1, 2. (a) Ngukuphi kuthula lesinako nyalo? (b) Yini lesivimbela kutsi sibe nekuthula lokuphelele nyalo? (Buka sitfombe lesisekucaleni kwalesihloko.)

SONKHE siyafuna kuphila ngekuthula singakhatsateki ngalutfo. Siyambonga Jehova ngekusipha “kuthula” kwakhe, lokungasivikela emicabangweni lesiphatamisako. (Fil. 4:6, 7) Ngenca yekutsi sitinikele kuJehova, sijabulela “kuthula naNkulunkulu” lokusho kutsi sinebuhlobo lobuhle naye.​—Rom. 5:1.

² Noma kunjalo, sisengakefiki sikhatsi sekutsi Nkulunkulu aletse kuthula lokuphelele. Kulamalanga ekugcina bantfu labanyenti bayatsandza kususa kucabana. (2 Thim. 3:1-4) Njengobe singemaKhristu, kufanele silwisane naSathane kanye netimfundziso temanga latikhutsatako. (2 Khor. 10:4, 5) Kodvwa tihlobo tetfu letingakholwa tingakuphatamisa kakhulu kuthula kwetfu. Tingahlekisa ngetinkholelo tetfu, tisisole ngekutsi sehlukanisa umndeni, noma tisisongele ngekutsi titasilahla nangabe singayekeli inkholo yetfu. Kufanele sikutsatse njani kuphikiswa ngumndeni? Ungatincoba njani tinkinga letiletfwa kuphikiswa ngumndeni?

3, 4. (a) Timfundziso taJesu tisitsintsa njani? (b) Kunini lapho kungaba matima khona kulandzela Jesu?

³ Jesu bekati kutsi timfundziso takhe betitawehlukanisa bantfu nekutsi balandzeli bakhe bekutawudzingeka babe nesibindzi kute bamlandzele ngisho noma baphikiswa. Lokuphikiswa bekutawuphatamisa kuthula kwemalunga emndeni. Jesu watsi: “Ningacabangi kutsi ngitele kutewuletsa kuthula emhlabeni; angiketeli kutewuletsa kuthula, kodvwa ngitewuletsa inkemba. Ngobe ngitele kutewuhlukanisa, indvodzana imelane neyise, indvodzakati imelane nenina, namalukatana amelane neninatala. Titsa temuntfu kuyawuba bantfu bakabo.”​—Mat. 10:34-36.

⁴ Nakatsi, “Ningacabangi kutsi ngitele kutewuletsa kuthula,” Jesu bekatsi tilaleli takhe bekufanele ticabange ngemiphumela lebuhlungu lebetitawuhlangabetana nayo ngekumlandzela. Umlayeto wakhe bewutawehlukanisa bantfu. Kuliciniso kutsi Jesu bekafuna kumemetela umlayeto waNkulunkulu loliciniso, hhayi kwehlukanisa bantfu. (Joh. 18:37) Noma kunjalo, kubambelela ngekwetsembeka etimfundzisweni taKhristu bekutawuba matima nangabe umngani noma lilunga lemndeni lingalemukeli liciniso.

5. Yini balandzeli baJesu babhekana nayo?

⁵ Jesu watsi buhlungu bekuphikiswa ngumndeni buyincenye yekuhlupheka balandzeli bakhe lokufanele batimisele kubhekana nako. (Mat. 10:38) Kuze bafanelekele kuba balandzeli baKhristu, bafundzi bekudzingeke babeketelele kuhlekwa ngisho nekubandlululwa yimindeni yabo. Noma kunjalo, kunyenti labakuzuza kunaloko lokwabalahlekela.​—Fundza Makho 10:29, 30.

6. Yini lokufanele siyikhumbule nangabe tihlobo tetfu timelene nemetamo yetfu yekukhonta Jehova?

⁶ Nanobe tihlobo tetfu tilwisana nemetamo yetfu yekukhonta Jehova, siyachubeka sititsandza, kepha kufanele sikhumbule kutsi lutsandvo lwetfu ngaNkulunkulu nangaKhristu luta kucala. (Mat. 10:37) Kufanele sati nekutsi Sathane angasebentisa indlela lesitsandza ngayo umndeni wetfu kute asente singetsembeki. Ase sicoce ngaletinye timo letingabanga kuphikiswa ngumndeni kanye nekutsi singatincoba njani tinkinga letingaba khona.

