1. Yini sonkhe lesiyifisako?

UTIVA njani nangabe umuntfu lomatiko nalomhloniphako akhohlwa ligama lakho, noma angasakuboni sanhlobo? Loko kungakuvisa buhlungu kakhulu. Kungani? Kungoba njengoba sibantfu siyafisa kwemukelwa ngulabanye. Ecinisweni sifuna lokungetulu nje kwekumane basati kutsi sibobani. Sifuna basati kutsi sibantfu labanjani kanye naloko lesikufezile.​—Num. 11:16; Jobe 31:6.

2, 3. Yini lengonakalisa sifiso setfu sekwemukelwa nguNkulunkulu? (Buka sitfombe lesisekucaleni kwalesihloko.)

² Njengaletinye tifiso lesinato, sifiso setfu sekutsandvwa ngulabanye singaba yingoti nangabe singakanaki. Lelive laSathane lingasenta sifune kuba bantfu labadvumile noma lababalulekile. Loko kungasenta singamhloniphi Babe wetfu losezulwini Jehova futsi singamkhonti ngendlela lefanele.​—Semb. 4:11.

 ³ Ngesikhatsi Jesu alapha emhlabeni, labanye bantfu bebanembono lokabi mayelana nekunakwa ngulabanye. Jesu wecwayisa balandzeli bakhe watsi: “Caphelani tati temtsetfo letitsandza kuhamba tigcoke tingubo letindze, naletitsandza kubingelelwa etimakethe nekuhlala etihlalweni letingembili emasinagogeni, futsi letifuna tindzawo letincono emadzilini.” Wachubeka watsi: “Ngako titawujeziswa kamatima.” (Luk. 20:46, 47) Ngalokwehlukile, ngesikhatsi umfelokati lophuyile anikela ngemali lencane kakhulu, Jesu wamncoma ngisho nome kungenteka labanye bebangakunaki loko labekwentile. (Luk. 21:1-4) Kuyacaca kutsi umbono waJesu mayelana nekwemukeleka bewehlukile emibonweni bantfu labanyenti lebebanayo. Lesihloko sitasisita kutsi sihlale sinembono lokahle Jehova lawemukelako.

4. Ngubani lokufanele silwele kwatiwa nguye, futsi kungani?

⁴ Ngubani lokufanele silwele kwatiwa nguye? Akusiko kunakwa lokutfolakala ngesizatfu sekutsi ufundzile, uyaphumelela ebhizinisini noma watiwa kakhulu kutekutijabulisa. Pawula wachaza kutsi ngubani lokufanele silwele kutsi asati nakatsi: “Njengobe senimati Nkulunkulu, nobe njengobe senatiwa nguNkulunkulu, nibuyelelani etintfweni letitsatfwa njengaletibalulekile eveni, letibutsakatsaka naletingenamsebenti, nifune kuphindze nibe tigcili tato?” (Gal. 4:9) Kulilungelo lelihle kakhulu ‘kwatiwa nguNkulunkulu’ longuMbusi wendalo yonkhe! Jehova uyasati kutsi sibobani, uyasitsandza, futsi ufuna sibe bangani bakhe. Jehova wasidala kuze sibe bangani bakhe.​—Shu. 12:13, 14.

5. Yini lesingayenta kuze Jehova asati kahle?

⁵ Nkulunkulu bekamati kahle Mosi. Ngesikhatsi Mosi acela kutati kancono tindlela taJehova, Jehova wamphendvula watsi: “Ngitakwenta loku lokushito, ngobe uzuze umusa emehlweni ami, futsi ngikwati kahle.” (Eks. 33:12-17) Natsi singatfola tibusiso letinyenti nangabe Jehova asati kahle. Yini lesingayenta kuze Jehova asati kahle? Jehova utawusati nangabe simtsandza futsi sitinikela kuye.​—Fundza 1 Khorinte 8:3.

6, 7. Yini lengasenta silahlekelwe buhlobo betfu naJehova?

