Yu wani taki yu nanga yu osofamiri de gosontu èn taki unu e libi langa? Yu e angri fu libi na ini wan grontapu pe sari, pina, nanga dede no o de moro? A grontapu dati a no wan dren. Na presi fu dati, wan nyun grontapu o kon pe retidu sa de, èn a sani dati o pasa heri esi fu di Yehovah Gado wani en so. Yu kan leisi fa a sani disi o kon tru, na Openbaring 21:3-5.—Leisi en.

„[Gado] o figi ala watra puru na den ai” (Openbaring 21:4). Sortu watra-ai a o figi puru? A no watra-ai fu prisiri noso den watra-ai di e sorgu taki wi ai no e kon drei. Gado e pramisi taki a o figi den watra-ai puru di e kon fu di wi e pina èn e sari. Gado no sa figi den watra-ai dati puru nomo, ma a o sorgu taki den sani di e meki wi krei no de moro. Iya, sari nanga pina no o de moro.

„Dede no o de moro” (Openbaring 21:4). A no de fu taki dati dede na a feanti di meki sma krei moro leki iniwan tra sani. Yehovah o sorgu taki dede no o abi krakti moro na tapu libisma di e gi yesi na en. Fa a o du dati? A o tyari wan kaba kon na a sani di e meki trutru taki sma e dede. Dati na a sondu di wi kisi fu Adam (Romesma 5:12). Nanga yepi fu a frulusu-ofrandi fu Yesus, Yehovah o meki taki libisma di e gi yesi na en no abi sondu moro. * Baka dati, a lasti feanti, dede, o „puru na pasi” (1 Korentesma 15:26). Sma di e gi yesi na Gado o man libi soleki fa Gado ben wani den fu libi. Den o tan gosontu fu têgo.

„Pen no o de moro” (Openbaring 21:4). Sortu pen no o de moro? Broko-ede, sari, nanga skin-ati di sma e kisi fu di den abi sondu èn di e pori a libi fu milyunmilyun sma, no sa de moro.

Heri esi sma o man libi sondro fu krei, sondro fu dede, èn sondro pen. Ma kande yu e aksi: ’Pe dati o pasa? A de so taki Gado e pramisi wi taki wi o libi na hemel?’ Nôno. Luku fu san ede dati no de so. A fosi sani di Gado e pramisi, na taki ’a tenti fu Gado o de na libisma’, èn libisma e libi na grontapu (Openbaring 21:3). A di fu tu sani di a e pramisi, na wan grontapu pe „dede no o de moro”. Iya, dede no o de moro na a grontapu disi. Noiti dede ben de na hemel, ma a de wan langa pisi ten kaba na grontapu. Dati meki a de krin taki a pramisi di Gado gi wi taki wi o kisi wan moro bun libi, o kon tru leti dya na grontapu.

Yehovah wani taki wi e poti bribi na ini a nyun grontapu fu en pe retidu o de. Baka te a taki fu den blesi di wi o kisi, dan wantewante a e gi wi a pramisi disi: „Luku, mi e meki ala sani kon nyun.” Ne a taki moro fara: „Den wortu disi tru èn sma kan bribi den” (Openbaring 21:5). Fu san ede yu no e kon sabi moro fini fa yu nanga den lobiwan fu yu kan tron wan fu den koloku anbegiman di o si fa den moi pramisi fu Gado o kon tru?