1, 2. (a) Sortu sani prenspari efu wi wani abi wan bun matifasi nanga Yehovah? (b) Sortu bun bakapisi a abi te wi ondrosuku Bijbel eksempre di e sori san sma du di Gado gi den rai?

„A BUN gi mi fu kon krosibei na Gado. Na a Moro Hei Masra Yehovah mi e si leki mi kibripe” (Ps. 73:28). Dyaso a psalm skrifiman ben sori taki a ben poti en frutrow na tapu Gado. San meki a taki a sani disi? Di a si a switi libi fu den ogrisma, dan na a bigin a ben abi bita-ati. A ben kragi: „Na fu soso mi du muiti fu kon abi wan krin ati. Na fu soso mi wasi mi anu fu sori taki mi no du noti” (Ps. 73:2, 3, 13, 21). Ma di a go na „a gran santa presi fu Gado”, dan dati yepi en fu kenki en denki èn fu tan abi wan bun matifasi nanga Gado (Ps. 73:16-18). A sani disi di a futuboi fu Gado ondrofeni leri en wan prenspari sani: Te yu de na mindri a pipel fu Gado, te yu e teki a rai fu en èn te yu e fiti dati na ini yu libi, dan dati kan yepi yu fu tan abi wan bun matifasi nanga Yehovah.—Ps. 73:24.

² Wi sosrefi wani abi wan bun matifasi nanga a tru èn libilibi Gado. Efu wi wani dati, dan a prenspari fu teki a rai noso piri-ai di a e gi wi. Disi o yepi wi fu kenki kon tron sma di a feni bun. Na ini a ten di pasa Gado gi difrenti sma nanga pipel na okasi fu teki a rai fu en. Na so a sori den sari-ati. A fasi fa den teki a rai fu Gado skrifi na ini Bijbel „fu leri wi wan sani” èn den skrifi „leki wan warskow gi wi di e libi na a kaba fu a ten disi” (Rom. 15:4; 1 Kor. 10:11). Te wi ondrosuku den tori disi, dan wi o frustan den fasi fu Yehovah moro bun èn wi o si sortu bun bakapisi a abi te wi e meki a kenki wi kon tron moro bun sma.

3. Fa Bijbel e sori na ini Yesaya 64:8 nanga Yeremia 18:1-6 taki Yehovah man kenki sma soleki fa a wani? (Luku a prenki na a bigin fu na artikel.)

³ Na wan agersi fasi Yesaya 64:8 e sori fa Yehovah man kenki difrenti sma noso pipel kon tron moro bun sma. Drape skrifi: „Yehovah, yu na wi Tata. Wi na klèidoti èn yu na wi Patu-bakriman. Na yu meki wi alamala.” Wan patu-bakriman man meki iniwan prapi di a wani nanga a klèidoti. A klèidoti no man taigi a patu-bakriman san a musu meki. Na so a de tu nanga libisma èn nanga Gado. Wi no abi a reti fu taigi Gado san a musu du fu meki wi kon tron moro bun sma, neleki fa a klèidoti no man taigi a patu-bakriman sortu patu noso prapi a musu meki.—Leisi Yeremia 18:1-6.

4. Yehovah e dwengi sma noso pipel fu kon de leki fa a wani? Fruklari disi.

⁴ Neleki fa wan patu-bakriman abi a makti fu du san a wani nanga a klèidoti, na so Yehovah sori taki a ben abi a makti fu du san a wani nanga na owruten pipel Israel. Ma toku wi kan taki dati Yehovah no de leki wan libisma patu-bakriman. Wan patu-bakriman kan gebroiki a klèidoti fu meki iniwan prapi di ensrefi man meki. Ma a de so taki Yehovah e bosroiti suma o tron bun sma èn suma o tron takru sma? Bijbel e sori taki disi no de so. Yehovah gi libisma wan spesrutu grani èn dati na taki den man bosroiti gi densrefi san den o du. Sobun, a no e gebroiki en makti fu dwengi sma. Na presi fu dati, libisma srefi musu bosroiti efu den o meki a Mekiman Yehovah kenki den kon tron moro bun sma.—Leisi Yeremia 18:7-10.

