SOWAN feifi yari pasa Choong Keon nanga Julie, wan trowpaar di pasa 35 yari now, ben de gewoon pionier na ini Sydney, na Australia. Choong Keon e taki: „Wi ben e wroko wan tu dei na ini a wiki èn wi ben abi wan bun libi. A weer ben moi na ini a kondre pe wi ben e tan èn wi no ben abi tumusi furu broko-ede. Wi ben lobi fu de krosibei fu wi famiri nanga wi mati.” Ma toku a konsensi fu Choong Keon nanga Julie ben fon den. Fu san ede? Aladi den ben sabi taki den ben kan du moro gi Yehovah, toku den ben e draidrai fu tyari kenki kon na ini den libi.

Na a kongres fu 2009, den yere wan lezing di naki den ati. A brada di hori a lezing, taki spesrutu nanga den sma di ben kan du moro na ini a preikiwroko. A taki: „Luku na eksempre disi: Wan sma di e rèi wan wagi, kan meki a wagi go na a kruktu-anusei noso na a reti-anusei. Ma a kan du dati soso te a wagi e rèi kaba. Na so Yesus e yepi wi tu fu du moro na ini a preikiwroko, ma na soso te wi e du wan sani fosi. Iya, te wi e meki muiti fu du dati, dan a o yepi wi trutru.” * Choong Keon nanga Julie ben abi a firi taki a brada ben e taki spesrutu nanga den. Na a srefi kongres dati, den interview wan trowpaar di ben e dini leki zendeling na Taiwan. Den fruteri fa den ben e prisiri nanga a preikiwroko èn den taki dati furu yepi ben de fanowdu ete. Agen Choong Keon nanga Julie ben abi a firi taki a trowpaar ben e taki nanga den.

Julie e taki: „Baka a kongres dati, wi begi Yehovah fu gi wi deki-ati fu bigin seti sani fu kan froisi go na Taiwan.” A e taki moro fara: „Ma wi ben frede. A ben gersi leki wi ben de fu dyompo go na ini bun dipi watra pe wi no ben swen noiti ete.” Wan tekst di yepi den fu teki wan bosroiti na Preikiman 11:4 pe skrifi: „A sma di e luku a winti, no o sai siri. A sma di e luku den wolku, no o koti nyanyan.” Choong Keon e taki: „Wi teki a bosroiti fu no tanapu ’luku’ moro, ma fu bigin ’sai siri èn koti nyanyan’.” Ne den begi fu a tori. Baka dati den begi ete wan tu tron èn den leisi ondrofenitori fu  zendeling. Fu di den ben wani kon sabi fa a libi de na Taiwan, meki den seni furu e-mail go na brada nanga sisa di ben froisi go drape kaba. Den seri den wagi nanga den ososani fu den èn dri mun baka dati den doro na Taiwan.

Moro leki 100 brada nanga sisa fu 21 te go miti 73 yari di komoto na tra kondre, e dini now na Taiwan na ini kontren pe moro Kownukondre preikiman de fanowdu. Den sma disi de fu Australia, Ingrisikondre, Kanada, Fransikondre, Yapan, Korea, Spanyorokondre nanga Amerkankondre. Na ini a grupu disi yu abi moro leki 50 sisa di no trow. San yepi den fayafaya brada nanga sisa disi fu du a diniwroko fu den na ini wan tra kondre? Meki wi go luku.

Laura, wan sisa fu Kanada di no trow, e pionier na a west-sei pisi fu Taiwan. Ma sowan tin yari pasa, a no ben lobi a preikiwroko kwetikweti. Laura e fruteri taki disi ben de so fu di a no ben e preiki nofo fu kan de wan bun preikiman. Ma dan wan tu mati na Kanada aksi en fu go nanga den na Meksikow fu preiki wán mun drape. „Dati na a fosi leisi taki mi ben de furu na ini a preikiwroko èn mi musu taki dati mi ben lobi en.”

Den moi sani dati di Laura ondrofeni meki taki a bigin prakseri fu froisi go na wan gemeente na ini Kanada pe den e taki wan tra tongo. A leri taki Sneisitongo, a go dini na ini wan Sneisi grupu èn a bigin seti sani fu go na Taiwan. Na ini september 2008, a froisi go drape. Laura e taki: „A teki wan heri yari fosi mi kon gwenti a nyun kontren, ma now mi no e prakseri srefi fu drai go baka na Kanada.” Fa a e denki now fu a preikiwroko? A e taki: „Mi lobi en srefisrefi. Nowan sani e gi mi moro prisiri leki te mi e si fa sma di e studeri Bijbel kenki den libi te den e kon sabi Yehovah. Di mi kon dini na ini Taiwan, mi si furu leisi fa a wroko disi gi mi bigi prisiri.”

