SIHLOKO LESIFUNDVWAKO 40
INGOMA 30 Jehova UnguBabe Wami NeMngani Wami
Jehova “Uyabelapha Labephukile Enhlitiyweni”
“Uyabelapha labephukile enhlitiyweni; abophe nemanceba abo.”—HLA. 147:3.
LOKUTAWUCOCWA NGAKO
Jehova unendzaba mbamba nalabo labephukile emoyeni. Lesihloko sitawukhombisa kutsi usisita njani nasiva buhlungu nekutsi usisita njani kuze sikhone kudvudvuta labanye.
1. Jehova utiva njani ngebantfu bakhe?
YINI Jehova layibonako nakabuka bantfu bakhe emhlabeni? Ubona injabulo yetfu nelusizi lwetfu. (Hla. 37:18) Ujabula kakhulu nakasibona senta konkhe lokusemandleni etfu kuze simkhonte ngisho nobe siva buhlungu! Ngetulu kwaloko, utimisele kusisekela nekusidvudvuta.
2. Yini Jehova layentela labo labephuke enhlitiyweni, futsi yini lesingayenta nasifuna kutsi asinakekele?
2 Tihlabelelo 147:3 titsi Jehova ‘ubopha emanceba’ alabephukile enhlitiyweni. Lelivesi lisenta simbone ngeliso lengcondvo Jehova anakekela labo labalimele emoyeni. Yini lokufanele siyente nasifuna kutsi Jehova asinakekele? Cabanga nganangu umfanekiso. Dokotela lonelikhono angenta lokunyenti kuze asite umuntfu lolimele kutsi elulame. Kodvwa kuze lomuntfu asitakale kufanele atilandzele ngekucophelela ticondziso talodokotela. Kulesihloko, sitawubona kutsi yini Jehova layishoko eVini lakhe kulabo labalimele emoyeni futsi sitawucoca ngekutsi singasisebentisa njani seluleko sakhe lesinelutsandvo.
JEHOVA UYASICINISEKISA KUTSI SIBALULEKILE
3. Yini leyenta labanye babone ngatsi abasilutfo?
3 Siphila eveni lelite lutsandvo, futsi lokubuhlungu kutsi bantfu labanyenti bentiwe babona ngatsi abasilutfo. Lomunye dzadze lokutsiwa nguHelen a utsi: “Ngakhulela emndenini lote lutsandvo. Babe bekaneludlame futsi bekahlale asitjela kutsi sitintfo letingenamsebenti.” Kungenteka nawe njengaHelen, bewuphatfwa kabi futsi uhlale usolwa, nobe bakwenta wabona ngatsi awutsandzeki. Nangabe kunjalo, ungakutfola kumatima kwetsemba kutsi ukhona umuntfu lonendzaba mbamba nawe.
4. Ngekusho kweTihlabelelo 34:18, yini Jehova lasicinisekisa ngayo?
4 Ngisho nobe labanye bakuphetse kabi, ungaciniseka kutsi Jehova uyakutsandza futsi ubalulekile kuye. Jehova “usedvute nalabo labephuke tinhlitiyo.” (Fundza Tihlabelelo 34:18.) Nawutiva “uphuke emoyeni,” khumbula kutsi Jehova wabona lokuhle enhlitiyweni yakho futsi yena wakudvonsela kuye. (Joh. 6:44) Uhlale akulungele kukusita ngobe uligugu kuye.
5. Yini lesingayifundza endleleni Jesu lebekaphatsa ngayo labo bebabukelwa phansi?
5 Singafundza ngendlela Jehova lativa ngayo ngekutsi sifundze ngesibonelo saJesu. Ngesikhatsi Jesu ashumayela lamhlabeni, bekabanaka labo bebabukelwa phansi ngulabanye futsi bekabaphatsa ngemusa. (Mat. 9:9-12) Ngesikhatsi lomunye umfati lobekanelitsemba lekwelapheka ekuguleni lokumatima atsintsa tembatfo taJesu, wamdvudvuta futsi wamncoma ngekukholwa kwakhe. (Mak. 5:25-34) Jesu wabuveta kahle kakhulu buntfu baBabe wakhe. (Joh. 14:9) Ngako ungaciniseka kutsi kuJehova ubalulekile nekutsi uyabunaka buntfu bakho lobuhle, lokufaka ekhatsi kukholwa kwakho nekutsi uyamtsandza.
