HERODOTUS, wan Griki historia skrifiman di ben e libi sowan 2500 yari pasa, ben fruteri wan tori fu den Egeptesma fu a ten fu en. A ben skrifi: „Te sma ben kaba nyan na den nyanyan fesa fu den gudusma, wan man ben e waka lontu nanga wan kisi pe wan udu popki ben didon na ini. A popki disi ben ferfi èn a ben meki so soifri taki a ben gersi wan trutru dede sma. A ben kan langa sowan afu meter noso wán meter. A man ben e sori ala sma drape a popki disi èn a ben e taki: ’Dringi èn meki prisiri ma luku a sani disi bun, bika na so yu o tron te yu dede.’”

A no den Egeptesma wawan ben e denki so fu libi nanga dede. Na ini a ten disi den wortu „Nyan, dringi, èn meki prisiri” kon tron wan aladei taki. Sma e denki: Efu toku wi o dede te fu kaba, dan fu san ede wi no e meki prisiri te wi man du dati ete? Fu san ede wi musu feti fu du san bun? Efu dede na a kaba fu ala sani, dan moro betre wi nyan bun fu a libi nownow. Na apostel Paulus ben taki wan srefi sortu sani. A ben sori fa sma di no ben e bribi na ini na opobaka ben e denki: „Efu den dede sma no o kisi wan opobaka, dan ’meki wi nyan èn dringi, bika tamara wi o dede.’”—1 Korentesma 15:32.

A no de fu taki dati Paulus srefi no ben e bribi taki dede na a kaba fu ala sani. A ben de seiker taki den dedewan ben o libi baka èn taki noiti moro den ben o dede. Wan tumusi prenspari reide ben de fu san ede a ben e bribi dati, èn a no ben e tweifri na a sani dati kwetikweti. Paulus ben e bribi na ini na opobaka * fu Krestes Yesus. Fu taki en leti, na opobaka dati ben de a moro prenspari sani di tranga a bribi fu den fosi disipel.

 Ma san na opobaka fu Yesus wani taki gi wi? Fa wi kan sabi taki a ben pasa trutru? Meki wi go luku san Paulus ben taki fu den tori disi di a skrifi wan brifi gi den Kresten na ini Korente.

Son Kresten na ini owruten Korente ben e tweifri efu na opobaka ben pasa trutru, èn tra sma no ben e bribi a tori dati srefisrefi. Na ini a fosi brifi di na apostel ben skrifi gi den Kresten drape a ben taki fa a ben o de efu Yesus no ben kisi wan opobaka. A ben skrifi: „Efu a tru taki den dede sma no sa opo baka, dan Krestes no opo baka tu. Ma efu Krestes no opo baka, dan a no de fu taki dati na fu soso wi e preiki èn na fu soso wi e bribi. Dan wi na falsi kotoigi fu Gado tu . . . Na fu soso unu e bribi. Unu no kisi pardon fu un sondu . . . Fu taki en leti, dan den wan di dede leki disipel fu Krestes, lasi gowe trutru.”—1 Korentesma 15:13-18.

„A sori ensrefi na moro leki feifi hondro brada na a srefi ten . . . Dan a sori ensrefi na Yakobus èn baka dati na ala den apostel. Ma leki lastiwan fu un alamala a sori ensrefi na mi.”—1 Korentesma 15:6-8

Paulus ben bigin nanga den wortu disi di no de wan lei kwetikweti: Efu den dedewan no o kisi wan opobaka, dan Krestes di dede, no ben kisi wan opobaka tu. Efu Krestes no ben kisi wan opobaka, dan san ben o de a bakapisi? Dan na fu soso wi ben o preiki a bun nyunsu. A nyunsu dati ben o de wan bigi lei. Fu taki en leti, na opobaka fu Krestes ben de wan prenspari leri fu a Kresten bribi. A abi furu fu du nanga wan tu fu den moro prenspari Bijbel leri di e taki fu a reti di Gado abi fu tiri, a nen fu en, a Kownukondre fu en, nanga a frulusu di wi o kisi. Efu Yesus no ben kisi wan opobaka, dan a boskopu di Paulus nanga den tra apostel ben preiki no ben o wani taki noti.

Ma dati a no ala. Efu Krestes no ben kisi wan opobaka, dan a Kresten bribi ben o de wan lei. Boiti dati, Paulus nanga den tra apostel no ben o lei nomo taki Yesus kisi wan opobaka, ma den ben o lei gi Yehovah Gado tu, bika den ben taki dati na en gi Yesus wan opobaka. Ma san moro prenspari, na taki a no ben o de so taki Krestes „dede gi den sondu fu wi”, soleki fa Bijbel e taki. Bika efu a Frulusuman srefi no ben kisi wan opobaka, dan fa a ben o man frulusu trawan? (1 Korentesma 15:3) Dati ben o wani taki dati Kresten di dede, kande gi a bribi fu den, ben dede nanga a falsi howpu taki den ben o kisi wan opobaka.

