Wan sweri na wan seryusu pramisi di wan sma e meki èn furu tron den e du dati na fesi Gado. Den kan taki en noso den kan skrifi en.

Son sma feni taki a fowtu fu meki wan sweri fu di Yesus ben taki: „Un no musu sweri kwetikweti . . . Te unu taki ’iya’, dan meki a tan iya. Te unu taki ’nôno’, dan meki a tan nôno. Bika ala tra sani di yu o taki e kon fu na ogriwan” (Mat. 5:33-37). A no de fu taki dati Yesus ben sabi taki a Wet fu Moses ben e sori taki den Israelsma ben musu meki sweri son leisi èn taki getrow futuboi fu Yehovah ben sweri tu fu du wan sani (Gen. 14:22, 23; Eks. 22:10, 11). A ben sabi tu taki Yehovah srefi ben meki sweri (Hebr. 6:13-17). Sobun, Yesus no ben wani taki dati wi no musu meki sweri noiti. Na presi fu dati a ben e warskow wi taki wi no musu meki sweri fu sani di no prenspari noso di no fiti. Sobun te wi pramisi fu du wan sani, dan wi musu du dati tu fu di dati na san Yehovah e fruwakti fu wi.

Dan san yu musu du efu wan sma aksi yu fu meki wan sweri? A fosi sani, na taki yu musu de seiker taki yu o man du san yu sweri. Efu yu no de seiker, dan a bun fu no meki a sweri dati. Gado Wortu e gi a warskow disi: „Moro betre yu no sweri fu du wan sani, leki yu sweri fu du wan sani, ma yu no du en” (Preik. 5:5). A di fu tu sani, na taki yu musu luku sortu Bijbel gronprakseri abi fu du nanga a sweri di yu wani meki. Baka dati, yu musu teki wan bosroiti di e kruderi nanga a konsensi fu yu. San na wan tu fu den Bijbel gronprakseri disi?

Son sweri di sma e meki no de teige a wani fu Gado. Fu eksempre, Yehovah Kotoigi e meki wan sweri te den o trow. Na fesi Gado nanga ala tra sma di de drape, wan man nanga wan uma di o trow e pramisi makandra taki den o lobi èn lespeki makandra, „solanga leki den tu de na libi”. (Kande tra trowpaar no o taki den srefi wortu disi, ma toku den e meki wan sweri na fesi Gado.) Now den na masra nanga wefi èn den musu tan na makandra den heri libi langa (Gen. 2:24; 1 Kor. 7:39). A pramisi di sma e meki nanga makandra te den trow fiti èn a e kruderi nanga a wani fu Gado.

Son sweri di sma e meki de teige a wani fu Gado. Wan tru Kresten no o sweri fu feti gi wan kondre èn a no o sweri fu drai baka gi Gado. Dati ben o de teige den wet fu Gado. Kresten „no de wan pisi fu grontapu”, sobun, den no kan teki prati na feti èn den no kan teki sei na ini politiek afersi.​—Yoh. 15:19; Yes. 2:4; Yak. 1:27.

 Son leisi wan Kresten musu luku san en konsensi e taigi en fosi a meki wan sweri. Son leisi a de fanowdu taki fosi wan sma meki wan sweri, a musu denki bun fu a rai di Yesus ben gi fu „pai Grankownu san na fu Grankownu, ma [fu] pai Gado san na fu Gado”.​—Luk. 20:25.

Kow taki dati wan Kresten wani tron wan borgu fu wan kondre noso a wani meki wan paspoort èn den e taigi en taki a musu meki wan sweri di e sori taki a e horibaka gi a kondre dati. Efu a de krin taki so wan sweri de teige den wet fu Gado, dan a konsensi fu en no o gi en pasi fu du dati. Lanti kan gi en primisi fu kenki wan tu wortu na a sweri so taki en konsensi kan gi en pasi fu meki a sweri.

So wan sweri di wan sma e meki kan kruderi nanga a Bijbel gronprakseri di skrifi na Romesma 13:1 di e taki: „Ibri sma musu saka ensrefi na ondro den tiriman.” Sobun, wan Kresten kan bosroiti taki a no fowtu fu meki so wan sweri, fu di Gado e taki dati wi musu gi yesi na den tiriman solanga den no e aksi wi fu du wan sani di a no wani.

A prenspari taki wi e arki wi konsensi te sma e aksi wi fu gebroiki wan sani te wi e meki wan sweri noso fu poti wi anu na wan spesrutu fasi. Den Romesma nanga den Skitsma fu owruten ben e gebroiki wan feti-owru di ben e prenki wan gado fu feti, fu sori taki wan sma di e meki wan sweri de fu frutrow. Den Grikisma ben e opo den anu go na hemel te den ben e meki wan sweri. Na so den e ben e sori taki wan gado de na loktu di libisma musu gi frantwortu fu ala sani di den e taki èn e du.

A no de fu taki dati wan futuboi fu Yehovah noiti o meki wan sweri pe a musu boigi gi wan fraga noso wan tra sani di abi fu du nanga falsi anbegi. Ma fa a de efu den aksi yu na fesi krutu fu poti yu anu tapu wan Bijbel fu sweri taki yu o taki san tru? Na ini so wan situwâsi yu kan bosroiti fu du dati fu di Bijbel e sori taki futuboi fu Gado ben e du wan spesrutu sani nanga den anu te den ben meki wan sweri (Gen. 24:2, 3, 9; 47:29-31). Yu musu hori na prakseri taki efu yu o meki so wan sweri, dan yu e sweri na fesi Gado taki yu o taki san tru. Yu musu frustan taki yu o abi fu taki san tru, awinsi sortu aksi den poti gi yu.

Fu di a matifasi fu wi nanga Yehovah prenspari gi wi, meki wi musu begi èn denki bun fu ibri sweri di sma e aksi wi fu meki. Te wi e du dati, dan wi no o du wan sani di de teige wi konsensi noso teige Bijbel gronprakseri. Efu yu o bosroiti fu meki wan sweri, dan yu musu du san yu sweri.​—1 Petr. 2:12.