Wan moi felem di nen A Trip Down Market Street (Wan koiri na Market Street) e sori fa na aladei libi ben de na San Francisco, Amerkankondre, na a bigin fu den yari 1900. Den sma di meki a felem ben fasi wan kamera na fesisei fu wan sortu loko di ben e pasa na ini wan strati pe furu sma ben e waka. Na ini a felem yu kan si asiwagi nanga wagi fu a ten dati, sma di ben e go bai sani èn boi di ben e seri koranti.

Soleki fa a sori, dan a felem disi meki na ini april 1906. Te yu e luku a felem disi, dan a e meki yu sari fu di a meki wan tu dei fosi a bigi gronseki nanga a bigi faya fu 18 april di pori pikinmoro a heri pisi dati fu a foto. A dei dati dusundusun sma dede. Kande sonwan fu den sma na ini a felem ben abi wan tu dei nomo fu libi ete. Scott Miles, wan famiri fu wan fu den sma di meki a felem, e taki: „Mi e si den sma drape èn den no sabi san o miti den. Na sari nomo yu kan sari den.”

Wan srefi sortu sani o pasa na ini a ten fu wi. Wi e firi sari tu gi den sma na wi lontu. Den e du den aladei sani fu den sondro fu sabi sortu rampu o miti den. Heri esi a grontapu disi o kisi pori èn wan kaba o kon na a fasi fa sma e libi. Wan gronseki kan pasa wantronso sondro fu sma sabi na fesi. Ma a krutudei fu Yehovah de tra fasi fu di okasi de ete fu warskow sma. A no de fu taki dati yu poti ten na wan sei ibri wiki fu preiki oso fu oso, ma yu kan du moro muiti fu warskow sma?

Na eksempre fu Yesus moi trutru, fu di ala ten a ben de klariklari fu preiki gi ala sma di a ben e miti, awansi na wan man di ben e teki belasting-moni èn di a ben miti na strati, noso wan uma di a ben miti na wan peti pe a ben go sidon teki bro (Luk. 19:1-5; Yoh. 4:5-10, 21-24). Srefi te Yesus ben wani go rostu, a ben de klariklari fu gebroiki a ten dati fu gi trawan leri. Fu di a ben e sari den sma na en lontu, meki a ben e du ala san a man fu preiki gi den (Mark. 6:30-34). Fa preikiman na ini a ten disi kan de klariklari fu preiki gi sma neleki Yesus?

Melika e libi na ini wan gebow pe sma no man kon na inisei so makriki. Furu fu den sma di e libi drape na studenti fu tra kondre di abi cel nomru  di yu no man feni na ini telefonbuku èn den nen no skrifi na ini a buku di e sori suma e libi na ini a gebow. Melika lobi fu gebroiki ibri okasi fu taki nanga den sma na a presi pe den musu pasa kon na ini a gebow noso na ini a lift. A e taki: „Gi mi, disi na a kontren pe mi e preiki.” Melika abi traktaat nanga tijdschrift na ini difrenti tongo èn furu fu den sma di a e miti e teki den sani dati. Boiti dati, a gwenti sori sma a website fu wi di nen jw.org. Melika ben man opo wan tu Bijbelstudie.

Sonia e suku okasi tu fu preiki gi sma. A e wroko na wan poli fu wan datra èn a e du muiti fu preiki gi ala den sma na en wrokope. A fosi sani di a du na taki a teki ten fu kon sabi san ibriwan fu den sma abi fanowdu èn sortu tori den lobi. Baka dati a gebroiki a pauze fu go suku den sma disi èn fu taki nanga den fu Bijbel. Disi meki taki Sonia ben man opo tu Bijbelstudie. A wani gebroiki a pauze tu fu taki nanga den sma di e sidon wakti na ini a bigi waktikamra.

Wan sma di no dede na ini a gronseki fu 1906 ben taki dati a sani disi ben de „a moro bigi rampu di oiti pasa na ini wan foto noso wan distrikt”. Ma toku a rampu disi na noti te yu teki en gersi nanga san o pasa na a dei te Yehovah o puru en atibron na tapu „den sma di no sabi” en (2 Tes. 1:8). Yehovah wani trutru taki sma kenki den prakseri nanga den ati èn taki den gi yesi na a boskopu di den Kotoigi fu en e preiki fu warskow sma.—2 Petr. 3:9; Openb. 14:6, 7.

Yu abi a grani fu yepi sma fu frustan taki wi e libi na ini muilek ten. Den no musu denki densrefi nomo, ma den musu bigin dini Yehovah (Sef. 2:2, 3). Yu kan gebroiki ibri okasi fu preiki gi sma na yu wrokope, na ini yu birti èn gi sma di yu e miti ala dei? Yu o du moro muiti fu warskow sma?