YU AKSI yusrefi wan leisi suma na yu trutru? Oiti yu prakseri taki yu ben libi bifo? Efu dati de so, dan yu a no a fosiwan. Sensi ten, sma fu difrenti kulturu ben e aksi densrefi den sortu sani dati. Fu di den ben wani kisi piki tapu den aksi dati, meki den bigin bribi taki sma e nasi. Dati wani taki dati te wan sma dede, dan wan sani di wi no man si e gowe libi a skin èn a e gebore baka na ini wan tra skin. A kan de wan libisma skin, a skin fu wan meti, noso a kan de wan prani srefi. A sani disi kan pasa wán leisi, noso moro leisi baka makandra.

 A tru taki son sma e bribi a sani disi, ma fa wi kan de seiker taki a bribi disi tru? San Gado Wortu, Bijbel, e taki fu en? Meki wi go luku fosi pe a bribi disi komoto.

Soleki fa historia skrifiman nanga sabiman e taki, dan den sma fu owruten Babilon, wan foto di seti moro leki 2000 yari fosi Krestes, bigin bribi taki baka te wan sma dede, a yeye fu en e libi go doro. A tori disi „ben e hari a prakseri fu den kerki leriman fu Babilon”, na so Morris Jastrow, Jr. e taki na ini a buku fu en (The Religion of Babylonia and Assyria). A man disi fruklari moro fara, taki gi den Babilonsma, „wan sma di dede e abra go na ini wan tra sortu libi. Fu di den kerki leriman disi no ben man bribi taki wan sma di dede no de moro, meki den kon nanga a leri di e taki dati a yeye fu wan dede sma e libi go doro.”

Di den Babilonsma bigin bribi a sani dati, dan sma na ini tra kondre fu owruten bigin bribi tu taki a yeye fu wan dede sma e go na ini a skin fu wan tra sma di gebore. Filosofiaman fu India kon nanga a denki taki na a fasi fa wan sma ben libi ben o sori na ini sortu skin a o gebore baka. Na a sani dati den e kari Karma. Pôpi Griki filosofiaman bigin bribi tu taki sma e nasi, èn na so tra sma bigin bribi a sani disi tu.

Te na a dei fu tide, a bribi disi e hari a prakseri fu furu sma na ini den kondre fu Amerika nanga Europa. Pôpi sma nanga yonguwan lobi den kerki leri nanga den gwenti fu den Owstusei kondre. Na ini a ten disi, bun furu buku nanga Internet site de di e taki fu sani di sma e bribi taki den ben ondrofeni na ini wan tra libi. Wan sani di e kon pôpi srefisrefi na ini furu kondre, na a datrayepi di den e kari past-life therapy. Te datra e yepi wan sma na a fasi disi, dan den e ondrosuku a libi di wan sma feni taki a ben abi fosi. Den e du disi fu kon frustan fu san ede a sma e siki now èn fu san ede a e tyari ensrefi na wan spesrutu fasi.

Aladi na sma fu owruten bigin bribi a sani disi, toku a prenspari srefisrefi fu kon sabi efu a bribi disi tru. Leki Kresten, wi wani sabi efu Bijbel e leri a sani disi trutru (Yohanes 17:17). Wi Mekiman, Yehovah Gado, na a sma di gi wi libi èn a de sosrefi ’wan Gado di e tyari kibritori kon na krin’. Fu dati ede a e meki wi kon sabi sani di abi fu du nanga libi nanga dede. Wan tra fasi no de fa wi ben o man sabi den sani dati. Wi kan abi a frutrow taki en Wortu, Bijbel, e piki den aksi di abi fu du nanga a tori disi.​—Danièl 2:28; Tori fu den Apostel 17:28.

