A WARAN fu a dei e meki taki Yosef e smeri den lotus-bromki nanga tra bromki di e gro na ini a watra. Wan tu bisnisman e tyari en pasa na ini a bigi kontren fu a Nijl-liba. Pruberi fu si fa wan grupu man e waka sei wan liba fu doro wan tra foto na ini Egepte. Wanwan leisi wan sabaku, noso wan korikori di e waka suku nyanyan na ini a watra, e skreki èn a e opo frei gowe. Yosef e prakseri a presi pe a ben e tan na ini a bergikontren fu Hebron pe furu winti e wai, èn di de hondrohondro kilometer fu pe a de now. Ma now a ben de na wan heri tra presi.

Prakseri fa kesikesi e meki babari na ini den dadel-bon nanga den figabon. Yosef e yere fa den sma di e waka pasa e taki, ma a no man frustan den srefisrefi. Kande a e pruberi fu arki bun efu a o man frustan wan wortu noso wan tu sani di den e taki. A o abi fu leri a tongo, bika a no o si en oso noiti moro.

Yosef ben de wan yonguman fu sowan 17 noso 18 yari, ma toku a ben kisi problema di ben o hebi srefi gi wan bigibigi man. En eigi brada ben e dyarusu na en tapu fu di Yosef en papa ben lobi en moro den. A sani disi meki taki pikinmoro den kiri en. Ma den no kiri en, den seri en gi bisnisman (Genesis 37:2, 5, 18-28). Now di den bisnisman de na pasi wan tu wiki kaba, den e bigin breiti fu di den e doro a bigi foto pe den o seri Yosef nanga den tra gudu fu den. San yepi Yosef fu no firi brokosaka so te taki a lasi-ati? Fa wi na ini a ten disi kan sorgu taki den problema fu a libi no e pori a bribi fu wi? Wi kan leri furu fu Yosef.

„Disiten den Ismaelsma tyari Yosef go na Egepte. Ne Potifar bai Yosef fu den Ismaelsma di ben tyari en go drape. Potifar ben de wan Egeptesma èn wan heihei man na ini na oso fu a kownu fu Egepte. A ben de edeman tu fu den waktiman fu Kownu” (Genesis 39:1). Nanga den wortu dati, Bijbel e yepi wi fu kon frustan fa Yosef ben musu firi di sma ben seri en ete wan leisi, neleki a ben de wan sani fu bai seri. Kande yu e si kaba fa Yosef e waka baka a nyun basi fu en, di ben de wan heihei man fu Egepte. Den e waka na ini den strati di lai nanga sma èn nanga wenkri, fu go na a presi pe Yosef ben o tan now.

A presi pe Yosef ben o tan now, ben de heri tra fasi leki pe a ben komoto. A ben kweki na ini wan famiri di ben e tan na ini tenti. Den ben e kweki skapu, èn den ben gwenti froisi fu a wán presi go na a trawan. Na ini a kondre pe Yosef ben de now, gudu Egeptesma soleki Potifar, ben e libi na ini kefalek diri oso di ben ferfi moi. Sabiman di e diki sani puru na ini a gron e taki dati den Egeptesma fu owruten ben lobi moi dyari di ben abi bigi bon di ben e gi furu skaduw. Den ben e diki pikin watra-olo na ini den dyari, èn den ben e prani papirus-bon, lotus-bromki, nanga tra bromki di e gro na ini watra. Son oso ben abi bigi dyari, den ben abi balkon pe sma ben man teki switi winti, èn den ben abi bigi fensre pe a winti ben kan wai kon na inisei. Den oso disi ben abi furu kamra, sosrefi wan bigi nyanyan-kamra, nanga kamra gi den futuboi.

