Wan sma di abi lobi abi dipi firi gi trawan. Wan lobi-ati sma e taki èn e du sani di e sori fa a e firi gi den wan di a lobi, awansi dati e aksi furu fu en.

Moses sori lobi gi Gado. Fa a du dati? We, memre den wortu di skrifi na 1 Yohanes 5:3: „Te wi lobi Gado, dan wi o hori den komando fu en.” Moses ben e du dati. Ala sani di Gado ben e aksi fu Moses a ben e du. Fu eksempre, aladi a ben ben frede fu go na fesi a makti Farao, toku a du dati, èn di a ben musu langa en tiki nomo abra a Redi Se, dan a du dati tu. Awansi a sani di Gado ben aksi fu Moses ben makriki noso muilek fu du, toku a ben e du en. „A du leti so.”​—Eksodes 40:16.

Moses sori lobi gi den Israelsma, a pipel fu en. Den ben sabi taki Yehovah ben poti Moses leki fesiman fu a pipel, èn fu dati ede den ben e tyari den problema fu den go na Moses. Bijbel e taki: „A pipel ben tan kon na en fu mamanten teleki neti” (Eksodes 18:13-16). Prakseri fa Moses ben musu fu weri te a ben e arki den problema fu den Israelsma heri dei! Ma toku Moses ben de klariklari fu yepi a pipel di a ben lobi.

Boiti taki Moses ben e arki den lobiwan fu en, a ben e begi tu gi den. A begi srefi gi den wan di ben du ogri nanga en! Fu eksempre, di Miryam, a sisa fu Moses, ben krutu en, dan Yehovah naki en nanga gwasi. Moses no ben breiti taki Miryam ben kisi a strafu dati, ma na presi fu dati a begi Gado wantewante gi en. A taki: „Mi Gado, grantangi, meki a kon betre! Mi e begi yu!” (Numeri 12:13) A no lobi wawan ben kan meki taki Moses begi so gi en sisa?

Wi o man de leki Moses te wi e kon abi tranga lobi gi Gado. A lobi dati o meki taki wi e gi yesi na den komando fu en ’nanga wi heri ati’ (Romesma 6:17). Te wi e gi yesi na Yehovah nanga wi heri ati, dan a o prisiri (Odo 27:11). Wi srefi o kisi wini tu. Fu taki en leti, te wi e dini Gado fu di wi lobi en trutru, dan wi o du san bun èn wi o du dati nanga prisiri!​—Psalm 100:2.

Wan tra fasi fa wi o man de leki Moses, na te wi e sori trutru lobi gi trawan. Te mati noso famiriman e kon na wi nanga den problema fu den, dan lobi sa meki wi du den sani disi: (1) Wi o arki den nanga pasensi. (2) Wi o pruberi fu frustan fa den e firi. (3) Wi o sori den taki wi e broko wi ede nanga den.

Neleki Moses, wi kan begi gi den lobiwan fu wi. Kande wi no sabi san wi musu du son leisi, te den e fruteri wi fu den problema fu den. Kande ala san wi e taigi den na disi: „Mi e sari taki mi no man yepi yu, ma mi o begi gi yu.” Ma memre a sani disi: „A fayafaya begi fu wan reti-ati sma abi furu krakti èn a abi bun bakapisi” (Yakobus 5:16). Sobun, te wi e begi gi wan sma, dan kande na fu dati ede Yehovah o du wan sani gi a sma dati. Dati meki a moro bun sani di wi kan du gi den lobiwan fu wi, na fu begi gi den, a no so? *

Yu no e agri taki wi kan leri furu fu Moses? Aladi a ben de wan sondu sma leki wi, toku a de wan heri bun eksempre gi wi te wi e luku fa a sori bribi, sakafasi, nanga lobi. O moro wi e du muiti fu de leki en, o moro wi o kisi wini èn o moro wi o man yepi trawan.​—Romesma15:4.