1. San kan yepi wi fu teki na eksempre fu Yehovah?

YEHOVAH gi wi ete wan moi kado: A meki wi na so wan fasi taki wi man frustan fa tra sma e firi, aladi noiti wi ben de na ini a situwâsi fu den. (Leisi Efeisesma 5:1, 2.) Fa disi kan yepi wi fu teki na eksempre fu Yehovah? Fu san ede wi musu luku bun taki wi no e gebroiki a kado di Gado gi wi na wan fowtu fasi?

2. Fa Yehovah e firi te wi e pina?

² Yehovah pramisi wi wan moi ten pe nowan sma o pina. Den salfuwan e fruwakti fu libi fu têgo na ini hemel èn den „tra skapu” e howpu fu libi fu têgo na grontapu (Yoh. 10:16; 17:3; 1 Kor. 15:53). Ma te ogri e miti wi, dan Yehovah e frustan fa wi e firi èn a sabi taki a hebi gi wi. Na ini owruten, a ben hati Yehovah di a pipel fu en ben e pina na ini Egepte. Iya, „te den ben de na ini banawtu, ensrefi ben de na ini banawtu tu” (Yes. 63:9). Hondrohondro yari baka dati, di den Dyu ben e bow a tempel baka, feanti ben e gens den. Dati meki den ben  frede. Ma Gado taigi den: „A sma di e fasi unu e fasi a popki fu mi ai” (Sak. 2:8). Neleki fa wan mama e sori lobi gi en beibi, na so Yehovah e sori lobi gi en pipel tu èn dati meki a e yepi den (Yes. 49:15). Sobun, Yehovah man frustan fa tra sma e firi èn a meki wi na so wan fasi taki wi srefi man frustan tu fa tra sma e firi.​—Ps. 103:13, 14.

3. San e sori taki Yesus ben abi sari-ati?

³ Te sma ben e pina, dan Yesus ben e frustan fa den ben firi, aladi en srefi noiti ben de na ini a situwâsi fu den. Fu eksempre, a pipel ben e frede den kerki fesiman di ben e bedrigi den. Den kerki fesiman disi ben meki wan lo wet so taki a libi fu a pipel ben kon moro hebi (Mat. 23:4; Mark. 7:1-5; Yoh. 7:13). Aladi Yesus noiti no ben frede den kerki fesiman disi èn a no ben bribi den lei fu den, toku a ben man frustan fa a pipel ben e firi. Sobun, te a ben e „si ala den sma, a ben e sari den, bika sma ben e pina den èn den ben e waka bruyabruya leki skapu di no abi skapuman” (Mat. 9:36). Neleki en Papa, na so Yesus ben lobi sma tu èn a ben e sori sari-ati gi den.​—Ps. 103:8.

4. San Yesus ben du te a ben e si taki sma ben e pina?

⁴ Te Yesus ben e si fa sma ben e pina, dan a ben yepi den fu di a ben lobi den. Na so a sori na wan heri bun fasi taki a ben de neleki en Papa. Baka di Yesus nanga den apostel fu en waka bun fara fu go preiki, den kon weri èn den go rostu na wan tiri presi. Ma di Yesus si omeni sma ben e wakti en, a sari den. Dati meki a teki a ten fu „leri den furu sani”.​—Mark. 6:30, 31, 34.

5, 6. Fa wi kan sori lobi gi tra sma neleki Gado? Gi wan eksempre. (Luku a prenki na a bigin fu na artikel.)

⁵ Neleki fa Gado e sori lobi gi sma, na so wi kan sori lobi gi tra sma tu. Luku wan eksempre fu wan yongu brada di wi o kari Alan. Alan e prakseri wan owru brada na ini a gemeente di no man si so bun. A muilek gi a brada disi fu leisi èn a hebi gi en tu fu waka oso fu oso na ini a preikiwroko. Now Alan e denki san Yesus ben taki na Lukas 6:31: „San unu wani meki sma du gi unu, na dati un musu du gi den tu.” Dati meki Alan e aksi ensrefi: ’San mi wani taki sma du gi mi?’ A e taki: ’Mi wani taki den e prei bal nanga mi!’ Ma na owru brada disi no man lon èn a no man prei bal. Na presi fu dati, san Alan musu du dan? A musu aksi ensrefi: ’Efu mi ben de na owru brada disi, dan san mi ben sa wani sma du gi mi?’

