Frutrow tapu Yehovah, now di a kaba e kon krosibei

„Un pipel, ala ten un musu frutrow Yehovah.”​—YES. 26:4.

1. Fa den futuboi fu Gado e difrenti fu grontapusma?

WI E libi na ini wan grontapu pe milyunmilyun sma no sabi moro suma den musu frutrow noso san den musu frutrow. Kande dati e kon fu di sma hati den firi fu den tumusi furu leisi kaba, noso fu di sma no ben du san den ben fruwakti fu den. Ma den futuboi fu Yehovah de heri tra fasi! Fu di den e meki a koni fu Gado tiri den, meki den sabi taki den no musu poti den frutrow na tapu den „heihei sma” fu a grontapu disi (Ps. 146:3). Na presi fu dati, den e poti a libi nanga a tamara fu den na ini Yehovah anu, fu di den sabi taki a lobi den, èn taki ala ten a e du san a taki na ini a Wortu fu en.​—Rom. 3:4; 8:38, 39.

2. Fa Yosua ben sori taki wi kan frutrow na tapu Gado?

² Yosua fu owruten ben sori taki Gado de fu frutrow. Na a kaba fu en libi a ben taigi den tra Israelsma: „Unu sabi heri bun taki Yehovah un Gado du ala den bun sani di a ben pramisi unu. Ala den sani disi kon tru.”​—Yos. 23:14.

3. San a nen fu Gado e leri wi fu en?

³ A no soso fu di Yehovah lobi den futuboi fu en meki a e du san a pramisi, ma a e du dati moro furu fu a bun fu en eigi nen (Ex. 3:14; 1 Sam. 12:22). Na a bigin fu a Bijbelvertaling fu en, J. B. Rotherham e taki dati a nen fu Gado wani taki dati A kan tron iniwan sani di a musu tron fu man du san a pramisi. Te wi e yere a nen fu en, dan dati e memre wi taki ala  ten a e du san a taki. A kan du san a musu du na iniwan ten èn na ini wan presi. Noti muilek tumusi gi en. Ala ten Gado sa handri na wan fasi di e kruderi nanga a nen fu en (The Emphasized Bible).

4. (a) Sortu rai wi e kisi na Yesaya 26:4? (b) San wi o luku na ini na artikel disi?

⁴ Aksi yusrefi den sani disi: ’Mi sabi Yehovah bun nofo fu frutrow dorodoro na en tapu? Mi abi na overtoigi taki sani o waka bun na ini a ten di e kon fu di mi sabi taki ala sani de na ini Gado anu?’ Na ini Yesaya 26:4 skrifi: „Un pipel, ala ten un musu frutrow Yehovah, bika Yah Yehovah na a Stonbergi di e tan fu ala ten.” A no de fu taki dati Gado no e du wondru gi sma neleki fa a ben e du dati na ini Bijbel ten. Ma fu di a de „a Stonbergi di e tan fu ala ten”, meki wi kan frutrow en „ala ten”. Fa a Gado fu wi di wi kan poti wi frutrow na tapu e yepi den reti-ati anbegiman fu en na ini a ten disi? Wi sa poti prakseri na dri fasi fa wi kan du dati: A e gi wi krakti te wi e aksi en fu yepi wi fu kakafutu gi tesi; a e yepi wi te wi e kisi fu du nanga sma di no wani arki a boskopu fu wi, noso te den e gens wi; èn a e gi wi deki-ati te wi abi furu broko-ede. Te wi e poti prakseri na den tori disi, dan a bun fu luku fa yu kan kon abi moro frutrow na ini Yehovah.

