1, 2. (a) Sortu presi fu anbegi, den futuboi fu Yehovah gebroiki na ini owruten? (b) Fa Yesus ben e si a tempel fu Gado na ini Yerusalem? (c) San wi o luku na ini na artikel disi?

SENSI owruten, den futuboi fu Gado ben abi presi pe den ben e anbegi Gado. A kan taki Abel ben e gebroiki wan altari te a ben e tyari ofrandi gi Gado (Gen. 4:3, 4). Noa, Abraham, Isak, Yakob nanga Moses ben e seti altari tu fu anbegi Gado (Gen. 8:20; 12:7; 26:25; 35:1; Eks. 17:15). Yehovah ben taigi den Israelsma fu bow a tabernakel (Eks. 25:8). Bakaten, den bow wan tempel fu anbegi Yehovah (1 Kow. 8:27, 29). Di den Dyu drai kon baka fu Babilon, pe den ben de srafu, den ben abi a gwenti fu kon makandra na ini snoga (Mark. 6:2; Yoh. 18:20; Tori 15:21). Den fosi Kresten ben e kon makandra na ini na oso fu den brada nanga sisa fu a gemeente (Tori 12:12; 1 Kor. 16:19). Na ini a ten disi, a pipel fu Yehovah e kon makandra na ini furu tin dusun Kownukondre zaal pe den e kisi leri èn pe den kan anbegi Gado.

² Yesus ben abi furu lespeki gi a tempel fu Yehovah na ini Yerusalem. A lobi di a ben abi gi a tempel ben memre den bakaman fu en san a psalm skrifiman taki: „A lobi di mi abi gi yu oso,  de leki wan faya di e bron na ini mi” (Ps. 69:9; Yoh. 2:17). Wi no kan kari nowan Kownukondre zaal „na oso fu Yehovah”, fu di a no de a srefi leki a tempel di ben de na ini Yerusalem (2 Kron. 5:13; 33:4). Ma toku Bijbel e gi wi rai di e sori fa wi musu gebroiki den presi pe wi e go fu anbegi Gado èn fa wi kan sori lespeki gi den presi disi. Na ini na artikel disi, wi o luku den Bijbel rai di e leri wi fa wi musu tyari wisrefi te wi de na den Kownukondre zaal, fa wi musu sorgu gi den èn fa wi kan yepi pai gi den. *

3-5. San na wan Kownukondre zaal èn fa wi musu si den konmakandra di e hori drape?

³ Wan Kownukondre zaal na a moro prenspari presi pe sma kan kon makandra fu anbegi Yehovah. Wan fu den sani di Yehovah seti fu tranga a bribi fu wi, na den alawiki konmakandra di e hori na a Kownukondre zaal. Na drape na organisâsi fu en e gi prenspari Bijbel leri nanga rai di e gi wi deki-ati. Te yu luku en bun, dan ala den sma di de na den konmakandra, de drape fu di Yehovah nanga a Manpikin fu en gi den wan kari. Aladi wi e kisi a kari ala ten baka fu go nyan na „a tafra fu Yehovah”, toku wi no musu frigiti taki a kari disi na wan spesrutu sani.—1 Kor. 10:21.

⁴ Yehovah feni den sortu okasi disi pe wi kan anbegi en èn kisi deki-ati so prenspari, taki a taigi na apostel Paulus fu sori taki wi no musu misi konmakandra. (Leisi Hebrewsma 10:24, 25.) Fa wi o sori lespeki gi Yehovah efu wi e misi konmakandra sondro taki a de fanowdu trutru? Te wi e sreka wisrefi gi den konmakandra disi èn te wi e teki prati na den nanga wi heri ati, dan wi e sori taki wi e warderi Yehovah nanga den sani di a seti gi wi.—Ps. 22:22.

⁵ Den sani di wi e du na den konmakandra nanga a fasi fa wi e sorgu gi den Kownukondre zaal fu wi, e sori taki wi abi lespeki gi Yehovah. A fasi fa wi e tyari wisrefi, musu gi Yehovah nen grani. Nofo tron a nen disi de fu si tu na tapu den bord na fesisei fu a Kownukondre zaal.—Luku 1 Kow. 8:17.

6. San son sma taki fu den Kownukondre zaal fu wi èn fu den sma di e go na den konmakandra? (Luku a prenki na a bigin fu na artikel.)

⁶ Furu sma di no de Kotoigi, e si taki wi abi lespeki gi den presi pe wi e go fu anbegi Gado. Fu eksempre, wan man fu Torkukondre taki: „A naki mi ati fu si fa a Kownukondre zaal krin èn fa ala sani drape orga so bun. Den sma drape ben weri netjes, den ben lafu èn den kon taki mi odi na wan switi fasi. A sani disi naki mi ati trutru.” A man disi bigin go na den konmakandra èn syatu baka dati a teki dopu. Na ini wan foto na Indonesia, wan gemeente gi wan kari na den heihei man fu a foto nanga tra sma fu a birti fu kon luku a nyun Kownukondre zaal fu den. A komsarsi fu a foto srefi go tu. Di a si a fasi fa a Kownukondre zaal meki èn taki den brada gebroiki den moro bun sani fu bow a zaal, a sani disi naki en ati. A prisiri tu di a si a moi dyari. A taki: „A fasi fa a zaal krin e sori taki un abi wan tranga bribi.”

