KON meki wi taki dati wi e libi na ini owruten, sowan 3500 yari pasa. Wi de ini a foto Yerikow, na ini a kondre Kanan. Wan meisje di nen Rakab e tan na ini a foto disi. A gebore na ini a ten baka di Moses tyari den Israelsma komoto na ini katibo na Egepte, èn a tyari den pasa a Redi Se na tapu drei gron! Na ini a pisi ten dati, sma no ben abi radio, telefisi, noso Internet, ma toku Rakab yere fu a wondru disi, aladi a pasa fara fu pe a e tan. Yu sabi fa a du kon taki a yere fu dati?​— *

A no de fu taki dati sma fu tra kondre ben fruteri fu den wondru disi di ben pasa. Te Rakab e gro kon bigi, a no e frigiti san Yehovah ben du gi En pipel. Bakaten, a e yere fu tra kefalek sani fu den Israelsma. Baka di den waka 40 yari na ini a gran sabana, den go na ini a kondre Kanan, èn Gado yepi den fu wini iniwan sma di ben kon feti teige den. Now, Rakab kon yere taki den Israelsma seti kampu na a tra sei fu Yordan-liba, di ben de leti na abrasei fu Yerikow!

Wan mofoneti, tu man di Rakab no sabi, kon na en fu di den sabi taki a e wroko na wan presi pe sma kan tan sribi. Rakab e meki den kon na inisei so taki den kan tan sribi drape. A srefi neti dati, sma e fruteri a kownu fu Yerikow taki tu Israel man kon drape na wan kibri fasi fu kon luku a foto, èn taki den go na a oso pe Rakab e wroko. Dati meki a kownu e seni boskopuman go na Rakab, fu taigi en taki a musu tyari den tu man di kon na en oso, na dorosei. Yu sabi san Rakab kon sabi kaba, èn yu sabi san a du?—

We, fosi den boskopuman fu a kownu doro, Rakab kon sabi taki den man di kon na ini en oso, na Israelsma di kon luku a kondre na wan kibri fasi. Fu dati ede, a e meki den go kibri na tapu a daki fu en oso. Dan a e taigi den boskopuman fu a kownu: „Iya, a tru taki den man kon na mi . . . Di dungru fadon den man go na dorosei, fosi a portu fu a foto tapu.” Rakab e taigi den: „Hari go na den baka esi-esi.”

Fu san ede yu denki taki Rakab kibri den tu man di kon luku a kondre?— A e taki fu san ede a du dati, fu di a e taigi den: „Mi sabi taki Yehovah o gi unu a kondre disi . . . Bika wi yere fa Yehovah ben drei a watra fu a Redi Se gi unu di  unu komoto na Egepte.” A yere tu fu tra okasi pe Gado ben yepi den Israelsma fu wini den feanti fu den.

Yehovah ben musu fu breiti srefisrefi taki Rakab ben kibri den man dati, soleki fa Bijbel e fruteri wi na Hebrewsma 11:31. A ben breiti tu di Rakab ben begi den man dati: ’Mi ben du unu wan bun, mi e begi unu grantangi, pramisi mi taki te unu e kon fu teki Yerikow abra, un musu meki mi papa nanga mi mama tan na libi, makandra nanga den brada nanga sisa fu mi.’ Den tu man e pramisi fu du dati efu Rakab e du san den e taigi en. Yu sabi san den taigi en fu du?—

Den man e taki: ’Teki a redi titei disi èn tai en na yu fensre. Baka dati yu musu tyari ala yu famiriman kon na ini yu oso. Efu yu du dati, dan ala sma di de na ini yu oso o tan na libi.’ Rakab e du soifri soleki fa den man e taigi en. Yu sabi san e pasa bakaten?—

Den Israelsma e doro na dorosei fu den skotu fu Yerikow. Siksi dei langa, den e waka lontu a foto wán leisi wan dei, sondro fu taki wan sani. Tapu a di fu seibi dei, den e waka seibi leisi lontu a foto èn baka dati den e bari bun tranga. Den skotu fu Yerikow e broko fadon, boiti a pisi pe a redi titei e anga na a fensre! Rakab nanga en famiri e tan na libi.​—Yosua 2:1-24; 6:1-5, 14, 15, 20-25.

San wi kan leri fu Rakab?— We, boiti taki a ben yere a nyunsu di ben taki fu den sani di Gado ben du fu kibri En pipel, a ben yepi den Israelsma tu di a kisi na okasi. Iya, Rakab teki a bosroiti fu dini Yehovah makandra nanga en pipel! Yu o du a srefi tu?— Wi e howpu taki yu o du dati.