No kon abi a yeye fu grontapu, ma a yeye fu Gado

„Wi no kisi a yeye fu grontapu, ma wi kisi a yeye di komopo fu Gado, so taki wi kan sabi den sani di Gado gi wi fu di a abi bun-ati.”​—1 KOR. 2:12.

1, 2. (a) Na ini sortu feti tru Kresten de? (b) Na sortu aksi wi sa poti prakseri?

TRU Kresten de na ini wan feti! A feanti fu wi tranga, a abi triki fasi, èn a sabi fa fu feti. A abi wan fetisani di e wroko so bun, taki a abi krakti tapu furu sma. Ma wi no musu denki taki wi no o man wini en (Yes. 41:10). Wi abi wan sani di kan kibri wi gi iniwan sani di a feanti disi wani du nanga wi.

² Fu taki en leti, a feti fu wi na wan agersi feti. A feanti fu wi na Satan Didibri, èn a moro prenspari fetisani di a e gebroiki, na a „yeye fu grontapu” (1 Kor. 2:12). A moro prenspari sani di e yepi wi fu kakafutu gi en, na a yeye fu Gado. Fu man pasa a feti disi libilibi èn fu man tan abi wan bun matifasi nanga Gado, dan wi musu aksi Gado fu gi wi a santa yeye fu en, èn wi musu sori den fasi fu a yeye dati (Gal. 5:22, 23). Ma san na a yeye fu grontapu, èn fa a du kon taki a abi krakti tapu so furu sma? Fa wi kan kon sabi efu a yeye fu grontapu abi krakti na wi tapu? Fa na eksempre fu Yesus e yepi wi fu kon sabi fa wi kan kisi a yeye fu Gado èn fa wi kan kakafutu gi a yeye fu grontapu?

Fu san ede a yeye fu grontapu de na ala sei?

3. San na a yeye fu grontapu?

³ A yeye fu a grontapu disi e komoto fu Satan, „a tiriman fu a grontapu”, èn a yeye disi e gens a santa yeye fu Gado (Yoh. 12:31; 14:30; 1 Yoh. 5:19). A yeye dati na a denki di abi krakti tapu heri grontapu. A yeye disi di abi bigi krakti tapu libisma e meki taki den e handri na wan fasi di no e kruderi nanga a wani fu Gado.

4, 5. Fa a du kon taki a yeye fu grontapu di e komoto fu Satan, de na ala sei?

⁴ Fa a du kon taki a yeye fu grontapu di e komoto fu Satan, de na ala sei? A fosi sani di Satan du, na taki a kori Eva na ini a dyari fu Eden. A overtoigi en taki a libi fu en ben o waka moro bun te a no ben o gi yesi na Gado (Gen. 3:13). A no de fu taki dati na lei a ben lei! (Yoh. 8:44) Baka dati, a gebroiki na uma fu kori Adam fu trangayesi Yehovah. Fu di Adam du dati, meki libisma tron srafu fu sondu, èn na so a du kon taki libisma e kisi a firi fu trangayesi Gado, soleki fa a yeye fu Satan wani den fu du.​—Leisi Efeisesma 2:1-3.

⁵ Satan kori bun furu engel tu, èn a sani dati meki taki den tron ogri yeye (Openb. 12:3, 4). Den engel dati ben drai baka gi Gado  wan pisi ten bifo a Frudu fu a ten fu Noa. Den engel dati ben e bribi taki a ben o moro bun fu gowe libi a posisi di Gado ben gi den na hemel, èn fu plisi den takru lostu fu den na grontapu (Yud. 6). Nanga yepi fu den ogri yeye dati, di no abi wan libisma skin moro, Satan e „kori sma na heri grontapu” (Openb. 12:9). A sari fu taki dati bun furu sma no sabi taki ogri yeye e kori den.​—2 Kor. 4:4.

A yeye fu grontapu abi krakti na yu tapu?

6. San na a wan-enkri fasi fa a yeye fu grontapu kan abi krakti na wi tapu?

⁶ Furu sma no sabi taki Satan abi krakti na den tapu, ma tru Kresten kon sabi nanga yepi fu Bijbel fa a e du dati (2 Kor. 2:11). Fu taki en leti, a yeye fu grontapu no kan abi krakti na wi tapu te wi no e gi pasi taki dati pasa. Wi sa poti prakseri na fo aksi di o yepi wi fu kon sabi efu a yeye fu Gado noso a yeye fu grontapu abi krakti na wi tapu.