 Yu denki taki a gudu libi dati ben drai Yosef ede? A no sori so. A ben musu fu de so taki a ben e firi leki a ben de en wawan. A tongo fu den Egeptesma, den krosi di den ben e weri, a fasi fa den ben e moi densrefi, èn srefi na anbegi fu den, ben de sani di Yosef no ben sabi. Den ben e anbegi wan lo gado, den ben e du afkodrei nanga bonu, èn den ben e poti furu prakseri na dede èn na a libi baka dede. Ma wan sani ben de di yepi Yosef fu no lasi-ati fu di a ben de en wawan. Bijbel e taki: „Yehovah ben de nanga Yosef” (Genesis 39:2). A no de fu taki dati Yosef ben e begi Yehovah fu taigi en fa a ben e firi. Bijbel e taki dati „Yehovah de krosibei fu ala den wan di e kari en” (Psalm 145:18). Sortu tra sani Yosef du fu sori taki a ben e frutrow tapu a Gado fu en?

A yonguman no lasi-ati, èn a bigin du a wroko fu en so bun leki a ben man. Na so Yosef gi Yehovah okasi fu blesi en, èn fosi yu denki, a nyun basi fu en bigin libi bun nanga en. Potifar ben si taki a yongu futuboi fu en ben e kisi blesi fu Yehovah, a Gado fu Yosef pipel. A no de fu taki dati den blesi dati ben e meki taki sani ben e go bun nanga na oso fu Potifar. Safrisafri Potifar kon abi moro lobi gi Yosef, èn a poti a koni yonkuman disi fu luku en heri oso èn fu sorgu gi ala sani di a ben abi.—Genesis 39:3-6.

Yosef na wan bun eksempre gi yonguwan di e dini Gado na ini a ten disi. Fu eksempre, te den de na skoro, dan den kan miti nanga situwâsi di den no gwenti. Kande trawan na den lontu e du sani di abi fu du nanga afkodrei èn di no e gi sma nowan howpu na ini a libi. Efu yu de na ini a situwâsi dati, dan hori na prakseri taki Yehovah no kenki (Yakobus 1:17). Te nanga now a e kibri den wan di e tai hori na en èn di e meki muiti fu du san a feni bun. A e gi den furu blesi, èn a o du dati tu gi yu.

Bijbel e fruteri wi moro fara taki Yosef ben e kon moro bigi. A yonguman kon tron wan „steifisteifi man di ben moi srefisrefi”. Den wortu dati e sori taki sani ben o miti en, fu di te wan sma moi, dan nofo tron trawan wani hori nanga en, awansi a no wani dati.

Yosef no ben wani bedrigi a basi fu en. Ma a wefi fu Potifar no ben abi trobi nanga a sani dati. Bijbel e taki: „A wefi fu a basi fu Yosef, bigin luku en èn a ben kisi firi gi en. Ne a taigi Yosef: ’Kon didon nanga mi’” (Genesis 39:7). Yu denki taki Yosef ben prakseri fu du san na uma disi ben prefuru fu aksi en? Bijbel no e sori taki Yosef no ben abi den lostu di yongusma abi, noso taki na uma  fu a gudu èn makti Potifar no ben moi. Yosef ben o kori ensrefi taki en basi noiti no ben o sabi? A ben o suku fu hori nanga na uma disi soso fu kon gudu?

Fu taki en leti, wi no sabi soifri san Yosef ben e denki. Ma wi kan sabi san ben de na ini en ati. Wi e si dati na ini a piki disi: „Luku, fa mi de na ini na oso dyaso, mi basi no e broko en ede nanga nowan sani di de na ini en oso èn a poti mi fu luku ala san a abi. Na ini na oso disi nowan sma de di bigi moro mi èn a basi fu mi poti ala sani na ini mi anu boiti yu, fu di yu na en wefi. Dan fa mi kan du so wan bigi ogri èn sondu teige Gado?” (Genesis 39:8, 9) Prakseri fa a yonguman e taki den wortu dati krin! A no ben wani prakseri srefi san na uma ben aksi en fu du. Fu san ede?