⁶ Noma kunjalo, kufanele sihlale sinebuhlobo lobuhle naBabe wetfu losezulwini. NjengemaKhristu aseGalathiya Pawula lawabhalela, natsi kufanele sibalekele kwenta tintfo “letibutsakatsaka naletingenamsebenti,” letifaka ekhatsi kufuna kudvunyiswa bantfu labalelive. (Gal. 4:9) LamaKhristu angelikhulu lekucala besekatfutfukile futsi atiwa nguNkulunkulu. Noma kunjalo, Pawula watsi labazalwane baphindze ‘babuyela’ ekwenteni tintfo letingenamsebenti. Ecinisweni Pawula bekatsi kubo: “Njengobe senitfutfuke kangaka, kungani nibuyela ekwenteni tintfo letibulima naletingenamsebenti?”

⁷ Natsi singaba sesimeni lesifanako lamuhla. NjengaPawula, nasicala kwati Jehova kungenteka sayekela kufuna kwatiwa kulelive laSathane. (Fundza Filiphi 3:7, 8.) Kungenteka asizange siwasebentise ematfuba ekutfola imfundvo lephakeme, noma asizange sitemukele tikhundla letiphakeme, noma ematfuba ekwenta imali lenyenti ebhizinisini. Mhlawumbe ngabe satiwa kakhulu noma sinjingile ngenca yemakhono lesinawo kutemculo noma kutemidlalo. (Heb. 11:24-27) Kungaba bulima kutsi sitisole ngetincumo lesatenta futsi sicabange kutsi ngabe siphila kahle kube sawasebentisa lamatfuba. Kucabanga kanjalo kungasenta sibuyele ekwenteni tintfo talelive lesititsatsa  ‘njengaletibutsakatsaka naletingenamsebenti.’

8. Yini lengasenta sitimisele kwemukelwa nguNkulunkulu?

⁸ Yini lesingayenta kuze sichubeke sifuna kwatiwa nguJehova hhayi bantfu balelive? Kufanele sihlale sikhumbula nankha emaciniso lamabili labalulekile. Kwekucala, Jehova uhlale abanaka bantfu labamkhonta ngekwetsembeka. (Fundza Hebheru 6:10; 11:6) Tonkhe tinceku takhe tiligugu kuye futsi ukutsatsa ‘njengalokungakalungi’ kungatinaki tinceku takhe letetsembekile. “Jehova uyabati labo lababakhe.” (2 Thim. 2:19) “Uyayinakekela indlela yalabalungile” futsi uyakwati kubakhulula ekulingweni.​—Hla. 1:6; 2 Phet. 2:9.

9. Shano tibonelo letikhombisa kutsi Jehova uyabatsandza bantfu bakhe.

⁹ Ngaletinye tikhatsi Jehova ukhombisa ngetindlela letikhetsekile kutsi uyabemukela bantfu bakhe. (2 Khr. 20:20, 29) Nasi sibonelo, Jehova wasindzisa bantfu bakhe eLwandle Lolubovu ngesikhatsi bacoshwa nguFaro nelibutfo lakhe. (Eks. 14:21-30; Hla. 106:9-11) Loko kwabamangalisa kakhulu bantfu kangangekutsi bebasolo bakhuluma ngako ngisho noma besekuphele iminyaka lecishe ibe ngu-40. (Josh. 2:9-11) Njengobe silindzele kuhlaselwa nguGogi wakaMagogi, kuyasikhutsata kukhumbula loko Jehova lakwenta kuze akhombise kutsi unemandla futsi uyabatsandza bantfu bakhe. (Hez. 38:8-12) Ngaleso sikhatsi sitawujabula kakhulu ngekutsi sifune kwatiwa nguNkulunkulu hhayi bantfu balelive.

10. Nguliphi lelinye liciniso lokufanele sihlale silikhumbula?

¹⁰ Kufanele sihlale sikhumbula nali liciniso lesibili lelibalulekile: Jehova angasinaka ngetindlela lesingakatilindzeli. Labo labenta lokuhle ngesizatfu sekutsi bafuna kubonwa ngulabanye ngeke bawutfole umvuzo kuJehova. Kungani? Basuke sebawutfolile umvuzo wabo nangabe badvunyiswa ngulabanye. (Fundza Matewu 6:1-5.) Noma kunjalo, Jesu watsi Babe wakhe “lobona asekusitsekeni” ubabona bonkhe labenta lokuhle ngisho noma labanye bangabanaki. Uyakubona konkhe labakwentako bese ubanika umvuzo lofanele. Ngaletinye tikhatsi Jehova usinika umvuzo ngetindlela lesingakatilindzeli. Ase sicoce ngaletinye tibonelo.