6. Yini umuntfu langayenta nakafikelwa yimicabango yekutsi akasilutfo?
6 Yini longayenta nayingapheli emandla imicabango yekutsi awusilutfo? Fundza emavesi lakucinisekisako kutsi ubalulekile kuJehova futsi ucabangisise ngawo. b (Hla. 94:19) Nangabe wehluleka kufinyelela umgomo lotsite nobe udvumala ngenca yekutsi awukhoni kwenta lokunyenti njengalabanye, ungacabangi kutsi usehluleki. Jehova akalindzeli kutsi wente lokungetulu kwemandla akho. (Hla. 103:13, 14) Nangabe wake wahlukunyetwa, ungatisoli ngaloko lokwentiwa ngulona lowakuhlukubeta. Bekungakafaneli uphatfwe ngaleyondlela! Khumbula kutsi kuJehova labanelicala ngulaba labahlukubeta labanye, hhayi laba labahlukunyetwako. (1 Phet. 3:12) Sandra, lowahlukunyetwa nakasemncane utsi: “Ngihlale ngicela Jehova kutsi angisite ngitibone ngendlela lekahle, ngitibuke ngendlela yena langibuka ngayo.”
7. Singakusebentisa njani loko lokwenteke ekuphileni kwetfu kuze sisite labanye?
7 Ciniseka kutsi Jehova angakusebentisa kuze usite labanye. Ukuvumele kutsi usebente kanye naye emsebentini wekushumayela. (1 Khor. 3:9) Loko lokwentekile ekuphileni kwakho kungenteka kukwente wabavela labanye futsi kwakwenta wayicondza indlela lokungenteka bativa ngayo. Ungenta lokunyenti kuze ubasite. Helen lesike sakhuluma ngaye walutfola lusito, futsi nyalo uyakhona kusita labanye. Utsi: “Bengivame kutiva ngingasilutfo. Kepha Jehova wangenta ngativa ngitsandvwa futsi wangisebentisa kuze ngisite labanye.” Helen ujabulile njengobe alihlahlandlela lelivamile.
JEHOVA UFUNA SIBONE KUTSI USICOLELE
8. Ngumaphi emavi lasicinisekisako laku-Isaya 1:18?
8 Labanye bantfu baJehova tibakhatsata kakhulu tono labatenta esikhatsini lesendlulile, kungaba ngulabatenta ngaphambi kwekutsi babhajatiswe nobe ngemuva kwekubhajatiswa. Kodvwa kufanele sikhumbule kutsi Jehova wasiniketa inhlawulo ngenca yekutsi usitsandza kakhulu. Siyaciniseka kutsi ufuna sisemukele lesipho. Uyasicinisekisa kutsi ngemuva ‘kwekulungisa tindzaba’ c emkhatsini wetfu naye, ubese uyasicolela tono tetfu. (Fundza Isaya 1:18.) Sibonga kakhulu ngekutsi Babe wetfu lositsandzako Jehova uyasicolela tono lesatenta esikhatsini lesendlulile! Ngesikhatsi lesifanako akatikhohlwa tintfo letinhle lesitentile.—Hla. 103:9, 12; Heb. 6:10.
