtu kon na wi oso. Den bigin suku sani na ini wi oso. Den no feni a kasi di ben span nanga buku, ma den feni wan tu buku di wi ben kibri na ondro wi bedi. Wantewante den taigi mi fu go nanga den na a skowtu-oso na ini Hilversum. Di mi brasa mi umapikin Willy fu taigi en odi, dan a aksi: „Yu no o tan langa tòk mama?” Mi piki en: „Nôno, mi gudu, mama no o tan langa.” Ma a ben o teki 18 mun fosi mi ben o hori mi umapikin baka na ini mi anu, èn den mun dati ben hebi srefisrefi.

Meki mi fruteri yu san pasa. Wan skowtu tyari  mi go na Amsterdam nanga loko, èn drape den aksi mi wan lo sani. Den skowtu drape sori mi dri brada fu Hilversum, èn den aksi mi efu den na Yehovah Kotoigi. Mi taigi den: „Mi sabi wán fu den man nomo. A e kon seri merki gi wi.” Èn dati ben tru. A brada dati ben e tyari merki kon gi wi. Mi ben taki moro fara: „Ma efu yu wani sabi efu en na wan Yehovah Kotoigi, dan yu no musu aksi mi, ma yu musu aksi en.” Di mi no ben wani taki noti moro, dan den naki mi na ini mi fesi èn den sroto mi na ini wan strafu-oso kamra, pe mi ben musu tan tu mun langa. Di mi masra kon sabi pe mi ben de, a ben man tyari wan tu krosi nanga wan tu nyanyan sani kon gi mi. Baka dati, na ini augustus 1941, den seni mi go na Ravensbrück, wan strafuman kampu gi umasma. A strafuman kampu disi, pe furu ogri-ati sani ben e pasa, ben de sowan 80 kilometer na a noordsei fu Berlijn, na ini Doisrikondre.

„No broko yu ede mi gudu”

Di wi doro na ini a kampu, den taigi wi taki wi ben kan go na oso efu wi ben o teken wan papira di ben e sori taki wi no ben wani de Bijbel Ondrosukuman moro. Ma a no de fu taki dati mi no teken a papira dati. Na presi fu dati, mi ben musu gi den ala san mi ben abi èn den poti mi na ini wan wasi-oso pe mi ben musu puru ala mi krosi na mi skin. Na ini a wasi-oso dati mi miti wan tu Kresten sisa fu Bakrakondre. Den srudati na ini a strafuman kampu gi wi strafuman krosi nanga wan persi dri-uku na tapu, den gi mi wan preti tu, wan kan, nanga wan spun. A fosi neti den poti wi na ini wan kampu pe wi no ben o tan langa. Di wi ben drape mi bigin krei fu a fosi leisi, sensi skowtu grabu mi hori. Mi ben taki: „San o pasa? O langa mi o tan dyaso?” Fu taki en leti, na a ten dati mi no ben abi so wan bun matifasi ete nanga Yehovah, fu di mi ben de na ini a tru anbegi wan tu mun nomo. Mi ben musu leri so furu sani ete. A tra dei, wi ben musu go tanapu na dorosei pe den ben o kari den nen fu ibriwan fu den strafuman. A ben musu fu de so taki wan fu den sisa fu Bakrakondre ben si taki mi ben e sari. A taki: „No broko yu ede mi gudu! San den o man du nanga wi?”

Baka di den kaba kari den nen fu wi, den tyari wi go na wan tra gebow. Drape wi miti nanga hondrohondro Kresten sisa fu Doisrikondre nanga Bakrakondre. Wan tu fu den sisa fu Doisrikondre ben de na ini a gebow dati pasa wán yari kaba. Den gi mi furu deki-ati, iya, den yepi mi fu no firi brokosaka moro. San hari mi prakseri tu, na taki a gebow pe den sisa fu wi ben e tan, ben krin moro den tra gebow na ini a strafuman kampu. Boiti taki a ben krin, sma ben sabi taki sma no e fufuru, kosi, noso feti na ini a gebow fu wi. Aladi a situwâsi na ini a strafuman kampu ben takru srefisrefi, toku a gebow fu wi ben de leki wan krin èilanti na ini wan fisti se.

Na aladei libi na ini a strafuman kampu

Na ini a strafuman kampu wi ben musu wroko furu, ma wi ben e kisi pikinso nyanyan. Wi ben musu opo feifi yuru mamanten, èn syatu baka dati den ben e kari den nen fu wi. Den srudati ben e meki wi tanapu na dorosei pikinmoro wan yuru langa, èn den no ben abi trobi efu alen ben e fadon, noso efu son ben faya. Feifi yuru bakadina, baka te wi ben wroko tranga heri dei, den ben e meki wi tanapu baka na dorosei aladi den e kari wi nen. Baka dati, wi ben e nyan pikinso supu nanga brede, èn wi ben e go sribi. Baka so wan dei, mi ben weri srefisrefi.