7, 8. Sortu prenspari sani den sma di e go na den konmakandra musu hori na prakseri?

⁷ Yehovah na a sma di e gi wi wan kari fu go na den konmakandra èn a prenspari gi en fa wi e weri èn fa wi e tyari wisrefi te wi de drape. Sobun, wi no musu du sani pasa marki. Den brada kon si taki son sma strak  tumusi te a abi fu du nanga a fasi wi musu tyari wisrefi na den konmakandra. Na a tra sei, yu abi sma di no e span fa den e tyari densrefi te den de na ini a Kownukondre zaal. Yehovah wani taki den futuboi fu en nanga tra sma di e kon na den konmakandra firi bun te den de drape. Dati meki wi no musu weri krosi di no netjes noso di no fiti gi den konmakandra. Wi musu luku bun tu taki wi no e sms, taki, nyan noso dringi te den konmakandra e hori. Papa nanga mama musu leri den pikin fu frustan taki a Kownukondre zaal a no wan presi fu lon noso fu prei.—Preik. 3:1.

⁸ Di Yesus si taki sma ben e seri sani na ini a tempel fu Gado, en ati bron èn a trowe den go na dorosei (Yoh. 2:13-17). Den Kownukondre zaal na presi tu pe wi e anbegi Yehovah èn e leri fu en. Sobun, a no ben o fiti fu du bisnis te wi de drape.—Luku Nehemia 13:7, 8.

9, 10. (a) Fa a pipel fu Yehovah man bow Kownukondre zaal èn san na a bakapisi? (b) Sortu lobi-ati seti yepi furu gemeente di no ben abi a moni fu bow Kownukondre zaal?

⁹ A pipel fu Yehovah na heri grontapu e wroko tranga fu bow Kownukondre zaal. Brada nanga sisa e meki bow-tekening fu den zaal disi, den e bow den zaal èn te a de fanowdu den e seti den kon nyun baka. Ala den sani disi den e du, sondro taki sma e pai den. San ben de a bakapisi? Sensi 1 november 1999, den brada bow moro leki 28.000 moi Kownukondre zaal na heri grontapu pe gemeente kan kon makandra fu anbegi Yehovah. Dati wani taki dati na ini den 15 yari di pasa, den bow sowan feifi nyun Kownukondre zaal ibri dei.

¹⁰ Yehovah organisâsi e bow Kownukondre zaal awinsi pe dati de fanowdu. Fu du a bow-wroko disi, den e gebroiki brada nanga sisa di e yepi nanga a wroko sondro fu kisi pai. Den e gebroiki moni tu di sma gi leki bijdrage. A sani disi abi fu du nanga wan Bijbel rai di e taki dati Kresten „kan tapu den nowtu fu makandra” fu di den e gebroiki san den abi bogobogo fu yepi tra brada nanga sisa di e mankeri wan sani. (Leisi 2 Korentesma 8:13-15.) A bakapisi ben de taki den brada bow moi Kownukondre zaal na ini den kondre pe den brada nanga sisa no abi a moni fu bow den sortu zaal disi.

11. San son brada e taki te den e si a nyun Kownukondre zaal fu den èn fa disi e meki yu firi?

¹¹ Wan gemeente na Kosta Rika di kisi wini fu a seti disi skrifi: „Te wi e tanapu na fesi a Kownukondre zaal, dan a gersi leki wi e dren! Wi no man bribi. Na ini soso aiti dei wi bow a moi zaal fu wi fu di Yehovah blesi wi, fu di en organisâsi seti a sani disi gi wi èn fu di wi lobi brada nanga sisa horibaka  gi wi. A presi disi pe wi kan anbegi Yehovah na trutru wan moi kado di a gi wi. Wi breiti srefisrefi nanga a zaal disi.” Wi e firi bun trutru fu yere te wi brada nanga sisa e taki Yehovah tangi gi san a du gi den. Wi e prisiri taki brada nanga sisa na heri grontapu kan abi den eigi Kownukondre zaal. Te den nyun zaal disi kaba bow, dan heri esi a e span nanga reti-ati sma di wani sabi moro fu wi lobi-ati Mekiman. A de krin taki Yehovah e blesi a bow-wroko disi.—Ps. 127:1.

12. Fa yu kan yepi bow Kownukondre zaal?

¹² Furu brada nanga sisa e prisiri trutru te den man yepi nanga a wroko fu bow zaal. Kande yu no man yepi nanga a bow-wroko. Ma wi alamala kan abi a grani fu horibaka gi a wroko disi nanga a moni di wi e gi. Te wi e du ala san wi man fu horibaka gi a wroko disi, wi e prisiri fu di wi e gi nanga wi heri ati. Ma a moro prenspari sani na taki wi man prèise Yehovah. Wi e teki na eksempre fu Gado pipel na ini Bijbel ten. Den ben de klariklari fu gi sani so taki den ben man bow presi fu anbegi Gado.—Eks. 25:2; 2 Kor. 9:7.

