MA SMA di feni taki den difrenti bribi musu moksi kon na wán, e denki tra fasi fu a tori disi. „Sori mi wan bribi di no e leri sma fu sori sari-ati . . . , di no e broko den ede nanga san sma e du nanga grontapu . . . , èn di no e leri sma fu sori switifasi”, na dati Eboo Patel ben aksi. Na a man disi seti wan organisâsi di e suku fu moksi bribi kon na wán, (Interfaith Youth Core).

A tru taki sma fu a Buda bribi, Lomsusma, Protestantsma, Hindu, Moslimsma, nanga furu trawan ben e wroko makandra son leisi fu yepi pôtisma, fu feti gi den reti fu trawan, fu tapu pasi gi sma fu poti mijn na ini a gron, noso fu poti prakseri na den sani di sma e du nanga grontapu. Sma fu difrenti kerki kon makandra fu taki san den kan du fu man frustan makandra moro bun èn fu leri fu makandra. Na den okasi disi den e hori seremonia pe den e leti kandra, den e hori fesa, den e prei poku, den e begi, èn so moro fara.

Yu denki taki den problema na mindri den difrenti bribi o lusu te den bribi disi e moksi kon na wán? Na Gado wani taki bribi e moksi kon na wán so taki grontapu kan tron wan moro bun presi?

Wan fu den moro bigi organisâsi di e suku fu moksi bribi kon na wán, e meki bigi taki a abi sma fu moro leki 200 difrenti bribi èn taki a e wroko na ini 76 kondre. A abi leki marki fu „gi sma fu difrenti bribi deki-ati fu tan wroko nanga makandra”. Ma a sani dati no makriki so. Fu eksempre, soleki fa den orgaman e taki, dan den ben musu luku bun san den ben e skrifi na ini a kontrakti fu den, soso fu no afrontu den someni difrenti kerki di ben teken a kontrakti. Fu san ede? Wán reide, na taki den no ben man agri nanga makandra efu den ben musu kari Gado na ini a kontrakti. Te fu kaba, den no taki notinoti fu Gado.

Ma efu Gado no de na ini a tori, dan sortu wini bribi abi? Boiti dati, fa so wan organisâsi di wani moksi bribi kon na wán e difrenti fu den organisâsi di e yepi sma di de na nowtu? Dati meki na organisâsi di wi ben taki fu en abi bun reide fu no kari ensrefi wan kerki organisâsi, ma „wan organisâsi di e gi sma deki-ati fu wroko makandra”.

„Nofo tron ala kerki e leri sma a srefi prenspari sani disi: den e gi sma deki-ati fu sori lobi gi trawan, fu sori sari-ati, èn fu gi trawan pardon”, na so a Dalai Lama e taki, wan prenspari sma di e suku fu moksi bribi kon na wán. A e taki moro fara: „San prenspari, na taki sma musu sori den fasi disi na ini den aladei libi.”

A no de fu taki dati a prenspari srefisrefi fu sori lobi nanga sari-ati, èn fu gi trawan pardon. Yesus ben leri sma a tumusi prenspari sani disi: „Ala sani di unu wani meki sma du gi unu, na dati un musu  du gi den tu” (Mateyus 7:12). Ma te kerki e gi trawan deki-ati fu du bun, dan dati wani taki dati den abi a tru bribi?

Na ini a ten fu na apostel Paulus, furu sma ben e taki dati den ben e dini Gado. Luku san Paulus ben taki fu den sma disi: „Mi kan taki fu den taki den de fayafaya fu dini Gado, ma den no abi soifri sabi.” San ben de a problema? Paulus e taki dati „fu di den no sabi a retidu fu Gado”, meki „den srefi e taki san na retidu” (Romesma 10:2, 3). Fu di den sma disi no ben sabi soifri san Gado ben e aksi fu den, meki a faya nanga a bribi di den ben abi ben de fu soso.—Mateyus 7:21-23.

„Koloku fu den sma di e suku fu libi bun nanga trawan”, na so Yesus ben taki (Mateyus 5:9). Yesus ben e du san a ben e leri sma. A ben e leri den fu no du ogri èn a ben e tyari wan boskopu fu freide gi sma fu difrenti bribi (Mateyus 26:52). Den sma di ben gi yesi na a boskopu fu en ben kon abi wánfasi fu di den ben kon abi lobi gi makandra (Kolosesma 3:14). Ma a de so taki Yesus ben e suku nomo fu tyari sma fu difrenti kulturu kon na wán, so taki den ben kan libi na ini freide nanga makandra? A ben teki prati na a anbegi fu tra sma?

Den fesiman fu den Fariseiman nanga den Saduseiman ben e gens Yesus fayafaya, èn den ben e suku srefi fu kiri en. San a du? Yesus taigi den disipel fu en: „Libi den. Den sma disi e sori trawan a pasi, ma den srefi breni” (Mateyus 15:14). Yesus weigri fu anbegi Gado makandra nanga den sortu sma dati.

Wan pisi ten baka dati, wan Kresten gemeente seti na ini a foto Korente, na Grikikondre. Sma fu difrenti kulturu nanga bribi ben e tan drape. Fa den Kresten drape ben musu tyari densrefi? Na apostel Paulus skrifi wan brifi fu taigi den: „No kon de wán nanga sma di no de na bribi.” Fu san ede? Paulus taki: „San Krestes abi fu du nanga Belial? Noso san wan sma di de na bribi abi fu du nanga wan sma di no de na bribi?” Baka dati a gi den a rai disi: „Fu dati ede, komoto na den mindri èn prati nanga den”.—2 Korentesma 6:14, 15, 17.

A de krin taki Bijbel e krutu a moksi di sma e moksi bribi kon na wán. Ma kande yu e aksi yusrefi: ’Dan fa wi kan kon abi trutru wánfasi?

Na Internationale ruimtestation na wan wrokopresi di sma bow na wan koni fasi na loktusei pe den planeiti nanga den stari de, èn a e drai lontu grontapu. Sowan 15 kondre wroko makandra fu bow a presi disi. Yu denki taki den kondre disi ben o man du a wroko dati efu den no ben man agri nanga makandra fa den ben o du en?

Na dati e pasa nanga den organisâsi di e suku fu moksi bribi kon na wán na ini a ten disi. Aladi di den e gi sma deki-ati fu wroko makandra èn fu lespeki makandra, toku den no man agri nanga makandra san na a yoisti fasi fu sori bribi. Dati meki te now ete den no man bosroiti san na a moro bun fasi fa sma musu tyari densrefi èn sortu leri na den yoistiwan.

Bijbel abi den leri fu Gado di e sori wi krin san na a yoisti fasi fu anbegi en. Wi kan gebroiki den Bijbel leri disi fu seti wi libi. Den sma di e hori densrefi na den leri disi no e desko sma di de fu wan tra ras noso fu wan tra bribi, èn den e leri fu wroko makandra na ini freide èn na ini wánfasi. A sani disi pasa soleki fa Gado ben taki na fesi: „Mi o leri den pipel wan soifri tongo, so taki den alamala kan kari a nen fu Yehovah èn dini en makandra leki wán man.” Na a „soifri tongo”, na anbegi di Gado feni bun, e tyari wánfasi kon.—Sefanya 3:9; Yesaya 2:2-4.

Yehovah Kotoigi e gi yu wan switi kari fu kon na a Kownukondre zaal na ini a kontren fu yu, so taki yu srefi kan si taki den abi trutru freide nanga wánfasi.—Psalm 133:1.