⁶ Aladi Alan yongu ete, toku a e pruberi fu frustan fa a ben o firi efu a ben o owru. Dati meki a e go taki nanga na owru brada. Te a brada disi e bigin taki, dan Alan e arki en bun. Safrisafri Alan e kon frustan fa a musu de fu de wan owrusma di e feni en muilek fu leisi Bijbel noso fu waka oso fu oso. Te Alan e frustan fa na owru brada disi e firi, dan a man si tu sortu yepi a brada abi fanowdu èn a wani yepi a brada trutru! Wi srefi kan du dati tu. Te wi e frustan fa tra sma e firi èn wi e sori lobi gi den, dan wi o de neleki Yehovah.​—1 Kor. 12:26.

7. Fa wi kan kon frustan fa tra sma e firi?

⁷ A no ala ten a makriki fu frustan fa tra sma e pina, spesrutu te wi no ben de na ini so wan situwâsi ete. Son sma no man du ala sani fu di den kisi mankeri, den  siki noso den kon owru. Yu abi sma di e firi brokosaka èn trawan e frede wantronso taki den no man du noti moro. Dan yu abi sma baka, di no e firi bun fu di sma du ogri nanga den omeni yari. Trawan e kweki den pikin den wawan noso den abi osofamiri memre di no e dini Yehovah. Ala sma e kisi problema, ma furu fu den problema disi e difrenti fu san wi srefi e ondrofeni. Sobun, fa wi kan teki na eksempre fu Gado èn sori lobi? Wi musu arki bun san a tra sma e fruteri wi so taki wi kan frustan pikinso fa a e firi. Na so wi o man sabi san na a moro bun fasi fu yepi a sma disi. Kande wi kan fruteri en san Yehovah e denki fu a problema fu en, noso wi kan du wan sani gi en. Te wi e du disi, dan wi e teki na eksempre fu Yehovah.​—Leisi Romesma 12:15; 1 Petrus 3:8.

8. San yepi Yesus fu sori switifasi?

⁸ Gado en Manpikin ben taki: „A Moro Heiwan, . . . [e] du bun gi den sma di no de nanga tangi èn gi den ogri sma” (Luk. 6:35). Yesus ben sori switifasi neleki Gado. San yepi en fu du disi? Fu di a ben prakseri bun sortu krakti den sani di a ben o taki noso du, ben o abi na tapu sma. Fu eksempre, wan leisi wan uma kon na en di ben du furu ogri sani. Na uma disi ben e krei so te, taki den watra-ai fu en fadon na tapu Yesus futu. Yesus ben man si taki na uma disi ben abi berow. A ben frustan taki na uma ben o firi brokosaka efu a no ben sori switifasi gi en. Dati meki a prèise na uma èn a gi en pardon. Ma wan Fariseiman di ben de drape, no ben e agri nanga san Yesus du. Toku Yesus taki na wan switifasi nanga en tu.​—Luk. 7:36-48.

9. San kan yepi wi fu sori switifasi neleki Gado? Gi wan eksempre.

⁹ Fa wi kan sori switifasi neleki Gado? Na apostel Paulus ben skrifi: „Wan srafu fu Masra no musu meki trobi, ma a musu sori switifasi gi ala sma” (2 Tim. 2:24). Fu eksempre, prakseri fa yu kan sori switifasi na ini den situwâsi disi: Efu a basi fu yu no e du en wroko bun, dan san yu o taki? Efu wan brada di no kon na zaal omeni mun e kon na den konmakandra, dan san yu o taigi en? Efu yu e preiki gi wan sma di e taki dati a no abi ten, dan fa yu kan sori switifasi? Efu yu wefi e aksi yu: „Fu san ede yu no taigi mi san yu ben o du satra?” Yu o piki en na wan switifasi? Wi musu pruberi fu frustan fa tra sma e firi èn fa den sani di wi e taki abi krakti na den tapu. Na so wi o sabi san wi musu taki èn san wi musu du fu sori switifasi neleki Yehovah.​—Leisi Odo 15:28.

10, 11. San kan yepi wi fu abi koni neleki Gado? Gi wan eksempre.

