WAN prenspari sani gi Gado pipel, na den bigi konmakandra pe den e leri sani fu Yehovah. Drape den abi a gwenti tu fu nyan nanga makandra èn disi e gi den moro prisiri.

Na ini september 1919, den Bijbel Ondrosukuman ben abi wan kongres na Cedar Point, Ohio, na Amerkankondre, di ben hori aiti dei langa. Den sma di ben kon na a kongres ben e tan na ini hotel pe den ben kan nyan tu. Ma dusundusun sma moro leki san den brada ben fruwakti, kon na a kongres tu. Di den sma di ben e wroko na ini a restaurant fu a hotel si so furu sma, den tapu nanga wroko. Na edeman fu a restaurant no ben sabi san fu du èn dati meki a aksi den brada efu yonguwan ben kan yepi en. Furu fu den ben de wani fu du dati. Sadie Green ben de wan fu den. A taki: „Fositron mi ben abi a wroko fu prati nyanyan gi sma, ma wi du en nanga prisiri.”

Na ini den yari baka a kongres disi, den brada seti sani taki nyanyan ben kan bori na den kongres. Na so furu brada nanga sisa kisi na okasi fu du a wroko disi. Fu di yonguwan ben e wroko makandra nanga tra brada nanga sisa, meki furu fu den kisi a deki-ati fu du moro gi Yehovah. Gladys Bolton ben wroko na ini a kukru na wan kongres di hori na ini 1937. A taki: „Mi miti sma fu tra presi èn mi yere fa den ben e horidoro, aladi den ben abi problema. Na a ten dati mi kisi na angri fu tron wan pionier.”

Beulah Covey di ben go na wan fu den kongres, taki: „Fu di den brada nanga sisa wroko fayafaya, meki ala sani ben e go bun.” Ma a no ben de so makriki. Na ini 1969, Angelo Manera go na wan kongres di ben hori na Dodger Stadium na ini Los Angeles, na California. Di a doro drape, a kisi fu yere taki den poti en leki edeman fu a kukru. A taki: „Mi skreki srefisrefi di mi yere san mi ben musu du.” Wan fu den sani di den ben musu sreka, na fu diki wan gotro fu sowan afu kilometer pe den ben poti wan peipi na ini, so taki den ben abi gas fu bori.

Na ini 1982, den brada nanga sisa fu Sierra Leone wroko fayafaya fu krin wan gron. Baka dati den gebroiki san den ben abi fu bow a kukru. Na ini 1951, brada fu Frankfurt, Doisrikondre, di ben sabi fa fu du sani bun, yuru wan loko. Te a loko disi ben e drai, dan den ben gebroiki a faya dampu fu en fu bori nyanyan na ini 40 spesrutu patu. Na ini wán yuru, brada nanga sisa  prati 30.000 porsi nyanyan. Den sma fu a kongres ben e tyari den eigi nefi nanga forku kon, so taki a wroko ben kon moro lekti gi den 576 brada nanga sisa di ben musu wasi dotisani. Na ini Yangon, na Mianmar, yu ben abi brada nanga sisa tu di ben e bori nyanyan. Fu di den no ben wani taki a nyanyan faya tumusi gi den brada nanga sisa fu tra kondre, meki den no poti so furu pepre na ini a nyanyan leki fa den ben gwenti.

Na ini 1950, wan kongres ben e hori na Amerkankondre. Annie Poggensee ben de na a kongres disi. Aladi a ben musu tanapu na ini a faya son na ini wan langa rèi fu kisi nyanyan, toku a ben e prisiri. A taki: „Di mi tanapu na ini a rèi, mi arki fa tu sisa e taki nanga makandra. Den sisa disi ben de fu Europa èn den ben kon na Amerkankondre nanga boto.” Den ben fruteri fa Yehovah yepi den fu kon na a kongres. Annie taki: „A takimakandra fu den gi mi furu deki-ati. Den ben e prisiri so te, taki a ben gersi gi den leki a rèi no ben langa èn a son no ben faya.”

Na furu bigi kongres den seti bigi tenti nanga wan heri ipi hei tafra pe sma ben kan tanapu e nyan. Na so den sma no ben o teki langa fu nyan èn baka den, trawan ben kan go nyan tu. Efu den no ben seti sani so, dan a ten di den dusundusun sma ben abi fu nyan, ben o syatu tumusi. Wan sma di no ben de wan Kotoigi, taki: „Mi no e frustan a kerki disi. Den e tanapu te den e nyan.”

Heihei wrokoman fu lanti nanga edeman fu a legre ben fruwondru fu si o bun sani ben orga na den kongres. Sma fu na Amerkan legre kon luku fa sani ben e go na a kukru na Yankee Stadium, na New York City. Baka dati den taigi a legre-ofsiri Faulkner, di ben e wroko na a ministeria fu legre-afersi fu Ingrisikondre, taki a ben musu go na wan kongres tu fu luku fa sani ben orga. Dati meki en nanga en wefi go na a „Kownukondre Wini” kongres di ben hori na ini 1955 na Twickenham, Ingrisikondre. A si taki a kukru ben e drai bun fu di den brada di ben wroko drape ben abi lobi.

Furu yari langa, brada nanga sisa ben de klariklari fu sreka bun nyanyan gi den sma di ben kon na den kongres. A nyanyan no ben diri èn den du a wroko disi nanga furu lobi. Ma nofo tron a wroko ben furu èn dati meki wan lo brada nanga sisa ben de fanowdu. Den ben e wroko langa èn son leisi den ben misi wan tu pisi fu a programa noso kande a heri programa srefi. Ma na ini den yari baka 1975 sani kenki. Na furu presi den brada no seti so furu sani moro fu prati nyanyan na den kongres. Na a bigin fu 1995, den aksi den sma di ben kon na a kongres fu tyari den eigi nyanyan kon. Now den brada nanga sisa di ben bori nyanyan ben kan sidon arki a programa èn den ben kan abi ten fu taki nanga tra brada nanga sisa. *

A musu fu de so taki Yehovah lobi den brada nanga sisa di wroko so tranga fu yepi tra brada nanga sisa. Kande sonwan fu den e sari pikinso te den e prakseri a moi ten di den ben e wroko na ini den kukru. Ma wán sani de seiker: Lobi na a moro prenspari sani di de fu si ete na den kongres fu wi.​—Yoh. 13:34, 35.