7. Loshade nemuntfu longakholwa kufanele abe namuphi umbono ngesimo lakuso?

⁷ LiBhayibheli litsi bantfu labashadako “batawuba nelusizi enyameni.” (1 Khor. 7:28) Nangabe unemlingani wemshado longakholwa ucindzeteleka kakhulu emshadweni wakho futsi ukhatsateke. Noma kunjalo, kubalulekile kutsi ubuke simo lokuso ngendlela Jehova lasibona ngayo. Kungakholwa kwemlingani wakho akusiso sizatfu lesivakalako sekuhlala ngekwehlukana noma sekudivosa. (1 Khor. 7:12-16) Ngisho noma indvodza lengakholwa ingeke ikhone kuhola etintfweni letiphatselene naNkulunkulu, kufanele ihlonishwe ngoba iyinhloko yelikhaya. Ngalokufanako, indvodza lengumKhristu kufanele ikhombise umfati wayo longakholwa lutsandvo lwekutidzela kanye nemusa ngisho noma angakholwa.​—Ef. 5:22, 23, 28, 29.

8. Ngumiphi imibuto longatibuta yona nangabe loshade naye afuna unciphise sikhatsi losicitsa ekukhonteni Jehova?

⁸ Kutsiwani nangabe loshade naye etama kukuvimba kutsi ukhonte Jehova? Nasi sibonelo, indvodza yalomunye dzadze yamtjela kutsi aye ensimini ngemalanga latsite evikini. Nangabe uhlangabetana nesimo lesifanako, tibute: ‘Umlingani wami ungipho celela kutsi ngiyekele kukhonta Nkulunkulu wami yini? Nangabe angangiphoceleli, ngingakhona yini kwenta loko lakucelako?’ Kuba nekucondza kungakusita ukhone kugwema tinkinga letingakadzingeki emshadweni.​—⁠Fil. 4:5.

9. EmaKhristu angabafundzisa njani bantfwana bawo kutsi bahloniphe umtali labangakholwa?

⁹ Kucecesha bantfwana kungaba matima kakhulu nangabe unemlingani longakholwa. Nasi sibonelo, kufanele ufundzise bantfwana bakho kulalela umyalo weliBhayibheli lotsi: “Hlonipha uyihlo nenyoko.” (Ef. 6:1-3) Kutsiwani nangabe umlingani wakho angatilandzeli timiso teliBhayibheli tekutiphatsa? Bani sibonelo ngekutsi umhloniphe. Naka kakhulu tintfo letinhle latentako futsi umncome ngato. Kugweme kukhuluma kabi ngemlingani wakho embikwebantfwana. Esikhundleni saloko, bachazele kutsi wonkhe umuntfu kufanele atikhetsele kukhonta Jehova. Kutiphatsa kahle kwebantfwana kungasita kutsi umtali longakholwa emukele liciniso.

10. Batali labangemaKhristu bangabafundzisa njani bantfwana babo emaciniso laseBhayibhelini nangabe banemlingani longakholwa?

¹⁰ Ngaletinye tikhatsi, umtali longakholwa angaphocelela bantfwana benu kutsi bagubhe imikhosi yemacaba noma bafundziswe timfundziso temanga. Lamanye emadvodza angabalela bafati babo labangemaKhristu kutsi bafundzise bantfwana babo liBhayibheli. Noma kunjalo, umfati longumKhristu wenta konkhe langakwenta kuze afundzise bantfwana bakhe emaciniso laseBhayibhelini. (Imis. 16:1; 2 Thim. 3:14, 15) Nasi sibonelo, indvodza yemfati longumKhristu ingahle imalele kutsi adadishe liBhayibheli kanye nebantfwana bakhe noma  kutsi aye nabo emihlanganweni yebuKhristu. Nanobe asihlonipha sincumo semyeni wakhe, angakhona kufundzisa bantfwana bakhe nakuvela ematfuba futsi loku kungabenta bamati Jehova kanye netimiso takhe. (Imis. 4:19, 20) Kuliciniso kutsi bantfwana bakhe kufanele batentele bona sincumo sekukhonta Nkulunkulu.​—Dut. 30:19, 20. *

11. Yini lengabanga tinkinga netihlobo takho letingasibo boFakazi?

¹¹ Ekucaleni, kungenteka asizange siyicocele imindeni yetfu kutsi sesifundza naBoFakazi BaJehova. Njengobe kukholwa kwetfu kukhula, sakubona kubalulekile kutsi sibacocele ngaloko lesikukholelwako. (Mak. 8:38) Nangabe kuba nesibindzi kubangele kutsi ube netinkinga netihlobo takho letingakholwa, cabanga nganaku longakwenta kute unciphise kungevani uphindze uhlale wetsembekile.

