„Te wan ogri sma e tiri, dan a pipel e soktu”, na so Bijbel e taki.—Odo 29:2.

Na ini den hondrohondro yari di pasa, bun furu ogri-ati tiriman meki taki wan lo takru sani miti a pipel fu den. A no de fu taki dati a no ala tiriman de so. Son tiriman wani yepi a pipel fu den trutru. Ma nofo tron te den bigin tiri, den e kisi gens fu den eigi sma èn fu tra sma di wani abi makti. Noso den e gebroiki a makti fu den fu kon gudu, aladi a pipel e pina. „Historia e sori taki sma no kisi okasi fu du furu fu den sani di den ben abi na prakseri fu du”, na so Henry Kissinger, di ben de minister fu dorosei afersi fu Amerkankondre, ben taki.

Bijbel e taki tu: „A no de na wan libisma di e waka fu taki srefi pe a o poti en futu” (Yeremia 10:23). Sondu libisma no abi a koni fu meki ala den afersi fu den waka bun, èn den no man si sani na fesi tu. Efu sma no sabi pe fu poti den eigi futu, dan fa den o man du dati gi wan heri kondre? Yu man si fu san ede libisma no man tyari wan kaba kon na pina? Fu taki en leti, nofo tron na libisma tirimakti e meki taki sma e pina!

„Na a fasi disi ala sma o sabi taki unu na mi disipel, te unu lobi makandra”, na so Yesus ben taki.—Yohanes 13:35.

Kerki fesiman fu ibri sortu kerki e leri sma taki den musu lobi makandra èn taki den musu libi na ini wánfasi. Ma den no ben man leri den bakaman fu den fu kon abi lobi di tranga so te taki den no e desko trawan. Na presi taki kerki e yepi sma fu kon abi lobi, nofo tron na den e meki taki difrenti pipel nanga heriheri kondre srefi e libi na ini pratifasi nanga makandra èn e desko makandra. Na a kaba fu a buku fu en, Hans Küng, wan sabiman fu kerkitori, ben skrifi: „Den moro ogri-ati feti di sma feti, na politiek feti pe kerki ben de na ini a tori” (Christianity and the World Religions).

Boiti dati, fesiman fu difrenti kerki taki krin  taki a no de wan sondu te sma abi seks fosi den trow, te den e waka gi a trowpatna fu den, èn te sma e libi wan homo-sekslibi. A sani disi meki taki siki e panya, furu sma e puru bere, sma e kon de nanga bere sondro fu den wani, trow e broko, èn osofamiri e pori. Den sani disi e tyari furu sari kon.

„Ibri sma e kisi tesi fu di en eigi lostu e hari en èn e kori en. Te a kweki a lostu, a e tyari sondu kon te fu kaba.”—Yakobus 1:14, 15.

Fu di wi alamala abi sondu, meki wi e meki fowtu èn wi musu basi na angri di wi abi fu ’libi soleki fa wi e firi’ (Efeisesma 2:3). Ma te wi e kisi okasi fu du san wi e firi fu du, dan a moro muilek fu basi wisrefi. Efu wi e meki takru lostu basi wi, dan dati kan tyari bigi problema kon gi wi.

Skrifiman P. D. Mehta ben skrifi: „Furu fu den problema di e miti wi e kon fu di wi abi takru lostu, fu di wi de nomonomo fu abi prisiri, fu di wi wani du san wisrefi wani, fu di wi gridi, èn fu di wi e feti fu kisi biginen.” Sopi, drugs, dòbel, seks, èn so moro fara, pori a libi fu bun furu sma di trawan na ini a libimakandra ben e lespeki. A sani dati tyari furu sari kon gi den famiri fu den sma disi, gi den mati fu den, èn gi tra sma. Fu di libisma abi sondu, meki wi musu agri te Bijbel e taki: „Wi sabi taki ala den sani di Gado meki, e geme doronomo èn den alamala abi pen te now ete.”—Romesma 8:22.

Bijbel e tyari kon na krin taki Satan na „a gado fu a grontapu disi” èn taki a e wroko makandra nanga makti ogri yeye.—2 Korentesma 4:4; Openbaring 12:9.

Neleki Satan, den ogri yeye e basi èn e kori libisma. Na apostel Paulus ben sori taki a sani disi tru. A ben taki: „Wi no e feti nanga libisma, ma nanga den tirimakti, nanga den wan di abi makti, nanga den tiriman fu a dungru grontapu disi, nanga den ogri yeye na hemel.”—Efeisesma 6:12.

Aladi den ogri yeye lobi fu tanteri sma, toku dati a no a moro prenspari sani den wani du. Den wani meki sma drai baka gi a Moro Hei Gado, Yehovah (Psalm 83:18). Na ini a ten disi, sma e luku den stari fu kon sabi san o pasa, den e bonu, den e du towfruwroko, èn sosrefi lukuman-wroko. Disi na wan tu fu den sani di ogri yeye e gebroiki fu kori sma èn fu basi den. Dati meki Yehovah e warskow wi gi den sani disi èn a e pramisi taki a o kibri ala sma di e kakafutu gi Satan èn gi den ogri yeye.—Yakobus 4:7.

Sowan tu dusun yari na fesi, Bijbel ben taki: „Sabi taki na ini den lasti dei muilek ten o de di tranga fu pasa.”

Bijbel e sori moro fara fu san ede den dei disi muilek: „Bika sma o lobi densrefi nomo. Den o lobi moni. Den o lobi dyaf. Den o abi heimemre. . . . Den no o lobi trawan. Den no o wani meki kruderi. Den o fruteri ogri-ati lei fu trawan. Den no o man dwengi densrefi. Den o du ogri-ati sani. Den no o lobi san bun. Den o tori trawan. Den o du san densrefi wani. Den o abi bigimemre. Den o lobi prisiri na presi taki den lobi Gado.” A de krin taki a prenspari reide fu san ede so furu sma e pina na ini a ten disi, na fu di wi e libi na ini „den lasti dei”.—2 Timoteyus 3:1-4.

Te wi e luku ala den tori disi, dan wi man si fu san ede libisma no man tyari wan kaba kon na pina, awinsi o furu muiti den e du? Pe wi kan suku yepi dan? Wi musu suku yepi na wi Mekiman, di pramisi taki a o „tyari wan kaba kon na den wroko fu Didibri” èn na den bakaman fu en (1 Yohanes 3:8). Na ini na artikel di e kon, wi o luku san Gado o du fu tyari wan kaba kon na ala den sani di e meki taki sma e pina.