Wan kaba o kon na ogridu!

GADO gi wi en Wortu, di e sori fu san ede sma e du ogri. A gi wi a grani tu fu teki wi eigi bosroiti èn a meki wi na so wan fasi taki wi man dwengi wisrefi. Na so fasi wi kan bosroiti fu no du ogri sani (Deuteronomium 30:15, 16, 19). Dati meki wi man si efu wi abi fasi di no bun èn wi o man du san de fanowdu fu tyari kenki kon. Te fu kaba, te wi no e du sani di ogri, dan wi èn sosrefi tra sma, o de koloku.—Psalm 1:1.

Ma awansi wi srefi e du tranga muiti fu no du ogri, toku grontapu lai nanga ogri di sma  e du. Bijbel e gi wi a warskow disi: „Ma sabi taki na ini den lasti dei muilek ten o de di tranga fu pasa.” Bijbel e sori moro fara san e meki taki den dei disi „tranga fu pasa”. A e taki: „Sma sa lobi densrefi nomo, den sa lobi moni, den sa denki tumusi furu fu densrefi, den sa abi heimemre, den sa taki ogri fu trawan, den sa trangayesi papa nanga mama, den no sa de nanga tangi, den no sa de loyaal; den no sa lobi trawan, den no sa wani meki kruderi, den sa de sma di e fruteri ogri-ati lei fu trawan, den no sa man dwengi densrefi, den sa du sani nanga trawan na wan ogri-ati fasi, den no sa lobi san bun; den sa de sma di e tori trawan, den sa du san densrefi wani, den sa abi bigimemre, den sa de sma di lobi prisiri na presi taki den lobi Gado; a o gersi leki den e dini Gado na wan getrow fasi, ma a libi fu den o sori taki dati no de so; yu no musu bumui nanga den sma dati.”—2 Timoteyus 3:1-5.

Kande yu si den wortu „den lasti dei” di skrifi na ini a profeititori di kari na tapusei. San dati wani taki gi yu? Soleki fa furu sma e frustan, dan „den lasti dei” wani taki dati wan sani e kon na wan kaba. San na dati? Luku san Gado pramisi na ini en Wortu.

Den ogriwan no sa de moro.

„Ete wan syatu pisi ten èn den ogriwan no sa de moro. Yu o luku pe den ben de fosi, ma den no sa de moro. Ma den safri-ati sma o kisi grontapu èn den o prisiri srefisrefi, fu di vrede o de pasa marki.”—PSALM 37:10, 11.

„Yehovah e kibri ala den wan di lobi en. Ma ala den ogriwan a o kiri.”—PSALM 145:20.

Sma no o kwinsi trawan moro.

„Bika a o frulusu den pôtisma di e bari suku yepi, sosrefi ala den mofinasma, nanga iniwan sma di no abi yepiman. A o kibri den libi, so taki tiriman di e kwinsi den èn di e du ogri-ati sani nanga den, no man du den noti moro.”—PSALM 72:12, 14.

„Den sani srefi di Gado meki, o komoto na ini a katibo di e tyari pori kon, èn na so fasi den o tron pikin fu Gado èn den o kisi kefalek bigi fri.”—ROMESMA 8:21.

Sma o kisi den sani di den abi fanowdu.

„Ibriwan sma o sidon na ondro en eigi droifibon nanga en eigi figabon. Nowan sma o meki den frede, bika na Yehovah srefi, iya, a Gado fu den legre taki so.”—MIKA 4:4.

„Den o bow oso èn den srefi o tan na ini. Den o prani droifidyari èn den srefi o nyan fu en. Den no o bow oso, dan wan tra sma go tan na ini. Den no o prani sani, dan wan tra sma nyan fu dati. Bika mi pipel o libi langa neleki wan bon èn den o nyan bun fu a wroko di den du.”—YESAYA 65:21, 22.

Retidu o de na grontapu.

„A no de so dan, taki . . . den wan di [Gado] kari èn di e bari kari en dei nanga neti, sa . . . feni reti? Mi e taigi unu: A sa sorgu taki den o feni reti esi-esi.”—LUKAS 18:7, 8.

„Yehovah na wan sma di lobi retidu. Dati meki a no o gowe libi den sma di e tai hori na en. A o kibri den fu ala ten.”—PSALM 37:28.

„Den sma fu grontapu e leri san na retidu.”—YESAYA 26:9.

„Wi e fruwakti nyun hemel nanga wan nyun grontapu, soleki fa a ben pramisi, èn drape regtfardikifasi o tan.”—2 PETRUS 3:13.

Srefi na ini a ten disi sma e kenki

A no de fu taki dati wi alamala breiti nanga den pramisi dati. Ma sortu dyaranti wi abi taki den sani disi o kon tru? Fu taki en  leti, nownow kaba wi abi buweisi taki den pramisi fu Gado o kon tru. San na a buweisi dati? A buweisi na taki na ini a ten disi, milyunmilyun sma na heri grontapu kenki den fasi fu den, fu di den no e denki densrefi moro, den no e tyari densrefi na wan fasi di no fiti, èn den no e du ogri moro. Na presi fu dati, den tron sma di e du san bun, di e libi bun nanga trawan, èn di abi switifasi. Na ini a ten disi, moro leki seibi milyun Kotoigi fu Yehovah de di e libi leki brada nanga sisa na heri grontapu. Awansi den sma disi na fu wan tra ras, fu wan tra kulturu, fu wan tra kondre, awansi den gudu noso pôti, toku den sani dati no e meki taki den abi bita-ati gi makandra, den no e du ogri èn den no e kiri trawan. Disi de heri tra fasi leki fa sani waka na ini den yari di pasa. * Den kenki disi di e pasa na ini a ten disi, e sori krin taki wi kan bribi dati den pramisi fu Gado o kon tru na heri grontapu.