Mi ben musu wroko tapu burugron ibri dei boiti sonde, èn mi ben musu koti tarwe nanga wan langa nefi di ben fasi na wan tiki. Mi ben musu krin gotro nanga agupen. A wroko ben  hebi, èn mi heri skin ben e kon doti. Ma toku mi ben man du a wroko dati ibri dei fu di mi ben yongu ete èn mi ben tranga. Mi ben e singi poku tu di ben abi wan Bijbel boskopu, èn na so fasi mi ben e gi misrefi deki-ati. Ma ibri dei mi ben angri fu si mi masra nanga mi umapikin.

Wi ben e kisi pikinso nyanyan nomo, ma ala den sisa ben e pruberi fu kibri wan pisi brede ibri dei. Na so fasi wi ben kan abi pikinso moro nyanyan te sonde. Tapu a dei dati, wi ben e kisi na okasi fu kon makandra èn fu taki fu Bijbel tori. Wi no ben abi nowan Bijbel publikâsi, ma mi ben e poti yesi arki te den owru sisa fu Doisrikondre ben e taki fu Bijbel tori nanga wi. Den sisa dati ben e dini Yehovah furu yari langa kaba. Wi ben hori srefi a Memrefesa fu a dede fu Krestes.

Mi firi brokosaka, mi sari fu wan sani di mi du, èn mi kisi deki-ati

Son leisi wi ben e kisi a komando fu du wroko di ben e horibaka gi na orloku fu a Nazi tirimakti. Fu di wi no e bumui nanga politiek afersi, meki ala den sisa weigri fu du a wroko dati, èn mi teki na eksempre fu den sisa dati di ben abi deki-ati. Fu di wi weigri fu du a wroko, meki wi no ben e kisi nyanyan omeni dei langa, èn wi ben musu tanapu na dorosei omeni yuru langa tu. Wan leisi, na a kowru pisi ten fu a yari, den srudati sroto wi 40 dei langa na ini wan kampu pe no wan sani ben de fu meki wan faya so taki wi ben kan hori wisrefi waran.

Ibri tron baka den srudati ben taigi wi leki Yehovah Kotoigi taki den ben o lusu wi èn taki wi ben o man go na oso efu wi ben o teken wan papira di ben e sori taki wi drai baka gi a bribi fu wi. Baka di mi ben libi na ini Ravensbrück pasa wán yari kaba, dan mi ben e firi brokosaka srefisrefi. Mi ben e angri so te fu si mi masra nanga mi umapikin, taki mi go na den srudati, mi aksi den wan fu den papira di ben e sori taki mi no wani de wan Bijbel Ondrosukuman moro, èn mi teken en.

Di den sisa kon sabi san mi du, dan wan tu fu den ben e koti pasi gi mi. Ma Hedwig nanga Gertrud, tu fu den owru sisa fu Doisrikondre, kon suku mi èn den sori mi taki den lobi mi ete. Di wi ben e wroko makandra na ini den agupen, dan na wan switi fasi den sori mi o prenspari a de fu tan gi yesi na Yehovah. Den sori mi tu taki te wi e tan du a wani fu Yehovah awinsi wi e kisi tesi, dan wi e sori En taki wi lobi En. Den sisa disi ben de leki mama gi mi, èn a lobi di den sori gi mi naki mi ati trutru. * Mi ben sabi taki mi no ben du wan bun sani, èn mi ben wani go na den srudati fu taigi den taki mi ben kenki a bosroiti di mi ben teki. Wan neti, mi taigi wan sisa san mi ben wani du. A ben musu fu de so taki wan fu den srudati na ini a kampu yere wi di wi ben e taki, bika a srefi neti dati, den puru mi na ini a kampu poti na ini wan loko di ben e go na Bakrakondre. Wan fu den ofsiri na ini a kampu taigi mi: „Yu na wan Bibelforscher (Bijbel Ondrosukuman), èn yu o tan wan fu ala ten.” Mi e memre a fesi fu na ofsiri dati heri bun ete. Mi piki en: „Iya, mi o tan wan Bijbel Ondrosukuman, efu Yehovah wani.” Toku mi ben e tan prakseri fa mi ben kan sori taki mi no ben wani drai baka moro gi a bribi fu mi.