12. Yini lengenta tihlobo tetfu letingakholwa kutsi tisiphikise, futsi singakhombisa njani kutsi sitifaka eticatfulweni tato?

¹² Tifake eticatfulweni tetihlobo takho letingakholwa. Nanobe singajabula kakhulu ngemaciniso eliBhayibheli lesiwafundzile, tihlobo tetfu tingahle ticabange kutsi sidukisiwe noma siyincenye yenkholo lengakavami. Bangacabanga kutsi asisabatsandzi ngoba asisawagubhi emaholidi kanye nabo. Bangaphindze bakhatsateke ngenhlalakahle yetfu. Kufanele sikhombise kucondza ngekutsi setame kutifaka eticatfulweni tabo siphindze sibalalele kute sicondze loko lokubakhatsatako. (Taga 20:5) Umphostoli Pawula wetama kucondza bantfu “bato tonkhe tinhlobo” kute abacocele tindzaba letimnandzi, futsi loko natsi kungasisita.​—1 Khor. 9:19-23.

13. Kufanele sikhulume njani netihlobo tetfu letingakholwa?

¹³ Bakhulumise kahle. LiBhayibheli litsi “Ngaso sonkhe sikhatsi, emavi enu akabe nemusa.” (Khol. 4:6) Singacela Jehova kutsi asiphe umoya wakhe longcwele kuze sikhone kukhombisa titselo temoya nasikhuluma netihlobo tetfu. Akukafaneli kutsi sihlale sibaphikisa ngetintfo letingemanga labatikholelwako. Nangabe bakhuluma noma benta tintfo letisilimatako, singalingisa sibonelo sebaphostoli. Pawula wabhala kutsi: “Nasetfukwa, siyabusisa; nasiphatfwa kabi, siyabeketela; nasihlanjalatwa, siphendvula ngemusa.”​—1 Khor. 4:12, 13.

14. Tiyini tinzuzo tekutiphatsa kahle?

¹⁴ Tiphatse kahle. Nanoma kukhuluma ngemusa kusita nangabe tihlobo takho tikuphikisa, indlela lotiphatsa ngayo ibaluleke kakhulu. (Fundza 1 Phetro 3:1, 2, 16) Nangabe usibonelo lesihle, tihlobo takho titawubona kutsi BoFakazi BaJehova bayajabula emishadweni yabo, bayabanakekela bantfwana babo futsi baphila imphilo lehlantekile nalenenjongo. Nanobe tihlobo tetfu tingawemukeli emaciniso, siyajabula ngekwenta intsandvo yaJehova ngekwetsembeka.

15. Singahlela njani kusengaphambili kute sigweme timo letingasicabanisa?

¹⁵ Hlela kusengaphambili. Cabanga ngetimo letinganicabanisa kanye nekutsi ungatilungisa njani. (Taga 12:16, 23) Lomunye dzadze wase-Australia uyachaza: “Babetala wami bekamelene neliciniso. Ngaphambi kwekutsi simvakashele, mine nemyeni wami besithantaza kuJehova simcele asisite kutsi simphendvule kahle. Besilungiselela tintfo lesitococa ngato kute singacabani. Kute sigweme kucoca sikhatsi lesidze ngoba bese sigcina sesiphikisana ngetindzaba tenkholo,  besihlela kutsi sitohlala sikhatsi lesingakanani.”