11. Jehova wamnaka njani Mariya?

¹¹ Jehova wakhetsa Mariya lobekatfobekile futsi ayintfombi ntfo kutsi abe ngumake waJesu. Mariya bekahlala edolobheni lebelibitwa ngekutsi yiNazaretha, futsi belikhashane nelithempeli lelihle lebeliseJerusalema. (Fundza Lukha 1:26-33.) Kungani Jehova akhetsa Mariya? Ingilosi Gabhriyeli yamtjela kutsi “utfole umusa kuNkulunkulu.” Mariya wakhombisa kutsi unebuhlobo lobuhle naJehova ngesikhatsi akhuluma nesihlobo sakhe Elizabethe. (Luk. 1:46-55) Ngenca yekutsi Mariya beketsembekile, Jehova wamnaka futsi wamniketa lilungelo lebekangakalilindzeli.

12, 13. Jehova wamnaka njani Jesu ngesikhatsi atalwa nangesikhatsi Mariya aya naye ethempelini ngemuva kwemalanga langu-40 atelwe?

¹² Ngesikhatsi Jesu atalwa, Jehova akazange atitjele tiphatsimandla nebabusi baseJerusalema noma baseBhetlehema. Esikhundleni saloko watfumela tingilosi kutsi tiyotjela belusi lebebatfobekile lebebalusa timvu emadlelweni langephandle kweBhetlehema. (Luk. 2:8-14) Labelusi babese bavakashela  loluswane lolusandza kutalwa. (Luk. 2:15-17) Kungenteka kwabajabulisa kakhulu boMariya naJosefa kubona indlela Jehova lamnaka ngayo Jesu. Cabanga ngemehluko lokhona endleleni Jehova lenta ngayo tintfo kanye nendlela Sathane lenta ngayo. Ngesikhatsi Sathane atfumela tati tetinkhanyeti kutsi tiyovakashela Jesu nebatali bakhe, bonkhe bantfu baseJerusalema bebakhatsatekile ngekutalwa kwaJesu. (Mat. 2:3) Loko kwabangela kutsi bantfwana labanyenti labangenacala babulawe.​—Mat. 2:16.

¹³ Ngemuva kwemalanga langu-40 Jesu atelwe, kwadzingeka kutsi Mariya aletse umnikelo ethempelini leliseJerusalema lebelingemakhilomitha lacishe abe ngu-9 kusukela eBhetlehema. (Luk. 2:22-24) Njengoba Mariya ahamba naJosefa naJesu, bekatibuta kutsi baphristi bebatamnaka ngalokukhetsekile yini Jesu. Bamnaka Jesu, kodvwa abazange bamnake ngendlela Mariya lebekayilindzele. Esikhundleni saloko Jehova wasebentisa Simeyoni lobekayindvodza “lebeyilungile futsi yesaba Nkulunkulu” kanye na-Ana umphrofethikati lobekaneminyaka lengu-84 kutsi basho kutsi lomntfwana bekatawuba nguMesiya noma Khristu.​—Luk. 2:25-38.

14. Jehova wambusisa ngani Mariya?

¹⁴ Kutsiwani ngaMariya? Jehova wachubeka amnaka yini Mariya njengobe bekanakekela Jesu futsi amkhulisa ngekwetsembeka? Yebo. Nkulunkulu wavumela kutsi emavi aMariya kanye netento takhe tibhalwe eBhayibhelini. Mariya akazange akhone kuhamba naJesu kuleminyaka lemitsatfu nehhafu ashumayela. Mhlawumbe Mariya bekufanele ahlale eNazaretha ngenca yekutsi besekangumfelokati. Ngisho nome angazange atfole emalungelo lamanyenti, kodvwa waba khona ngesikhatsi Jesu asatawufa. (Joh. 19:26) Ngekuhamba kwesikhatsi Mariya bekaseJerusalema kanye nebaphostoli ngaphambi kwekutsi batfole umoya longcwele ngeliPhentekoste. (Imis. 1:13, 14) Kungenteka naye wagcotjwa ngaleso sikhatsi. Loko kungasho kutsi kungenteka waniketwa litfuba lekuba naJesu kuze kube phakadze. Asingabati kutsi loyo ngumvuzo lomuhle kakhulu Mariya lawutfola ngenca yekwetsembeka kwakhe.