Frutrow tapu Gado te yu e kisi tesi fu du san no bun

5. Te a abi fu du nanga a frutrow di wi abi na ini Gado, dan san kan de wan bigi tesi?

⁵ Kande a makriki fu frutrow tapu Yehovah te a abi fu du nanga a pramisi di a gi wi taki wi o libi na ini wan Paradijs, èn taki sma o kisi wan opobaka. Iya, wi e angri gi den sani dati. Ma kande a sa de moro muilek fu frutrow na en tapu te wi musu bosroiti efu wi o hori wisrefi na den markitiki fu en. Iya, kande a no makriki fu abi na overtoigi taki den markitiki fu en bun, èn taki wi sa de moro koloku te wi e hori wisrefi na den. Kownu Salomo ben gi wi a rai disi: „Frutrow tapu Yehovah nanga yu heri ati. No frutrow tapu yu eigi frustan. Poti prakseri na en, awinsi sortu pasi yu e waka, dan na en o meki yu pasi kon reti” (Odo 3:5, 6). Luku san a kownu e taki fu den „pasi” fu wi. Iya, a no soso a Kresten howpu di wi abi, ma wi heri libi musu sori taki wi e frutrow na Gado tapu. Fa wi kan sori taki wi e frutrow na Gado tapu te wi e kisi tesi?

6. Fa wi kan kon abi wan moro tranga overtoigi fu no du san ogri?

⁶ Wan sma di no wani du ogri, musu luku bun taki a no e prakseri fu du sondu. (Leisi Romesma 8:5; Efeisesma 2:3.) Ma fa yu kan kon abi wan moro fasti bosroiti fu no prakseri sani di no fiti? Den feifi sani disi sa de wan yepi gi wi: 1. Begi Gado fu yepi yu (Mat. 6:9, 13) 2. Denki dipi fu sma na ini Bijbel di no ben arki Yehovah èn fu sma di ben arki En. Baka dati, luku fa sani waka nanga den. * (1 Kor. 10:8-11) 3. Prakseri den problema di yu nanga den lobiwan fu yu kan kisi te yu du wan sondu. 4. Prakseri fa Gado e firi te wan fu  den futuboi fu en du seryusu sondu. (Leisi Psalm 78:40, 41.) 5. Prakseri fa Yehovah e prisiri te a e si taki wan reti-ati anbegiman fu en e weigri fu du ogri, ma e du san reti, awansi a de na mindri tra sma noso awansi a de en wawan (Ps. 15:1, 2; Odo 27:11). Yu kan sori tu taki yu e frutrow tapu Yehovah.

Frutrow tapu Yehovah te sma no wani arki wi, noso te den e gens wi

7. Sortu tesi Yeremia ben e kisi, èn fa a ben e firi son leisi?

⁷ Furu fu den brada nanga sisa fu wi e dini na ini kontren pe a no makriki fu preiki. A profeiti Yeremia ben e dini na ini so wan kontren, na ini den bruya lasti dei fu a kownukondre fu Yuda. Ibri dei a ben e kisi tesi fu di a ben e meki den krutuboskopu fu Gado bekènti, soleki fa Gado ben taigi en fu du. Fu wan pisi ten, srefi Baruk, a reti-ati sekretarsi fu en, ben e krutukrutu fu di a ben kon weri (Yer. 45:2, 3). Den sani dati ben meki Yeremia lasi-ati? We, na wan spesrutu okasi a ben e firi sari. A ben taki: „Fluku musu kon tapu a dei di mi gebore! . . . Fu san ede mi ben musu komoto na ini mi mama bere, soso fu si fa sma e wroko tranga èn fa den e sari? Fu san ede mi musu kisi syen teleki mi dede?”​—Yer. 20:14, 15, 18.

8, 9. Soleki fa Yeremia 17:7, 8 nanga Psalm 1:1-3 e taki, dan san wi musu du fu man tan gi bun froktu?

⁸ Toku Yeremia no tapu nanga a wroko fu en. A ben tan frutrow tapu Yehovah. Leki bakapisi fu dati, a reti-ati profeiti si taki den wortu fu Yehovah di skrifi na Yeremia 17:7, 8, kon tru. Drape skrifi: „Blesi o kon tapu a sma di e frutrow tapu Yehovah èn di e bribi taki Yehovah e horibaka gi en. A o tron leki wan bon di prani na sei watra èn di sutu en rutu go na wan liba. Te dreiten doro, a no o firi en. Na presi fu dati a o abi furu wiwiri. Awinsi dreiten hori wan heri yari langa, toku a no o bruya. A no o tapu fu gi froktu.”

