STUDIE-ARTIKEL 45
SINGI 138 Weti wiwiri e moi den owruwan
Leri fu den lasti wortu fu getrow futuboi fu Gado
„Owru sma abi koni èn o moro langa wan sma e libi, o moro a e sabi sani.”—YOB 12:12.
SAN WI O LERI
Efu wi e gi yesi na Yehovah Gado, dan wi o kisi blesi nownow kba èn sosrefi têgo libi na ini a ten di e kon.
1. Fu san ede wi kan leri fu den owruwan?
WI ALAMALA abi rai fanowdu fu man teki bun besroiti na ini a libi. Nofo tron wi kan kisi den rai dati fu owruman èn fu tra lepi Kresten. Efu den sma disi owru furu yari moro wi, dan wi no musu denki taki den rai fu den no e wroko moro. Yehovah wani taki wi e leri fu den owruwan. Den abi moro ondrofeni leki wi, den sabi moro wi, èn den koni moro wi.—Yob 12:12.
2. San wi o luku na ini na artikel disi?
2 Na ini Bijbel ten, Yehovah gebroiki getrow owruwan fu tiri en pipel èn fu gi den dek’ati. Fu eksempre, Moses, David, nanga na apostel Yohanes ben e libi na difrenti ten èn den situwâsi fu den ben e difrenti fu makandra. Di den ben doro na a kba fu den libi, dan den gi sma di ben yongu moro den bun rai. Ibriwan fu den getrow man disi ben taki o prenspari a de fu gi yesi na Gado. Yehovah meki sma skrifi den koni wortu fu den na ini Bijbel so taki wi kan leri fu den. Awinsi wi yongu noso owru, tòg wi kan kisi wini te wi e poti prakseri na a rai fu den (Rom. 15:4; 2 Tim. 3:16). Na ini na artikel disi, wi o poti prakseri na den lasti wortu fu den dri owru man disi èn wi o luku tu san wi kan leri fu den sani di den taki.
„UNU O LIBI LANGA”
3. Na sortu fasi Moses dini Gado nanga a pipel fu en?
3 Moses wroko tranga gi Yehovah en heri libi langa. A ben dini leki profeiti, leki krutuman, leki fesiman, èn leki skrifiman. Moses ben abi bun furu ondrofeni. A ben tyari a pipel fu Israel kmoto na ini katibo na Egepte èn a ben si furu fu den wondru fu Yehovah nanga en eigi ai. Yehovah gebroiki en fu skrifi den fosi feifi buku fu Bijbel, sosrefi Psalm 90, èn kande Psalm 91. A kan tu taki na en skrifi a buku Yob.
4. Suma Moses ben gi dek’ati, èn fu san ede?
4 Syatu fosi Moses dede di a ben abi 120 yari, dan a kari ala den Israelsma kon na wán fu memre den na den sani di Yehovah ben du gi den. Di sonwan fu den sma disi ben yongu, dan den ben si furu fu den wondru di Yehovah ben du èn den ben si tu fa a strafu den Egeptesma (Eks. 7:3, 4). Den ben si fa Yehovah prati a watra fu a Redi Se na tu èn den ben waka psa abra drei gron. Den ben si fa Yehovah pori Farao èn a heri legre fu en (Eks. 14:29-31). Di den ben de na ini a gran sabana, dan Yehovah kibri den èn a sorgu gi den (Deut. 8:3, 4). Heri esi den Israelsma ben o go na ini a Pramisi Kondre. Dati meki fosi a dede, Moses ben wani gi a pipel dek’ati. a
5. Sortu dyaranti den lasti wortu fu Moses na Deuteronomium 30:19, 20 ben gi den Israelsma?
5 San Moses ben taki? (Leisi Deuteronomium 30:19, 20.) A memre a pipel fu Israel taki wan moi tamara ben e wakti den. Yehovah ben o sorgu taki den Israelsma ben o man libi langa na ini a kondre di a ben pramisi den. A kondre dati ben moi èn a ben e gi furu n’nyan. Moses ben taigi den: „A kondre abi bigi èn moi foto, ma a no unu bow den. A abi oso di abi furu bun sani na ini, ma a no unu poti den drape. Na ini a kondre watrabaki de tu, ma a no unu meki den. A abi droifidyari nanga olèifbon, ma a no unu prani den. Toku na unu o nyan den sani dati teleki un bere furu.”—Deut. 6:10, 11.