5. Te libisma e weigri fu meki Yehovah kenki den kon tron moro bun sma, dan fa a e gebroiki en makti?

⁵ Ma san e pasa te libisma e weigri fu meki a Bigi Patu-bakriman kenki den kon tron moro bun sma? Fa Gado e gebroiki en makti leki patu-bakriman? Prakseri san wan patu-bakriman kan du nanga klèidoti te a no man gebroiki en gi a sani di a abi na prakseri. We, a kan meki wan tra prapi nanga a klèidoti noso a kan trowe en. Ma nofo tron a de so taki te a patu-bakriman no man gebroiki a klèidoti, dan na en no sreka a klèidoti bun. Ma noiti disi de so nanga wi Bigi Patu-bakriman (Deut. 32:4). Te Yehovah e pruberi fu yepi wi kon tron moro bun sma èn wi no wani arki, dan noiti a fowtu de na den rai fu Yehovah, ma a de na wisrefi. Yehovah kan gebroiki difrenti fasi fu kenki sma, ma a de na a sma srefi fu bosroiti san a o du. Te sma e gi yesi na Yehovah, dan Yehovah kan kenki den kon tron moro bun sma. Fu eksempre, den salfu Kresten na ’prapi di Gado o sori sari-ati’. Gado meki den tron „prapi di a e gebroiki gi wan prenspari wroko”. Na a tra sei, den sma di e weigri fu gi yesi na Gado o tron „prapi di musu kisi pori”.—Rom. 9:19-23.

6, 7. San Kownu David du di Yehovah gi en rai, ma san Kownu Saul du di ensrefi kisi rai?

 ⁶ Wan fasi fa Yehovah e yepi sma fu kenki na taki a e gi den rai noso piri-ai. Wi kan si fa Yehovah gebroiki en makti fu kenki sma te wi e luku na eksempre fu Saul nanga David, den fosi tu kownu fu Israel. Di Kownu David du sutadu nanga Batseiba, dan den sani di a du ben abi takru bakapisi gi en nanga tra sma. Aladi David ben de kownu, toku Yehovah gi en piri-ai. Gado ben seni en profeiti Natan go na David fu gi en seryusu rai (2 Sam. 12:1-12). San David du? A ben sari trutru fu a sani di a du èn a sori berow. Fu dati ede Gado sori en sari-ati.—Leisi 2 Samuel 12:13.

 ⁷ Ma Kownu Saul, di ben tiri fosi David, ben de heri tra fasi. Saul no gi yesi na a rai  di a kisi. Nanga yepi fu a profeiti Samuel, Yehovah taigi Saul krin fu kiri ala sma fu Amalèk nanga den meti fu den. Ma Saul no gi yesi na a komando fu Gado. A no kiri Kownu Agak nanga den moro bun meti. Fu san ede? Wan fu den sani na taki a ben wani kisi grani (1 Sam. 15:1-3, 7-9, 12). Di Saul kisi rai a ben musu arki èn na so fasi a ben o gi a Bigi Patu-bakriman na okasi fu kenki en kon tron wan moro bun sma. Na presi fu dati, Saul weigri fu teki a rai fu Gado. A ben feni taki a no du wan sani di ben fowtu fu di den meti di a ben hori na libi, a ben wani tyari leki ofrandi gi Yehovah. Gado puru Saul leki kownu èn noiti moro Saul kon abi wan bun matifasi nanga a tru Gado.—Leisi 1 Samuel 15:13-15, 20-23.

8. San wi kan leri fu a fasi fa den Israelsma teki a warskow fu Yehovah?

⁸ Yehovah gi wan heri pipel na okasi tu fu kenki. Na ini a yari 1513 bifo Krestes, den manpikin fu Israel komoto na ini katibo na Egepte èn Gado meki wan frubontu nanga den. Israel ben de a spesrutu pipel fu en èn den ben abi a grani taki Yehovah, a Bigi Patu-bakriman, kenki den kon tron wan moro bun pipel neleki klèidoti na ini en anu. Ma a pipel tan du san Yehovah no feni bun èn den go anbegi den gado srefi fu den tra pipel na den lontu. Ibri leisi baka Yehovah seni profeiti go na den fu warskow den, ma den Israelsma no arki (Yer. 35:12-15). Fu di den tan weigri fu gi yesi na Gado,  meki a strafu den. Yehovah ben si a tin-lo kownukondre na noordsei leki patu di bun fu kisi pori. Dati meki a gi pasi taki den Asiriasma wini den. A meki tu taki den Babilonsma wini a tu-lo kownukondre na zuidsei. Disi e leri wi wan prenspari sani! Te Yehovah wani yepi wi fu tron moro bun sma, dan dati o tyari wini kon gi wi soso te wi e gi yesi na en.

