„GO NA den famiriman fu yu, dan yu fruteri den ala sani di Yehovah du gi yu èn taki a ben abi sari-ati nanga yu”, na dati Yesus Krestes taigi wan man di ben wani tron wan bakaman fu en. Na a ten dati a ben de kande na Gadara di ben de na a zuid-owstusei fu a Se fu Galilea. Den wortu fu Yesus e sori taki a ben frustan taki ala libisma wani fruteri famiriman fu sani di den lobi èn di prenspari gi den.—Mark. 5:19.

Na ini a ten disi wi kan si dati tu. Ma na ini son libimakandra a de moro krin fu si leki na ini trawan. Te wan sma e tron wan anbegiman fu a tru Gado Yehovah, dan nofo tron a wani fruteri en famiriman fu a nyun bribi fu en. Ma fa a musu du disi? Fa a kan doro na ati fu famiriman di abi wan tra bribi noso di no e bribi na ini Gado kwetikweti? Bijbel e gi wi rai di bun gi wi na ini a ten disi.

Na ini a fosi yarihondro, Andreas ben de wan fu den fosi sma di kon sabi taki Yesus na a Mesias. Suma a lon go fruteri a tori? „A fosi sani di [Andreas] du, na taki a go suku en brada Simon. Dan a taigi en: ’Wi feni a Mesias.’ (Disi wani taki Krestes.)” Andreas tyari Petrus go na Yesus èn na so a gi Petrus na okasi fu tron wan fu den bakaman fu Yesus.—Yoh. 1:35-42.

Sowan siksi yari baka dati, di Petrus ben e tan na ini Yope, a kisi a kari fu go na Sesareya, na noordsei. A ben musu go na a oso fu a legre-ofsiri Kornelius. Suma Petrus miti drape? „Kornelius ben wakti [Petrus nanga den sma di ben de nanga en] . . . èn a ben kari den famiriman nanga den bun mati fu en kon.” Na so Kornelius gi den famiriman fu en na okasi fu yere san Petrus ben abi fu taki èn fu teki wan bosroiti te den ben o yere den sani disi.—Tori 10:22-33.

 San wi kan leri fu a fasi fa Andreas nanga Kornelius yepi den famiriman fu den?

Andreas nanga Kornelius no ben denki taki den famiriman ben o kon sabi Gado fu densrefi. Na Andreas srefi ben tyari Petrus go na Yesus èn na Kornelius ben seti sani taki den famiriman fu en ben kan yere san Petrus ben abi fu taki. Ma Andreas nanga Kornelius no ben dwengi den famiriman fu den èn den no ben kon nanga ala sortu triki fu meki den tron bakaman fu Krestes. Yu kan leri wan sani fu disi? A bun fu teki na eksempre fu den. Kande wi abi na okasi fu fruteri famiriman san wi e bribi èn wi e suku fasi fu meki den kon sabi den tru tori fu Bijbel noso fu meki den kon sabi den Kresten brada nanga sisa fu wi. Ma wi musu lespeki a fasi fa den e si sani èn wi musu luku bun taki wi no dwengi den. Luku fa na eksempre fu Jürgen nanga Petra, wan trowpaar fu Doisrikondre, e sori fa wi kan yepi wi famiri.

Petra ben e studeri Bijbel nanga Yehovah Kotoigi èn baka wan pisi ten a teki dopu. En masra Jürgen ben de wan legre-ofsiri. Na a bigin Jürgen no ben breiti nanga a bosroiti di en wefi teki. Ma baka wan pisi ten a kon si taki den Kotoigi ben e fruteri sma den tru tori fu Bijbel. Bakaten Jürgen srefi gi en libi abra na Yehovah èn now a de wan owruman na ini wan gemeente na Doisrikondre. Soleki fa Jürgen e taki, dan fa wi kan doro na ati fu wan famiriman?

Jürgen e taki: „Wi no musu dwengi famiriman èn wi no musu weri den ede nanga tumusi furu Bijbel tori. Dati o meki nomo taki den no wani arki. Te yu e taki nanga den fu a bribi fu yu, dan a moro bun fu taki sani na so wan fasi taki yu e hori den firi fu den na prakseri. Fruteri den pikinsopikinso fu a bribi fu yu èn no du dati ala yuru baka. A bun fu meki wi famiriman kon sabi den Kresten brada nanga sisa fu wi di owru a srefi leki den noso di lobi den srefi sani leki den. Na a fasi dati a o moro makriki fu yepi den.”

Na apostel Petrus nanga den famiriman fu Kornelius teki a boskopu fu Bijbel wantewante. Ma tra sma fu a fosi yarihondro di yere den tru tori fu Gado, ben abi moro ten fanowdu fu teki wan bosroiti.

