BANTFU labanyenti bayayati indzaba yaJesu yekutsi walengiswa elugodvweni emkhatsini wetigebengu letimbili. (Mat. 27:35-38) Nanobe kunjalo, labanye bantfu abaletsembi liBhayibheli nalitsi sidvumbu saJesu salungiselelwa kungcwatjwa sase sifakwa ethuneni.—Mak. 15:42-46.

Labanye labaphikisa loko lokushiwo ngemaVangeli bayangabata kutsi umuntfu lobulewe ngalendlela angagcwatjwa kahle, njengekungcwatjwa ethuneni. Kunaloko, bacabanga kutsi tigebengu letibulewe ngalendlela betiphatfwa ngendlela leyehlukile. Lenye intsatseli lokutsiwa ngu-Ariel Sabar, yabhala kumagazini lokutsiwa yi-Smithsonian, ichaza ngalokwenta labanye bacabange ngalendlela, yatsi: “Bantfu lababi kakhulu emmangweni lebebabulawelwa elugodvweni, futsi letinye tati titsi akunangcondvo kucabanga kutsi emaRoma bewangavuma kutsi bangcwatjwe ngendlela lehloniphekile.” EmaRoma bekafuna letigebengu tihlazeke kakhulu, ngako tidvumbu tato betingashiywa elugodvweni kuze tidliwe tilwane tesiganga. Lokusele bekungabese kujikwa emathuneni.

Nanobe kunjalo, bavubukuli batfole lokunye lokwehlukile kulamanye emaJuda labulawa. Nga-1968, kwatfolakala ematsambo endvodza leyabulawa ngesikhatsi Jesu aselamhlabeni. Atfolakala ethuneni lemndeni wemaJuda, eceleni kwaseJerusalema. Lamatsambo atfolakala ebhokisini lelihlala ematsambo. Emkhatsini walamatsambo bekunelitsambo lesitsendze. Besibetselwe elugodvweni ngesipikili lesingemasentimitha langu-11.5. Sabar utsi: “Lesitsendze salenye indvodza lokutsiwa nguYehochanan, futsi saniketa bufakazi bekutsi indzaba lesemaVangelini yekungcwatjwa kwaJesu kungenteka iliciniso. Lesitsendze saYehochanan sisiniketa bufakazi bekutsi kunendvodza leyabulawa ngemalanga aJesu leyavunyelwa ngemaRoma kutsi ingcwatjwe ngendlela yemaJuda.”

Kunemibono lengafani mayelana nendlela Jesu lalengiswa ngayo elugodvweni nakubukwa lelitsambo lesitsendze laYehochanan. Kodvwa kuyacaca kutsi letinye tigebengu letabulawa, tangcwatjwa kahle, atizange tilahlwe emathuneni. Kusebaleni kutsi kuliciniso loko lokushiwo liBhayibheli nalitsi sidvumbu saJesu sangcwatjwa ethuneni lelikahle. Lobufakazi buvumelana naloko lokushiwo liBhayibheli.

Ngetulu kwaloko, Jehova washo kutsi Jesu bekatawungcwatjwa ethuneni lemuntfu lonjingile, futsi kute longavimba livi laNkulunkulu kutsi ligcwaliseke.—Isa. 53:9; 55:11.