Dede de leki wan sribi fu di den dedewan no sabi noti èn den no man du notinoti tu. Ma a Mekiman fu libi kan gi den dedewan libi baka. Fu sori taki a sani dati kan, Gado gi Yesus a makti fu gi wan tu dedesma libi baka.—Leisi Preikiman 9:5; Yohanes 11:11, 43, 44.

Gado pramisi taki den dedewan di de na ini en prakseri o kisi libi baka na tapu wan grontapu pe retidu o de. Den dedewan di o kisi libi baka musu tan wakti teleki Gado wiki den. Na almakti Gado e angri fu gebroiki en makti fu gi den dedewan libi baka.—Leisi Yob 14:14, 15.

Te Gado o gi sma wan opobaka, dan den o man sabi densrefi, den mati fu den, nanga den famiriman fu den. Aladi wan sma en skin e pori gowe, toku Gado kan gi a sma dati libi baka nanga wan nyun skin.—Leisi 1 Korentesma 15:35, 38.

Wan pikin grupu sma nomo de di e kisi libi baka fu go na hemel (Openbaring 20:6). Furu fu den sma di o kisi wan opobaka o libi na ini a paradijs di o seti baka na grontapu. Den sma disi o bigin wan nyun libi èn den o abi a howpu fu libi fu têgo.—Leisi Psalm 37:29; Tori fu den apostel 24:15.