Di Yesus ben e du en diniwroko na grontapu, wan tu famiriman fu en ben bribi na ini en. Fu eksempre, a kan taki den apostel Yakobus nanga Yohanes ben de neef fu Yesus èn taki Salome, a mama fu den, ben de wan tanta fu en. Kande a ben de wan fu den „furu tra uma di gebroiki den sani fu den fu sorgu Yesus nanga den disipel fu en”.—Luk. 8:1-3.

Ma tra famiriman fu Yesus no ben bribi na ini en wantewante. Fu eksempre, wan leisi wan heri ipi sma kon makandra na ini wan oso fu arki Yesus. Disi pasa moro leki wán yari baka di Yesus teki dopu. „Ma di den famiriman fu en yere fu den sani di Yesus du, dan den go fu grabu en, bika den ben taki: ’A lasi en frustan.’” Wan pisi ten baka dati, den afubrada fu Yesus aksi en pe a ben o go, ma a no piki den wantewante. Fu san ede? Fu di „a ben de so, taki den brada fu en no ben e bribi na ini en”.—Mark. 3:21; Yoh. 7:5.

San wi kan leri fu a fasi fa Yesus ben wani yepi den famiriman fu en? A no mandi di sonwan fu den taki dati a lasi en frustan. Srefi baka di sma kiri Yesus èn baka di a kisi wan opobaka, a tan gi den famiriman  fu en deki-ati fu di a sori ensrefi na en afubrada Yakobus. Fu di Yesus sori ensrefi na Yakobus, meki a ben man yepi Yakobus nanga den tra afubrada fu en fu kon si taki En na a Mesias trutru. Soleki fa a sori, dan den ben de tu na a sodrokamra na Yerusalem, makandra nanga den apostel èn nanga tra sma, di a santa yeye kon na den tapu. Baka wan pisi ten Yakobus nanga Yudas, wan tra afubrada fu Yesus, kisi moi grani tu.—Tori 1:12-14; 2:1-4; 1 Kor. 15:7.

Neleki fa a ben de na ini a fosi yarihondro, na so wan tu famiriman fu wi abi furu ten fanowdu fu kon na tapu a pasi di e tyari sma go na libi. Luku Roswitha fu eksempre. A ben de wan fayafaya Lomsu di en masra tron wan Kotoigi fu Yehovah na ini 1978. Fu di Roswitha ben denki fosi taki a ben abi a tru bribi, meki a ben e gens en masra. Ma baka wan tu yari, a no ben e gens en so furu moro èn a kon si taki den Kotoigi ben e leri san tru. Na ini 2003 en srefi teki dopu. San meki a kenki? Na presi taki Roswitha masra mandi di en wefi gens en, a gi en wefi okasi fu kenki a fasi fa a ben e si sani. Sortu rai Roswitha e gi wi? „Wi kan du furu bun te wi abi pasensi, pasensi, iya, furu pasensi.”

Monika teki dopu na ini 1974 èn baka tin yari den tu boi fu en tron Kotoigi tu. Aladi en masra Hans no gens en noiti, toku a ben de na ini 2006 fosi, taki a teki dopu. Sortu rai na osofamiri disi e gi now di den ondrofeni a sani disi? „Tai hori na Yehovah èn no du sani di no e kruderi nanga san yu e bribi.” A no de fu taki, dati a ben de prenspari taki Monika nanga den boi fu en sori Hans ala ten baka taki den lobi en. Noiti den lasi howpu taki Hans ben o teki a bribi te fu kaba.

Wan leisi Yesus agersi a boskopu fu Bijbel nanga watra di e gi têgo libi (Yoh. 4:13, 14). Wi wani leri wi famiri den tru tori fu Bijbel di de leki kowru watra di e gi sma krakti baka te den dringi en. Wi no wani dwengi den, noso a o gersi leki yu wani gi den someni watra taki den kan dede. A fasi wi e taki nanga den fu a bribi fu wi, o meki taki den firi bun noso taki den no wani sabi moro. Bijbel e taki dati „na ati fu a reti-ati sma e prakseri dipi fu sani” fosi a gi piki. A e taki tu: „San de na ini na ati fu wan koni sma e meki a taki nanga koni èn a fasi fa a e taki e meki sma arki en.” Fa wi kan teki a rai disi?—Odo 15:28; 16:23.

Kande wan wefi wani fruteri en masra san a e bribi. Efu a „e prakseri dipi fu sani” fosi a gi piki, dan a o luku bun san a o taki èn a no o de tumusi gaw fu taki wan sani. A no musu gi en masra a firi taki a sabi ala sani èn taki a bun moro en. Te a wefi e prakseri bun fosi a taki, dan a masra fu en o firi bun èn trobi no o de. O ten a man taki moro makriki nanga en masra? Fu sortu tori a masra lobi taki noso san a lobi leisi? A lobi taki fu sabidensi, politiek noso sport? Fa a wefi kan meki taki en masra wani kon sabi moro fu Bijbel, aladi a e hori den firi fu en na prakseri èn a e lespeki a fasi fa a e denki? Te a wefi e hori den sani disi na prakseri, dan dati o yepi en fu taki nanga en masra èn fu du sani nanga koni.

