Cha, abayisekeli. BoFakazi BaJehova bangemaKhristu lasekela tinkholelo tawo emiBhalweni. Nanobe letinye tinkholo tifundzisa kutsi kuhlangana kwemaJuda ePalestine kuhlobene nekugcwaliseka kwesiphrofetho semiBhalo, boFakazi BaJehova abawusekeli loyo mbono. Abakholelwa kutsi kwakhiwa kwalenhlangano yepolitiki kwabiketelwa ngalokucondzile emiBhalweni. Ecinisweni, ngekusho kwemiBhalo, kute hulumende webantfu loncono kunalomunye nobe licembu lebantfu lelincono kunalabanye. Magazini losemtsetfweni waboFakazi BaJehova, Sicongosekulindza, washo ngalokucacile kutsi: “Kute imiBhalo lesekela inhlangano yepolitiki lebitwa ngekutsi yi-Zionism.”

 I-Encyclopædia Britannica ichaza i-Zionism ngekutsi “yinhlangano yebuve yemaJuda lenemgomo wekusungula nekusekela umbuso webuve bemaJuda losePalestine.” Lenhlangano inemsuka wenkholo nepolitiki. BoFakazi BaJehova abayitfutfukisi inkholo lehlobene ne-Zionism futsi abalutsatsi luhlangotsi etindzabeni tepolitiki taleyo nhlangano.

 Inhlangano yaboFakazi BaJehova iyinhlangano yenkholo futsi kute licembu lepolitiki leyitihlobanisa nalo, lokufaka ekhatsi ne-Zionism. Kungatsatsi luhlangotsi etindzabeni tepolitiki kwaboFakazi BaJehova kwatiwa kabanti futsi kulamanye emave boFakazi bakhetse kuhlushwa kabuhlungu kunekutsi bangenele tepolitiki. Siyaciniseka ngekutsi nguMbuso waNkulunkulu wasezulwini kuphela longaletsa kuthula emhlabeni; kute hulumende webantfu nobe licembu lelingakhona kwenta loko.

 Intfo lebalulekile ngetinkholelo taboFakazi BaJehova, kulalela kwabo imitsetfo yabohulumende, ngisho nobe bahlala kuyiphi indzawo. Abativukeli tiphatsimandla tahulumende nobe bangenele imphi.