9. Kubaluleke ngani kutsi singachubeki sicabanga ngetono lesatenta esikhatsini lesendlulile?
9 Nangabe ukhatsatwa tintfo lowatenta esikhatsini lesendlulile, yenta konkhe longakwenta kuze ucabange ngaloko lokwentako nyalo nangaloko lotawukwenta esikhatsini lesitako. Cabanga ngesibonelo semphostoli Pawula. Bekatisola ngekutsi wake wawaphatsa kabi kakhulu emaKhristu kodvwa bekati kutsi Jehova umcolele. (1 Thim. 1:12-15) Bekahlale acabanga yini ngetono takhe tasesikhatsini lesendlulile? Siyaciniseka kutsi bekangacabangi ngato, njengobe bekangacabangi nangetintfo latifeza ngesikhatsi angumJuda loshisekako. (Fil. 3:4-8, 13-15) Kunaloko, Pawula wachubeka enta konkhe lokusemandleni akhe emsebentini wekushumayela futsi wabuka phambili esikhatsini lesitako. NjengaPawula, nawe angeke ukushintje lokwentekile esikhatsini lesendlulile. Kodvwa ungamdvumisa Jehova futsi umjabulise nyalo, ngetulu kwaloko, ungacabanga ngesikhatsi lesijabulisako lasetsembise sona.
10. Yini lesingayenta nangabe tintfo lesatenta esikhatsini lesendlulile tabavisa buhlungu labanye?
10 Kungenteka ukhatsatwa tintfo lowatenta esikhatsini lesendlulile letabavisa buhlungu labanye. Yini lengakusita? Yenta loko lokusemandleni akho kuze ulungise lomonakalo, lokufaka ekhatsi kucolisa ngalokusuka enhlitiyweni. (2 Khor. 7:11) Cela Jehova abasite labo lowabavisa buhlungu ngaloko lowakwenta. Angasita wena kanye nalabo lowabavisa buhlungu kutsi nicinisele futsi niphindze nibe nekuthula.
11. Yini lesingayifundza esibonelweni semphrofethi Jona? (Buka sitfombe lekucala.)
11 Fundza emaphutseni lowawenta futsi utimisele kuvumela Jehova kutsi akusebentise nganobe nguyiphi indlela. Cabanga ngesibonelo semphrofethi Jona. Kunekutsi aye eNineve njengobe Nkulunkulu bekamtjelile, Jona wabaleka waya endzaweni lekhashane kakhulu. Jehova wamjezisa futsi Jona wafundza kuleliphutsa lakhe. (Jona 1:1-4, 15-17; 2:7-10) Jehova akazange amlahle Jona. Kunaloko wamniketa lelinye litfuba lekutsi aye eNineve, futsi kuloku Jona walalela ngekushesha. Akazange avumele kutisola ngeliphutsa lebekalentile kumvimbe kutsi emukele lesabelo lesivela kuJehova.—Jona 3:1-3.
Ngemuva kwekutsi umphrofethi Jona asindze esiswini senhlanti, Jehova waphindze wamtjela kutsi akaye eNineve ayomemetela umlayeto wakhe (Buka sigaba 11)
JEHOVA UYASIDVUDVUTA ASEBENTISA UMOYA LONGCWELE
12. Jehova usinika njani kuthula nasibhekene netimo letisetfusako nobe nasilahlekelwa ngulotsite? (KubaseFiliphi 4:6, 7)
12 Asebentisa umoya wakhe longcwele, Jehova uyasidvudvuta nasehlelwa timo letetfusako nobe nasilahlekelwa ngulotsite. Cabanga ngalokwenteka kuRon naCarol. Indvodzana yabo yatibulala. Batsi: “Sike sabhekana netimo letimatima esikhatsini lesendlulile, kodvwa lesi sitendlula tonkhe. Emalangeni lamanyenti besiphelelwa butfongo ebusuku futsi besithantaza, besikuva mbamba kuthula lokuchazwe KubaseFiliphi 4:6, 7.” (Fundza.) Nangabe ubhekene nesimo lesikwephula inhlitiyo, kungaya ngawe kutsi ufuna kutfulula sifuba sakho kuJehova ngemthantazo tikhatsi letingakanani nobe sikhatsi lesidze kangakanani. (Hla. 86:3; 88:1) Cela umoya wakhe longcwele ngalokuphindzaphindziwe. Jehova utawuhlale akusita.—Luk. 11:9-13.