A no soso te yu e taki pikinsopikinso fu den tru tori fu Bijbel, yu o man doro na ati fu den famiri di no de Kotoigi ete. Den sani di wi e taki musu de fu si na ini a fasi fa wi e tyari wisrefi.

„Na ini wi aladei libi wi musu tan du san Bijbel e leri. Na so wan famiriman o si taki wi e tyari wisrefi na wan bun fasi, aladi a no e taigi yu dati,” na so Jürgen e taki. Hans, di teki dopu sowan 30 yari baka en wefi, e taki: „Leki Kresten, a prenspari fu tyari wisrefi na wan bun fasi, so taki wan famiriman kan si sortu wini wi e kisi fu den tru tori fu Bijbel.” Den famiri fu wi musu si taki a bribi fu wi e kenki wi trutru èn taki wi de tra fasi. Den musu man si krin taki wi e tron moro bun sma.

Na apostel Petrus ben gi wefi di abi masra di no abi a srefi bribi leki den, a rai disi: „Un uma, . . . saka unsrefi na ondro un eigi masra, so taki te sonwan fu den no wani du san Gado wortu e taki, dan a fasi fa unu e tyari unsrefi kan meki den teki a bribi sondro fu unu taigi den wan sani, bika den si nanga den eigi ai fa unu e tyari unsrefi na wan krin fasi èn nanga bigi lespeki. A moi fu unu no musu de den sani di sma ai man si, soleki a brei di unu e brei un wiwiri èn den gowtu sani noso krosi di unu e weri. Ma a moi fu unu musu de a sma di unu de dipi na ini  un ati, fu di unu abi wan tiri èn safri fasi di de leki wan krosi di no e pori èn di warti srefisrefi gi Gado.”—1 Petr. 3:1-4.

Petrus skrifi taki te wan wefi tyari ensrefi na wan bun fasi, dan a masra fu en kan tron wan bribiman. Na dati Christa e hori na prakseri. Sensi di a teki dopu na ini 1972, a e du muiti fu tyari ensrefi na wan bun fasi fu kan doro na ati fu en masra. Fosi, en masra ben studeri nanga den Kotoigi, ma a no teki a bribi ete. A masra go kaba na wan tu fu den konmakandra èn a no abi problema fu taki nanga den sma na ini a gemeente. Na a tra sei, den brada nanga sisa e lespeki a reti di a abi fu bosroiti efu a wani teki a tru anbegi. Fa Christa e pruberi fu doro en ati?

„Mi teki a bosroiti fu tan du san Yehovah wani mi fu du. Ma na a tra sei, mi e tyari misrefi na wan bun fasi tu fu di mi wani yepi mi masra ’sondro fu taigi en wan sani’. Te a e aksi mi wan sani di Bijbel no e krutu, dan mi e du ala san mi man fu du san a aksi mi. Boiti dati, mi e lespeki a wani fu en èn mi e libi a tori gi Yehovah.”

Na eksempre fu Christa e sori o prenspari a de fu no strak tumusi. Christa e tan du den sani di a musu du leki Kresten. Dati meki a no e misi den konmakandra èn a e du ala san a man na ini a preikiwroko. Ma Christa e frustan tu taki a musu sori en masra taki a lobi en, taki a abi ten gi en èn taki a e poti prakseri na en, fu di en masra abi reti na tapu den sani disi. A de wan koni sani gi wi alamala fu no de tumusi strak èn fu sori taki wi e frustan fa famiriman di no de na bribi e firi. Bijbel e taki: „Gi ala sani wan ten de.” Disi wani taki dati wi musu abi ten gi famiriman di no abi a srefi bribi leki wi, spesrutu te a sma na wi trowpatna. Te wi abi ten gi makandra, dan wi o man taki nanga makandra. Ondrofeni e sori taki te sma abi a gwenti fu taki bun nanga makandra, dan a patna fu den no o abi a firi taki a de en wawan, noso taki a trawan no e luku en nanga wan ai, èn a no o dyarusu.—Preik. 3:1.

„A prenspari fu sori famiriman taki wi lobi den èn taki wi e begi gi den,” na so Holger e taki. En papa teki dopu 20 yari baka di tra famiriman tron Kotoigi. Christa e taki dati ’noiti a o lasi a howpu taki en masra o tron wan futuboi fu Yehovah te fu kaba èn taki a o teki a tru leri’. Noiti wi musu denki taki famiriman di no abi a srefi bribi leki wi no o kon na ini a tru anbegi. Iya, no meki wi lasi howpu.

Wi musu meki muiti fu tan libi bun nanga den famiri fu wi, fu gi den na okasi fu leri sabi a tru leri èn fu doro den ati nanga a Bijbel boskopu. Ala ten wi musu tyari wisrefi na wan bun fasi èn wi musu du dati „na wan safri fasi èn nanga bigi lespeki”.—1 Petr. 3:15.