1-3. (a) Kungenteka tabhalwa nini Tihlabelelo 147? (b) Yini lesingayifundza nasitadisha Tihlabelelo 147?

KUFANELE advunyiswe umuntfu nangabe ente kahle umsebenti laniketwe wona nobe akhombise buntfu lobuhle bebuKhristu. Nangabe sibadvumisa bantfu ngalabakwentile, kangakanani-ke ngaJehova Nkulunkulu! Singamdvumisa ngenca yemandla akhe lamakhulu lesiwabona endalweni yakhe lemangalisako nobe nasendleleni labaphatsa kahle ngayo bantfu, ngekutsi atfumele Jesu kute afele bantfu.

² Umbhali weTihlabelelo 147 wadvumisa Jehova. Wakhutsata nalabanye kutsi badvumise Nkulunkulu.​—Fundza Tihlabelelo 147:1, 7, 12.

³ Asati kutsi ngubani lowabhala lencwadzi yeTihlabelelo, kodvwa kungenteka lomhlabeleli waphila ngesikhatsi Jehova akhulula ema-Israyeli eBhabhulona awabuyisela eJerusalema. (Hla. 147:2) Kukhululwa kwebantfu baNkulunkulu babuyele endzaweni lapho bebatamkhonta kahle khona, kungenteka kwenta umhlabeleli wadvumisa Jehova. Nanobe kunjalo kunaletinye tizatfu letamenta wadvumisa Jehova. Ngutiphi? Ngutiphi tizatfu lonato tekumemeta utsi “Haleluya!”?​—Hla. 147:1.

4. Kungenteka kutsi ema-Israyeli ativa njani ngesikhatsi iNkhosi Khuresi iwakhulula, futsi kungani?

⁴ Asewucabange nje kutsi ema-Israyeli bekativa njani ngesikhatsi aseBhabhulona. Labo lebebawatfumbile bebahlekisa ngawo batsi: “Ase nisihlabelele lenye yetingoma tenu taseSiyoni.” Ngaleso sikhatsi, liJerusalema lebeliyindzawo lapho bebakhonta khona Jehova belibhujisiwe. (Hla. 137:1-3, 6) EmaJuda bekete umdlandla wekuhlabela. Tinhlitiyo tawo betephukile futsi bekadzinga kudvudvutwa. Lokuhle kwaba kutsi, loko Nkulunkulu lebekakushito kwenteka, inkhosi yasePheresiya lenguKhuresi yawakhulula. Yalincoba liBhabhulona futsi yatsi: “Simakadze . . . sewungiyalile kutsi ngimakhele lithempeli eJerusalema . . . Manje-ke, ngulowo nalowo kini nine sive saNkulunkulu losemkhatsini wenu, shangatsi Simakadze Nkulunkulu wakhe angaba naye, ahambe aye khona.” (2 Khr. 36:23) Kungenteka kutsi loku lokwenteka kwawadvudvuta kakhulu ema-Israyeli lebekahlala eBhabhulona!

5. Yini umhlabeleli layisho mayelana nemandla aJehova ekuphilisa?

⁵ Jehova akazange advudvute lesive sema-Israyeli njengelicembu kuphela, kodvwa wadvudvuta umuntfu ngamunye. Nalamuhla solo wenta njalo. Umhlabeleli watsi ngaNkulunkulu: “Labanetinhlitiyo letephukile uyabaphilisa, abophe emanceba abo.” (Hla. 147:3) Jehova uyabakhatsalela labo labagulako nalabo labacindzetelekile. Lamuhla Jehova uyakulangetelela kusidvudvuta kuto tonkhe tintfo letisicindzetelako. (Hla. 34:18; Isa. 57:15) Usipha kuhlakanipha kanye nemandla ekubeketelela nobe ngukuphi kucindzeteleka lesibhekana nako.​—Jak. 1:5.

6. Kungasisita njani kufundza loko lokwashiwo ngumhlabeleli kuTihlabelelo 147:4? (Buka sitfombe lesisekucaleni kwalesihloko.)