¹⁰ Yehovah koni pasa marki. A man luku san o pasa na ini a ten di e kon. Ma en srefi e bosroiti o ten a wani du dati. Ma wi no man du dati. Toku wi kan sori taki wi abi koni tu. Fa so? Fosi wi teki wan bosroiti, wi musu go denki fa disi o abi krakti na wi tapu noso tapu tra sma. Wi no musu de leki den Israelsma. Den no prakseri san ben kan pasa efu den ben o trangayesi Gado. Aladi Yehovah du so furu gi den, toku Moses ben sabi taki den no ben o du san Gado feni bun. Di a heri pipel kon makandra, Moses singi wan singi di ben e taki: „Israel na wan pipel di no e teki rai. Nowan fu den abi frustan. Ma mi winsi taki den ben koni! Dan den ben o prakseri den sani disi. Den ben o prakseri  taki den ben kan lasi den libi bakaten.”​—Deut. 31:29, 30; 32:28, 29.

¹¹ Fu eksempre, kon meki wi taki dati yu meki mofo fu trow. Hori na prakseri taki den seksfiri fu yu kan tranga fu di yu lobi a sma. Ma noiti yu musu du wan sani di kan pori a matifasi di yu abi nanga Yehovah. Na presi fu dati, wi musu sori taki wi abi koni èn wi musu prakseri san kan pasa te wi no e arki a koni rai fu Gado. Du san Bijbel e taki: „A koniwan si taki ogri o miti en èn a go kibri, ma a sma sondro ondrofeni waka go doro èn dati meki a musu kisi strafu.”​—Odo 22:3.

12. Sortu takru bakapisi a kan abi te wi no e dwengi den prakseri fu wi?

¹² Wan koni sma e frustan taki den prakseri fu en kan abi bun bakapisi noso takru bakapisi, neleki faya. Te wi e gebroiki faya na a yoisti fasi, dan dati kan de wan bun sani. Fu eksempre, wi kan gebroiki faya fu bori nyanyan. Ma faya kan abi takru bakapisi tu. Te wi no e luku a faya bun, a kan bron wi oso èn a kan kiri ala den sma na ini na oso. Wi kan agersi den prakseri fu wi nanga faya tu. Te wi e prakseri bun sani, dan dati kan yepi wi fu de neleki Yehovah. Ma te wi e prakseri sani di no bun, dan a kan abi takru bakapisi. Fu eksempre, te wi e tan denki fu seks di no fiti noso fu tra sani di no bun, dan te fu kaba wi kan go du den sani disi. Disi kan meki taki wi e pori a matifasi di wi abi nanga Yehovah.​—Leisi Yakobus 1:14, 15.

13. Fa Eva ben prakseri taki a libi fu en ben o de?

¹³ Wi kan leri wan sani fu a tori fu a fosi uma Eva. Yehovah ben taigi Adam nanga Eva taki den no ben mag nyan a froktu fu „a bon di nen ’Sabi san bun èn san ogri’” (Gen. 2:16, 17). Ma a sneki taigi Eva: „Unu no o dede kwetikweti, bika Gado sabi taki na a dei di unu o nyan den froktu, un ai o opo èn unu o de leki Gado. Unu o sabi san bun èn san ogri.” Ne Eva luku a bon èn a „kon si taki den froktu fu a bon ben bun fu nyan èn taki a bon ben moi fu si”. San ben de a bakapisi? „A piki wan froktu fu a bon, dan a nyan fu en. Bakaten di en masra ben de nanga en, a gi en masra meki a nyan tu. Ne en masra srefi bigin nyan” (Gen. 3:1-6). Soleki fa a sori, dan Eva ben lobi a sani di Satan taigi en. Now a ben kan bosroiti gi ensrefi san bun èn san ogri, na presi fu wan sma taigi en. Ma a fasi fu denki disi no ben abi bun bakapisi kwetikweti! Fu di en masra Adam trangayesi Gado, meki „sondu kon na grontapu èn sondu tyari dede kon”.​—Rom. 5:12.