9, 10. San den sma fu Ninefei du di Yehovah warskow den?

⁹ Yehovah ben gi den sma fu Ninefei, a mamafoto fu Asiria, wan warskow èn dati ben gi den na okasi fu kenki a libi fu den. A taigi Yona disi: „Opo go na a bigi foto Ninefei èn taigi den sma drape taki mi si ala den ogri di den e du.” Ninefei ben o kisi pori.—Yona 1:1, 2; 3:1-4.

¹⁰ Ma di Yona meki bekènti taki Ninefei ben o kisi pori, dan „den sma fu Ninefei bigin bribi na ini Gado. Dati meki den taki dati den no ben o nyan èn den ben o weri rowkrosi fu sori taki den e sari fu den ogri di den du. Iya, ala sma du disi, awinsi den ben gudu noso pôti, awinsi den ben owru noso yongu.” A kownu fu Ninefei „opo fu en kownusturu, a puru en kownukrosi, dan a weri krosi di sma gwenti weri te den e sari. Ne a saka sidon na ini asisi.” Den sma fu Ninefei gi yesi na a warskow fu Yehovah di ben wani yepi den fu kenki den libi èn den ben sori berow. Dati meki Yehovah no pori a foto.—Yona 3:5-10.

11. San wi kan leri fu Yehovah te wi e luku na eksempre fu den sma fu Ninefei èn a di fu Israel?

¹¹ Aladi den Israelsma ben de wan spesrutu pipel fu di Gado ben meki wan frubontu nanga den, toku a strafu den. Na a tra sei Gado no ben meki wan frubontu nanga den sma fu Ninefei. Ma toku Yehovah warskow den taki a ben o pori a foto fu den èn di den kenki den libi a sori den sari-ati. Na so den ben de leki safu klèidoti na ini na anu fu wan patu-bakriman. Den tu eksempre disi e sori krin taki wi Gado Yehovah „no lobi a wan sma moro a trawan”.—Deut. 10:17.

12, 13. (a) Fu san ede Gado e kenki prakseri te sma e teki a rai fu en? (b) Fa Yehovah kenki wan bosroiti di a ben teki kaba na ini a tori fu Saul èn na ini a tori fu Ninefei?

¹² Te sma e drai den libi, dan Yehovah kan kenki wan bosroiti di a ben teki kaba. Fu eksempre, Bijbel e sori taki a ben hati Yehovah taki a poti Saul fu tiri leki kownu fu Israel (1 Sam. 15:11). Na ini Bijbel wi e leisi taki di den sma fu Ninefei sori berow èn den drai den libi, dan ’a tru Gado kenki prakseri èn a no tyari rampu kon na den tapu moro’.—Yona 3:10.

¹³ Na ini a tori fu Saul Yehovah sori taki a no ben wani Saul leki kownu moro. Disi no ben de fu di Yehovah ben meki wan fowtu di a poti Saul leki kownu, ma na fu di Saul no ben sori bribi èn a ben trangayesi Gado. Na ini a tori fu den sma fu Ninefei, a tru Gado no du moro san a ben abi na prakseri. A moi fu si taki Yehovah, wi Patu-bakriman, de klariklari fu kenki wan bosroiti di a ben teki kaba. Boiti dati, a abi safu-ati nanga sari-ati èn a de klariklari fu kenki prakseri te a e si taki sma di sondu e meki muiti fu tyari densrefi na wan tra fasi now.

14. (a) Fa Yehovah e kenki wi kon tron moro bun sma? (b) San wi musu du te Gado wani kenki wi?

¹⁴ Na ini a ten disi Yehovah e gebroiki Bijbel nanga en organisâsi fu kenki wi kon tron moro bun sma (2 Tim. 3:16, 17). Wi musu teki den rai di Gado e gi wi nanga yepi fu Bijbel nanga en organisâsi. Awinsi o langa wi dopu noso awinsi omeni grani wi abi na ini a gemeente, toku wi musu tan  gi yesi na a rai fu Yehovah fu di dati o kenki wi so taki wi kon de leki prapi di a man gebroiki gi wan prenspari wroko.