13. Umoya longcwele ungasisita njani kutsi sichubeke sikhonta Jehova ngekwetsembeka? (Kubase-Efesu 3:16)
13 Ukile yini wabhekana nesimo lesimatima lesikushiye ute emandla? Umoya longcwele ungakusita ukuphe emandla ekuchubeka ukhonta Jehova ngekwetsembeka. (Fundza Kubase-Efesu 3:16.) Cabanga ngalokwenteka kulomunye dzadze lokutsiwa nguFlora. Yena nendvodza yakhe bebatitfunywa telivangeli ngesikhatsi umyeni wakhe angetsembeki kuye futsi badivosa. Utsi: “Ngeva buhlungu lobukhulu ngenca yekutsi bekangaketsembeki kimi futsi kute lokunye lebengikhona kukucabanga. Ngathantaza kuJehova ngicela umoya wakhe longcwele kuze ungisite ngicinisele. Jehova wanginika loko bengikudzinga kuze ngiphole futsi ngibeketelele simo lebesibonakala ngatsi angeke ngikhone kusibeketelela ekucaleni.” Flora wabona kutsi Nkulunkulu umsitile kutsi ametsembe kakhulu futsi uyaciniseka kutsi utamsita kuto tonkhe tinkinga takhe. Uchubeka utsi: “Emavi lakuTihlabelelo 119:32 achaza indlela Jehova langisita ngayo, lelivesi litsi: ‘Ngitayilalela ngekutimisela imitsetfo yakho, ngobe wena wenta kutsi ngiyicondze kancono.’”
14. Yini lesingayenta kuze sivumele umoya waNkulunkulu usebente kitsi?
14 Yini longayenta ngemuva kwekucela umoya longcwele? Yenta tintfo letitawenta kutsi umoya waNkulunkulu usebente kuwe. Loku kufaka ekhatsi kuya emihlanganweni nekushumayela. Gcwalisa ingcondvo yakho ngemicabango yaJehova ngekutsi ufundze liVi lakhe onkhe malanga. (Fil. 4:8, 9) Njengobe ulifundza, naka bantfu lokukhulunywa ngabo eBhayibhelini lebebanetinkinga futsi ucabangisise ngendlela Jehova labasita ngayo kutsi bacinisele. Sandra lesike sakhuluma ngaye wabhekana netimo letimatima ngekulandzelana. Utsi: “Indzaba yaJosefa ingitsintsa kakhulu. Akazange avumele tinkinga kanye nekuphatfwa kabi kutsi kulimate buhlobo bakhe naJehova.”—Gen. 39:21-23.
JEHOVA UYASIDVUDVUTA ASEBENTISA BANAKETFU NABODZADZE
15. Singayitfola kubobani indvudvuto, futsi bangasisita njani? (Buka nesitfombe.)
15 Nasibhekene nesimo lesimatima, banaketfu nabodzadze ‘bangasidvudvuta kakhulu.’ (Khol. 4:11) Jehova usebentisa bona kuze akhombise kutsi uyasitsandza. Bangasidvudvuta ngekutsi bacitse sikhatsi natsi futsi basilalele njengobe siveta indlela lesitiva ngayo. Bangaphindze basikhutsate basebentisa livesi leliseBhayibhelini nobe bathantaze kanye natsi. d (Rom. 15:4) Ngaletinye tikhatsi, umzalwane nobe dzadze angasikhumbuta indlela Jehova lacabanga ngayo futsi ngaleyondlela asisite sitive sesincono. Banaketfu nabodzadze bangaphindze basisite nangaletinye tindlela, njengekusiletsela kudla lokuphekiwe nasicindzetelekile.