Soleki fa Yosef ben taki, dan a basi fu en ben e frutrow en. Potifar ben libi a heri oso fu en na ini Yosef anu, soso en wefi Yosef no ben mag fasi. Fa Yosef ben kan meki en basi fesi fadon? A no ben wani prakseri a sani dati srefisrefi. Ma a sani di ben gi en moro groskin, na a denki taki a ben o sondu teige a Gado fu en, Yehovah. Yosef en papa nanga mama ben leri en bun fa Gado e si a trowlibi èn fu san ede trowpatna no musu waka gi makandra. Yehovah ben trow a fosi man nanga uma, èn a ben sori krin fa a e denki fu a trowlibi. Wan masra nanga en uma musu tai hori na makandra, den musu tron „wan skin” (Genesis 2:24). Den sma di ben pruberi fu pori a trowlibi, ben kan kisi strafu fu Gado. Iya, pikinmoro ogri ben miti den man di ben prakseri fu du ogri nanga a wefi fu Abraham, di ben de na afo fu Yosef, èn sosrefi a wefi fu Isak, Yosef granmama (Genesis 20:1-3; 26:7-11). Yosef ben sabi a sani dati bun, èn a bosroiti fu du san a ben leri.

A wefi fu Potifar no ben lobi a sani di Yosef taigi en. A no ben man bribi taki a wisiwasi srafu disi no ben wani en, èn a taki a ben taigi en srefi taki a sani di a ben aksi fu en ben de „wan bigi sondu”. Toku a tan suku Yosef. Fu di a ben hati en taki Yosef no ben wani so wan kefalek uma leki en, meki a ben de nomonomo fu kisi Yosef. Na so a sori taki a ben abi a srefi denki leki Satan, di ben tesi Yesus. Satan no ben man kisi Yesus tu, ma a no gi abra. A wakti „fu kon baka na wan moro bun ten” (Lukas 4:13). Sma di e bribi na ini Gado musu teki a bosroiti fu du san bun èn den no musu degedege. Na dati Yosef du. Aladi a ben e kisi tesi fu Potifar wefi „ibri dei”, toku Yosef no ben e gi abra. Bijbel e skrifi: „noiti Yosef ben wani go didon nanga en” (Genesis 39:10). Ma a wefi fu Potifar ben de nomonomo fu kisi Yosef.

A suku wan momenti di nowan fu den futuboi ben de na ini na oso. A ben sabi taki Yosef ben o abi fu kon na inisei fu du en wroko. Di Yosef kon na inisei, dan a pruberi fu kisi en. A grabu en krosi, èn a begi en wan lasti leisi: „Kon didon nanga mi!” Yosef no draidrai. A meki muiti fu hari ensrefi puru, ma na uma tan hori a krosi fu en. Yosef lusu en srefi libi a krosi na ini en anu, èn a lon gowe!—Genesis 39:11, 12.

Kande wi e memre a rai disi di na apostel Paulus ben skrifi nanga yepi fu santa yeye: „Lowe gi hurudu” (1 Korentesma 6:18). Yosef na wan moi eksempre gi ala tru Kresten. Kande wi no man yepi taki wi musu de makandra nanga sma di no e lespeki den wet fu Gado. Ma dati no wani taki dati wi musu gi abra te den wani dwengi wi fu du sani di no bun. Awansi san e pasa, wi musu lowe.

Ma a sani disi ben tyari bigi problema gi Yosef. Potifar wefi ben wani puru atibron na en tapu. Wantewante a bigin bari, èn a kari den tra futuboi kon na ini na oso. A taigi den taki Yosef ben wani dwengi en fu didon nanga en, èn taki a ben lon gowe di a bigin meki babari. A ben hori a krosi fu Yosef leki buweisi èn a wakti fu en masra kon na oso. Di Potifar doro na oso, dan a fruteri en a srefi lei. A taigi en masra taki na en ben meki a sani disi pasa, fu di na en ben tyari wan trakondre sma kon na ini den oso. San Potifar du? Bijbel e taki: „A basi kisi bigi atibron”! A meki den poti Yosef na strafu-oso.—Genesis 39:13-20.

