Yehu horibaka fayafaya gi a tru anbegi

YEHU ben e horibaka gi a tru anbegi nanga en heri ati. A ben de wan man di ben e wroko tranga, a ben e du sani wantewante, a no ben e tapu en ai gi ogridu fu di a ben e sari den ogriman, a ben de fayafaya èn a ben abi deki-ati. A bun fu teki den bun maniri disi fu Yehu abra.

Yehu ben kisi wan wroko fu du na wan ten di sani no ben e go bun na ini Israel. A kondre ben e pina fu den ogri-ati sani di Iseibel ben e du. Iseibel ben de a wefi fu Kownu Akab di ben dede kaba èn a mama fu Kownu Yoram di ben e tiri na a ten dati. A ben e gi sma deki-ati fu anbegi Bâal na presi fu Yehovah, a meki sma kiri den profeiti fu Gado, èn a ben pori a pipel fu di a ben e „huru nanga falsi gado” èn a ben e du „towfruwroko” (2 Kow. 9:22; 1 Kow. 18:4, 13). Dati meki Yehovah bosroiti taki a heri famiri fu Akab, sosrefi Iseibel nanga Yoram, musu dede. Yehu ben de a sma di ben musu teki fesi fu sorgu taki disi pasa.

A fosi leisi te Bijbel e taki fu Yehu, wi e leisi taki a ben e sidon nanga den legre-edeman, na wan ten di den Israelsma ben e feti nanga den Siriasma na Ramot-Gilead. Yehu ben abi wan hei posisi na ini a legre. Kande a ben de a komandanti fu a legre fu Israel. A profeiti Elisa ben seni wan fu den profeiti go na Yehu fu salfu en leki kownu èn fu taigi en taki a ben musu kiri ibri mansma fu a famiri fu Akab di ben drai baka gi Gado.​—2 Kow. 8:28; 9:1-10.

Biginbigin di den tra legre-edeman aksi Yehu san a profeiti ben kon du, a no ben wani taigi den. Ma di den tan aksi en, a fruteri den san a profeiti taki, dan en nanga den mati fu en span anu makandra fu kiri Yoram (2 Kow. 9:11-14). Soleki fa a sori, dan sonwan fu den srudati ben de teige den wèt di Iseibel nanga en famiri ben poti na ini a kondre. A ben musu fu de so taki Yehu prakseri bun san ben de a moro bun fasi fu du a sani disi di Gado taigi en fu du.

Kownu Yoram ben kisi mankeri na ini wan feti èn a ben go na a foto Yisreyel fu kon betre. Yehu ben sabi taki efu a ben wani kisi wan bun okasi fu kiri a kownu, dan nowan sma ben musu go fruteri a tori disi na Yisreyel. A taki: „No meki nowan sma boro komoto na ini a foto fu go fruteri sma na Yisreyel san pasa” (2 Kow. 9:14, 15). Kande Yehu ben e denki taki wan tu srudati di ben de na a sei fu Yoram ben o du wan sani fu tapu en. Sobun, a ben wani du ala sani fu no meki disi pasa.

A E RÈI LEKI WAN LAWMAN!

Yehu no ben wani taki sma sabi san a ben o du, sobun esi-esi a teki en asiwagi, dan a rèi 72 kilometer fu Ramot-Gilead go na Yisreyel. Di a ben e kon krosibei fu Yisreyel, wan waktiman di ben de na tapu wan toren si „Yehu e rèi kon, makandra nanga wan bigi grupu man” (2 Kow. 9:17). Wi kan frustan taki Yehu tyari wan lo man  nanga en, so taki a ben kan de seiker taki a ben o man kiri a kownu.

A waktiman ben frustan taki na a deki-ati man Yehu ben e rèi kon na ini wan fu den asiwagi. Dati meki a taki: „A e rèi leki wan lawman” (2 Kow. 9:20). Efu a de so taki Yehu ben gwenti rèi tranga, dan wi kan frustan taki disi leisi di a kisi wan wroko fu Gado, a ben musu fu de so taki a ben e rèi leki wan lawman trutru.

Den ben seni tu boskopuman fu aksi Yehu san pasa, ma Yehu no ben wani taigi den noti. Dati meki te fu kaba a ben kan miti nanga Kownu Yoram èn a mati fu en, Kownu Ahasia fu Yuda. Den ala tu ben de na ini den eigi asiwagi. Ne Yoram aksi Yehu: „Ala sani bun, Yehu?” Nanga atibron Yehu piki en: „Fa ala sani kan go bun, efu yu mama Iseibel e huru nanga falsi gado èn efu a e du ala den towfruwroko fu en ete?” Yoram skreki di a yere disi, dan a drai fu lowe. Ma Yehu ben esi moro en! A hari en bo nanga peiri, dan a sutu Yoram na ini en ati èn na so Kownu Yoram dede na ini en asiwagi. Ahasia ben man lowe, ma bakaten Yehu suku en te a feni en, dan a meki den kiri en tu.​—2 Kow. 9:22-24, 27.

