Aksi fu leisiman

Wi man taki soifri sortu yuru fu a dei sma spikri Yesus Krestes na wan postu?

Sma aksi a sani disi, fu di a gersi leki Bijbel e taki tu difrenti sani fu a dede fu Yesus te yu e leisi san Markus skrifi èn san na apostel Yohanes skrifi fu a tori disi. Markus skrifi: „A ben de wan ten fu neigi yuru mamanten di den [srudati] spikri en na wan postu” (Mark. 15:25). Yohanes taki dati „a ben de wan ten fu twarfu yuru bakadina” di Pilatus gi Yesus na den Dyu fu den spikri en na wan postu (Yoh. 19:14-16). Bijbel sabiman fruklari a tori disi na difrenti fasi, fu di a gersi leki den tu tori disi no e kruderi nanga makandra. Ma nofo sani no skrifi na ini Bijbel di kan yepi wi fu frustan fu san ede den tu tori disi no de a srefi te a abi fu du nanga a yuru di den spikri Yesus na wan postu. Toku wi kan frustan a tori disi pikinso te wi e luku fa sma na a ten dati ben e luku a ten fu sabi o lati a de.

Na ini a fosi yarihondro den Dyu ben poti 12 yuru gi deiten èn den ben e bigin teri fu a ten te son ben e opo (Yoh. 11:9). Den ben kari a ten na wan tra fasi tu. Fu eksempre, a pisi ten fu aiti yuru te go miti neigi yuru mamanten, den ben e kari a di fu dri yuru, èn a di fu siksi yuru ben de wan ten fu twarfu yuru bakadina. Ma na den difrenti pisi ten fu a yari son ben e opo èn a ben e dongo na difrenti ten. Sobun, wan dei ben kan de moro langa noso moro syatu na den difrenti pisi ten fu a yari. Boiti dati, sma ben e luku a son fu man sabi o lati a de. Sobun, te den sma fu a ten dati ben e kari wan yuru, dan a no ben de soifri a yuru dati. Den Griki Buku fu Bijbel e taki furu tron fu a di fu dri yuru, a di fu siksi yuru, noso a di fu neigi yuru, ma nofo tron na soso fu sori sortu pisi ten fu a dei a ben de (Mat. 20:3, 5; Tori 10:3, 9, 30). Te den ben wani taki moro fini o ten wan sani pasa, dan den ben e kari den tra yuru soleki a di fu seibi yuru. (Dati na wan ten fu wán yuru bakadina.) Ma den ben e du disi, soso te a ben de prenspari fu sabi o ten wan sani pasa.​—Yoh. 4:52.

Den Bijbel buku di e taki fu a libi fu Yesus e gi a srefi ten fu den tra sani di pasa na a lasti dei di Yesus ben de na grontapu. Ala den fo buku dati e sori taki den priester nanga den owru man kon makandra baka di son dongo, dan den tyari Yesus go na Granman Pontius Pilatus fu Rome (Mat. 27:1; Mark. 15:1; Luk. 22:66; Yoh. 18:28). Mateyus, Markus nanga Lukas e taki dati fu a di fu siksi yuru, sobun fu „wan ten fu twarfu yuru bakadina” di den ben spikri Yesus na a postu kaba, teleki a di fu neigi yuru, noso „wan ten fu dri yuru bakadina”, a heri kondre ben de na dungru.​—Mat. 27:45, 46; Mark. 15:33, 34; Luk. 23:44.

Wan prenspari sani di kan meki taki a ten di den spikri Yesus na a postu no de a srefi na disi: Te wan sma ben kisi a strafu fu dede na wan postu, dan den ben e wipi en tu. Sobun, a wipi di den ben e wipi so wan sma ben de wan pisi fu a strafu. Son tron den ben e wipi en so te, taki a ben dede fosi den spikri en na a postu. Di den du disi nanga Yesus a ben musu fu hebi tu, bika a no ben man tyari en pinapostu moro. Wan tra sma ben musu tyari en (Luk. 23:26; Yoh. 19:17). Kande son sma ben e si a wipi di den wipi Yesus èn a spikri di den spikri en leki a heri strafu di a kisi, ma trawan ben e si soso a spikri di den spikri en leki a strafu. Efu disi de so, dan wi kan frustan taki den ben sa kari difrenti yuru o ten Yesus kisi strafu. Sosrefi, a no ala sma ben sa luku na a srefi ten o lati a de. Sobun, difrenti sma ben kan gi difrenti yuru o lati den spikri Yesus na a postu.

Na apostel Yohanes ben skrifi a tori disi someni tenti yari baka di Mateyus, Markus nanga Lukas ben skrifi dati. Sobun, a ben man luku san den dri trawan ben skrifi. Soleki fa a sori, dan a gersi leki a yuru di Yohanes gi no de a srefi leki san Markus gi. Ma disi e sori krin taki Yohanes no skrifi a tori fu Markus abra. Na Gado meki Yohanes nanga Markus skrifi den tori. Aladi Bijbel no e sori krin fu san ede a yuru no de a srefi, toku wi kan de seiker taki den Bijbel buku di e taki fu Yesus libi, e taki san tru.