⁶ Umhlabeleli ubese sewukhuluma ngalokusesibhakabhakeni, asitjele kutsi Jehova “ubala inombolo yetinkhanyeti, atibite tonkhe ngemabito ato.” (Hla. 147:4) Yini leyenta lomhlabeleli wase ukhuluma ngaloko lokwenteka esibhakabhakeni? Asewucabange nganaku: Umhlabeleli bekatibona tinkhanyeti, kodvwa bekangati kutsi tingakhi. Kuleminyaka leyendlulile, linani letinkhanyeti lesikhona kulibona likhule kakhulu. Labanye bacabanga kutsi kunetigidzigidzi tetinkhanyeti kulesicheme sinye setinkhanyeti lesibitwa ngekutsi yi-Milky Way. Kungenteka kunetigidzi tetigidzi tetinkhanyeti endzaweni yonkhe! Empeleni ngeke sikhone kutibala tinkhanyeti! Kodvwa tonkhe uMdali utetse emagama. Loko kusho kutsi inkhanyeti ngayinye ibalulekile kuJehova. (1 Khor. 15:41) Kangakanani-ke ngetidalwa takhe letibantfu letisemhlabeni? Njengobe Nkulunkulu ati kutsi inkhanyeti letsite ikuphi ngasiphi sikhatsi, nawe uyakwati​—uyati kutsi ukuphi, utiva njani nekutsi yini loyidzingako ngesikhatsi lesitsite!

7, 8. (a) Jehova ucabanga ngani nakakhulula bantfu bakhe eluvivinyweni? (b) Niketa sibonelo lesikhombisa indlela Jehova lafise ngayo kubasita bantfu labanesono.

⁷ Jehova akakukhatsaleli nje kuphela kodvwa unemandla ekukusita ubhekane netinkinga tekuphila futsi uyakuvela. (Fundza Tihlabelelo 147:5.) Kungenteka ucabange kutsi simo sakho simatima kakhulu futsi tinkinga lonato ngeke ukhone kutetfwala. Nkulunkulu uyakwati loko longeke ukhone kukwenta, ‘uyakhumbula kutsi ulutfuli nje.’ (Hla. 103:14) Ngenca yekutsi sinesono, senta emaphutsa lafanako emahlandla lamanyenti. Siva buhlungu kakhulu nasikhuluma kabi, sihle siba netifiso letimbi nobe sibe nemona ngaloko labanye labanako! Jehova akawenti emaphutsa lafana nalawa; nanobe kunjalo, indlela lasicondza ngayo simo setfu iyamangalisa futsi ayiphenyeki!​—Isa. 40:28.

 ⁸ Kungenteka sewuke wayibona indlela Jehova lakusite ngayo kutsi welulame eluvivinyweni lolutsite. (Isa. 41:10, 13) Asewucabange ngaKyoko, dzadze lolihlahlandlela lowadvumateka kakhulu ngemuva kwekuya esabelweni sakhe lesisha. Jehova wakhombisa njani kutsi uyasicondza simo lebekakuso? Esabelweni sakhe lesisha, Kyoko bekasondzelene nebantfu lebebayicondza indlela lebekativa ngayo. Weva shengatsi Jehova utsi kuye: “Ngiyakutsandza, hhayi ngobe nje ulihlahlandlela kodvwa ngenca yekutsi uyindvodzakati yami futsi utinikele kimi. Ngifuna ukujabulele kuphila njengobe unguFakazi wami!” Kuloko lokwake kwenteka kuwe, Somandla ukhombise njani kutsi “kuhlakanipha kwakhe akunakulunganiswa”?

9, 10. Yini Jehova lacale asinikete yona nangabe asisita? Niketa sibonelo.

⁹ Ngalesinye sikhatsi ungase udzinge tintfo letitsite kute uchubeke uphila. Kungenteka ukhatsateke ngekutsi ngeke ube nako kudla lokwanele. Nanobe kunjalo, nguJehova lowadala lomjikeleto wemvelo lowenta kutsi kube nekudla, wondla ngisho nemazini emahhwabayi! (Fundza Tihlabelelo 147:8, 9.) Nangabe Jehova achubeka nekondla emahhwabayi, kufanele wetsembe kutsi nawe utakunika loko lokudzingako.​—Hla. 37:25.

