NA OPOBAKA fu Yesus a no wan sani nomo di ben pasa na ini owruten èn di no wani taki noti gi wi. Na apostel Paulus ben sori san na opobaka fu Yesus wani taki gi wi, di a skrifi: „Krestes kisi wan opobaka trutru. Fu den wan di dede en na a fosiwan di kisi wan opobaka. Fu di na wan libisma tyari dede kon, dan na wan libisma o meki taki dede sma opo baka tu. Neleki fa ala sma dede fu Adam ede, na so ala sma sa kon na libi baka tu fu Krestes ede.”—1 Korentesma 15:20-22.

Yesus ben kisi wan opobaka tapu 16 Nisan fu a yari 33. Na a dei dati, den Dyu ben e go na a tempel na Yerusalem fu gi Yehovah Gado den fosi bosu fu na aleisi di den ben koti. Di Paulus kari Yesus a fosiwan, dan dati ben e sori taki tra sma ben o kisi opobaka tu.

Den sani di Paulus taki baka dati e sori san na opobaka fu Yesus du. Paulus taki: „Fu di na wan libisma tyari dede kon, dan na wan libisma o meki taki dede sma opo baka tu.” Fu di Adam gi wi sondu, meki wi alamala e dede. Ma Yesus no abi nowan enkri sondu. Dati meki a ben kan gi en libi leki wan lusu-paiman so taki libisma kan kisi wan opobaka èn kon fri fu sondu nanga dede. Paulus e taki en moi na Romesma 6:23: „A pai fu sondu na dede, ma a kado di Gado e gi sma na têgo libi nanga yepi fu Krestes Yesus wi Masra.”

Yesus srefi ben fruteri san a dede nanga na opobaka fu en kan du gi wi. Luku san a ben taki fu ensrefi: „Den sa musu opo a Manpikin fu libisma go na loktu . . . so taki ala sma di e bribi na ini en, kan kisi têgo libi. Bika Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi.”—Yohanes 3:14-16.

Denki a tori: têgo libi sondro pen, sondro pina, sondro sari (Openbaring 21:3, 4). Dati na wan moi sani! Wan sabiman e taki en so: „Beripe e memre wi taki a libi syatu, ma na opobaka na a dyaranti taki dede o tan fu wan syatu pisi ten nomo.” Iya, na opobaka fu Yesus o meki taki sma kisi têgo libi!