⁹ Yeremia ben de neleki wan froktu bon di e gro bun fu di a „prani na sei watra”, noso di prani na ini wan froktudyari di abi gotro di lai nanga watra. Noiti Yeremia ben ’tapu fu gi froktu’. A no ben meki den ogri-ati sma di ben e spotu en, abi krakti na en tapu. Na presi fu dati, a tan krosibei fu a Sma di e gi „watra” di e hori sma na libi, èn a ben e gi yesi na ala san Yehovah ben taigi en (Leisi Psalm 1:1-3; Yer. 20:9). Yeremia na trutru wan moi eksempre gi wi, spesrutu gi den futuboi di musu dini Gado na ini kontren pe sma no wani arki a boskopu fu den! Efu yu de na ini so wan situwâsi, dan tan frutrow dorodoro tapu Yehovah, fu di a sa yepi yu fu horidoro aladi yu e „meki en nen bekènti na trawan”.​—Hebr. 13:15.

10. Sortu blesi wi e kisi, èn san wi musu aksi wisrefi?

¹⁰ Yehovah gi wi furu sani di kan yepi wi nanga den broko-ede di wi e kisi na ini den lasti dei disi. Fu eksempre, a gi wi a heri Bijbel, di den brada e vertaal na wan soifri fasi na ini moro nanga moro tongo. Nanga yepi fu „a getrow èn koni srafu” Yehovah e gi wi yeye nyanyan na a reti ten. Èn a gi wi bun furu brada nanga sisa di e horibaka gi wi, èn di wi e miti na den gemeente konmakandra èn na den bigi konmakandra. Yu e du muiti fu kisi wini fu den seti disi? Ala sma di e du dati „o bari fu prisiri fu di den abi wan bun ati”. Ma den sma di no wani gi yesi na Gado, ’o bari fu di den ati e hati èn den o bari krei fu di den lasi-ati krinkrin’.​—Yes. 65:13, 14.

Frutrow tapu Gado te yu abi broko-ede

11, 12. Te wi e luku den problema na ini a grontapu disi, dan san na a moro koni sani fu du?

¹¹ A libisma famiri e sungu gowe na ini problema di e kon lai moro nanga moro, soleki fa Bijbel ben taki na fesi (Mat. 24:6-8; Openb. 12:12). Te wan trutru frudu e kon, dan a fosi sani di sma e du, na taki den e lon go na wan moro hei presi, noso den e kren go na tapu a daki fu wan oso. Iya, den e go na tapu iniwan hei presi di den kan feni. Na so a de tu taki, fu  di a grontapu disi e kisi moro problema, meki milyunmilyun sma e suku kibri na agersi hei presi soleki bangi, politiek organisâsi, kerki, noso sabidensi. Ma nowan fu den sani disi kan kibri den trutru (Yer. 17:5, 6). Na a tra sei, den futuboi fu Yehovah sa kisi trutru kibri, fu di den e go na „a Stonbergi di e tan fu ala ten” (Yes. 26:4). A psalm skrifiman ben taki: [Yehovah] „de leki wan stonbergi gi mi èn a e frulusu mi. A de leki wan bergi pe mi kan lon go kibri.” (Leisi Psalm 62:6-9.) Fa wi kan kisi kibri na a Stonbergi disi?

¹² Te wi e gi yesi na a Wortu fu Yehovah, dan wi o tan krosibei fu en. Ma nofo tron a koni fu libisma no e kruderi nanga a Wortu fu Gado (Ps. 73:23, 24). Fu eksempre, sma di e meki libisma denki tiri den, ben kan taki: ’Yu e libi wán leisi nomo, sobun nyan bun fu a libi.’ ’Suku fu meki nen.’ ’Meki furu moni.’ ’Bai disi, bai dati.’ ’Go koiri luku tra kondre.’ Ma Gado e gi wi a koni rai disi: „Meki den wan di e gebroiki den sani fu grontapu, de leki sma di no e gebroiki den sani fu grontapu dorodoro; bika a komedi-prei fu grontapu e kenki” (1 Kor. 7:31). Yesus e gi wi a rai tu fu poti Kownukondre afersi na a fosi presi ala ten. Na so wi sa kibri „gudu na ini hemel”, èn noiti wi sa lasi den gudu dati.​—Mat. 6:19, 20.