15. Jehova wakhombisa njani kutsi uyayemukela iNdvodzana yakhe ngesikhatsi ilamhlabeni?

¹⁵ Jesu akazange afune kuhlonishwa baholi benkholo noma betepolitiki bangesikhatsi sakhe. Wajabula kakhulu ngesikhatsi Jehova amkhombisa kutsi uyamemukela ngekutsi akhulume naye tikhatsi letehlukene. Ngemuva nje kwekutsi Jesu abhajatiswe eMfuleni iJordane, Jehova watsi: “Lena yiNdvodzana yami letsandzekako, ngiyemukele.” (Mat. 3:17) Kubonakala ngatsi nguJesu naJohane kuphela labeva lamavi. Kusesele umnyaka kutsi Jesu afe, baphostoli bakhe labatsatfu beva Jehova akhuluma ngaJesu atsi: “Lena yiNdvodzana yami letsandzekako nalengiyemukele; yilaleleni.” (Mat. 17:5) Kwekugcina, nasekusele emalanga lambalwa kutsi Jesu afe, Jehova waphindze wakhuluma neNdvodzana yakhe asezulwini.​—Joh. 12:28.

16, 17. Jehova wakhombisa njani kutsi uyamemukela Jesu ngendlela lebekangakayilindzeli?

¹⁶ Ngisho noma Jesu bekati kutsi utawubulawa kabuhlungu futsi abitwe ngekutsi ungumhlambalati, wathantazela kutsi kwenteke intsandvo yaJehova hhayi yakhe. (Mat. 26:39, 42) “Wabeketelela kufa elugodvweni, wangalinaki lihlazo” futsi akazange  afune kwemukelwa bantfu balelive, kodvwa wafuna kwemukelwa nguBabe wakhe. (Heb. 12:2) Jehova wakhombisa njani kutsi uyayemukela iNdvodzana yakhe?

¹⁷ Ngesikhatsi Jesu alamhlabeni, wakhombisa kutsi bekafuna kuba nenkhatimulo lebekanayo ngesikhatsi anaBabe wakhe ezulwini. (Joh. 17:5) LiBhayibheli alisho kutsi Jesu bekafuna lokungetulu kwaloko. Bekangakalindzeli kutfola umvuzo lokhetsekile ngenca yekwenta intsandvo yaJehova emhlabeni. Yini Jehova layenta? Wakhombisa Jesu kutsi uyamemukela ngekutsi ente intfo Jesu labengakayilindzeli. Wamvusa futsi “wamphakamisela esikhundleni lesisetulu” waphindze wamniketa kuphila lokuphakadze ezulwini lobekungazange kutfolwe ngulomunye umuntfu. * (Fil. 2:9; 1 Thim. 6:16) Loyo ngumvuzo lomuhle kakhulu Jesu lawutfola ngenca yekwetsembeka kwakhe.

18. Yini lengasisita sibalekele kufuna kwemukelwa bantfu balelive?

¹⁸ Yini lengasisita sibalekele kufuna kwemukelwa bantfu balelive? Ngaso sonkhe sikhatsi khumbula kutsi Jehova uhlale atemukela tinceku takhe letetsembekile futsi utibusisa ngetindlela lebetingakatilindzeli. Kute lowatiko kutsi yini Jehova latasentela yona esikhatsini lesitako. Kodvwa nyalo njengobe sibeketelela bumatima kanye netilingo kulelive lelibi, kufanele sihlale sikhumbula kutsi lelive kanye netintfo talo titawendlula. (1 Joh. 2:17) Babe wetfu lositsandzako Jehova, “akasuye umuntfu longakalungi kutsi angakhohlwa umsebenti wenu nelutsandvo lenibe nalo ngelibito lakhe.” (Heb. 6:10) Utasibonisa umusa, mhlawumbe ngendlela lebesingakayicabangi.