16. Ungakugwema njani kutiva unelicala lekudvumata tihlobo takho?

¹⁶ Kuliciniso kutsi angeke ukhone kugwema tonkhe tintfo leningavumelani ngato netihlobo takho letingakholwa. Loko kungakwenta utive unelicala, ikakhulukati ngoba utitsandza kakhulu tihlobo takho futsi bewusolo wetama kutijabulisa. Nangabe utiva ngaleyondlela, kwetsembeka kwakho kuJehova kufanele kute kucala kunekutsandza umndeni wakho. Kwenta njalo kungasita tihlobo takho tati kutsi kusebentisa timiso teliBhayibheli kumcoka kakhulu. Khumbula kutsi angeke ubaphocelele labanye kutsi bemukele emaciniso. Kunaloko bente batibone kuwe tinzuzo tekwenta tintfo ngendlela yaJehova. Nkulunkulu wetfu lositsandzako nabo ubanika litfuba lekutikhetsela indlela labafuna kuhamba ngayo.​—Isa. 48:17, 18.

17, 18. Yini lengakusita nangabe lilunga lemndeni lishiya Jehova?

¹⁷ Sivame kuva buhlungu kakhulu nangabe lilunga lemndeni liyekeliswa kuba nguFakazi noma liyekela kutihlanganisa nelibandla. Yini lengakusita ukhone kubhekana nalolusizi?

¹⁸ Chubeka neluhlelo lwakho lwekukhonta Jehova. Tondle ngekufundza liBhayibheli njalo, ngekulungiselela imihlangano yebuKhristu futsi uye kuyo, ngekuya ensimini kanye nangekuthantaza ucele Jehova akuphe emandla kute ukhutsatele. (Juda 20, 21) Kutsiwani nangabe uva ngatsi lokwentako awukwenti ngenhlitiyo yonkhe kepha wentela kugcina licala? Ungalilahli litsemba. Luhlelo loluhle lwekukhonta Jehova lungakusita ukhone kulawula imicabango kanye nendlela lotiva ngayo. Cabanga ngalokwenteka kumbhali weTihlabelelo 73. Bekanembono loliphutsa futsi wakhatsateka kakhulu, kodvwa wakhona kulungisa indlela labecabanga ngayo nakangena endlini yaNkulunkulu. (Hla. 73:16, 17) Kukhonta Jehova ngekwetsembeka kungakusita wente lokufanako.

19. Ungakhombisa njani kutsi uyalihlonipha lilungiselelo laJehova lekusiyala?

¹⁹ Sihloniphe siyalo saJehova. Nanobe siyalo sibuhlungu, ngekuhamba kwesikhatsi siletsa imiphumela lemihle ngisho nakuloyo lowente lokubi. (Fundza Hebheru 12:11.) Nasi sibonelo, Jehova usiyala kutsi siyekele “kutihlanganisa” nebantfu labangaphendvuki. (1 Khor. 5:​11-13) Nanoma siva buhlungu kakhulu nangabe nemalunga emndeni ayekeliswa kuba BoFakazi, kufanele siyekele kuchumana nawo, kungaba ngekuwashayela lucingo, kuwatfumelela imilayeto, kuwabhalela tincwadzi, ema e-mails noma ngetinhlelo tekuchumana.

20. Nguliphi litsemba lokufanele sililondvolote?

²⁰ Hlale unelitsemba. Lutsandvo “lwetsemba tonkhe tintfo” lokufaka ekhatsi nekutsi bantfu labashiye Jehova batawuphindze babuyele kuye. (1 Khor. 13:7) Nangabe ubona bufakazi bekutsi lilunga lemndeni selishintjile, ungathantaza ucele Jehova aliphe emandla kuze likhone kulalela kuncusa kwakhe nakatsi: “Buyela kimi.”​—Isa. 44:22.

21. WYini lokufanele uyente nangabe umndeni wakho ukuphikisa ngenca yekutsi ulandzela Jesu?

²¹ Jesu watsi sitabe singamfaneli nangabe sitsandza bantfu kakhulu kunaye. Kodvwa bekaciniseka kutsi bafundzi bakhe bebatawuba nesibindzi sekuhlale betsembekile kuye noma imindeni yabo ingabaphikisa. Nangabe kulandzela Jesu kuletsa “inkemba” emndenini wakho, tsembela kuJehova kute akusite ukhone kuncoba tinkinga. (Isa. 41:​10, 13) Jabula ngekutsi Jehova naJesu bayajabula ngawe futsi batakunika umvuzo ngenca yekwetsembeka kwakho.