6. Fu san ede Yehovah gi pasi taki tra kondre teki Israel abra?
6 Moses ben warskow den Israelsma tu taki efu den ben wani libi na ini a moi kondre fu den, dan den ben musu gi yesi na den komando fu Yehovah. Moses ben taigi den fu „teki a libi”. Dati wani taki dati den ben musu arki Yehovah èn den ben musu „tai hori na en”. Ma den Israelsma no gi yesi na Yehovah. Dati meki te fu kba Gado gi pasi taki den Asiriasma èn bakaten den Babilonsma teki a kondre fu den abra èn tyari den go na ini katibo.—2 Kow. 17:6-8, 13, 14; 2 Kron. 36:15-17, 20.
7. San wi kan leri fu den sani di Moses taki? (Luku a prenki.)
7 San disi e leri wi? Te wi e gi yesi na Yehovah, dan wi o man libi fu têgo. Neleki den Israelsma di ben de leti na fesi a Pramisi Kondre, wi de fu go na ini a nyun grontapu di Gado pramisi. Heri esi, grontapu o tron wan paradijs baka (Yes. 35:1; Luk. 23:43). Didibri nanga den ogri yeye fu en no o de moro (Openb. 20:2, 3). Falsi bribi no o de di e leri sma lei fu Yehovah (Openb. 17:16). Libisma tirimakti no o de moro fu pina den borgu fu den (Openb. 19:19, 20). Yehovah no o gi pasi taki sma e tyari problema kon na ini Paradijs (Ps. 37:10, 11). Sma na ala sei o gi yesi na den bun wet fu Yehovah, èn dati o meki taki wánfasi nanga freide de. Ala sma o lobi makandra èn den o fertrow makandra (Yes. 11:9). Wi no man wakti teleki a ten dati kon. Èn san moro prenspari, na taki efu wi e gi yesi na Yehovah, dan wi o man libi fu têgo na ini wan paradijs na grontapu.—Ps. 37:29; Yoh. 3:16.
Efu wi e gi yesi na Yehovah, dan wi kan libi na ini a paradijs na grontapu fu ala ten (Luku paragraaf 7)
8. San yepi wan Kresten di de wan zendeling bun langa kba, fu tan gi yesi na Yehovah? (Yudas 20, 21)
8 Efu wi e tan denki dipi fu a têgo libi di Gado pramisi wi, dan dati kan yepi wi fu gi yesi na en awinsi sortu problema e miti wi. (Leisi Yudas 20, 21.) A pramisi dati kan gi wi dek’ati tu fu kakafutu gi den swakifasi fu wi. Wan brada di de wan zendeling na ini Afrika furu yari kba, e ferteri taki a ben gwenti kisi tesi fu du wan sani di Yehovah no feni bun. A e taki: „Mi kon si taki mi no ben o man libi fu têgo na ini paradijs efu mi no ben e gi yesi na Yehovah. A sani dati yepi mi fu no gi abra èn fu begi Yehovah fayafaya fu yepi mi. Na so mi ben man dini Yehovah nanga wan bun konsensi.”
„YU O MAN DU ALA SANI NA WAN KONI FASI”
9. Sortu tesi ben miti David?
9 David ben de wan kownu fu a pipel fu Yehovah èn a ben e dini Gado nanga en heri ati. Furu tesi ben miti en. Wan tu yari a ben e libi leki loweman fu di a ben e lowe gi Kownu Saul di ben dyarusu na en tapu. Baka di David tron kownu, a ben musu lowe baka fu di en manpkin Absalom di ben wani tron kownu, ben e suku fu kiri en. Aladi den problema disi ben e miti David èn aladi a ben meki wan tu fowtu, tòg a tan dini Gado te na a dede fu en. Yehovah ben taki dati a ben lobi David. A no de fu taki dati wi musu arki den koni rai fu David.—Tori 13:22; 1 Kow. 15:5.
10. Fu san ede David gi en manpkin Salomo rai fosi a tron kownu?
10 Luku a rai di David ben gi en manpkin Salomo di ben o tron kownu baka en. Yehovah ben teki a yonguman disi fu bow wan tempel pe sma ben kan anbegi En (1 Kron. 22:5). Furu wroko ben de fu du èn a ben abi yepi fanowdu fu Yehovah fu man tiri a pipel. San David ben o taigi en? Kow go luku.
11. Soleki fa 1 Kownu 2:2, 3 e sori, dan sortu rai David gi Salomo, èn fa den sani dati kon tru? (Luku a prenki.)
11 San David ben taki? (Leisi 1 Kownu 2:2, 3.) David ben taigi en manpkin taki efu a ben o gi yesi na Yehovah, dan sani ben o waka bun gi en. Èn furu yari langa, sani ben e waka bun gi Salomo (1 Kron. 29:23-25). A bow wan bigi tempel, a skrifi wan tu Bijbel buku, èn den wortu fu en de fu feni tu na tra presi na ini Bijbel. A kon pôpi fu di a ben koni èn fu di a ben abi furu gudu (1 Kow. 4:34). Ma soleki fa David e taki, dan sani ben o waka bun gi Salomo solanga a ben e gi yesi na Yehovah Gado. A sari taki di Salomo kon owru, dan a bigin anbegi tra gado. Yehovah no ben lobi a sani dati èn a tapu fu gi Salomo a koni fu tiri a pipel nanga lobi èn na wan reti fasi.—1 Kow. 11:9, 10; 12:4.
