SOWAN 60 yari pasa, a papa fu John tron wan Yehovah Kotoigi na ini a pikin foto Guyarat, na India. John, den feifi brada nanga sisa fu en, nanga en mama ben de fayafaya Lomsusma èn den no ben lobi a bribi fu a papa fu den srefisrefi.

Wan dei, John en papa aksi en fu tyari wan envelop gi wan brada fu a gemeente. Ma a mamanten dati, John koti en finga di a ben e pruberi fu opo wan bigi bari. Ma fu di a ben wani du san en papa ben aksi en, meki a tai en finga nanga wan krosi èn a tyari a envelop gi a sma.

Di John doro na a brada en oso, dan a wefi fu en teki na envelop. Na uma disi ben de wan Yehovah Kotoigi tu. Di a si taki John ben koti en finga, dan a ben wani yepi en. A go teki dresi fu krin a soro èn a tai a finga bun. Ne a meki te gi John èn a taki na wan switi fasi nanga en fu Bijbel.

Fu di a ben e sori switifasi gi John, meki John bigin denki tra fasi fu den Kotoigi. Dati meki a poti tu aksi gi a sisa. A ben wani sabi efu Yesus na Gado èn efu Kresten musu begi Maria. A ben sabi taki a kerki fu en ben leri tra sani fu den tori disi. Fu di a sisa ben leri a Guyaratitongo di John ben e taki, meki a piki den aksi fu en nanga yepi fu Bijbel èn a gi en a pikin buku „Dit goede nieuws van het koninkrijk” (A bun nyunsu fu a Kownukondre).

Bakaten, di John leisi a buku, a ben e firi leki na a fosi leisi a ben e yere den tru tori fu Bijbel. A go na a priester fu en èn a poti den srefi tu aksi gi en. Fosi yu denki a priester ati bron èn a fringi a Bijbel tapu John. A bari: „Yu kon tron Satan! Sori mi pe fu Bijbel a skrifi taki Yesus a no Gado. Sori mi pe a skrifi taki yu no musu anbegi Maria. Sori mi!” John skreki so te fu a fasi fa a priester tyari ensrefi, taki a taigi en: „Noiti moro mi e poti mi futu na ini wan Lomsu kerki.” Èn noiti moro a du dati tu!

John bigin studeri Bijbel nanga den Kotoigi, a teki a tru anbegi, èn a bigin dini Yehovah. Baka wan pisi ten, ete wan tu sma fu en famiri du a srefi. Tide na a dei, John abi a marki ete na en finga pe a ben koti ensrefi sowan 60 yari pasa. Noiti a o frigiti a bun sani di wan Kresten ben du gi en. Na a sani dati hari en kon na ini a tru anbegi.​—2 Kor. 6:4, 6.