15, 16. (a) Fa wan sma kan firi te a kisi piri-ai èn te a lasi den grani fu en? Gi wan eksempre. (b) San kan yepi wi te wi lasi-ati fu di wi kisi piri-ai?

¹⁵ Son leisi te wi e kisi rai, dan dati na fu leri wi wan sani noso fu tyari kenki kon. Ma a kan pasa tu taki wi musu kisi piri-ai fu di wi du wan sani di no bun. Disi kan meki wi lasi den grani fu wi. Luku na eksempre fu Dennis, * wan brada di ben de owruman. Fu di a brada disi teki wan fowtu bosroiti na ini wan bisnis afersi, meki a du wan sani di no bun. Dati meki a kisi piri-ai, ma den brada no meki dati bekènti na ini a gemeente. A brada disi lasi den grani fu en. Ma fa Dennis firi a neti di den meki bekènti na ini a gemeente taki a no de owruman moro? „A gersi leki mi no ben man du nowan sani bun moro”, na so a e taki. „Na ini den 30 yari di pasa mi kisi furu grani. Mi ben de gewoon pionier, mi ben dini na Betel, mi ben tron dinari ini a diniwroko èn baka dati mi ben de wan owruman. No so langa pasa, mi ben gi mi fosi lezing na a distrikt kongres. Ne wantronso mi lasi ala den grani dati. Boiti taki mi ben syen, mi ben feni tu taki noti no de moro fu du gi mi na ini na organisâsi.”

¹⁶ Dennis ben abi fu tyari kenki kon na ini en libi. Ma san yepi en fu no firi lasi-ati moro? A e taki: „Mi no meki nowan sani tapu mi fu tan du san mi man na ini a diniwroko fu Gado. Wan tra prenspari sani di yepi mi, na a deki-ati di mi kisi fu den Kresten brada nanga sisa èn fu den buku fu wi. Na artikel ’Yu ben e dini fosi? Yu man dini baka?’ na ini A Waktitoren fu 15 augustus 2009 ben de leki wan brifi di skrifi gi mi èn a ben piki den begi fu mi. Na artikel ben gi wan moi rai di naki mi ati trutru. Na artikel ben taki: ’Now di yu no abi frantwortu na ini a gemeente, dan gebroiki yu ten fu kon abi wan moro bun matifasi nanga Yehovah.’” Sortu wini Dennis kisi fu a piri-ai? Baka wan tu yari a brada disi taki: „Yehovah blesi mi baka fu di a gi mi a grani fu de wan dinari ini a diniwroko.”

17. Te den puru wan sma fu a gemeente, dan fa dati kan yepi en fu drai kon baka? Gi wan eksempre.

¹⁷ Wan moro seryusu fasi fa Yehovah e gi wi piri-ai na te a e puru wan sma fu a gemeente. Disi e meki taki a sma no pori den trawan na ini gemeente èn a kan meki tu taki a sma di sondu drai en libi (1 Kor. 5:6, 7, 11). Luku a tori fu Robert. Den ben puru Robert fu a gemeente èn a ben teki sowan 16 yari fosi a kon baka. Na ini a pisi ten dati en papa, mama nanga den brada fu en tan hori densrefi na Bijbel rai èn den no bumui nanga en. Den no ben taki en odi srefi. Wan tu yari kaba den teki Robert baka na ini a gemeente èn a e go na fesi. Di den aksi en san meki a drai kon baka na Yehovah nanga en pipel baka someni yari, a taki na fu di en famiri no bumui moro nanga en. A taki: „Efu mi famiri ben bumui pikinso srefi nanga mi, efu na taki den ben o taki mi odi nomo, dan dati kaba ben o sari gi mi. Dan mi no denki taki mi ben o wani drai kon baka na Gado.”

18. Sortu klèidoti wi musu de na ini na anu fu a Bigi Patu-bakriman?

¹⁸ Kande wi no abi piri-ai fanowdu na a fasi dati, ma sortu klèidoti wi wani de na ini na anu fu a Bigi Patu-bakriman? San wi o du te wi kisi rai? Wi o de leki David noso leki Saul? A Bigi Patu-bakriman na wi Tata. Noiti wi musu frigiti taki „Yehovah e piri-ai gi a sma di a lobi, neleki fa wan papa e du nanga wan manpikin di e gi en prisiri”. Fu dati ede, „no weigri fu teki a leri fu Yehovah èn no ati bron te a e piri-ai gi yu”.—Odo 3:11, 12.