Aksi fu leisiman

San mi musu du te mi abi wan aksi fu wan sani di mi leisi na ini Bijbel, noso te mi e suku rai fu lusu wan problema?

Odo 2:1-5 e gi wi a deki-ati fu „tan suku” koni leki wan gudu di kibri. Disi e sori taki wi musu du muiti fu ondrosuku sani, so taki wi kan feni piki tapu aksi di wi abi fu Bijbel èn rai di kan yepi wi fu lusu wi problema. Fa wi kan ondrosuku sani?

A buku Kisi wini fu a Theokrasia Diniwroko-skoro abi wan kapitel di nen „Fa fu ondrosuku sani moro fini” na tapu bladzijde 33 te go miti 38. A kapitel disi e sori fa wi kan feni piki tapu den aksi fu wi na ini den buku di „a koni srafu di de fu frutrow” gi wi (Mat. 24:45). Na tapu bladzijde 36 yu kan leisi fa yu kan gebroiki a Index van Wachttoren-publikaties. Na ini na Index yu o si wortu nanga Bijbeltekst di abi fu du nanga difrenti tori. Sobun, efu yu wani sabi wan sani fu wan wortu noso wan tekst fu Bijbel, yu kan suku a wortu noso a tekst na ini na Index, dan yu o si den artikel noso buku di e taki fu a sani di yu wani sabi. Ibri yari A Waktitoren fu 15 december abi wan Index tu pe yu kan feni difrenti tori di kon na ini den Waktitoren a yari dati. Son leisi yu no o feni a piki wantronso, sobun yu musu abi pasensi fu suku go doro. Memre taki disi de neleki yu e suku gudu di kibri, sobun a o teki ten nanga muiti fu du disi.

A no de fu taki dati den buku fu wi no e taki finifini fu son sani noso son tekst. Son leisi den buku fu wi taki fu wan Bijbeltekst di yu wani frustan moro bun, ma den no e taki fu a sani di yu wani sabi. Boiti dati, son Bijbel tori no e taki finifini fu ala sani, sobun yu kan abi aksi fu dati tu. Wi no musu denki taki ala ten wi o kisi piki tapu ala aksi wantewante. Ma te den buku no e gi piki tapu den aksi fu wi, dan wi no musu suku fu fruklari dati na wi eigi fasi. Efu wi du dati, dan a kan taki wi o go haritaki fu „aksi di e meki sma lasi ten. Den sani disi no abi noti fu du nanga sani di e kon fu Gado èn di e tranga sma bribi” (1 Tim. 1:4; 2 Tim. 2:23; Tit. 3:9). Den brada di e wroko na den bijkantoro èn na a edekantoro no kan gi piki tapu ibri aksi di wi abi fu tori di den buku fu wi no e taki fu den. Ma wi kan de seiker taki Bijbel e fruteri wi nofo fu man sabi san wi musu du na ini a libi. Te wi no e frustan wan sani ete, dan disi e gi wi na okasi fu sori taki wi e bribi trutru na ini Gado nanga en Wortu.​—Luku bladzijde 185, 186 fu a buku Kon krosibei na Yehovah.

Ma san yu kan du efu yu du ala muiti fu ondrosuku wan tori di prenspari gi yu, ma toku yu no feni noti? Yu kan taki nanga wan lepi Kresten, soleki wan fu den owruman fu a gemeente pe yu e go. Den sabi Bijbel bun èn den e dini Yehovah furu yari kaba. Efu yu abi rai fanowdu fu man lusu wan problema noso fu man teki wan bosroiti, dan den owruman o man yepi yu, fu di den de krosibei, den sabi yu èn den sabi a libi fu yu. Noiti yu musu frigiti tu taki yu kan begi Yehovah fu fruteri en ala san e moro yu. Efu yu aksi en fu meki a santa yeye tiri yu te yu e denki fu a problema fu yu, dan a o gi yu a sabi nanga a koni di yu abi fanowdu.​—Odo 2:6; Luk. 11:13.