Bani Neluvelo Kuto ‘Tonkhe Tinhlobo Tebantfu’
NGESIKHATSI Jesu afundzisa baphostoli bakhe kutsi bashumayele njani, wabatjela kutsi ngaletinye tikhatsi bantfu bebangeke baze babalalelele. (Luk. 10:3, 5, 6) Kwenteka lokufanako nakitsi nasishumayela. Sihlangana nebantfu labedzelelako nalabanebudlova. Kungaba matima kutsi sibe neluvelo futsi sibashumayele nangabe banebuntfu lobunjalo.
Umuntfu loneluvelo uyatibona tidzingo talabanye kanye netinkinga tabo bese uyabavela futsi afune kubasita. Kungentekani nangabe singabaveli bantfu lesibatfola ensimini? Singaphelelwa ngumdlandla lokusho kutsi ngeke sifune kubashumayela futsi ngeke sikhone kubasita. Umdlandla lesinawo singawufananisa nemlilo. Kuze umlilo uvutse kakhulu kufanele uwukhwetele. Ngendlela lefanako, kuze sibe nemdlandla nasishumayela kufanele sibe neluvelo.—1 Thes. 5:19.
Singaba njani neluvelo ngisho nasetimeni letimatima? Ase sicoce ngetibonelo letintsatfu tebantfu lokufanele sibalingise—Jehova, Jesu kanye nemphostoli Pawula.
BANI NELUVELO NJENGAJEHOVA
Sekuphele tinkhulungwane teminyaka bantfu bakhuluma emanga lamabi ngeligama laJehova. Kodvwa Jehova “unemusa kulabo labangabongi nakulababi.” (Luk. 6:35) Kubeketela kwakhe kusikhombisa kutsi unemusa. Jehova ufisa kutsi “tonkhe tinhlobo tebantfu tisindziswe.” (1 Thim. 2:3, 4) Ngisho noma Jehova abenyanya bubi, wonkhe umuntfu ubalulekile kuye futsi akafuni kubhubhe ngisho namunye.—2 Phet. 3:9.
Jehova uyati kutsi Sathane uyakhona kwenta bantfu bakholelwe tintfo letingemanga. (2 Khor. 4:3, 4) Bantfu labanyenti bafundziswa emanga kusukela basebancane. Ngako indlela labacabanga ngayo nalabativa ngayo ingenta kube matima kutsi bemukele liciniso. Kodvwa Jehova ufuna kubasita. Sikwati njani loko?
Nasi sibonelo, cabanga ngendlela Jehova lativa ngayo ngebantfu baseNineve. Ngisho noma bebanebudlova, Jehova watsi kuJona: “Pho, mine bengingeke ngiyihawukele yini iNineve, lelidolobha lelikhulu kangaka, lapho kukhona bantfu labangakwati kwehlukanisa sandla sabo sekudla nesancele, labati-120 000, kanye netinkhomo letinyenti kangaka?” (Jona 4:11) Jehova wabavela labantfu lebebangalati liciniso ngaye. Kungako atfuma Jona kutsi abecwayise.
NjengaJehova, bantfu sibatsatsa njengalabaligugu. Singamlingisa ngekutsi sizame ngato tonkhe tindlela kuze sisite labo labangasilalela ngisho noma babonakala bangeke basilalele.
BANI NELUVELO NJENGAJESU
NjengaBabe wakhe, Jesu wabavela bantfu lebebangati lutfo ngaNkulunkulu. “Watsi nakabona sicumbi sebantfu, inhlitiyo yakhe yagcwala sihawu, ngobe bebaphetfwe kabi futsi bahlakatekile njengetimvu letite umelusi.” (Mat. 9:36) Jesu bekacondza kutsi bantfu bebakulesimo ngobe baholi babo benkholo bebabaphatsa kabi futsi babafundzisa nemanga. Ngisho noma Jesu bekati kutsi akusibo bonkhe labebamlalela labebatawuba balandzeli bakhe, “wachubeka abafundzisa tintfo letinyenti.”—Mak. 4:1-9.
Ungaphelelwa ngemandla nangabe umuntfu angakulaleli ekucaleni
Nangabe timo tebantfu tishintja, bangenta ngendlela leyehlukile nasibashumayela
Nangabe bantfu bangawemukeli umlayeto wetfu weMbuso, kufanele setame kucondza kutsi bentiwa yini. Kungenteka banembono lokabi ngeliBhayibheli noma ngemaKhristu. Kungenteka nekutsi babona bantfu labatibita ngekutsi bangemaKhristu benta tintfo letimbi. Labanye kungenteka batjelwe emanga ngetintfo lesitikholelwako. Kantsi futsi labanye besaba kutsi tihlobo tabo kanye nalabanye emmangweni bangahlekisa ngabo nangabe basikhulumisa.
Labanye bantfu lesibatfola ensimini abawulaleli umlayeto wetfu ngenca yetimo letibuhlungu letenteka ekuphileni kwabo. Kim lositfunywa selivangeli utsi: “Bantfu labanyenti labasensimini yetfu basindze emphini, futsi balahlekelwa ngiko konkhe labanako. Bete litsemba lelihle ngelikusasa. Bayesaba futsi abetsembi muntfu. Kulendzawo, sivame kutfola bantfu labasiphikisako. Ngalelinye lilanga ngahlaselwa nangishumayela.”