Brian nanga Michelle, wan trowpaar fu Amerkankondre di pasa 35 yari kaba, froisi go na Taiwan sowan aiti yari pasa. Na a bigin den ben feni taki den no ben e du nofo na ini a preikiwroko. Ma wan zendeling taigi den: „Srefi te yu kan gi wan sma wán traktaat nomo, yu musu hori na prakseri taki kande dati o de a fosi leisi taki a yere wan sani fu Yehovah. Sobun, na a fasi dati yu du wan prenspari sani kaba na ini a preikiwroko.” A deki-ati dati yepi Brian nanga Michelle fu horidoro. Wan tra brada taigi den: „Efu yu no wani lasi-ati, dan yu no musu luku ala dei omeni fu a Sneisitongo yu leri kaba, ma yu musu du dati baka ibri bigi konmakandra.” Na dati den du èn den go na fesi. Now den de pionier di sabi du den wroko bun.

San o yepi yu fu bigin leri wan tra tongo? Pruberi fu go luku a kondre pe yu ben sa wani dini. Go na den konmakandra, moksi nanga den brada nanga sisa fu drape èn go na ini a preikiwroko makandra nanga den. Brian e taki: „Te yu si taki so furu sma wani arki a Kownukondre boskopu èn yu e si fa den brada nanga sisa lobi yu, dan dati o meki en moro makriki gi yu fu dini na wan tra kondre.”

Furu brada nanga sisa di froisi go na Taiwan fu di moro preikiman de fanowdu drape, e gi les na ini Ingrisitongo fu man pionier. Kristin nanga Michelle e seri fisi. Kristin e taki: „Noiti ete mi du so wan wroko, ma a yepi mi fu man tan na ini a kondre.” Baka wan pisi ten a feni wan tu klanti di ben gwenti kon bai sani na en. Na so a man wroko nofo moni fu sorgu gi en nanga en wefi. Den abi nofo ten tu fu du a pionierwroko di e yepi den fu de fisiman di e fanga libisma. Disi na a moro prenspari sani gi den.

William nanga Jennifer, wan trowpaar fu Amerkankondre, doro na Taiwan sowan seibi yari pasa. William e taki: „Son leisi a ben hebi fu leri a tongo, fu dini leki pionier, fu sorgu gi a gemeente èn fu wroko nofo moni fu man sorgu mi osofamiri.” San yepi den fu horidoro èn fu de koloku? Den e pruberi fu seti sani na so wan fasi taki a pionierwroko no e kon hebi gi den. Fu eksempre, di den ben e leri Sneisitongo den no fruwakti tumusi furu fu densrefi. Dati meki den no ben e firi brokosaka tumusi te den no ben e go na fesi so esi.

William sabi ete taki wan kring-opziener taigi en wan leisi taki te wi wani du moro na ini a diniwroko, dan wi musu bigin seti sani fu doro a marki dati. Ma a no musu de wan hebi gi wi. Na presi fu dati, a musu gi wi prisiri. William teki a rai disi èn dati yepi en nanga en wefi fu no fruwakti tumusi furu fu densrefi. Den teki a rai tu fu brada di abi frantwortu na ini a gemeente drape èn den kenki a fasi fa den ben e du son sani so taki den ben kan abi bun bakapisi na ini preikiwroko. A e taki moro fara: „A yepi wi tu fu no frigiti fu poti ten na wan sei fu luku den moi sani di de fu si na tapu na èilanti pe wi e preiki.”