Den lasti sani di David taigi en manpkin Salomo e yepi wi fu kon si taki efu wi e gi yesi na Yehovah, dan a o gi wi a koni fu teki bun besroiti (Luku paragraaf 11-12) b
12. San wi kan leri fu den sani di David taki?
12 San disi e leri wi? Te wi e gi yesi na Yehovah, dan a o blesi wi èn a o yepi wi (Ps. 1:1-3). A no de fu taki dati Yehovah no pramisi wi taki wi o kon gudu èn taki wi o kisi biginen neleki Salomo. Ma efu wi e gi yesi na a Gado fu wi, dan a o tiri wi èn a o gi wi koni fu teki bun besroiti (Odo 2:6, 7; Yak. 1:5). Den rai fu en kan yepi wi te wi musu teki besroiti di abi fu du nanga wroko, skoro, moni, èn nanga prisiriten. Te wi e gi yesi na den rai fu Gado, dan dati e yepi wi fu tan bun mati fu en èn wi o kisi têgo libi (Odo 2:10, 11). Wi o abi bun mati èn wi osofamiri o de koloku.
13. San yepi Carmen fu kon abi wan moro bun libi?
13 Carmen di e libi na ini Mosambik, ben denki taki a ben o abi wan moro bun libi efu a ben o teki heiskoro. A go na wan universiteit fu studeri fa sma e meki gebow. A skrifi: „Mi ben lobi san mi ben e leri. Ma a ben e teki tumsi furu fu mi ten nanga mi krakti. Mi ben de na skoro fu 7.30 m’manten teleki siksi yuru bakadina. A ben muilek gi mi fu go na den konmakandra èn a matifasi fu mi nanga Yehovah kon swaki. Èn mi kon si taki mi no ben e gi yesi na den rai fu Yehovah” (Mat. 6:24). Carmen begi Yehovah fu yepi en èn a ondrosuku sani moro fini na ini den buku fu wi. A e taki: „Baka di mi kisi bun rai fu lepi brada èn fu mi m’ma, dan mi besroiti fu libi na universiteit èn fu go du furuten diniwroko gi Yehovah. A sani disi yepi mi fu teki a moro bun besroiti èn mi breiti taki mi du dati.”
14. San ben de a moro prenspari beskopu fu Moses nanga David?
14 Moses nanga David ben lobi Yehovah èn den ben sabi taki a prenspari srefsrefi fu gi yesi na en. Dati meki den gi trawan dek’ati fu tan gi yesi na Yehovah neleki fa den ben du dati. Den ala tu ben warskow trawan tu taki efu den no tan getrow na Yehovah, den no ben man de en mati èn a no ben o blesi den. A rai fu den e yepi wi na ini a ten disi. Hondrohondro yari bakaten, ete wan futuboi fu Yehovah sori o prenspari a de fu tan gi yesi na Gado.
’NOWAN TRA SANI E GI MORO PRISIRI’
15. San na apostel Yohanes ben ondrofeni na ini en libi?
15 Yohanes ben de wan bun mati fu Yesus Krestes (Mat. 10:2; Yoh. 19:26). Yohanes ben e preiki furu makandra nanga Yesus èn a si fa a ben du wondru. A tan getrow na Yesus na ini muilek ten. A si fa sma kiri Yesus èn a si Yesus baka di a kisi wan opobaka. A ben si tu fa a Kresten gemeente gro. Yohanes ben libi langa nofo fu si fa a bun nyunsu „preiki gi ala sma na grontapu”.—Kol. 1:23.
16. Suma kisi wini fu den brifi fu Yohanes na ini a ten di psa, èn suma e kisi wini fu en na ini a ten disi?
16 Di Yohanes ben kon owru, dan a ben abi a grani fu skrifi a span buku Openbaring (Openb. 1:1). Èn a skrifi dri brifi di wi sabi now leki a fosi, a di fu tu, nanga a di fu dri brifi fu Yohanes. A ben skrifi a di fu dri brifi fu en gi wan getrow Kresten di nen Gayus èn di a ben lobi neleki a ben de en pkin (3 Yoh. 1). A musu de so taki na a ten dati, Yohanes ben e si furu Kresten brada nanga sisa leki en eigi pkin. Den sani di a getrow owru man disi skrifi e gi ala den bakaman fu Yesus dek’ati te na a dei fu tide.