Yini lesita Kim kutsi abavele bantfu ngisho noma bamphatsa kabi? Utsi: “Nangabe bantfu bangiphatsa kabi, ngetama kukhumbula umbhalo weTaga 19:11 lotsi: ‘Umuntfu lonekucondza uyakubamba kutfukutsela kwakhe.’ Kukhumbula lokwenteka kubantfu lesibashumayelako kuyangisita kutsi ngibavele. Bakhona bantfu labawemukelako umlayeto wetfu. Kulendzawo kunebantfu labakahle lengibuyela kubo.”
Singatibuta kutsi: ‘Kube bengisesimeni sebantfu lengibashumayelako, bengitawemukela yini umlayeto weMbuso?’ Nasi sibonelo, ase sitsi besitjelwe emanga ngaBoFakazi BaJehova. Kungenteka natsi besingeke sibalalele BoFakazi futsi bekutawudzingeka kutsi basivele. Kukhumbula umlayeto waJehova wekuphatsa bantfu ngendlela lebesingatsandza kuphatfwa ngayo kutasikhutsata kutsi sibavele labanye ngisho noma kumatima kwenta njalo.—Mat. 7:12.
BANI NELUVELO NJENGAPAWULA
Umphostoli Pawula bekabavela labanye ngisho noma bebamhlukumeta futsi bamphikisa. Kungani? Kungobe bekakhumbula loko labekwenta esikhatsini lesendlulile. Watsi: “Ekucaleni ngangihlambalata, ngihlupha labanye futsi ngedzelela. Kodvwa ngaboniswa umusa ngobe bengenta ngekungati nangekweswela kukholwa.” (1 Thim. 1:13) Wabona kutsi Jehova naJesu bebamkhombise umusa lomkhulu. Bekacondza kutsi kungani bantfu bamvimba kutsi ashumayele ngobe naye bekenta njalo esikhatsini lesendlulile.
Ngaletinye tikhatsi, Pawula bekahlangana nebantfu lebebatikholelwa ngalokucinile timfundziso letingemanga. Bekumphatsa njani loko? Imisebenti 17:16 itsi: ‘Ngesikhatsi Pawula ase-Athene wacansuka nakabona kutsi kwakugcwele tithico kulelidolobha.’ Noma kunjalo, Pawula wasebentisa loko lebekumcansula kuze akhone kubafundzisa. (Imis. 17:22, 23) Washintja indlela labeshumayela ngayo kuze ivumelane netinhlobo tebantfu letehlukahlukene kuze ‘tisindziswe.’—1 Khor. 9:20-23.
Nasishumayela bantfu labangasilaleli noma labakholelwa tintfo letingemanga, singalingisa sibonelo saPawula ngekutsi sisebentise loko labakwatiko kuze sibafundzise “tindzaba letimnandzi.” (Isa. 52:7) Dzadze lobitwa ngekutsi nguDorothy utsi: “Ensimini yetfu bantfu bafundziswa kutsi Nkulunkulu unelunya futsi umane ehlulele bantfu. Ngiyabancoma bantfu labanjalo ngenca yekutsi bayakholelwa kuNkulunkulu bese ngibafundzisa lokushiwo liBhayibheli ngebuntfu lobuhle baJehova kanye naloko lasetsembisa kona ngelikusasa.”
“NCOBA LOKUBI NGALOKUHLE”
Njengoba siphila “emalangeni ekugcina,” singalindzela kutsi bantfu lesibashumayelako “batawudlanga ngebubi.” (2 Thim. 3:1, 13) Kodvwa akukafaneli sivumele loko kusente singasabaveli labanye noma siphelelwe yinjabulo. Jehova angasiniketa emandla ‘ekuncoba lokubi ngalokuhle.’ (Rom. 12:21) Jessica lolihlahlandlela utsi: “Ngivame kuhlangana nebantfu labangakatfobeki nalabasibukela phasi. Loko kungasivisa buhlungu. Nangicoca nemuntfu ngiyathantaza ngicele Jehova angisite ngikhone kubona lomuntfu lengicoca naye ngendlela yena lambona ngayo. Loku kuyangisita kutsi nginganaki indlela lengitiva ngayo, kodvwa ngicabange ngendlela lengingamsita ngayo.”
Siyachubeka sifuna bantfu labatimisele kutfola kuphila lokuphakadze
Ngekuhamba kwesikhatsi labanye bangavuma sibafundzise ngaNkulunkulu
Kufanele siwakhutsate emaKhristu lesihamba nawo ensimini. Jessica utsi: “Nangabe lomunye bamphetse kabi ensimini ngetama kungakhulumi ngako. Esikhundleni saloko, ngikhuluma ngetintfo letinhle letifaka ekhatsi umphumela lomuhle lesiwutfola nasishumayela ngisho noma labanye bangasilaleli.”
Jehova utati kahle tinkinga lesihlangabetana nato nasishumayela. Ujabula kakhulu nasetama kuba nemusa njengaye! (Luk. 6:36) Kuliciniso kutsi Jehova angeke abe nemusa futsi abeketelele bantfu kuze kube phakadze. Singaciniseka kutsi usati kahle sikhatsi latawubhubhisa ngaso lelive lelibi. Njengobe sisengakefiki lesikhatsi kubaluleke kakhulu kutsi sishumayele. (2 Thim. 4:2) Shengatsi singachubeka siwenta ngemdlandla umsebenti wekushumayela futsi siphatse “tonkhe tinhlobo tebantfu” ngemusa.