Megan, di komoto na Amerkankondre, na wan pionier sisa di no trow. Neleki fa a de nanga William nanga Jennifer, na so Megan e prisiri tu nanga a diniwroko èn a e pruberi fu taki a Sneisitongo moro bun. Ibri satra nanga sonde a e wroko makandra nanga wan grupu preikiman di gwenti preiki na ini a moi kontren fu Kaohsiung, a moro bigi lanpe fu Taiwan. Drape Megan ben go fu a wan sipi na a trawan fu preiki a bun nyunsu gi fisiman fu Bangladesh, India, Indonesia, den Filippijnen, Thailand nanga Vanuwatu. „Fu di den fisiman de na a lanpe soso gi wan syatu pisi ten,  meki wi e bigin studeri Bijbel nanga den wantewante. Fu man miti den alamala, meki mi e studeri nofo tron nanga fo noso feifi sma na a srefi ten.” Fa a e go nanga a Sneisitongo di Megan e leri? A e taki: „Mi ben winsi taki mi ben man leri a tongo moro esi. Ma mi e hori na prakseri san wan brada taigi mi wan leisi: ’Du san yu man, dan Yehovah o sorgu gi ala tra sani.’”

Di Cathy, fu Ingrisikondre ben wani froisi go na wan tra kondre, a luku fosi sortu kondre ben o fiti gi wan sisa di no trow. A begi Yehovah fu a tori èn a seni brifi gi wan tu bijkantoro fu aksi den sortu presi ben o fiti gi sisa di no trow. Baka dati a prakseri bun fu ala den piki di a kisi èn a kon si taki Taiwan ben o bun gi en.

Na ini 2004, di Cathy ben abi 31 yari, a froisi go na Taiwan. Drape a no e libi bigi, ma a abi soso den moro prenspari sani di de fanowdu fu tan na libi. A e fruteri: „Mi aksi den brada nanga sisa san na den moro bun presi fu bai bunkopu froktu nanga gruntu. A bun rai fu den e yepi mi fu kan gebroiki mi moni moro langa.” San e yepi en fu libi na a fasi disi? Cathy e taki: „Mi e begi Yehovah furu fu a yepi mi fu de tevrede nanga a nyanyan di mi abi èn nanga den krosi di mi e weri. Mi si taki Yehovah piki den begi fu mi fu di a leri mi fu kon sabi san mi abi fanowdu trutru èn fu di a yepi mi fu no kisi a firi taki mi e misi wan sani.” A e taki tu: „Mi lobi a fasi fa mi e libi fu di dati e yepi mi fu tan poti prakseri na a diniwroko.”

Ma den furu moi sani di Cathy e ondrofeni, e meki tu taki a e prisiri nanga a libi fu en. A e taki: „Mi man preiki na ini wan kontren pe furu sma wani arki a bun nyunsu. Disi e gi mi furu prisiri.” Di a doro na Taiwan, tu Sneisitongo gemeente ben de na ini a foto pe a bigin dini leki pionier. Ma now seibi gemeente de drape. Cathy e taki: „Mi breiti srefisrefi fu si nanga mi eigi ai taki a wroko e gro èn taki mi kan yepi ala dei fu tyari sma kon na ini a tru anbegi.”

Fa sani waka gi Choong Keon nanga Julie di wi kari na a bigin fu na artikel? Na a bigin Choong Keon ben abi a firi taki a no ben de fanowdu trutru na ini a gemeente fu di a no ben man taki Sneisitongo bun. Ma den brada drape ben denki tra fasi fu a tori. Choong Keon e taki: „Di a gemeente fu wi prati na ini tu gemeente, mi kisi furu nyun frantwortu leki dinari ini a diniwroko. Di dati pasa, mi si taki mi e dini trutru pe moro yepi de fanowdu.” Nanga wan lafu fesi a e taki tu: „Mi ben firi bun di mi kon si taki srefi mi den ben abi fanowdu.” Now a de wan owruman. Julie e taki tu: „Wi abi a firi taki wi du wan bun sani èn noiti ete wi ben de so koloku. Wi kon dyaso fu yepi trawan, ma den moi sani di wi ondrofeni meki wi kon si taki na wi kisi yepi. Wi e taki Yehovah tangi taki a gi wi na okasi fu kon dini dyaso.”

Furu kondre de ete pe moro preikiman de fanowdu. Yu e aksi yusrefi san yu o du nanga yu libi now di yu kaba nanga skoro? Efu yu na wan sma di no trow, yu e prakseri san yu kan du moro na ini na organisâsi fu Yehovah? Yu wani taki yu osofamiri ondrofeni moi sani na ini a diniwroko fu Yehovah di den no o frigiti noiti moro? Yu go nanga pensyun èn yu abi ondrofeni di yu kan gebroiki fu yepi trawan? Yu kan de seiker taki yu o kisi furu blesi te yu e teki a bosroiti fu du moro na ini a diniwroko èn te yu e go dini pe moro Kownukondre preikiman de fanowdu.