1. Fu san ede a lobi di Gado nanga en Manpikin ben abi gi makandra ben e kon moro tranga?

YESUS KRESTES, a Manpikin fu Yehovah, ben taki: „Mi lobi a Tata” (Yoh. 14:31). A ben taki tu: „A Tata lobi a Manpikin” (Yoh. 5:20). Disi no musu fruwondru wi. Te yu luku en bun, dan omeni dusundusun yari fosi Yesus tron wan libisma, a ben de a „tumusi bun wrokoman” fu Gado (Odo 8:30). Fu di Yehovah nanga Yesus ben e wroko makandra, meki a Manpikin leri sabi en Tata heri bun. Fu taki en leti, den ben de so bun nanga makandra, taki dei fu dei a lobi di den ben abi gi makandra ben e kon moro tranga.

2. (a) San a wani taki fu lobi Yehovah? (b) Sortu aksi wi o go luku?

² A psalm skrifiman David ben singi: „Yehovah, mi krakti, mi o sori taki mi lobi yu” (Ps. 18:1). Na so wi musu prakseri tu fu Gado, fu di a lobi wi. Efu wi gi yesi na Yehovah, dan a o sori taki a lobi wi. (Leisi Deuteronomium 7:12, 13.) Ma wi kan lobi Gado trutru, aladi wi no man si en? San a wani taki fu lobi Yehovah? Fu san ede wi musu lobi en? Fa wi kan sori taki wi lobi Gado?

3, 4. Fu san ede wi man lobi Yehovah?

³ „Gado na wan Yeye” èn dati meki wi no man si en (Yoh. 4:24). Toku wi man lobi Yehovah èn Bijbel e taki dati wi musu sori lobi gi en. Fu eksempre, Moses ben taigi den Israelsma: „Un musu lobi Yehovah un Gado nanga un heri ati, nanga un heri libi, èn nanga ala un krakti.”—Deut. 6:5.

⁴ Fu san ede wi man lobi Gado nanga wi heri ati? Na fu di a meki wi na so wan fasi taki wi wani anbegi en èn taki wi man sori lobi gi en. Te wi e kon sabi Yehovah, dan a lobi di wi abi gi en e kon moro tranga èn disi e meki taki wi e firi koloku. Yesus ben taki: „Koloku fu den sma di sabi taki den abi Gado fanowdu, bika den o kisi a Kownukondre fu hemel” (Mat. 5:3). Son sma e taki dati ala libisma gebore nanga a firi fu anbegi Gado. A. C. Morrison ben taki na ini wan buku fu en dati a moi fu si taki ala ten libisma suku Gado èn taki den wani poti bribi na ini en.—Man Does Not Stand Alone.

5. Fa wi sabi taki wi man feni Gado?

⁵ Ma oiti wi o man feni Gado? Iya, fu di a wani taki wi feni en. Na apostel Paulus ben tyari disi kon na krin di a ben e preiki gi wan grupu sma di ben kon makandra na a Areopagus. Disi ben de krosibei fu a Partenon, a tempel di den sma fu Ateine ben meki gi na umagado Ateina di ben musu kibri den. Pruberi fu si yusrefi drape te Paulus e taki fu „a Gado di meki grontapu nanga ala sani na en tapu”. Baka dati Paulus e sori taki a Gado disi „no e tan na ini tempel di libisma meki”. A e taki tu dati „fu wán sma nomo [Gado] meki ala tra sma fu libi na heri grontapu. Na en bosroiti san na a reti ten taki sani musu pasa èn pe sma musu tan. Gado wani taki sma musu suku en fayafaya èn taki den musu feni en trutru. Fu taki en leti, a no de fara fu nowan fu wi” (Tori 17:24-27). Iya, libisma man feni Gado. Moro leki seibi nanga afu milyun Kotoigi fu Yehovah „feni en trutru” èn den lobi en nanga den heri ati.

6. Soleki fa Yesus taki, dan san na „a fosi èn a moro bigi komando”?

⁶ A lobi di wi abi gi Yehovah musu komoto dipi na ini wi ati. Yesus ben tyari disi kon na krin di wan Fariseiman aksi en: „Leriman, san na a moro bigi komando na ini a Wèt?” Yesus piki en: „’Yu musu lobi Yehovah yu Gado nanga yu heri ati, nanga yu heri libi, èn nanga yu heri frustan.’ Disi na a fosi èn a moro bigi komando.”—Mat. 22:34-38.

