Nofo tron fosi yu bigin du wan sani, yu e aksi yusrefi: ’Sortu bun mi o feni?’ Yu denki taki a fowtu te wan sma e aksi ensrefi sortu wini begi o tyari kon gi en? A de so taki so wan sma e denki ensrefi nomo te a e aksi ensrefi a sani disi? Nôno, a no abi fu de so. Furu sma wani sabi efu begi e yepi trutru. Srefi a bun man Yob ben aksi wan leisi: „[Gado] ben o piki mi efu mi ben o kari en?”—Yob 9:16.

Na ini den artikel fosi a wan disi wi si kaba taki begi a no wan gwenti nomo di kerkisma abi èn a no de soso wan sani di sma e du fu puru stress. A tru Gado e arki begi trutru. Efu wi e begi na a yoisti fasi èn efu wi e begi fu sani di Gado feni bun, dan a o arki den begi fu wi. Fu taki en leti, en srefi e gi wi a deki-ati fu kon krosibei na en, noso fu tron wan mati fu en (Yakobus 4:8). Sobun, san wi kan fruwakti efu wi bigin begi ala dei? Meki wi luku sortu bun a kan tyari kon gi wi te wi abi a gwenti fu begi.

Te yu e kisi problema, a de so taki yu e bruya fu di yu no sabi san fu du? Na ini den sortu situwâsi disi Bijbel e gi wi a deki-ati fu „begi doronomo” èn fu „begi Gado ala ten”, so taki a kan ’sabi san wi wani aksi en’ (1 Tesalonikasma 5:17; Filipisma 4:6). Bijbel e gi wi a dyaranti taki efu wi e begi Gado, dan „a freide fu Gado di bigi moro iniwan sani di libisma man frustan, o kibri [wi] ati nanga [wi] frustan” (Filipisma 4:7). Te wi e fruteri wi hemel Papa sortu broko-ede wi abi, dan dati kan meki wi firi  korostu. Fu taki en leti, en srefi wani taki wi du dati. Psalm 55:22 e taki: „Trowe yu hebi na tapu Yehovah, dan en srefi o horibaka gi yu.”

Bun furu sma na heri grontapu si taki begi e yepi den fu firi korostu. Hee Ran fu Zuid-Korea taki: „Mi abi bigi problema, ma te mi taki fu den na ini begi, mi e firi leki wan hebi komoto na mi tapu èn mi e kisi krakti baka fu horidoro.” Cecilia fu Filippijnen, fruteri: „Leki mama, mi e broko mi ede furu nanga den umapikin fu mi èn nanga mi mama di no sabi srefi moro suma na mi. Ma fu di mi e begi, mi man du den aladei sani fu mi sondro fu broko mi ede tumusi. Mi sabi taki Yehovah o yepi mi fu sorgu den.”

Kande yu abi bigi broko-ede fu di wan sari sani pasa nanga yu, noso fu di yu de na ini wan situwâsi pe yu kan lasi yu libi. Te yu e begi „a Gado fu ala  trowstu”, dan a kan meki yu firi korostu trutru. Bijbel e taki dati Gado e „trowstu wi te wi de na ini ala sortu banawtu” (2 Korentesma 1:3, 4). Fu eksempre, wan leisi di Yesus ben de na ini wan situwâsi di ben hebi gi en srefisrefi, „a saka kindi, dan a bigin begi”. San ben de a bakapisi? „Wan engel fu hemel kon na en èn a gi en krakti” (Lukas 22:41, 43). Nehemia, wan man di ben e dini Gado fayafaya, ben de na ini wan muilek situwâsi tu. Ogri-ati sma ben wani kiri en fu di den ben wani tapu en fu du a wroko fu Gado. Nehemia begi: „Gi mi deki-ati.” Den sani di pasa baka dati e sori taki Gado yepi en trutru fu no frede moro èn fu klari a wroko (Nehemia 6:9-16). Reginald fu Gana fruteri fa begi yepi en. A taki: „Te mi e begi, spesrutu te mi de na muilek situwâsi, mi e firi taki mi fruteri mi problema na wan sma di man yepi mi èn di e gi mi a dyaranti taki mi no abi fu frede.” Iya, Gado kan trowstu wi te wi e begi en.

Son bosroiti di wi e teki kan abi krakti tapu wi èn tapu den lobiwan fu wi fu ala ten. Fa wi kan teki koni bosroiti? Bijbel e taki: „Efu wan fu unu e mankeri koni [spesrutu te a e kisi tesi], dan meki a tan aksi Gado fu dati, bika te Gado e gi sma sani, a e du dati nanga en heri ati èn sondro fu suku fowtu na den. Sobun, Gado o gi a sma a koni dati” (Yakobus 1:5). Efu wi e aksi Gado fu gi wi koni, a kan gebroiki en santa yeye fu yepi wi fu teki bun bosroiti. Fu taki en krin, wi kan aksi Gado fu gi wi santa yeye, fu di Yesus taki dati „a Tata di de na hemel sa gi santa yeye na den sma di e aksi en!”—Lukas 11:13.

Yesus srefi ben feni en fanowdu fu aksi en Papa fu yepi en teki prenspari bosroiti. Bijbel e taki dati di a ben musu teki 12 man fu tron en apostel, dan „heri neti a begi Gado”.—Lukas 6:12.

Neleki Yesus, furu sma na ini a ten disi si fa Gado yepi den ibri tron baka di den aksi en fu yepi den teki koni bosroiti. Disi tranga a bribi fu den moro. Regina di e tan na Filippijnen taki dati a ben abi difrenti sortu problema. A ben musu sorgu ensrefi nanga en osofamiri baka di en masra dede, a lasi en wroko èn a ben muilek gi en fu kweki den pikin. San yepi en fu teki koni bosroiti? A taki: „Mi e frutrow taki Yehovah o yepi mi te mi e begi en.” Kwabena di e libi na Gana taki fu san ede a ben aksi Gado fu yepi en. A taki: „A bow-wroko di mi ben e du ben e pai bun. Ma bakaten mi lasi mi wroko.” Di a ben e luku sortu tra wroko a ben kan du, a taki: „Doronomo mi ben e aksi Yehovah fu yepi mi teki a yoisti bosroiti.” Kwabena taki tu: „Mi e bribi trutru taki Yehovah yepi mi fu feni wan wroko di e meki taki mi man tan dini en èn taki mi man sorgu misrefi.” Gado kan yepi yu tu te yu e begi en fu yepi yu teki bun bosroiti di o meki taki yu tan wan mati fu en.

Wi taki fu wan tu wini nomo di yu kan kisi te yu e begi. (Wan tu tra fasi fa begi kan yepi yu, skrifi na ini a faki „ Fa begi kan yepi yu”.) Ma efu yu wani kisi wini fu begi trutru, dan yu musu kon sabi Gado èn yu musu sabi san na a wani fu en. Efu na disi yu wani, dan wi e gi yu deki-ati fu aksi Yehovah Kotoigi fu yepi yu studeri Bijbel. * Disi na a fosi sani di kan yepi yu fu tron wan mati fu „a sma di e arki begi”.—Psalm 65:2.