Na ini heri Bijbel yu kan feni profeititori di e taki finifini fu son sani. Nowan sma man taki finifini san o pasa na ini a ten di e kon. Dati meki den Bijbel profeititori di kon tru e sori krin taki Bijbel na Gado Wortu trutru.—Leisi Yosua 23:14; 2 Petrus 1:20, 21.

Bijbel profeititori di kon tru kaba na krin buweisi taki wan Gado de (Hebrewsma 11:1). Den e gi wi a dyaranti tu taki na ini a ten di e kon Gado o du ala den moi sani di a pramisi wi. Sobun, den Bijbel profeititori e gi wi wan trutru howpu.—Leisi Psalm 37:29; Romesma 15:4.

Son profeititori e warskow den futuboi fu Gado taki den musu du wan sani. Fu eksempre, di den fosi Kresten si fa son profeititori kon tru, den gowe libi Yerusalem. Bakaten a foto kisi pori fu di furu sma drape no ben wani bribi na ini Yesus. Ma den Kresten di ben du san den profeititori taki ben gowe libi a foto èn den tan na libi.—Leisi Lukas 21:20-22.

Na ini a ten disi profeititori di kon tru e sori taki heri esi Gado Kownukondre o figi den kownukondre nanga den tiriman fu grontapu puru (Danièl 2:44; Lukas 21:31). Fu dati ede, a prenspari srefisrefi taki ibri sma du san a musu du fu sorgu taki Yesus Krestes, a sma di Gado poti leki Kownu fu a Kownukondre, feni en bun.—Leisi Lukas 21:34-36.