Te wi e ondrosuku Bijbel finifini, dan Gado e meki wi kon sabi san e pasa nanga den dedewan. Fu eksempre, na Genesis 3:19, wi e leisi san Gado taigi Adam baka di Adam nanga Eva trangayesi en. Gado ben taki: „Yu o broko sweti, fu di yu o abi fu wroko tranga fu feni nyanyan. Na so a o de teleki yu dede èn yu drai go baka na a gron di mi teki yu puru na ini, bika na fu doti yu meki èn na doti yu o tron baka.” Adam ben meki fu doti. Di a dede, a tron doti baka. Gado ben taki krin taki na dati ben o pasa. Sobun, te wan sma dede a no e gebore leki wan tra sma, ma a no de moro. * Neleki fa faya nanga kowru, drei nanga nati, èn leti nanga dungru de kontrari fu makandra, na so dede de kontrari fu libi. Den dedewan dede trutru! A sani disi makriki fu frustan, a no so?

Dati meki tra reide musu de fu san ede sma e denki taki den ben libi bifo. Te nanga now, sma no man frustan krin ete fa wi frustan e wroko noso fa a abi krakti na wi tapu. Wi no sabi tu sortu krakti den dresi di wi e gebroiki noso den takru sani di wi ondrofeni kan abi na wi tapu. Son leisi, wi e dren sani, noso wi abi a denki taki son sani pasa. Den sani disi de so krin na ini wi frustan taki a gersi leki den pasa trutru. Disi e kon fu di wi frustan man memre so furu sani. Son leisi, ogri yeye e meki sma  ondrofeni sani di den no man fruklari, èn son leisi den sma disi e bribi taki den sani dati pasa trutru.​—1 Samuel 28:7-19.

Ala sma wani tan na libi èn den wani sabi san o pasa na ini a ten di e kon. Ma fa a du kon taki sma wani a sani dati? A moi fu sabi san Bijbel e taki fu a Mekiman: A poti ’têgo ten na ini libisma ati’ (Preikiman 3:11). Fu dati ede libisma abi a tranga winsi fu libi fu têgo.

Efu wi Mekiman, Yehovah Gado, poti na angri fu libi fu têgo na ini na ati fu libisma, dan wi kan frustan taki a ben o meki den kon sabi tu san den musu du fu man libi fu têgo. Bijbel e taki dati a Mekiman o gi libisma di e gi yesi a moi okasi fu libi fu têgo na ini wan paradijs na grontapu. Nanga yepi fu santa yeye, Kownu David, a psalm skrifiman, ben taki: „Den reti-ati sma o kisi grontapu èn fu têgo den o tan libi drape” (Psalm 37:29). Wan prenspari Bijbel leri di e poti prakseri na a têgo libi di Gado o gi sma, na taki a o gi den dedewan wan opobaka.​—Tori fu den Apostel 24:15; 1 Korentesma 15:16-19.

Aiti leisi Bijbel e fruteri taki sma si fa dedewan kisi libi baka na grontapu. * Den dedewan disi no ben nasi, ma den ben kisi wan opobaka. Di den sma disi kisi libi baka, dan den mati nanga den famiri fu den ben sabi suma na den wantewante. Den famiriman fu den no ben abi fu go na ala sei fu suku efu wan fu den nyunyun gebore beibi na a yeye fu a lobiwan fu den di ben nasi baka.​—Yohanes 11:43-45.

A de wan trowstu fu sabi san o pasa nanga den dedewan. Gado Wortu e sori taki bun furu dedewan o kisi wan opobaka te Gado o wiki den na ini a nyun grontapu fu en di heri esi o kon na ini a presi fu na ogri grontapu disi (2 Petrus 3:13, 14). Nownowde, Yehovah di no e frigiti noti, e memre a fasi fa den milyardmilyard sma dati ben e libi. Iya, en na a Gado di e memre srefi den nen fu ala den stari! (Psalm 147:4; Openbaring 20:13). Te a e wiki ipi-ipi sma baka fu libi na ini a nyun grontapu fu en, dan den o man luku suma na den famiriman fu den èn den o man kon sabi den afo fu den. Dati na wan moi howpu fu tru!