7. San na wan fasi fa Satan e pruberi fu meki wi drai baka gi Yehovah?

⁷ San a prisiriten di mi abi e sori fu mi? (Leisi Yakobus 3:14-18.) Satan e pruberi fu meki wi kon abi lobi gi ogridu, so taki wi kan drai baka gi Gado. Didibri sabi taki Yehovah e tegu gi sma di lobi ogridu (Ps. 11:5). Fu dati ede, Satan e gebroiki buku, felem, poku, nanga video game fu plisi den lostu fu sma. Sonwan fu den video game disi e gi sma deki-ati fu du hurudu, nanga bigi ogridu. Satan no abi trobi efu wi lobi san bun, solanga wi lobi den takru sani tu di a wani wi fu lobi.​—Ps. 97:10.

8, 9. Sortu sani wi musu aksi wisrefi te a abi fu du nanga prisiriten?

⁸ Ma a yeye fu Gado e gi sma deki-ati fu tyari densrefi na wan krin fasi, fu lobi vrede, èn fu lobi fu sori sari-ati gi trawan. A bun te wi e aksi wisrefi a sani disi: ’A prisiriten di mi abi, e gi mi deki-ati fu kweki bun fasi?’ A koni fu Gado „no e hoigri”. Den sma di e meki a yeye fu Gado tiri den, no e fruteri trawan taki den musu libi wan krin libi, aladi densrefi lobi luku felem di e gi sma deki-ati fu du ogri nanga hurudu.

⁹ Yehovah e fruwakti taki wi e anbegi en wawan. Ma Satan sa breiti kaba te wi e du awansi wán sani nomo fu anbegi en, neleki fa a ben wani taki Yesus ben musu du (Luk. 4:7, 8). A bun te wi e aksi wisrefi a sani disi: ’A prisiriten di mi abi e gi pasi taki mi e dini Gado nanga mi heri ati? A e meki en moro muilek noso moro makriki gi mi fu kakafutu gi a yeye fu grontapu? Mi musu suku fu abi tra sortu prisiriten?’

10, 11. (a) Te a abi fu du nanga gudu, dan san a yeye fu grontapu wani wi fu du? (b) Sortu fasi a Wortu fu Gado di skrifi nanga yepi fu santa yeye e gi wi deki-ati fu abi?

¹⁰ Fa mi e denki fu gudu? (Leisi Lukas 18:24-30.) A yeye fu grontapu wani taki sma plisi „a lostu fu den ai”, èn fu dati ede a e gi den deki-ati fu abi bigi-ai èn fu feti baka gudu (1 Yoh. 2:16). A yeye disi meki taki furu sma de nomonomo fu kon gudu (1 Tim. 6:9, 10). A yeye dati wani meki wi bribi taki te wi abi furu gudu, dan sani o tan waka bun nanga wi (Odo 18:11). Ma te wi e kon lobi moni moro Gado, dan dati e sori taki Satan kon abi krakti na wi tapu. A bun te wi e aksi wisrefi a sani disi: ’A de so taki mi de nomonomo fu abi wan switi libi èn fu meki prisiri?’

¹¹ Tra fasi leki dati, a Wortu fu Gado e gi wi deki-ati fu abi a yoisti denki fu moni, èn a e gi wi a rai fu wroko tranga fu sorgu gi wisrefi èn gi wi osofamiri (1 Tim. 5:8). Den sma di e meki a yeye fu Gado tiri den, na sma di lobi fu gi trawan sani, neleki fa Yehovah e du dati. Den sma dati lobi sma moro leki den lobi sani, èn den de klariklari fu prati sani nanga trawan te den man du dati (Odo 3:27, 28). Èn noiti den e si en leki wan moro prenspari sani fu feti baka gudu, leki fu dini Gado.

12, 13. Fa a yeye fu Gado de tra fasi leki a yeye fu grontapu, èn fa a kan yepi wi fu du bun?

¹² Te mi e luku fa mi e tyari misrefi, dan sortu yeye abi krakti na mi tapu? (Leisi  Kolosesma 3:8-10, 13.) A yeye fu grontapu e gi wi deki-ati fu du san a sondu skin wani (Gal. 5:19-21). Efu wi wani kon sabi sortu yeye abi krakti na wi tapu trutru, dan wi no musu luku fa wi e handri te sani e waka bun, ma wi musu luku fa wi e handri te sani no e waka bun. Fu eksempre, san wi e du te wan brada noso wan sisa no e poti prakseri na wi, te den e hati den firi fu wi, noso te den e sondu teige wi. Boiti dati, te wi de na wi oso, dan a kan kon na krin sortu yeye abi krakti na wi tapu. A bun te wi e ondrosuku wisrefi. Aksi yusrefi a sani disi: ’A de so taki na ini den siksi mun di pasa, mi du muiti fu sori den fasi fu Krestes moro bun? Noso a fasi fa mi e taki èn e tyari misrefi e sori taki mi bigin teki den takru gwenti baka di mi ben abi fosi?’