17. San e gi wi moro prisiri leki iniwan tra sani, soleki fa 3 Yohanes 4 e sori?
17 San Yohanes ben skrifi? (Leisi 3 Yohanes 4.) Na ini a di fu dri brifi fu en, Yohanes ben taki dati a e gi en prisiri fu si taki den brada nanga sisa fu en e gi yesi na Gado. Na a ten dati, son sma ben e leri sma sani di no tru èn den ben e tyari seryusu problema kon na ini a gemeente. Ma trawan „tan gi yesi na a tru leri” (2 Yoh. 4, 6). Den getrow Kresten disi meki taki Yohanes nanga Yehovah ben breiti trutru.—Odo 27:11.
18. San wi kan leri fu den sani di Yohanes taki?
18 San disi e leri wi? Te wi e tan gi yesi na Yehovah dan wi o de koloku èn trawan o de koloku tu (1 Yoh. 5:3). Fu eksempre, wi de koloku fu di wi sabi taki Yehovah breiti nanga wi. A e prisiri te wi e weigri fu du san no bun èn te wi e gi yesi na den wet fu en (Odo 23:15). Tra engel na hemel e prisiri tu (Luk. 15:10). Wi kan prisiri tu te wi e si fa wi brada nanga sisa e tan gi yesi na Yehovah, srefi efu sma e ferfolgu den, noso te den e kisi tesi fu du san no bun (2 Tes. 1:4). Èn te a grontapu fu Satan kisi pori, dan wi o de koloku fu di wi tan getrow na Yehovah.
19. San wan sisa di nen Rachel ben taki fu a grani di a abi fu leri trawan a waarheid? (Luku a prenki.)
19 Wi e prisiri srefsrefi te wi e yepi trawan fu kon sabi Yehovah. Rachel di e libi na ini a Dominikan Republiek, feni en wan bigi grani fu yepi sma fu kon sabi wi Gado Yehovah. A yepi difrenti sma fu bigin anbegi Yehovah. A e taki: „Mi no man taki fa a e gi mi prisiri te mi e luku fa den wan di mi gi leri e kon lobi Yehovah, fa den e leri fu fertrow en, èn fa den e tyari kenki kon na ini den libi so taki Yehovah kan breiti nanga den. A prisiri dati bigi moro iniwan muiti di mi du fu man gi den leri.”
A e gi wi prisiri fu leri trawan fu lobi Yehovah èn fu gi yesi na en (Luku paragraaf 19)
LERI FU DEN LASTI WORTU FU GETROW FUTUBOI FU GADO
20. Na sortu fasi wi de leki Moses, David, nanga Yohanes?
20 Moses, David, nanga Yohanes ben e libi wan langa ten psa. Èn a fasi fa den ben e libi e difrenti fu a fasi fa wi e libi tide. Ma wi de leki den na furu difrenti fasi. Den ben e dini a tru Gado èn wi e du dati tu. Neleki den, wi e begi Yehovah, wi e fertrow na en tapu, èn wi e suku rai na en. Èn neleki den man dati fu owruten, wi abi a fertrow taki Yehovah e blesi den wan di e gi yesi na en.
21. Fa Yehovah o blesi wi efu wi e gi yesi na den rai fu Moses, David, nanga Yohanes?
21 Meki wi gi yesi na a rai fu den owru man disi èn meki wi gi yesi na den komando fu Yehovah. Te wi e gi yesi na Yehovah, dan a o yepi wi èn a o blesi wi. Wi o de na libi èn wi o „libi langa”, iya, fu têgo! (Deut. 30:20) Èn wi o prisiri fu di wi e plisi wi Tata na hemel di o blesi wi moro leki san wi ben kan denki.— Ef. 3:20
SINGI 129 Wi o horidoro
a Furu fu den Israelsma di ben si den wondru di Yehovah du na a Redi Se, no ben de na libi moro di a pipel go na ini a Pramisi Kondre (Num. 14:22, 23). Yehovah ben taki dati den sma fu 20 yari èn moro owru, ben o dede na ini a gran sabana (Num. 14:29). Ma furu fu den wan di ben yongu moro 20 yari tan na libi èn makandra nanga Yosua, Kaleb, nanga furu tra yonguwan fu a lo fu Leifi, den abra Yordan-liba èn den go na ini a Pramisi Kondre.—Deut. 1:24-40.
b SAN WI E SI TAPU DEN PRENKI: Na a kruktu-anusei: Fosi David dede, a e gi en manpkin Salomo wan tu koni rai. Na a reti-anusei: Studenti na wan Pionierskoro e kisi wini fu a leri di den e kisi fu Yehovah.