¹⁰ Lokubaluleke nakakhulu kutsi Jehova usiniketa imfundvo letasisita kutsi sihlale sinebuhlobo lobuhle naye, lephindze isisite sitfole “kuthula kwaNkulunkulu lokwendlula konkhe kucondza.” (Fil. 4:6, 7) Asewucabange ngaMutsuo nemkakhe, lababona indlela Jehova labanakekela ngayo ngemuva kwe-tsunami lebeyiseJapan nga-2011. Kute basindze kule-tsunami bagibela eluphahleni lwendlu yabo. Nobe kunjalo, ngalelolanga balahlekelwa ngiko konkhe lebebanako. Bacitsa busuku bonkhe bahleti ebumnyameni ekamelweni labo lelisetulu futsi kubandza. Ekuseni bafuna lokutsite lokungacinisa kukholwa kwabo. Batfola incwadzi letsi INcwadi Yonyaka YoFakazi BakaJehova ya-2006 (letfolakala ngesiZulu.) Bavele bakhangwa sihloko lesitsi “Ama-tsunami Abulala Ngendlela Engakaze Ibonwe.” Lesihloko besimayelana nekutamatama kwemhlaba lokwenteka eSumatra nga-2004 lokwabangela ema-tsunami lebekanemandla kakhulu emlandvweni. Mutsuo kanye nemkakhe bakhala njengobe bebafundza lencwadzi. Babona kutsi Nkulunkulu uyabatsandza futsi uyabakhatsalela ngobe wabaniketa loko bebakudzinga kute babeketelele leso simo. Jehova wabaniketa netintfo lebebatidzinga kute bachubeke baphila. Bazalwane babapha tintfo lebetitabasita ngaleso sikhatsi. Bameleli benhlangano yaNkulunkulu labavakashela libandla lebebakulo ngibo lababacinisa kakhulu. Mutsuo utsi: “Ngeva shengatsi Jehova bekaseceleni kwetfu futsi asinakekela. Loku kwasidvudvuta kakhulu!” Nkulunkulu ucale asinikete imfundvo letasisita kutsi sihlale sinebuhlobo lobuhle naye, bese sewusiniketa tintfo lesitidzingako kute sichubeke siphila.

11. Yini lokufanele yentiwe ngulabo labafuna kukhululwa nguNkulunkulu?

¹¹ Jehova uhlale akulungele ‘kuphakamisa labatfobekile.’ (Hla. 147:6a) Kute Jehova asisite, yini tsine lokufanele siyente? Kufanele sibe nebuhlobo lobuhle naye. Kute sibe nebuhlobo lobuhle naye, kufanele sitfobeke. (Zef. 2:3) Bantfu labatfobekile bamela Jehova kutsi alungise nobe ngubuphi bubi futsi acedze nobe nguluphi lusizi lababhekene nalo. Bantfu labanjalo Jehova uvele amamatseke nakababona.

12, 13. (a) Yini lokufanele siyigweme kute sitfole lusito lwaNkulunkulu? (b) Bobani Jehova lekabajabulelako?

 ¹² Ngakulolunye luhlangotsi, Nkulunkulu bantfu “lababi ubehlisela phansi.” (Hla. 147:6b) Lawa ngemavi lanemandla kakhulu! Nangabe sifuna kuzuza elutsandvweni lwaJehova siphindze sibalekele nelulaka lwakhe, kufanele sitondze loko lakutondzako. (Hla. 97:10) Sibonelo saloku kutsi kufanele sitondze kutiphatsa lokubi kwelicansi. Loku kusho kutsi kufanele sigweme nobe ngabe yini lengasibangela kutsi sente lomkhuba lomubi, lokufaka ekhatsi kubuka titfombe letivusa inkhanuko. (Hla. 119:37; Mat. 5:28) Loku kungadzinga kutsi silwe kamatima, kodvwa kute sitfole tibusiso taJehova kufanele sente imetamo.

¹³ Kute sikhone kuncoba lemphi kufanele singatetsembi tsine kodvwa setsembele kuJehova. Angajabula yini Jehova nasingatsembela emandleni “emahhashi emphi,” lapho bantfu labanyenti bafuna lusito khona? Cha! Ngeke size setsembele ngisho nasemasotjeni “lahlomile lahamba ngetinyawo,” kube shengatsi singakhona kutisindzisa nobe sisindziswe ngulabanye. (Hla. 147:10) Kunaloko, kufanele siye kuJehova, simcele kutsi asisite. Ngekungafani nebeluleki lababantfu, Jehova akadzinwa kulalela ticelo tetfu ngisho nobe simcela tikhatsi letinyenti. LiBhayibheli litsi: “Simakadze ujatjuliswa ngulabamesabako nalabetsemba umusa wakhe.” (Hla. 147:11) Singetsemba kutsi ngelutsandvo lwakhe utasisekela kute asisite sikhone kuncoba tifiso letimbi.