7. San a wani taki fu lobi Gado nanga (a) wi „heri ati”? (b) wi „heri libi”? (c) wi „heri frustan”?

⁷ San Yesus ben abi na prakseri di a taki dati wi musu lobi Gado nanga wi „heri ati”? A ben wani sori taki a lobi di wi abi gi Yehovah musu abi krakti na tapu den sani di wi wani du èn na tapu den firi fu wi. Yesus ben taki tu dati wi musu lobi Gado nanga wi „heri libi”. Den wortu „heri libi” wani taki a heri fasi fa wi de leki libisma èn a heri fasi fa wi e libi. Wan tra sani di wi musu du, na taki wi musu lobi Gado nanga wi „heri frustan”. Den wortu „heri frustan” wani taki a fasi fa wi e gebroiki wi frustan èn den sani di wi e denki. Na so fasi Yesus ben wani sori taki wi musu du ala san wi man fu lobi Yehovah sondro fu hori wan sani na baka.

8. Efu wi lobi Gado nanga wi heri ati, dan san wi o du?

⁸ Efu wi lobi Gado nanga wi heri ati, nanga wi heri libi èn nanga wi heri frustan, dan wi o studeri en Wortu fayafaya, wi o gi yesi na en nanga wi heri ati èn wi o du ala san wi man fu preiki a bun nyunsu fu a Kownukondre (Mat. 24:14; Rom. 12:1, 2). Efu wi lobi Yehovah trutru, dan wi o kon  moro krosibei na en (Yak. 4:8). A no de fu taki dati wi no man kari ala den sani di e meki taki wi musu lobi Gado, ma toku wi o luku wan tu fu den.

9. Fu san ede yu lobi Yehovah di de wi Mekiman èn a sma di e sorgu wi?

⁹ Yehovah na wi Mekiman èn a sma di e sorgu wi. Paulus ben taki: „Na en meki taki wi de na libi, taki wi e buweigi èn taki wi de” (Tori 17:28). Yehovah gi wi a grontapu di de wan kefalek moi tanpresi (Ps. 115:16). A e gi wi nyanyan tu nanga tra sani di wi abi fanowdu fu tan na libi. Dati meki Paulus ben kan taigi den sma fu Listra taki ’a libi Gado meki wi kon sabi en fu di a du bun sani gi wi. A e gi wi alen komoto fu hemel èn bun ten di e meki taki wi abi bun furu nyanyan èn taki wi e firi prisiri’ (Tori 14:15-17). Yu no feni taki a sani disi musu meki wi lobi wi Gran Mekiman, a sma di e sorgu wi na so wan lobi-ati fasi?—Preik. 12:1.

10. Fa yu e firi te yu e prakseri den sani di Gado seti fu puru sondu nanga dede?

¹⁰ Gado seti sani fu puru a sondu nanga dede di wi kisi fu Adam (Rom. 5:12). Iya, „Gado sori wi taki a lobi wi fu di a meki Krestes dede gi wi, aladi wi ben de sondari ete” (Rom. 5:8). A no de fu taki dati wi lobi Yehovah nanga wi heri ati fu di a sorgu taki wi man kisi pardon fu den sondu fu wi te wi abi berow èn te wi e poti bribi na ini a frulusu-ofrandi fu Yesus.—Yoh. 3:16.

11, 12. Sortu moi howpu Yehovah gi wi?

¹¹ Fu di Yehovah e gi wi howpu, meki wi abi furu prisiri nanga freide (Rom. 15:13). A howpu di Gado gi wi e meki taki wi man horidoro te wi e kisi tesi. Gado o pai salfu Kresten di ’tan gi yesi na en te na dede’ nanga libi na ini hemel (Openb. 2:10). Sma di tan gi yesi na Gado èn di abi a howpu fu libi na grontapu, o kisi têgo blesi na ini a paradijs di Gado pramisi wi (Luk. 23:43). Fa yu feni a moi pramisi disi? A no de so taki yu e prisiri taki Gado gi wi „ibri bun presenti nanga ibri kado di bun dorodoro”? A no de so taki yu e firi korostu èn taki yu lobi en?—Yak. 1:17.

¹² Gado gi wi a moi howpu taki dedesma o kon na libi baka (Tori 24:15). Disi e meki taki wi no e sari tumusi te wan lobiwan fu wi dede. Wi abi a howpu taki dedesma o kon na libi baka èn dati meki ’wi no e sari neleki fa tra sma e sari fu di den no abi nowan howpu’ (1 Tes. 4:13). Yehovah Gado lobi wi èn fu dati ede a e angri fu gi dedesma wan opobaka, spesrutu den sma di ben e dini en, soleki a reti-ati man Yob (Yob 14:15). Prakseri fa sma o breiti fu si den lobiwan fu den te den o kon na libi baka èn te den o libi makandra nanga den dyaso na grontapu. Wi ati e furu nanga lobi gi wi hemel Tata di gi wi a kefalek moi howpu disi.