A sma na ini Akab famiri di ben o dede baka dati, ben de na ogri-ati Umakownu Iseibel. Yehu ben abi leti di a kari en wan „frufruktu uma”. Di Yehu ben e rèi kon na ini Yisreyel, a si Iseibel tapusei na ini a kownu-oso e luku kon na dorosei. Yehu no draidrai, ma wantewante a taigi den heihei man fu Kownu krin taki den musu trowe Iseibel komoto fu a fensre kon na gron. Dan Yehu meki den asi fu en traputrapu na uma disi di ben pori Israel. Baka dati Yehu kiri furu tra sma na ini a famiri fu na ogri kownu Akab.​—2 Kow. 9:30-34; 10:1-14.

Ogridu na wan sani di no bun kwetikweti, ma san wi musu frustan na taki te Yehovah ben krutu wan sma na a ten dati, a ben gebroiki den futuboi fu en fu du san a bosroiti fu du nanga a sma. Bijbel e taki: „Na Gado ben gi pasi taki Ahasia go na Yoram, fu di Gado ben abi na prakseri fu kiri Ahasia. Di Ahasia doro na Yoram, dan den ala tu hari gowe fu go miti Yehu, a granpikin fu Nimsi. Yehovah ben salfu Yehu fu kiri a heri famiri fu Akab” (2 Kron. 22:7). Di Yehu taigi sma fu puru Yoram en skin na ini na asiwagi èn fu trowe en na a gron di Nabot ben abi, a kon frustan taki na so Yehovah du san a pramisi, fu di a ben taki dati a ben o strafu Akab fu di a kiri Nabot. Boiti dati, Yehu ben kisi a komando tu fu „strafu Iseibel, fu di a kiri den profeiti di ben de [Gado] futuboi”.​—2 Kow. 9:7, 25, 26; 1 Kow. 21:17-19.

Na ini a ten disi nowan futuboi fu Yehovah e feti nanga den sma di de teige a tru anbegi. Gado taki: „Na mi o puru atibron na den tapu” (Hebr.  10:30). Ma efu den Kresten owruman e si taki wan sma wani pori a gemeente, dan a kan taki den musu abi deki-ati neleki Yehu èn den musu du wan sani (1 Kor. 5:9-13). Boiti dati, ala sma na ini a gemeente musu teki a fasti bosroiti fu no bumui moro nanga sma di puru fu a gemeente.​—2 Yoh. 9-11.

YEHU NO GI PASI TAKI SMA ANBEGI TRA GADO BOITI YEHOVAH

Baka dati, Yehu taigi Yonadab di ben e horibaka gi a tru anbegi tu, wan sani di e sori krin fu san ede a kiri den sma. A taki: „Kon nanga mi, so taki yu kan si taki mi no e gi pasi taki sma e anbegi tra gado boiti Yehovah.” Yonadab teki a kari fu Yehu, a go na ini Yehu en asiwagi, dan a rèi nanga en go na Samaria. Drape Yehu du leki en na wan mati fu den anbegiman fu Bâal. A ben „kori den, fu di a ben wani kiri den”.​—2 Kow. 10:15-17, 19.

Yehu seni boskopu go na ala sei taki a ben o tyari „wan bigi ofrandi” gi Bâal (2 Kow. 10:18, 19). Wan sabiman taki dati „na wan koni sani Yehu taki”. Den wortu di a gebroiki dyaso „wani taki nofo tron ’ofrandi’, ma sma ben e gebroiki den tu te den ben o kiri sma di drai baka gi a bribi fu den”. Fu di Yehu ben wani taki ala anbegiman fu Bâal ben o de drape te a ben o tyari na ofrandi, meki a taigi den taki den alamala musu weri moi krosi èn kon makandra na a oso fu Bâal. „Fa Yehu kaba tyari a bron-ofrandi”, a meki 80 man di ben abi fetisani kiri den anbegiman fu Bâal. Dan a meki den broko na oso fu Bâal èn a meki sma gebroiki a presi dati leki kumakoisi, so taki noiti moro wan sma ben o go anbegi wan gado drape.​—2 Kow. 10:20-27.

A tru taki Yehu kiri furu sma. Ma Bijbel e taki dati a ben de wan deki-ati man di fri Israel fu Iseibel nanga en famiri di ben e tiri a pipel na wan ogri-ati fasi. Efu wan fesiman fu Israel ben o du so wan sani, dan a ben musu fu de wan fayafaya, deki-ati man di ben o du nomonomo san a abi na prakseri. Wan buku di e fruklari Bijbel wortu e taki: „A ben de wan hebi wroko di wan sma ben sa musu fu du finifini sondro fu sari sma. Efu a ben o sari den sma, a no ben o man puru a Bâal anbegi na ini Israel.”