13, 14. Sortu Bijbel rai e yepi wi fu hori wi Kownukondre zaal krin èn netjes?

¹³ Wi e dini wan santa Gado di krin èn di wani taki wi musu orga sani bun. Dati meki wi musu hori wi Kownukondre zaal krin èn ala sani musu de netjes. (Leisi 1 Korentesma 14:33, 40.) Efu wi wani de santa èn krin neleki Yehovah, dan wi musu hori na anbegi fu wi krin. Boiti dati, a denki fu wi, den sani di wi e du, nanga wi skin musu de krin tu.—Openb. 19:8.

¹⁴ Te wi e teki den rai disi, dan wi no abi  fu frede fu kari sma kon na den konmakandra, fu di wi sabi taki a zaal krin èn taki a e gi glori na a bun nyunsu di wi e preiki. Den sma disi o si taki wi e dini wan Gado di santa èn di heri esi o kenki grontapu kon tron wan paradijs di krin.—Yes. 6:1-3; Openb. 11:18.

15, 16. (a) Fu san ede a no makriki ala ten fu hori a Kownukondre zaal krin, ma fu san ede a prenspari fu du disi? (b) San den brada orga fu krin a Kownukondre zaal fu yu èn sortu grani ibriwan fu wi abi?

¹⁵ A no ala sma feni taki a prenspari fu krin wan presi bun. Fu san ede? Kande a abi fu du nanga a fasi fa den kweki. Son sma e libi na wan presi pe furu stof de, noso den e libi na pasi di doti èn tokotoko. Tra sma no abi nofo watra noso sopo fu krin sani. Awinsi pe wi e libi èn awinsi fa sma na ini wi birti e si a wroko fu krin sani, wi musu sorgu taki wi Kownukondre zaal krin èn taki a netjes, fu di na drape wi e anbegi Yehovah.—Deut. 23:14.

¹⁶ Efu wi wani taki a Kownukondre zaal fu wi tan krin, dan sani musu orga bun. Den owruman musu meki wan schema gi a gemeente èn den musu sorgu taki ala ten nofo sani de fu krin a zaal soleki sopo nanga tra wrokosani. Den owruman musu orga sani na so wan fasi taki a wroko du. Son sani musu krin baka ibri konmakandra, ma tra sani musu du na wan tra ten. Wi alamala abi a grani fu yepi krin a Kownukondre zaal.

17, 18. (a) Sortu eksempre na ini Bijbel e sori taki wi musu sorgu bun gi den presi pe wi e anbegi Yehovah? (b) Fu san ede wi musu sorgu bun gi den Kownukondre zaal fu wi?

¹⁷ Te sani broko na a Kownukondre zaal, dan wi leki futuboi fu Yehovah e meki ala muiti fu meki den sani dati baka. Kownu Yoas fu Yuda ben taigi den priester fu ’meki na oso [fu Yehovah] na ala den presi pe a ben broko’. Fu du a wroko disi, den ben musu gebroiki a moni di a pipel ben tyari kon na a tempel (2 Kow. 12:4, 5). Moro leki 200 yari baka dati, Kownu Yosia du a srefi sani. A teki a moni di a pipel tyari kon na a tempel èn a gebroiki dati fu meki den sani di ben broko na a tempel.—Leisi 2 Kroniki 34:9-11.

¹⁸ Wan tu bijkantoro e fruteri taki na ini son kondre, furu sma no e feni en prenspari fu sorgu gi gebow noso gi wrokosani. Kande wan tu sma nomo na ini den kondre dati sabi fa fu du a sortu wroko disi noso kande den no abi a moni fu du dati. Ma efu wi no sorgu bun gi a zaal fu wi, dan a bakapisi o de taki a zaal o broko esi-esi. Sma fu a birti o si disi èn a kan gi wi leki Kotoigi porinen. Na a tra sei, te brada nanga sisa na ini a gemeente e du ala san den man fu sorgu bun gi a Kownukondre zaal, dan dati e gi Yehovah grani. Na so wi e sori tu taki wi no e frumorsu a moni di brada nanga sisa e gi leki bijdrage.

19. Fa yu o sori taki yu e lespeki a presi pe yu e anbegi Yehovah?

¹⁹ A Kownukondre zaal na wan presi di gi abra na Yehovah. Dati meki a no de fu wan sma noso fu wan gemeente. Soleki fa wi leri na ini na artikel disi, dan Bijbel rai o yepi wi fu si a presi pe wi e anbegi Gado, na wan yoisti fasi. Fu di wi e lespeki Yehovah, meki wi e sori lespeki tu gi den konmakandra èn gi a Kownukondre zaal. Wi breiti fu gi moni so taki wi man horibaka gi a wroko fu bow moro zaal. Wi e wroko tranga tu fu sorgu gi den zaal disi èn fu hori den krin. Neleki Yesus, wi de fayafaya gi a presi pe wi e anbegi Yehovah èn wi e lespeki a presi disi tu.—Yoh. 2:17.