Gado no abi wan wefi, sobun a no meki pikin nanga wan wefi. Gado na a Mekiman fu ala libisani. A meki libisma na so wan fasi taki den man sori den fasi fu En. Dati meki Bijbel e kari Adam, a fosi libisma di Gado meki, „a manpikin fu Gado”. Bijbel e kari Yesus „a Manpikin fu Gado” tu fu di a abi den srefi fasi fu en Papa.—Leisi Lukas 3:38; Yohanes 1:14, 49.

Gado ben meki Yesus fosi a meki Adam. Fu taki en leti, Gado ben meki Yesus, èn baka dati a gebroiki en fu meki ala tra sani, sosrefi den engel. Dati meki Bijbel e kari Yesus „a fosiwan fu ala sani di Gado meki”.—Leisi Kolosesma 1:15, 16.

Fosi Yesus gebore na Betlehem, a ben e libi leki wan yeye na hemel. Di a ten doro, dan Gado teki a libi fu Yesus puru na hemel èn a poti en na ini a muru fu Maria, so taki a ben kan gebore leki libisma.—Leisi Lukas 1:30-32; Yohanes 6:38; 8:23.

Fu san ede Gado meki Yesus gebore leki libisma na grontapu? Sortu prenspari frantwortu Yesus ben abi? Yu kan feni den piki tapu den aksi disi na ini Bijbel. Den o yepi yu fu kon frustan moro bun san Gado nanga Yesus du gi yu, èn den o yepi yu tu fu kisi moro warderi gi den sani dati.