13. Fa wi sabi taki Gado e broko en ede nanga wi trutru?

¹³ Yehovah e broko en ede nanga wi trutru. (Leisi Psalm 34:6, 18, 19; 1 Petrus 5:6, 7.) Fu di wi sabi taki wi lobi-ati Gado de klariklari ala ten fu yepi den sma di e gi yesi na en, meki wi no e frede fu di wi na ’den skapu di de na den weigron fu en’ (Ps. 79:13). Boiti dati, ala den sani di Gado o du gi wi nanga yepi fu a Mesias Kownukondre, o sori taki a lobi wi. Baka te Yesus Krestes, a Kownu di Gado poti fu tiri, puru ala ogri di sma e du na grontapu, dan Gado o blesi den sma di e gi yesi na en fu di a o meki den libi na ini freide fu ala ten (Ps. 72:7, 12-14, 16). Yu no feni taki a howpu disi e sori fu san ede wi musu lobi Gado nanga wi heri ati, nanga wi heri libi, nanga ala wi krakti èn nanga wi heri frustan?—Luk. 10:27.

14. Sortu moi grani Gado gi wi?

¹⁴ Yehovah gi wi a moi grani fu de en Kotoigi (Yes. 43:10-12). Wi lobi Gado, fu di a gi wi na okasi fu horibaka gi a tiri fu en èn fu meki sma na ini a grontapu disi di lai nanga  problema kisi trutru howpu. Wi e preiki a bun nyunsu gi sma fu di wi abi bribi èn fu di wi de seiker fu san wi e leri sma. Fu san ede wi de seiker fu dati? Fu di a boskopu fu wi teki puru fu Gado Wortu èn den pramisi fu en e kon tru ala ten. (Leisi Yosua 21:45; 23:14.) Iya, furu sani de di e meki taki wi lobi Yehovah. Ma fa wi kan sori taki wi lobi en?

15. Te wi e studeri Gado Wortu èn wi e du san a e taki, dan fa dati kan yepi wi?

¹⁵ Studeri Gado Wortu fayafaya èn du san a e taki. Te wi e du disi, dan dati e sori taki wi lobi Yehovah èn taki wi e si a wortu fu en trutru leki wan ’leti na tapu wi pasi’ (Ps. 119:105). Te wi abi broko-ede, dan wi kan kisi trowstu te wi e leisi den sortu pramisi leki a wan disi: „Mi Gado, yu no o tapu yu ai gi wan sma di firi brokosaka, noso gi wan sma di lasi-ati.” „Na a bun-ati fu yu, Yehovah, hori mi tanapu. Di den prakseri fu mi di ben e trobi mi, ben kon hebi gi mi, dan na yu ben e trowstu mi, so taki mi ben man prisiri baka” (Ps. 51:17; 94:18, 19). Yehovah e sori sari-ati gi den sma di e pina èn Yesus e firi sari tu gi den sortu sma disi (Yes. 49:13; Mat. 15:32). Te wi e studeri Bijbel, dan wi kan si krin taki Yehovah e broko en ede nanga wi fu di a lobi wi. Disi e meki taki wi wani sori en taki wi lobi en trutru.

16. Fu san ede a lobi di wi abi gi Gado e kon moro tranga te wi abi a gwenti fu begi?

¹⁶ Abi a gwenti fu begi. Te wi e begi, dan wi e kon moro krosibei na Gado, „a sma di e arki begi” (Ps. 65:2). Efu wi e si taki Gado e piki den begi fu wi, dan a lobi di wi abi gi en e kon moro tranga. Fu eksempre, kande wi si kaba taki a no e meki wi kisi tesi di hebi moro leki san wi man tyari (1 Kor. 10:13). Efu wi e broko wi ede nanga wan sani èn wi e begi Gado fayafaya, dan wi kan kisi a „freide fu Gado” di Yehovah wawan kan gi wi (Fil. 4:6, 7). Son leisi wi kan teki na eksempre fu Nehemia èn begi Gado sondro taki sma yere wi. Baka wan pisi ten wi e si taki Gado piki a begi fu wi (Neh. 2:1-6). Te wi e „tan begi” Yehovah èn wi e si taki a e arki den begi fu wi, dan a lobi di wi abi gi en o kon moro tranga èn wi o frutrow moro na en tapu taki a o yepi wi te wi e kisi tesi.—Rom. 12:12.