Wi no sabi soifri fa den strafu-oso fu Egepte ben de na ini a ten dati. Sabiman feni brokopresi fu den strafu-oso dati. Den ben de leki bigi fortresi di ben abi strafu-oso kamra èn sosrefi dungru kamra ondrogron. Nowan howpu ben o de gi wan  sma di den ben poti drape. Na ini a buku Psalm wi leri taki Yosef ben nyan moro pina: „Den fasi en futu nanga bui. Den tai en nanga isri keti” (Psalm 105:17, 18). Son leisi, den Egeptesma ben e fasi den anu fu den strafuman na den baka nanga bui. Tra strafuman ben e weri isri banti di sma ben fasi na den neki. A ben musu fu de so taki Yosef ben pina hebi, aladi a no ben du nowan ogri.

San moro ogri, na taki Yosef ben o pina fu wan langa pisi ten. Bijbel e taki dati Yosef „tan drape na strafu-oso”. A tan omeni yari na ini a takru presi dati! * Boiti dati, Yosef no ben sabi efu a ben o komoto drape oiti. Yu denki taki a ben lasi ala howpu di a si taki dei e pasa, wiki e pasa, mun e pasa, sondro taki a situwâsi fu en e kenki?

Bijbel e fruteri wi a moi sani disi: „Yehovah ben de nanga Yosef ala ten. A tan sori en taki a ben e tai hori na en, fu di a lobi en” (Genesis 39:21). Nowan strafu-oso, nowan bui, èn nowan dungru kamra ondrogron kan tapu pasi gi Yehovah fu sori lobi gi den futuboi fu en (Romesma 8:38, 39). Wi kan frustan taki Yosef ben e begi en lobi hemel Tata fu fruteri en ala san ben e moro en. Na so a ben kon abi a freide nanga a korostu firi di „a Gado fu ala trowstu” wawan ben kan gi en (2 Korentesma 1:3, 4; Filipisma 4:6, 7). Sortu tra sani Yehovah du gi Yosef? Bijbel e taki dati Yehovah meki taki „na edeman fu a strafu-oso kon lobi Yosef”.

Soleki fa a sori, dan den strafuman ben e kisi wroko fu du, èn agen Yosef gi Yehovah okasi fu blesi en. A ben e wroko tranga, a ben e du ala wroko di a kisi so bun leki a ben man, èn a ben e frutrow tapu Yehovah. Fu di Yehovah blesi Yosef, meki sma kon abi lespeki gi en èn sma kon frutrow na en tapu, neleki di a ben e wroko gi Potifar. Bijbel e taki: „Sobun, na edeman fu a strafu-oso poti Yosef fu luku ala den tra strafuman di ben de drape. Na Yosef ben e sorgu taki den ben e du ala a wroko di den ben musu du. Na edeman fu a strafu-oso no ben abi fu broko en ede kwetikweti nanga nowan wroko di Yosef ben e du, fu di Yehovah ben de nanga Yosef. Yehovah meki ala sani di Yosef ben e du, waka bun” (Genesis 39:22, 23). A ben musu fu de wan trowstu gi Yosef fu sabi taki Yehovah ben e sorgu gi en!

Son leisi, wan tu hebi tesi kan miti wi, srefi ogri-ati sani. Ma wi kan leri wan sani fu a bribi fu Yosef. Te wi e tan begi Yehovah, te wi e tan gi yesi na den wet fu en, èn te wi e du ala muiti fu du san a feni bun, dan wi e gi en okasi fu blesi wi. Ma Yehovah ben o gi Yosef moro bigi blesi, soleki fa wi o si na ini tra artikel di o kon.