Ma san meki taki sma tyari den kenki disi o kon? A piki de na ini wan tra pramisi fu Bijbel di a profeiti Yesaya ben skrifi. A ben skrifi:

„Busidagu o tan nanga pikin skapu, èn pikin krabita o didon na sei penitigri. Pikin kaw, yongu lew, nanga fatu meti o de makandra. Srefi wan pikin boi o tiri den. . . . Srefi lew o nyan grasi neleki mankaw. Wan pikin di de na bobi ete o prei na a olo fu wan kobra-sneki. Wan pikin di no e dringi bobi moro o poti en anu na a olo fu wan takru sneki. Den no o du nowan ogri èn den no o pori nowan sani na mi santa bergi, fu di heri grontapu o furu nanga a sabi fu Yehovah, neleki fa a se furu nanga watra.”—Yesaya 11:6-9.

A profeititori disi e taki nomo fu wan ten te meti nanga libisma no o du ogri moro  nanga makandra? Nôno, a e sori wi wan moro prenspari sani. Luku a lasti pisi fu den vers dati, di e sori san o meki den kenki disi pasa. A e taki: „Heri grontapu o furu nanga a sabi fu Yehovah.” A sabi fu Gado e kenki a fasi fa meti de? Nôno. Ma a sabi fu Gado e kenki sma! A profeititori disi e taki dati den sma di ben abi fasi di gersi leki di fu meti, ben o kenki den fasi disi èn den ben o tyari densrefi leki Kresten, fu di den e leri san Bijbel e taki èn den e fiti den sani disi na ini den libi.

Luku na eksempre fu Pedro. * A ben denki taki a ben e feti gi retidu di a tron wan memre fu wan organisâsi di ben du ogri sani fu gens tirimakti. Baka di a leri san a ben musu du, a ben musu sutu wan presi panya pe skowtu ben tan. Di a ben e seti sani fu du dati, dan skowtu grabu en. Pedro koti strafu 18 mun langa, èn drape a ben tan seti sani fu du ogri teige tirimakti. Na a ten dati, Pedro en wefi bigin studeri Bijbel nanga Yehovah Kotoigi. Di Pedro komoto fu strafu, a bigin studeri Bijbel tu, èn den sani di a leri fu Yehovah Gado meki taki a tyari bigi kenki kon na a fasi fa a tyari ensrefi èn na a fasi fa a ben e si a libi. Pedro e taki: „Mi e taki Yehovah tangi taki noiti mi kiri wan sma na ini a ten di mi ben de na ini na organisâsi dati. Now mi e gebroiki a feti-owru fu Gado yeye, èn dati na Bijbel, fu fruteri sma wan boskopu fu trutru  vrede nanga retidu. Iya, dati na a bun nyunsu fu Gado Kownukondre.” Pedro ben go srefi na a presi di a ben o sutu panya fu fruteri den sma drape a boskopu di e taki fu vrede èn fu wan grontapu pe ogri no sa de moro.

A Wortu fu Gado abi furu krakti tapu sma èn dati e gi wi moro reide fu bribi a pramisi fu Gado di e taki dati wan kaba o kon na ala ogridu. Iya, sma no o du ogri fu ala ten, ma den o tron moro bun sma. Heri esi Yehovah o pori Satan Didibri, a sma pe ogridu komoto, èn a sma di wi no man si. Na en e meki taki so furu ogri pasa na grontapu. Bijbel e taki: „Heri grontapu de na ini a makti fu na ogriwan” (1 Yohanes 5:19). Ma heri esi a o kisi pori. Boiti en, den sma di e weigri fu kenki den ogri fasi fu den, o kisi pori tu. A o de wan heri moi sani fu libi na ini a ten dati!

San wan sma musu du fu man libi na ini a ten dati? Hori na prakseri taki na „a sabi fu Yehovah” e meki taki sma e kenki a fasi fa den e libi na ini a ten disi, èn na a sabi dati o meki taki grontapu kenki heri esi. Te yu e teki soifri sabi fu Bijbel èn te yu e fiti den sani dati na ini yu libi, neleki fa Pedro ben e du dati, dan yu sosrefi o abi a howpu fu libi na ini wan grontapu pe „regtfardikifasi o tan” (2 Petrus 3:13). Fu dati ede, wi e gi yu a deki-ati fu teki na okasi di de ete fu kon leri sabi Gado nanga Yesus Krestes, bika dati wani taki têgo libi gi yu.—Yohanes 17:3.

[Futuwortu]

[Prenspari pisi na tapu bladzijde 9]

Yu sosrefi o abi a howpu fu libi na ini wan grontapu pe „regtfardikifasi o tan”.—2 PETRUS 3:13