14. Fa Bijbel e yepi wi fu no du hurudu?

 ¹⁴ A sondu di Eva du na ini a dyari fu Eden, no ben abi fu du nanga seks. Toku Bijbel e warskow wi taki wi no musu tan denki fu nowan sani di abi fu du nanga hurudu. A taki: „Iniwan sma di e tan luku wan uma nanga tranga lostu gi en, du sutadu nanga en kaba na ini en ati” (Mat. 5:28). Paulus ben warskow tu: „No sidon prakseri na fesi fa yu o du den sani di a sondu skin wani.”​—Rom. 13:14.

15. Sortu gudu wi musu kibri èn fu san ede?

¹⁵ Wan tra sani di Bijbel e sori wi na taki wi musu tan prakseri fa wi kan prisiri na ati fu Yehovah. Wi no musu tan denki fa wi kan kon gudu. Srefi te wan sma gudu, en moni no kan kibri en (Odo 18:11). Yesus taki dati wan sma „di e tyari moro nanga moro gudu kon na wán gi ensrefi”, ma di no e poti Yehovah na a fosi presi na ini en libi, na wan don sma. A sma disi „no gudu na ini Gado ai” (Luk. 12:16-21). Yehovah breiti te wi e du sani di e prisiri en ati (Odo 27:11). Te wi e kibri „gudu na ini hemel”, dan wi e prisiri fu di wi sabi taki Yehovah feni wi bun (Mat. 6:20). Wan bun matifasi nanga Yehovah warti moro iniwan gudu di wi kan abi.

16. San kan yepi wi te wi e broko wi ede?

¹⁶ Te wi e pruberi fu kon gudu na ini a grontapu disi, dan dati o tyari soso broko-ede kon (Mat. 6:19). Yesus ben gebroiki wan agersitori fu sori taki „den broko-ede fu a grontapu disi nanga a bedrigifasi fu gudu” kan kiri a wortu fu a Kownukondre (Mat. 13:18, 19, 22). Son sma e broko den ede doronomo nanga ogri di kan miti den. Ma te wi e broko wi ede tumusi, dan wi kan kon siki èn a matifasi di wi abi nanga Yehovah kan kon pori. Na presi fu dati, wi musu frutrow na tapu Yehovah. No frigiti taki „tumusi furu broko-ede o meki wan sma lasi-ati, ma te sma e taki switi nanga en, dan a e firi prisiri” (Odo 12:25). Te wan sma di e frustan fa yu e firi e gi yu deki-ati, dan yu o firi bun. Kande yu kan taki nanga yu papa, yu mama, yu trowpatna noso wan mati di sabi yu bun èn di e si sani soleki fa Gado e si en. Te yu e fruteri den san de tapu yu ati, dan dati kan yepi yu fu no broko yu ede tumusi.

17. Fa Yehovah e yepi wi te wi e broko wi ede?

¹⁷ Nowan sma leki Yehovah e frustan fa wi e firi te wi e broko wi ede. Paulus ben skrifi: „No broko un ede nanga nowan sani, ma begi Gado ala ten, begi en fayafaya èn taki en tangi tu. Na so a o kon sabi san unu wani aksi en, dan a freide fu Gado di bigi moro iniwan sani di libisma man frustan, o kibri un ati nanga un frustan nanga yepi fu Krestes Yesus” (Fil. 4:6, 7). Sobun, te yu e broko yu ede, dan denki den fasi fa Yehovah e yepi yu fu meki a matifasi di yu abi nanga en tan tranga. A gi yu den Kresten brada nanga sisa, den owruman, a srafu di de fu frutrow, den engel nanga Yesus fu yepi yu.

18. Te wi e prakseri fa sani o de, dan fa dati kan yepi wi?

¹⁸ Soleki fa wi si, dan wi kan teki na eksempre fu Yehovah te wi e pruberi fu frustan fa tra sma e firi (1 Tim. 1:11; 1 Yoh. 4:8). Wi o de koloku te wi e sori trutru lobi, te wi e prakseri den bakapisi fu den sani di wi e du èn te wi e luku bun taki wi no e meki broko-ede pori wi prisiri. Sobun, meki wi tan prakseri fa a libi o de te a Kownukondre o tiri. Meki wi du ala san wi man fu teki na eksempre fu Yehovah èn sori lobi, switifasi, nanga koni. Dan wi o de koloku.​—Rom. 12:12.