Bijbel e sori taki baka di den Midiansma tyari Yosef go na Egepte, Yakob nanga en famiri froisi fu Kanan go na Egepte. Den go tan na a kontren Gosen, di ben de na a pisi pe a Nijl-liba e miti a Mindrikondre Se (Gen. 47:1, 6). Den Israelsma ’ben kon furu trutru èn den ben kon tranga srefisrefi’. Dati meki den Egeptesma bigin frede den èn den meki den tron srafu.​—Eks. 1:7-14.

Son sma di e krutu Bijbel e taki dati a tori disi na wan anansitori. Toku buweisi de di e sori taki den bakapikin fu Sem * ben libi leki srafu na ini Egepte fu owruten.

Fu eksempre, sabiman di e ondrosuku owruten sani feni omeni owruten dorpu na a noordsei fu Egepte. A Bijbel sabiman John Bimson e taki dati buweisi de di e sori taki den bakapikin fu Sem ben libi na ini sowan 20 fu den pikin dorpu disi. Boiti dati, James K. Hoffmeier, wan sabiman di e ondrosuku owruten sani fu Egepte e taki: „Fu a yari 1800 te go miti 1540 Fosi Krestes, furu fu den sma fu a west-sei fu Asia [pe a famiri fu Yakob komoto] froisi go tan na Egepte.” A e taki tu: „Disi na a srefi pisi ten di Abraham, Isak nanga Yakob go na Egepte soleki fa wi e leisi na ini a buku Genesis.”

Den feni tra buweisi tu na a zuidsei fu Egepte. Wan pisi papirus fu a pisi ten fu 2000-1600 Fosi Krestes abi den nen fu srafu di ben wroko na ini wan oso na a zuidsei fu Egepte. Moro leki 40 fu den nen disi na fu sma di ben de bakapikin fu Sem. Den srafu disi ben e bori, den ben e meki krosi èn den ben e du tra tranga wroko. A sabiman Hoffmeier e taki: „Fu di moro leki fotenti bakapikin fu Sem ben wroko na ini wán oso nomo na a zuidsei fu Egepte, meki wi kan bribi taki furu fu den sma disi ben libi na ini Egepte spesrutu na ini a kontren pe a Nijl-liba e miti a Mindrikondre Se.”

David Rohl, wan sabiman di e ondrosuku owruten sani, e skrifi taki den nen fu den srafu gersi den nen di de na ini Bijbel. Fu eksempre, a pisi papirus abi nen di gersi den nen leki Isaskar, Aser nanga Sifra (Eks. 1:3, 4, 15). Rohl e taki dati „den sani disi na krin buweisi taki den Israelsma ben libi na ini Egepte leki srafu”.

A sabiman Bimson e taki: „Buweisi lai di e sori taki den Israelsma ben de srafu na ini Egepte trutru èn taki den komoto drape soleki fa Bijbel e taki.”