¹³ A yeye fu Gado kan yepi wi fu ’kenki a fasi fa wi ben de fosi èn fu tapu nanga den sani di wi ben e du’. A yeye dati kan yepi wi tu fu tron „nyun sma”. Na so wi sa kon abi lobi nanga switifasi. Wi sa de klariklari fu gi trawan pardon, awansi wi abi bun reide fu mandi nanga den sma dati. Te wi feni taki sma no handri na wan reti fasi nanga wi, dan wi no sa abi ’bita-ati, wi no sa mandi, wi no sa atibron, wi no sa bari, èn wi no sa kosi’. Na presi fu dati, wi sa meki muiti fu „sori sari-ati na wan lobi fasi”.​—Ef. 4:31, 32.

14. Fa furu sma na ini grontapu e si a Wortu fu Gado?

¹⁴ Mi e lespeki den gronprakseri fu Bijbel, èn mi lobi den? (Leisi Odo 3:5, 6.) A yeye fu grontapu e gi sma deki-ati fu trangayesi a Wortu fu Gado. Den sma di abi a yeye disi, no e poti prakseri na den pisi fu Bijbel di den e si leki tori di no de prenspari. Na presi fu dati den e poti prakseri na gwenti nanga leri fu libisma (2 Tim. 4:3, 4). Son sma no abi nowan enkri lespeki gi Gado Wortu. Den sma dati feni taki Bijbel no de gi a ten disi, èn taki den sani di skrifi na ini a no tru tori. Na so den e tron sma di koni na ini den eigi ai. Den no abi nowan enkri lespeki gi den soifri markitiki fu Bijbel te a abi fu du nanga sutadu, homo-sekslibi, nanga brokotrow. Den e leri sma taki „bun ogri èn ogri bun” (Yes. 5:20). A yeye disi kon abi krakti na wi tapu? Te wi e kisi fu du nanga problema, dan wi e frutrow na tapu a koni fu libisma, noso na tapu wi eigi koni? Noso wi e du muiti fu gi yesi na a rai di Bijbel e gi?

15. Na presi taki wi e frutrow na tapu wi eigi koni, dan san wi musu du?

¹⁵ A yeye fu Gado e gi wi deki-ati fu abi lespeki gi Bijbel. Neleki a psalm skrifiman, wi e si Gado wortu leki wan lampu gi wi futu, èn leki wan leti na tapu wi pasi (Ps. 119:105). Wi no e frutrow tapu wi eigi koni, ma wi abi ala overtoigi taki Gado Wortu kan yepi wi fu kon sabi san bun èn san ogri. We no e leri nomo fu lespeki Bijbel, ma wi e leri tu fu lobi a wet fu Gado.​—Ps. 119:97.

 Teki leri fu na eksempre fu Yesus

16. San a wani taki fu „denki soleki fa Krestes e denki”?

¹⁶ Efu wi wani kisi a yeye fu Gado, dan wi musu leri fu „denki soleki fa Krestes e denki” (1 Kor. 2:16). Fu kon abi „a srefi denki di Krestes Yesus ben abi”, dan wi musu kon sabi fa a ben e gi leri, èn fa a ben e handri. Baka dati, wi musu teki na eksempre fu en (Rom. 15:5; 1 Petr. 2:21). Meki wi luku wan tu fasi fa wi kan du dati.

17, 18. (a) Te a abi fu du nanga begi, dan san Yesus ben leri wi? (b) Fu san ede wi musu „tan aksi”?

¹⁷ Begi Gado fu gi yu en santa yeye. Bifo Yesus kisi fu du nanga tesi, a ben begi Gado fu yepi en nanga a yeye fu En (Luk. 22:40, 41). Wi musu aksi Gado tu fu gi wi a santa yeye fu en. Yehovah de klariklari fu gi en santa yeye na iniwan sma di e aksi en dati nanga bribi (Luk. 11:13). Yesus ben taki: „Tan aksi, dan unu sa kisi; tan suku, dan unu sa feni; tan naki na tapu a doro, dan a doro sa opo gi unu. Bika a sma di e aksi, e kisi; a sma di e suku, e feni; a sma di e naki na tapu a doro, a doro sa opo gi en.”​—Mat. 7:7, 8.

