Sma musu gi trawan kado nanga prisiri
„Wan sma sa de moro koloku te a e gi sani, leki te a e kisi sani.”—TORI FU DEN APOSTEL 20:35.
Wan reide fu san ede sma e hori Kresneti.
Soleki fa Yesus ben taki, dan te wan sma e gi sani, en nanga a sma di kisi sani e prisiri. Fu di furu sma wani abi a prisiri dati, meki den feni taki wan fu den moro prenspari sani di sma musu du na Kresnetiten, na fu gi trawan kado. Fu eksempre, wan ondrosuku sori taki aladi problema ben de nanga na ekonomia a yari di pasa, toku ibri osofamiri na ini Ierland ben prakseri fu gebroiki moro leki 500 euro (sowan 660 Amerkan dala) fu bai Kresneti kado gi trawan.
Fu san ede dati no makriki?
Furu sma feni taki den no e firi koloku te den wani gi trawan Kresneti kado, ma na presi fu dati den e kisi moro broko-ede. Fa so? Wan lo fu den e si en leki wan plekti fu bai kado gi trawan, aladi den no abi nofo moni. Boiti dati, ipi-ipi sma e de na strati èn na den wenkri, fu di ala sma e bai kado na a srefi ten. A sani disi e meki taki furu sma e fuga te den musu go bai sani.
Sortu leri fu Bijbel kan yepi sma?
Yesus ben taki: „Abi a gwenti fu gi sma sani” (Lukas 6:38). * A no ben e gi sma sani soso na wan spesrutu ten fu a yari te sma ben o fruwakti dati fu trawan. Yesus ben gi den bakaman fu en a rai fu teki en leki wan gwenti fu gi sma kado.
„Meki ibri sma gi soleki fa a bosroiti na ini en ati. A no musu du dati nanga krutukrutu noso fu di sma dwengi en, bika Gado lobi a sma di e gi sani nanga prisiri” (2 Korentesma 9:7). Wan buku di e taki fu Bijbel e sori taki Paulus e leri wi taki „noiti wi musu si en ’leki wan plekti’ fu gi sma sani. Iya, wi no musu gi sma sani fu di wi feni taki trawan e dwengi wi fu du dati”. „A sma di e gi sani nanga prisiri”, no e si en leki wan plekti fu gi wan spesrutu sma wan spesrutu sani na wan spesrutu ten, soleki fa dati e pasa na Kresnetiten.
„Te wan sma de klariklari fu gi, dan dati bun spesrutu te a gi san a man gi. A no musu gi san a no man gi” (2 Korentesma 8:12). Gado no e fruwakti fu Kresten taki den e meki paiman fu bai diri kado. Ma te wan sma e gi „san a man gi”, dan boiti taki a no o hebi gi en fu gi den sani dati, a e du wan sani tu di „bun spesrutu”. Dati de heri tra fasi leki a deki-ati di bisnisman e gi sma na Kresnetiten fu „bai now èn fu pai bakaten”.
^ paragraaf 8 Son Bijbelvertaling e taki nomo: „Gi.” Ma na ini na owruten Grikitongo, a wortu wani taki dati wan sma e du wan sani doronomo. Fu di a Nyun-Grontapuvertaling wani tyari soifri kon na krin san a wortu di Yesus gebroiki wani taki, meki den vertaal a wortu nanga „abi a gwenti fu gi sma sani”.