14. Yini leyacinisekisa umhlabeleli?

¹⁴ Jehova usiniketa sizatfu lesingasicinisekisa kutsi utabasita bantfu bakhe nangabe badzinga lusito. Nakacabanga ngekuvusetelwa kweliJerusalema, umhlabeleli wahlabelela ngaJehova watsi: “Ngobe nguye locinisa imivalo yemasango akho, abusise bantfu bakho, ente iminyele yakho ibe nekuthula.” (Hla. 147:13, 14) Kwamcinisekisa kakhulu umhlabeleli kwati kutsi Nkulunkulu bekatawucinisa imivalo yemasango yalelidolobha kute nje avikele tikhonti takhe!

15-17. (a) Ngalesinye sikhatsi singativa njani ngetinkinga lesibhekene nato, kodvwa Jehova ulisebentisa njani liVi lakhe kute asisite? (b) Niketa sibonelo sendlela liVi laNkulunkulu lelisiniketa ngayo sicondziso ngekushesha.

¹⁵ Kungenteka ubhekane nebumatima lobukwenta kutsi ukhatsateke. Jehova utakuniketa emandla ekubeketelela leso simo. Umhlabeleli watsi ngaNkulunkulu: “Ukhipha umyalo wakhe uye emhlabeni, livi lakhe ligijima ngalamakhulu ematubane.” Ngemuva kwekutsi atse Jehova ‘ukhitsikisa lichwa njengeboya betimvu, asakate sitfwatfwa njengemlotsa, ehlise sangcotfo sakhe njengetinhlavu,’ umhlabeleli wabuta watsi: “Ngubani nje longemelana nemakhata akhe?” Waphindze watsi Jehova “utfumela livi lakhe likuncibilikise.” (Hla. 147:15-18) Nkulunkulu wetfu lohlakaniphile, lonemandla, nalolawula sangcotfo nesitfwatfwa, angakusita uncobe nobe ngabe ngubuphi bumatima longabhekana nabo.

¹⁶ Lamuhla Jehova usicondzisa ngeliVi lakhe liBhayibheli. “Livi lakhe ligijima ngalamakhulu ematubane” ngemcondvo wekutsi uhlale akulungele kusiniketa sicondziso lesingasisita sicinise kukholwa kwetfu. Asewucabange nje kutsi kukusite njani kufundza liBhayibheli, kufundza tincwadzi letilungiselelwe “sisebenti lesetsembekile nalesihlakaniphile,” kubukela i-JW Broadcasting, kungena ku-jw.org, kukhuluma nalabadzala belibandla, kanye nekutihlanganisa nalamanye emaKhristu. (Mat. 24:45) Ubonile yini kutsi Jehova usheshe wakuniketa sicondziso?

¹⁷ Simone wabona kutsi liVi laNkulunkulu linemandla kangakanani. Bekatibukela phansi, kangangekutsi besekangabata kutsi  yena unguloluhlobo lwemuntfu lolwemukelwa nguNkulunkulu. Nanobe kunjalo, nakativa advumatekile bekathantaza, acele Jehova kutsi amsite. Bekaphindze akukhutsalele kutifundzela liBhayibheli. Utsi: “Ngaso sonkhe sikhatsi ngihlale ngiva kutsi Jehova uyangicinisa futsi uyangicondzisa.” Loku kumsitile kutsi abe nesimo sengcondvo lesikahle.

18. Yini lekwenta uciniseke kutsi Nkulunkulu uyakutsandza futsi ngutiphi tizatfu lonato tekumemeta utsi: ‘Dvumisani Jehova’?

¹⁸ Umhlabeleli bekati kutsi Nkulunkulu ubatsandza kangakanani bantfu bakhe basendvulo. Bekungibo kuphela bantfu Nkulunkulu lebekabaniketa “livi” lakhe, “timiso nemiyalo yakhe.” (Fundza Tihlabelelo 147:19, 20.) Lamuhla sibusisekile ngobe sikuphela kwebantfu lababitwa ngelibito laNkulunkulu. Kwati Jehova nekusebentisa loko lesikufundza eVini lakhe kusisitile kutsi sibe nebuhlobo lobuhle naye. Njengembhali weTihlabelelo 147, unato yini tizatfu letingakwenta umemete utsi: ‘Dvumisani Jehova’ futsi ukhutsate nalabanye kutsi nabo bente lokufanako?