YESUS e taki na Mateyus 13:24-26: „A Kownukondre fu hemel de leki wan man di ben sai bun siri na ini a gron fu en. Di sma ben e sribi, dan a feanti fu en kon èn a sai takru wiwiri na mindri na aleisi. Baka dati a gowe. Di na aleisi bigin gro èn a gi nyanyan, dan a takru wiwiri kon de fu si tu.” Furu skrifiman aksi densrefi efu den sani di Yesus taki dyaso ben e pasa trutru. Ma den wet fu Rome e sori taki a ben e pasa.

Wan buku di e fruklari sani fu Bijbel e taki: „A wet fu Rome ben e sori taki a ben de wan bigi ogri te wan sma ben e sai takru wiwiri na ini a gron fu wan trawan fu di a ben abi trobi nanga en. A wet disi no ben o de efu so wan sani no ben e pasa furu.” A sabiman Alastair Kerr e taki dati na ini a yari 533, Grankownu Justinianus fu Rome tyari wan buku kon na doro pe a taki syatu fu den wet fu Rome èn fu sonwan fu den afkati fu a ten dati (na mindri a yari 100-250). A buku disi (Digest, 9.2.27.14), e taki dati wan afkati di nen Ulpianus ben e fruteri fa a Rome tiriman Celsus krutu wan afersi pe wan sma ben sai takru wiwiri na ini a gron fu wan trawan. Ala den sani di a sma ben prani kon lasi. A buku e sori taki wet ben de fu dwengi sma di pori a gron fu wan trawan fu pai en baka.

Na ogri disi di sma ben e du na ini a Gran Kownukondre Rome e sori taki a sani di Yesus taki, ben e pasa trutru na ini na aladei libi.

NA INI a fosi yarihondro, den Romesma ben e tiri Yudea. Den ben e poti wan granman di ben musu tiri gi den èn a ben abi wan legre tu. A moro prenspari sani di a granman disi ben musu du, na taki a ben musu teki belasting-moni gi Rome, a ben musu sorgu taki freide de èn taki sani waka bun na ini a kondre. Den Romesma ben e du ala san den man fu sorgu taki sma no du ogri èn den ben e strafu ala sma di ben e tyari dyugudyugu kon. Ma nofo tron den ben e meki den Dyu tiriman tiri den difrenti distrikt.

A Sanhedrin ben de a grankrutu fu den Dyu èn a ben e gebroiki a wet fu den Dyu fu koti krutu. Na ini heri Yudea yu ben abi tra krutubangi tu. Na den ben e krutu furu fu den afersi fu ogriman nanga tra sortu afersi èn den Romesma no ben e bumui nanga disi. Ma wan sani ben de di den Dyu krutubangi no ben mag du. Den no ben kisi primisi fu kiri ogriman. Na den Romesma nomo ben abi a reti fu du disi. Ma toku a pasa wan leisi taki krutuman fu a Sanhedrin krutu Stefanus èn den meki sma ston en kiri.​—Tori 6:8-15; 7:54-60.

Leki fa wi si, dan a Dyu Sanhedrin ben abi furu reti. A sabiman Emil Schürer e taki: „Ma wan prenspari sani, na taki den Romesma ben kan teki bosroiti na ini krutu-afersi iniwan ten di den ben wani sondro fu gi frantwortu na wan sma. Den ben e du dati spesrutu te den ben si taki a ben kan tyari dyugudyugu kon na politiek sei.” So wan sani pasa di a legre-edeman Klawdiyus Lisias teki na apostel Paulus, wan Romesma, tyari gowe fu di sma ben wani kiri en.​—Tori 23:26-30.