Bangani labetsembekile futsi labavutsiwe bangakudvudvuta kakhulu futsi bakusekele (Buka sigaba 15)
16. Yini lokufanele uyente kuze labanye bakusite?
16 Kuze labanye basisite, kungahle kudzingeke kutsi sicele lusito. Banaketfu nabodzadze bayasitsandza futsi bayafuna kusisita. (Taga 17:17) Kodvwa kungenteka abati kutsi sitiva njani nobe kutsi yini lesiyidzingako. (Taga 14:10) Nangabe wephukile emoyeni, tjela bangani bakho labavutsiwe ngendlela lotiva ngayo. Batjele kutsi yini lengakusita. Ungakhetsa kubhobokela lomdzala welibandla munye nobe lababili lokutfola kumelula kukhuluma nabo. Labanye bodzadze kuyabadvudvuta kukhuluma nalomunye dzadze lovutsiwe.
17. Ngutiphi letinye tintfo letingasivimbela kutsi sitfole sikhutsato, futsi yini lesingayenta kuze sitincobe?
17 Lwisana nekufuna kuba wedvwa. Ngenca yekutsi uva buhlungu, kungenteka ungakufuni kuba nalabanye bantfu. Ngaletinye tikhatsi bazalwane bakho nabodzadze bangahle bangakucondzisisi kahle nobe bangakhoni kukhetsa kahle emagama. (Jak. 3:2) Ungativumeli tintfo letinjalo tikuvimbele kutsi utfole sikhutsato losidzingako. Lomunye lomdzala welibandla lokutsiwa nguGavin, lonesifo sekucindzeteleka utsi: “Ngivame kungafuni kukhuluma nebangani bami nobe kucitsa sikhatsi nabo.” Nobe kunjalo, Gavin wenta konkhe lokusemandleni akhe kuze abe nebazalwane bakhe nabodzadze futsi uvame kutiva ancono nakenta njalo. Lomunye dzadze lokutsiwa ngu-Amy utsi: “Ngenca yetintfo letentekile ekuphileni kwami, ngikutfola kumatima kwetsemba labanye bantfu. Kodvwa ngiyetama kutsandza bazalwane bami nabodzadze nekubetsemba njengobe Jehova enta. Ngiyati kutsi loko kuyamjabulisa, futsi kuyangijabulisa nami.”
TINGASIDVUDVUTA TETSEMBISO TAJEHOVA NGELIKUSASA
18. Yini lesingabuka phambili kuyo esikhatsini lesitako, futsi yini lesingayenta nyalo?
18 Singalibuka ngesibindzi likusasa, sibe sati kutsi ngekushesha Jehova utabucedza ngalokuphelele bonkhe buhlungu lesibuvako emtimbeni nasemoyeni. (Semb. 21:3, 4) Ngaleso sikhatsi, tintfo letibuhlungu lesibhekene nato ‘angeke tisasivisa buhlungu.’ (Isa. 65:17) Njengobe sesibonile, Jehova ‘ubopha emanceba etfu’ ngisho nanyalo. Usinikete tintfo letinyenti kuze tisidvudvute futsi tisisite, ngako lwemukele lusito lwakhe. Ungacali ungabate kutsi ‘uyakukhatsalela.’—1 Phet. 5:7.
INGOMA 7 Jehova Ungemandla Etfu
a Lamanye emagama ashintjiwe.
b Buka libhokisi lelitsi “ Ubalulekile KuJehova.”
c Kuze ‘silungise tindzaba’ emkhatsini wetfu naJehova, kufanele sikhombise kutsi siphendvukile ngekutsi simcele asicolele tono tetfu futsi sishintje indlela lesenta ngayo. Nangabe sente sono lesikhulu, kufanele sicele nelusito kulabadzala belibandla lesikulo.—Jak. 5:14, 15.
d Buka imibhalo letfolakala ngephansi kwesihloko lesitsi “Kukhatsateka” nalesitsi “Indvudvuto” encwadzini letsi ImiBhalo Lecondzisa Kuphila KwemaKhristu.