17. Efu wi lobi Gado, dan fa wi o si den konmakandra?

 ¹⁷ Abi a gwenti fu go na den alawiki konmakandra èn na den bigi konmakandra (Hebr. 10:24, 25). Den Israelsma ben e kon makandra fu arki èn fu leri fu Yehovah so taki den ben kan lespeki en èn so taki den ben kan du san skrifi na ini a Wet fu en (Deut. 31:12). Te wi lobi Gado trutru, dan a no de wan hebi fu du san a wani. (Leisi 1 Yohanes 5:3.) Sobun, meki wi du ala san wi man fu go na den konmakandra. Noiti wi musu meki a lobi di wi ben abi gi Yehovah di wi leri sabi en na a bigin, kon kowru.—Openb. 2:4.

18. Te wi lobi Gado, dan san wi o wani du?

¹⁸ Preiki fayafaya fu den tru leri di wi kon sabi (Gal. 2:5). A lobi di wi abi gi Gado e meki taki wi wani fruteri sma fu a Kownukondre fu en lobi Manpikin, a Mesias. Na ini Armagedon a o ’rèi en asi èn a o feti gi sani di tru’ (Ps. 45:4; Openb. 16:14, 16). Wi e prisiri trutru fu yepi sma tron disipel. Wi breiti taki wi kan leri den taki Gado lobi wi èn taki a pramisi wi wan nyun grontapu.—Mat. 28:19, 20.

19. Fu san ede wi musu sori warderi gi den skapuman di Yehovah poti fu luku na ipi fu en?

¹⁹ Sori warderi gi den skapuman di Gado poti fu luku na ipi fu en (Tori 20:28). Na Yehovah poti owruman na ini a gemeente èn ala ten den e du sani gi a bun fu wi. Den ’de leki wan kibripresi gi tranga winti èn gi sibibusi. Den de leki wan liba di e lon na wan kontren sondro watra èn leki a kowrupe fu wan bigi ston na ini wan kontren di drei’ (Yes. 32:1, 2). Te tranga winti e wai, te hebi alen e fadon noso te a son faya, dan wi breiti fu feni wan kibripresi. Na so wi breiti tu te owruman e yepi wi èn te den e gi wi a deki-ati di wi abi fanowdu fu tan dini Yehovah aladi wi e kisi problema na ini a libi. Te wi e gi yesi na den brada di e teki fesi na wi mindri, dan wi e sori taki wi abi furu warderi gi den èn taki wi lobi Gado nanga Krestes, di de na Ede fu a gemeente.—Ef. 4:8; 5:23; Hebr. 13:17.

20. Efu yu lobi Gado, dan san yu o du te yu leisi Yakobus 1:22-25?

²⁰ Efu yu lobi Yehovah èn yu abi wan bun matifasi nanga en, dan yu o de wan ’sma di e du san a wortu fu Gado e taki. Yu no o de wan sma di e yere nomo.’ (Leisi Yakobus 1:22-25.) Wan „sma di e du” san Gado taki na wan sma di abi bribi. A bribi dati e meki taki a e preiki èn taki a e teki prati na den konmakandra. Te yu lobi Gado trutru, yu o gi yesi na a „wèt fu Yehovah di bun dorodoro”. Sobun, yu o du ala sani di a e aksi fu yu.—Ps. 19:7-11.

21. Nanga san yu kan agersi den begi di yu e taki nanga yu heri ati?

²¹ Lobi gi Yehovah Gado o meki taki yu o tan begi en ala ten nanga yu heri ati. Soleki fa a sori, dan den priester na ini Israel ben abi a gwenti fu bron switismeri gi Yehovah ibri dei. Kownu David ben agersi den begi fu en nanga switismeri, di a singi: „Meki den begi fu mi kon de leki switismeri di sma e bron spesrutu gi yu [Yehovah]. Te mi e opo mi anu go na loktu fu begi, dan dati musu de gi yu leki nyanyan-ofrandi di sma e tyari na mofoneti” (Ps. 141:2; Eks. 30:7, 8). Abi sakafasi te yu e aksi Gado wan sani, begi en fayafaya, prèise en èn taki en tangi nanga yu heri ati. Na so den begi fu yu o de leki switismeri gi en, san wani taki dati a o feni den bun.—Openb. 5:8.

22. San wi o luku na ini a tra artikel?

²² Yesus taki dati wi musu lobi Gado èn tra sma tu (Mat. 22:37-39). Te wi lobi Yehovah nanga den rai fu en di wi kan feni na ini Bijbel, dan dati o yepi wi fu lobi tra sma. Na ini a tra artikel wi o si san disi wani taki.