„Mi denki taki a moro bigi sani di e meki en muilek gi mi fu kon moro krosibei na Yehovah, na a firi di mi abi taki mi no warti noti.” Na dati wan uma taki fu di a ben feni en muilek fu bribi taki oiti Yehovah ben o broko en ede nanga en. Na so yu e firi tu? Efu dati de so, dan kande yu e aksi yusrefi: ’Yehovah e broko en ede nanga iniwan fu den anbegiman fu en?’ Iya, a e du dati. Den sani di Yesus taki e sori taki Yehovah e broko en ede nanga ibriwan fu wi.​—Leisi Yohanes 6:44.

San Yesus, di sabi moro bun leki iniwan sma fa Yehovah de èn san na a wani fu en, ben taki? (Lukas 10:22) Yesus ben taki: „Nowan sma kan kon na mi, efu a Tata di seni mi kon no e hari en kon.” Sobun, wi no man tron wan bakaman fu Krestes èn wi no man tron wan anbegiman tu fu wi hemel Tata Yehovah, efu Yehovah srefi no hari wi kon (2 Tesalonikasma 2:13). Efu wi e frustan san Yesus ben wani taki, dan wi o si krin taki Gado e broko en ede nanga wi.

San a wani taki dati Yehovah e hari wi kon? A Griki wortu di vertaal nanga „hari kon”, abi fu du tu nanga a hari di wan sma e hari wan nèt nanga fisi kon na ini wan boto (Yohanes 21:6, 11). A de so taki Yehovah e hari wi kon sondro taki wi wani noso taki a e dwengi wi fu anbegi en? Kwetikweti. Yehovah gi wi a reti fu teki wi eigi bosroiti, sobun, a no e dwengi wi fu opo wi ati gi en (Deuteronomium 30:19, 20). Yehovah e ondrosuku na ati fu den milyardmilyard sma na grontapu èn a e suku sma di wani anbegi en (1 Kroniki 28:9). Te a feni so wan sma, dan a e du wan sani di e naki wi ati. San a e du?

Na wan agersi fasi, Yehovah e hari safri na a ati fu wan sma di „abi a yoisti denki” (Tori fu den apostel 13:48). A e du dati na tu fasi: Nanga yepi fu a bun nyunsu fu Bijbel di ibriwan fu wi e yere, èn nanga yepi fu en santa yeye. Te Yehovah e si wan ati di lobi den tru tori fu Bijbel, dan a e gebroiki en yeye fu yepi a sma fu kon frustan den leri dati èn fu fiti den na ini en libi (1 Korentesma 2:11, 12). Sondro a yepi fu Gado, noiti wi ben o man tron trutru bakaman fu Yesus èn fayafaya anbegiman fu Yehovah.

Sobun, san den sani di Yesus taki na Yohanes 6:44 e leri wi fu Yehovah Gado? Yehovah e hari sma kon te a e si wan bun sani na ini den ati èn a e broko en ede nanga ibriwan fu den. Di na uma di kari na a bigin fu na artikel disi frustan a tru tori disi, dan dati ben de wan trowstu gi en. A taki: „A moro bigi grani di wan sma kan abi, na fu de wan futuboi fu Yehovah. Efu Yehovah feni mi bun nofo fu de wan futuboi fu en, dan a musu de so taki mi warti gi en.” Fa a de nanga yu? Yu no wani opo yu ati gi Yehovah, now di yu kon sabi taki a e broko en ede nanga ibriwan fu den anbegiman fu en?