A no de fu taki dati Kresten na ini a ten disi musu abi sonwan fu den fasi fu Yehu tu, fu di son leisi den e kisi fu du nanga muilek situwâsi. Fu eksempre, san wi musu du efu sma wani wi fu moksi nanga den fu du wan sani di Yehovah no feni bun? Wi musu abi deki-ati, wi musu de fayafaya èn wantewante wi musu sori taki wi no wani abi noti fu du nanga so wan sani. Efu wi na sma di e dini Yehovah nanga wi heri ati, wi no o feni en bun taki sma e anbegi tra gado boiti Yehovah.

LUKU TAKI YU E DU ALA SANI DI SKRIFI NA INI A WÈT FU YEHOVAH

A kaba fu a tori disi na wan warskow gi wi. Bijbel e taki dati Yehu „tan anbegi den gowtu pikin kaw di ben de na Betel nanga Dan” (2 Kow. 10:29). Efu Yehu ben de so fayafaya fu horibaka gi a tru anbegi, dan fa a du kon taki toku a gi pasi taki den ben e anbegi popki leki gado?

A kownukondre Israel ben prati fu a kownukondre Yuda, sobun kande Yehu ben e denki taki den ben musu abi wan tra fasi tu fu anbegi Gado. Fu dati ede, a du leki den tra kownu fu Israel di ben de fosi en èn a meki den sma anbegi popki fu pikin kaw, so taki na anbegi fu den nanga Yuda no ben o de a srefi. Ma disi e sori taki Yehu no ben abi nofo bribi na ini Yehovah, a sma di ben meki a tron kownu.

Yehovah ben prèise Yehu, fu di a „du den sani di [Gado] feni bun”. Ma toku Yehu „no du ala sani di skrifi na ini a wèt fu Yehovah, a Gado fu Israel. A no gi yesi na Gado nanga en heri ati” (2 Kow. 10:30, 31). Te yu e prakseri ala den sani di Yehu du fosi, dan kande yu no ben o fruwakti so wan sani fu en. A de wan sari sani taki a kenki so. Ma wi kan leri wan sani fu disi. Noiti wi musu si a matifasi fu wi nanga Yehovah leki wan sani di no de so prenspari. Ibri dei wi musu kon moro krosibei na Gado èn tai hori na en moro nanga moro. Wi kan du disi te wi e studeri en Wortu, te wi e teki ten fu prakseri fu dati, èn te wi e begi wi hemel Tata nanga wi heri ati. Fu dati ede, meki wi du muiti fu tan du ala sani di skrifi na ini a wèt fu Yehovah èn meki wi du dati nanga wi heri ati.​—1 Kor. 10:12.

[Faki na tapu bladzijde 4]

San historia buku e taki fu Yehu

Furu tron sma aksi densrefi efu den sma di Bijbel e taki fu den ben de trutru sma. Sobun, boiti Bijbel, tra buweisi de taki Yehu ben de wan trutru sma?

Sowan dri tori di sma fu owruten Asiria skrifi abi a nen fu a kownu disi fu Israel. Wan fu den tori disi e sori fa Yehu noso wan fu den man di ben e teki presi gi en e boigi gi Kownu Salmaneiser III fu Asiria èn fa a e gi a kownu wan presenti. Na tapu a pisi ston skrifi: „A presenti fu Yehu (Ia-ú-a), manpikin fu Omri (Hu-um-ri). Mi kisi fu en solfru, gowtu, wan gowtu saplu-komki, wan gowtu batra di abi wan smara ondrosei pisi, gowtu komki fu dringi sani, gowtu koba, senki, wan tiki gi wan kownu, (nanga) udu puruhtu [a no krin san na den sani disi].” Yehu no ben de wan trutru pikin fu Omri. Ma dyaso den skrifi taki a ben de wan manpikin fu Omri fu sori taki a ben de wan kownu di tiri a kondre baka Kownu Omri di ben abi biginen èn di bow Samaria, a mamafoto fu Israel.

Tra buweisi no de taki Yehu tyari presenti gi a kownu fu Asiria trutru. Ma a kownu meki sma skrifi a nen fu Yehu dri tron. A skrifi na tapu wan pisi ston, na tapu a popki fu Salmaneiser, èn na ini den historia buku fu den kownu fu Asiria. Fu di Yehu nen skrifi na ala den dri presi disi, wi kan frustan taki a Yehu di Bijbel e taki fu en ben de wan trutru sma.