¹⁸ Te wi begi Yehovah fu gi wi en santa yeye èn fu yepi wi, dan wi no musu de gaw fu tapu fu aksi en. Kande wi musu begi moro leisi, èn moro langa. Fosi Yehovah e piki den begi fu sma, dan son leisi a wani taki sma musu taigi en ala san de na tapu den ati, èn a wani taki den sori en tu taki den abi trutru bribi. *

19. San Yesus ben e du ala ten, èn fu san ede wi musu teki na eksempre fu en?

¹⁹ Gi yesi na Yehovah nanga yu heri ati. Ala ten Yesus ben du san e plisi en Tata. Na wan okasi, Yesus sori taki a ben o wani taki sani waka tra fasi leki fa en Papa wani. Toku a taigi en Papa nanga ala frutrow: „A no mi wani musu pasa, ma yu wani” (Luk. 22:42). Aksi yusrefi a sani disi: ’Mi e gi yesi na Gado awinsi a no makriki fu du dati?’ Wi musu gi yesi na Gado efu wi wani tan na libi. Wi musu gi yesi na Yehovah nanga wi heri ati, fu di en na wi Mekiman, a Sma di gi wi libi, èn sosrefi a Sma di e hori wi na libi (Ps. 95:6, 7). Wi musu gi yesi na Gado efu wi wani taki a feni wi bun.

20. San den sani di Yesus du ben e sori, èn fa wi kan teki na eksempre fu en?

²⁰ Wi musu sabi Bijbel bun. Di Yesus ben e kakafutu gi den tesi fu Satan, dan a ben e taki sani di a ben teki puru fu den Santa Buku fu Bijbel (Luk. 4:1-13). Di Yesus ben taki nanga den kerki fesiman di ben e gens en, dan den sani di a ben e taki ben e kruderi nanga a Wortu fu Gado (Mat. 15:3-6). Ala sani di Yesus ben e du, ben sori taki a ben sabi a wet fu Gado, èn taki a ben hori ensrefi na a wet dati (Mat. 5:17). Wi wani tan poti prakseri tu na a Wortu fu Gado di e tranga a bribi fu wi (Fil. 4:8, 9). Kande a muilek gi sonwan fu wi fu feni ten fu studeri Bijbel wi wawan èn nanga wi osofamiri. Ma na presi taki wi e wakti teleki wi feni ten, wi musu meki ten.​—Ef. 5:15-17.

21. San kan yepi wi fu kon sabi Gado Wortu moro bun, èn fu du san wi e leri?

²¹ „A getrow èn koni srafu” seti na Osofamiri Anbegi di wi kan hori ibri wiki. Na so wi abi ten fu studeri Bijbel wi wawan èn nanga wi osofamiri (Mat. 24:45). Yu e kisi wini fu a seti disi? Wan sani di kan yepi yu fu denki soleki fa Krestes e denki, na fu poti prakseri ibri wiki na sani di Yesus ben leri sma fu den tori di yu wani kon sabi moro fu den. Yu kan gebroiki na Index van Wachttoren-publikaties fu feni artikel di abi fu du nanga a tori di yu  e studeri. Fu eksempre, fu 2008 te go miti 2010 a Waktitoren gi a publiki ben abi 12 artikel na ini di ben nen „Den sani di Yesus leri wi”. Kande yu kan studeri den artikel disi. Sensi 2008 a srefi Waktitoren dati abi na artikel di nen „Abi bribi neleki den”. Den artikel disi e yepi wi fu kon abi wan moro tranga bribi. Kande yu kan poti prakseri na den artikel ten na ten te yu e hori na Osofamiri Anbegi.

Wi kan wini grontapu

22, 23. San wi musu du fu wini grontapu?

²² Efu wi wani taki a yeye fu Gado tiri wi, dan wi musu kakafutu gi a yeye fu grontapu. A no makriki fu du dati. Kande wi sa abi fu feti tranga (Yud. 3). Ma wi kan wini a feti! Yesus ben taigi den disipel fu en: „Na grontapu unu e kisi banawtu, ma hori deki-ati! Mi wini grontapu kaba.”​—Yoh. 16:33.

²³ Wi kan wini grontapu tu te wi e kakafutu gi a yeye fu en, èn te wi e du ala san wi man fu kisi a yeye fu Gado. Iya, „efu Gado de nanga wi, dan suma o man feti nanga wi?” (Rom. 8:31) Te wi e kisi a yeye fu Gado èn te wi e teki a tiri fu en soleki fa skrifi na ini Bijbel, dan wi sa abi wan korostu firi, wi sa abi vrede, wi sa de koloku, èn wi sa abi a dyaranti taki wi sa libi fu têgo na ini a nyun grontapu di sa kon heri esi.

[Futuwortu]

Yu e memre disi ete?

• Fu san ede a yeye fu grontapu de na ala sei?

• San na fo sani di wi musu aksi wisrefi?

• Te wi wani kisi a yeye fu Gado, dan san na dri sani di wi e leri fu Yesus?

[Aksi fu a tori disi]

[Prenki na tapu bladzijde 8]

Fa a du kon taki son engel tron ogri yeye?

[Prenki na tapu bladzijde 10]

Satan e gebroiki a yeye fu grontapu fu abi krakti tapu sma, ma wi kan sorgu taki a no abi krakti na wi tapu