13. Te wi e hori 1 Yohanes 2:15-17 na prakseri, dan san wi musu aksi wisrefi?

¹³ A fasi fa yu e denki fu „grontapu” èn fu „den sani fu grontapu” e sori taki yu e frutrow dorodoro tapu Gado (1 Yoh. 2:15-17). Wi e si den blesi di wi e kisi fu Yehovah leki prenspari sani, èn wi e si en leki wan prenspari sani fu du moro na ini a diniwroko? Noso wi feni taki den sani fu grontapu prenspari moro na anbegi fu wi? (Fil. 3:8) Yu e du muiti fu tan ’hori yu ai krin’? (Mat. 6:22) A no de fu taki dati Gado no wani taki yu e si den frantwortu di yu abi leki sani di no prenspari, spesrutu te yu abi wan osofamiri fu sorgu (1 Tim. 5:8). Ma a e fruwakti taki den futuboi fu en e frutrow na en tapu, na presi taki den e frutrow tapu a grontapu fu Satan di o kisi pori.​—Hebr. 13:5.

14-16. Fa son sma kisi wini fu di den ’hori den ai krin’ èn fu di den tan poti Kownukondre afersi na a fosi presi na ini den libi?

¹⁴ Luku na eksempre fu Richard nanga Ruth di abi dri yongu pikin. Richard e taki: „Dipi na ini mi ati mi ben sabi taki mi ben kan du moro gi Yehovah. Mi ben abi wan switi libi, ma mi ben feni taki mi ben e du ala san mi ben man kaba gi Gado. Baka di mi nanga Ruth begi Yehovah, èn wi prakseri bun fu a tori, dan wi bosroiti taki mi ben o aksi a basi fu mi efu mi kan wroko fo dei na ini a wiki. Wi du dati, aladi na ekonomia fu a kondre no ben e waka bun. A basi fu mi agri nanga a tori, èn baka wán mun mi bigin wroko fo dei na ini a wiki.” Fa Richard e firi now?

¹⁵ A e taki: „A moni di mi ben kisi saka nanga 20 procent, ma now mi abi 50 dei moro na ini a yari fu de nanga mi osofamiri èn fu gi den pikin fu mi leri. Now mi e wroko tu tron so furu yuru na ini a preikiwroko leki fosi, mi abi dri tron so furu Bijbelstudie leki fosi, èn mi man teki fesi moro bun na ini a gemeente. Èn fu di mi abi moro ten fu yepi nanga den pikin, meki Ruth ben man go na ini a yepi-pionierwroko  wan tu leisi kaba. Mi abi a fasti bosroiti fu tan go so doro so langa leki mi man.”

¹⁶ Roy nanga Petina, di abi wan umapikin ete na oso, ben man seti sani, so taki den no abi fu du a grontapuwroko fu den ala dei. Na so fasi den ben kan go na ini a furuten diniwroko. Roy e taki: „Mi e wroko dri dei na ini a wiki èn Petina e wroko tu dei na ini a wiki. Boiti dati, wi froisi go tan na ini wan moro pikin oso di moro makriki fu sorgu gi. Wi ben e pionier fosi wi ben kisi a manpikin nanga na umapikin fu wi, èn noiti wi lasi na angri fu pionier. Sobun, di den pikin fu wi ben kon bigi, dan wi bigin du a furuten diniwroko baka. Den blesi di wi kisi warti moro moni srefi.”