Wan fu den sani di ben skrifi na tapu a papira na disi: „Mi e gi a dyaranti taki noiti moro mi o horibaka gi a wroko fu na organisâsi fu Bijbel Ondrosukuman di de na heri grontapu.” Mi ben sabi san mi ben musu du! Na ini yanuari 1943, syatu baka di mi doro oso, mi bigin teki prati baka na a preikiwroko. A no de fu taki dati efu a Nazi tirimakti ben o si ete wan leisi taki mi e preiki fu a Kownukondre fu Gado, den ben o gi mi hebi strafu.

Fu di mi ben wani sori Yehovah taki mi e angri fu dini en nanga mi heri ati, meki mi nanga mi masra ben e meki kring-opziener nanga brada nanga sisa di ben e tyari Bijbel publikâsi go na tra presi, kon tan na wi. Mi ben de nanga tangi trutru taki mi kisi ete wan okasi fu sori taki mi lobi Yehovah nanga a pipel fu en!

Wan hati sani miti mi

Wan tu mun bifo na orloku kon na wan kaba,  wan hati sani miti mi nanga mi masra. Na ini oktober 1944, na umapikin fu wi kon siki wantronso. Willy ben abi difteri. Heri esi a ben kon moro siki, èn baka dri dei a dede. A ben abi seibi yari nomo.

A dede fu a wan-enkri pikin fu wi ben de wan tumusi hati sani. Fu tru, den tesi di mi kisi na ini Ravensbrück, na noti te yu teki den gersi nanga a sari di mi ben e firi di a pikin fu wi dede. Ma na ini muilek ten, ala ten den wortu na ini Psalm 16:8 ben e gi wi trowstu. Drape skrifi: „Doronomo mi e prakseri Yehovah. Fu di na en de na mi reti-anusei, meki mi no o naki futu.” Mi nanga mi masra ben abi na overtoigi taki Yehovah o gi a pikin fu wi wan opobaka, soleki fa A pramisi. Wi horidoro na ini a tru anbegi, èn ala ten wi ben e preiki a bun nyunsu fayafaya. Mi masra yepi mi fu dini Yehovah nanga wan ati di furu nanga tangi, èn a du dati te na a dede fu en na ini 1969.

Mi kisi furu blesi

Wan fu den sani di gi mi prisiri ala ten na ini den someni tenti yari di pasa, na a demakandra di mi ben abi nanga furuten dinari. Neleki fa wi ben du na a pisi ten fu na orloku, na so wi ben gi kring-opziener nanga den wefi fu den na okasi fu kon tan na wi te den ben e fisiti a gemeente fu wi. Wan fu den kring-opziener nanga en wefi ben de Maarten nanga Nel Kaptein. Den ben tan 13 yari langa na ini wi oso! Di Nel ben kon siki seryusu, dan mi ben abi a grani fu sorgu gi en na ini wi oso dri mun langa te na a dede fu en. Fu di mi ben abi furu demakandra nanga a trowpaar dati, èn nanga den tra lobi-ati brada nanga sisa fu a gemeente, meki mi ben firi taki wi e libi nownow kaba na ini na agersi paradijs.

Na ini 1995, mi kisi wan fu den moro bigi blesi na ini mi libi. Mi kisi a kari fu go na wan demakandra fu memre a ten di wi ben de na ini Ravensbrück. Drape mi miti sisa di ben de makandra nanga mi na ini a strafuman kampu. Pasa 50 yari mi no ben si den sisa dati! Baka so wan langa pisi ten wi ben de makandra baka. A sani dati naki mi ati trutru, èn noiti moro mi sa frigiti a dei dati. Wi ben abi na okasi tu fu gi makandra deki-ati fu tan abi a howpu taki den lobiwan fu wi di dede, sa libi baka.

Na apostel Paulus taki na ini Romesma 15:4 dati „a fasi fa wi e horidoro èn a trowstu di Gado Buku e gi, kan gi wi howpu”. Mi e taki Yehovah tangi taki a gi wi a howpu dati. A howpu disi yepi mi fu dini en nanga tangi na ati, srefi di mi ben e kisi tesi.

[Futuwortu]

[Prenki na tapu bladzijde 10]

Mi nanga Jaap, na ini 1930

[Prenki na tapu bladzijde 10]

Willy, na umapikin fu wi, di a ben abi seibi yari

[Prenki na tapu bladzijde 12]

Na ini 1995 mi miti baka nanga lobi-ati mati. Mi de na ini a fosi rèi, a di fu tu sma komoto fu a kruktu-anusei