Fu dati ede Paulus ben taki a sani disi: „Efu na ini a libi disi wawan wi howpu tapu Krestes, dan wi de fu sari moro leki ala tra libisma” (1 Korentesma 15:19). Neleki tra Kresten, Paulus ben lasi furu, a ben kisi frufolgu, problema ben miti en, èn sma ben wani kiri en, soso fu di a ben e bribi na ini na opobaka èn na ini ala sani di ben o pasa leki bakapisi fu dati. Ala den sani dati ben o de fu soso efu na opobaka ben de wan lei!

A no de fu taki dati Paulus no ben e tweifri na den sani di den Kresten ben e bribi. A ben sabi taki Yesus ben kisi wan opobaka èn a kari ala den buweisi fu dati gi den Korentesma. A ben taki dati „Krestes dede gi den sondu fu wi soleki fa Gado Buku taki. Den beri en èn a kisi wan opobaka na a di fu dri dei soleki fa Gado Buku taki. A sori ensrefi na Seifas, èn baka dati na den twarfu apostel.” * Dan Paulus taki moro fara: „Baka dati a sori ensrefi na moro leki feifi hondro brada na a srefi ten. Furu fu den brada disi e libi te now ete, ma sonwan fu den dede. Dan a sori ensrefi na Yakobus èn baka dati na ala den apostel. Ma leki lastiwan fu un alamala a sori ensrefi na mi.”—1 Korentesma 15:3-8.

Fu san ede Paulus ben abi a tranga bribi taki  Krestes dede gi den sondu fu wi, taki den beri en, èn taki a kisi wan opobaka? Wan reide, na taki furu sma ben si den sani disi nanga den eigi ai. Di Yesus kisi wan opobaka, dan a sori ensrefi na difrenti sma (Paulus ben de wan fu den). A ben sori ensrefi tu na pikin grupu sma, èn srefi na wan grupu fu 500 sma. A no de fu taki dati furu fu den sma dati no ben wani bribi di den yere taki Yesus kisi wan opobaka! (Lukas 24:1-11) Furu fu den sma dati ben de na libi ete na a ten fu Paulus èn sma ben kan aksi den efu Yesus ben kisi wan opobaka trutru (1 Korentesma 15:6). Efu na wán noso tu sma nomo ben si a sani disi, dan a ben o makriki fu taki dati a no tru. Ma dati no ben o man efu 500 sma noso moro leki dati ben si en.

Boiti dati, Paulus ben taki tu leisi taki a dede fu Yesus, a beri fu en, nanga na opobaka fu en ben pasa „soleki fa Gado Buku taki”. Den sani dati e sori taki profeititori na ini den Hebrew Buku fu Bijbel di e taki fu a Mesias, ben kon tru. Dati e sori taki Yesus ben de a Mesias di Gado ben pramisi.

Soleki fa wi si, dan sma ben si taki Yesus ben kisi wan opobaka èn Gado Buku srefi e taki fu a tori. Toku sma fu a ten dati ben e tweifri èn te now ete sma e tweifri taki Yesus ben kisi wan opobaka. Son sma e taki dati den disipel fu en fufuru a dedeskin fu en, èn bakaten den taki dati den si taki a kisi wan opobaka. Ma nowan enkri fasi no de fa den disipel ben o man puru den waktiman di ben e tanapu na fesisei fu a grebi. Tra sma e taki dati na denki den disipel ben e denki nomo taki den ben si Yesus di a kisi wan opobaka. Ma dati no kan te wi e luku taki someni difrenti sma si Yesus na difrenti okasi. Boiti dati, efu na denki sma ben denki nomo taki den ben si Yesus, dan fa a kan taki Yesus losi fisi gi den disipel fu en na Galilea? (Yohanes 21:9-14) Yu denki taki a ben o man taigi sma fu fasi en?—Lukas 24:36-39.

 Ma tra sma de tu di e taki dati na opobaka ben de wan lei di den disipel fruteri. Ma sortu wini dati ben o abi gi den? Fu di den disipel ben fruteri sma taki Yesus kisi wan opobaka, meki sma spotu den, den pina den, èn den kiri den. Fu san ede den ben o nyan ala den pina disi soso fu horibaka gi wan lei? Boiti dati, den preiki fosi na ini Yerusalem, leti na fesi den gensman fu den di ben de nomonomo fu puru den na pasi.

Na a opobaka ben gi den disipel a deki-ati fu fruteri sma fu a Masra fu den, awansi sma ben e frufolgu den na wan ogri-ati fasi. Na opobaka tron wan fu den moro prenspari leri fu a Kresten bribi. Fu san ede den fosi Kresten ben de klariklari fu lasi den libi? A no fu di den ben wani fruteri trawan fu wan koni leriman di sma kiri, ma na fu di den ben wani meki bekènti taki Yesus kisi wan opobaka. Dati ben e sori taki Yesus na a Krestes, a Manpikin fu Gado. A ben de wan makti sma di ben de na libi èn di ben e horibaka gi den èn tiri den. Na opobaka fu Yesus ben o meki taki den disipel ben o kisi wan opobaka tu. Fu taki en leti, efu Yesus no ben kisi wan opobaka, dan a Kresten bribi no ben o de. Iya, efu a no ben kisi wan opobaka, dan kande noiti wi ben o yere fu en.

Ma san na opobaka fu Krestes wani taki gi wi tide?