Meki „a vrede fu Gado” kibri yu ati

17. Te a abi fu du nanga den broko-ede fu a libi, dan fa Bijbel trowstu yu?

¹⁷ Nowan fu wi sabi fa sani o waka na ini a ten di e kon, fu di ’takru ten nanga sani di wi no e fruwakti’ e miti wi alamala (Preik. 9:11). Ma awinsi wi no sabi san a tamara o tyari kon, toku dati no musu meki taki wi lasi a korostu firi di wi abi. Nofo tron na dati e pasa nanga den wan di e frede a tamara fu di den no abi wan bun matifasi nanga Gado (Mat. 6:34). Na apostel Paulus ben skrifi: „No broko un ede nanga nowan sani, ma begi Gado ala san unu wani, èn du dati fayafaya sosrefi, èn taki en tangi tu; èn a vrede fu Gado di bigi moro leki san libisma man frustan, sa kibri un ati èn un frustan.”​—Fil. 4:6, 7.

18, 19. Na sortu fasi Gado e trowstu wi? Gi wan eksempre.

¹⁸ Furu brada nanga sisa di de na ini muilek situwâsi ondrofeni fa Yehovah gi den wan korostu firi. Wan sisa e taki: „Ibri tron baka, wan datra ben pruberi fu tapu skreki gi mi, fu di a ben wani taki mi teki brudu. Wan fu den fosi sani di a ben taigi mi na disi: ’Mi yere taki yu no wani teki brudu. San na a law dati?’ Na tra okasi mi begi Yehovah na ini mi ati, èn a gi mi wan korostu firi. Mi ben firi leki mi ben tranga neleki wan stonbergi. Fu di mi no ben abi so furu brudu, meki mi ben swaki. Toku mi ben man sori a datra krin nanga yepi fu Bijbel fu san ede mi no wani teki brudu.”

¹⁹ Son leisi Gado e yepi wi nanga yepi fu lobi-ati Kresten brada nanga sisa, noso nanga yepi fu yeye nyanyan di gi na a reti ten. Kande yu yere wan brada noso wan sisa taki wan leisi: „Disi na san mi ben abi fanowdu. Na artikel disi skrifi gi mi!” Iya, awinsi na ini sortu situwâsi wi de, noso awinsi san wi abi fanowdu, Yehovah o sori taki a lobi wi efu wi e frutrow na en tapu. Fu taki en leti, wi na en „skapu” èn a gi wi a grani fu tyari en nen.​—Ps. 100:3; Yoh. 10:16; Tori. 15:14, 17.

20. Fu san ede den futuboi fu Yehovah o kisi kibri te a grontapu fu Satan o kisi pori?

²⁰ Tapu a „dei fu Yehovah en atibron” di e kon heri esi, ala den sani fu a grontapu fu Satan, di sma e poti den frutrow na tapu, o kisi pori. Gowtu, solfru, nanga tra diri sani no sa man kibri sma kwetikweti (Sef. 1:18; Odo 11:4). A wan-enkri sma di o man kibri wi, na wi „Stonbergi di e tan fu ala ten” (Yes. 26:4). Sobun, meki wi gi yesi na den regtfardiki markitiki fu en, meki wi preiki a Kownukondre boskopu awinsi sma no wani arki wi, noso awinsi den e gens wi, èn meki wi trowe wi hebi na en tapu. Na so fasi wi e sori taki wi e frutrow dorodoro tapu Yehovah. Te wi e du den sani dati, dan wi kan de seiker taki ’sani o waka bun gi wi èn wi no sa abi fu frede taki ogri o miti wi’.​—Odo 1:33.

[Futuwortu]

Yu kan tyari disi kon na krin?

Fa wi kan sori taki wi e frutrow tapu Gado

• te wi e kisi tesi fu du sani di no bun?

• te sma no wani arki a boskopu fu wi, noso te sma e gens wi?

• te wi abi broko-ede?

[Aksi fu a tori disi]

[Prenki na tapu bladzijde 13]

Te wi e hori wisrefi na den markitiki fu Gado, dan wi sa de koloku

[Prenki na tapu bladzijde 15]

„Yehovah na a Stonbergi di e tan fu ala ten”